Jaꞌ An Libro
CANTARES
1
Jaꞌ jun spoesía naj Salomón tiꞌ,txꞌojxa swatxꞌil yoc skꞌaneal tiꞌ.
Bꞌabꞌel Tujan Bꞌit
Chi yal ix kꞌopo jaxca tiꞌ:
2 Jaach achꞌe tol camcꞌulnebꞌil wu, tzꞌubꞌel jin tiꞌ. Yutol yel xacꞌal ecꞌbꞌan ẍiꞌal ja camcꞌulal yintaj an yal uva.
3 Manxa jantajoj swatxꞌil yoc sabꞌ perfume eyoc ja win, jaꞌ yet chach bꞌinai, laan jaxca yel sabꞌ perfume chi wabꞌe. Yu jun tuꞌ, yuxan masanil ebꞌ ix kꞌopo chach camcꞌulneni.
4 Jaach waawil, iꞌ jintoj yin eymanil ja wetoj, iꞌ jintoj bꞌey ja cuarto, ẍi ix.
Chi yalon ebꞌ ánima jaxca tiꞌ:
Caw tzalacꞌulal chi cu ecꞌ ja wetoj; caw oj koche ja camcꞌulal yintaj an yal uva. Yu jun tuꞌ, yuxan caw chi camel scꞌul ebꞌ ix kꞌopo ix ja win, ẍi ebꞌ.
Chi yal ix kꞌopo jaxca tiꞌ:
5 Jex ix a Jerusalén, jain tiꞌ kꞌej wili, asan xin watxꞌ cꞌaltaꞌ wili; kꞌej wili jaxca yili an skꞌap na ebꞌ a Quedar, watxꞌ wili jaxca yili an cortina yul sna naj rey Salomón.
6 Cꞌam chex oc xacꞌal tꞌanan win, yutol kꞌej wili, yutol tzꞌaꞌnajtoj jin chiꞌbꞌeal yu yajan cꞌu. Jix tit sjowal ebꞌ naj jin no win, jix jin yaon oc ebꞌ naj yin jin teynen bꞌey awbꞌil an uva, yu jun tuꞌ, yuxan ma jin teyne jin bꞌa.
7 Jaach jin camcꞌulnebꞌil, akꞌ wotajne eloj ¿bꞌeytuꞌ chach ilwi oc meꞌ? ¿bꞌeytuꞌ cha wiꞌtoj noꞌ yet chi xew noꞌ yet chuman cꞌu? ¿Tzet yu, yuxan tucꞌal chin qꞌueyecꞌ jaxca junoj ix ix tucꞌal chi ecꞌabꞌ xol ebꞌ yet ilom meꞌal? ẍi ix.
Chi yalon ebꞌ ánima jaxca tiꞌ:
8 Jaach kꞌopo ix, ta tol man ja wotaj oj tol yel xacꞌal watxꞌ ja wili xol ebꞌ ix ix watxꞌ yili, ocan tzajan yintaj bꞌey chi too noꞌ meꞌ, jaꞌ tituꞌ cha teyne noꞌ yuneꞌ chiw, bꞌey scawilal skꞌap na ebꞌ ilom meꞌ, ẍi ebꞌ.
Chi yalon naj achꞌe jaxca tiꞌ:
9 Jaach kꞌopo ix tol camcꞌulnebꞌil jaach wu, caw sakꞌal ja wili jaxca junoj noꞌ che chi tokꞌon bꞌeytoj scarruaje naj rey Faraón.
10 Watxꞌ xacꞌal yili spacꞌul ja tiꞌ xol chꞌen ome eyoc yin ja txiquin, caw watxꞌ xacꞌal yili ja nukꞌ bꞌey eyoc chꞌen ue.
11 Oj cu waꞌne chꞌen ome ey jaach tol oro xacꞌal eloj, oj oc chꞌen plata yelawiloj, ẍi naj.
Chi yalon ix kꞌopo jaxca tiꞌ:
12 Yajbꞌan chotan ey naj waawil yin smeẍa, jaꞌ an nardo chi ecꞌ meyeyoj sabꞌ win an.
13 Jaach achꞌe tol camcꞌulnebꞌil wu, laan jaach chi wabꞌ jaxca junoj txꞌuye an mirra, tol jaꞌ bꞌey xaam jin cꞌul eyocoj.
14 Jaach jin camcꞌulnebꞌil, laan jaach jaxca junoj yuchan an alheña chi chꞌibꞌ bꞌey En-gadi, ẍi ix.
Chi yalon naj achꞌe jaxca tiꞌ:
15 Jaach jin camcꞌulnebꞌil, manxa jantajoj swatxꞌil ja wili. Laan yili sbꞌakꞌ ja sat jaxca yili noꞌ uch, ẍi naj.
Chi yalon ix kꞌopo:
16 Jaach jin camcꞌulnebꞌil, caw watxꞌ ja wili. Jaꞌ an yaax cꞌultaj oj oc cu weyubꞌoj, ẍi ix.
Chi yalon naj achꞌe:
17 Jaꞌ teꞌ kꞌuteꞌ oj oc spatzabꞌiloj cu na, jaxa teꞌ qꞌuisis oj oc spatiloj yibꞌan, ẍi naj.