3 Jaꞌ noꞌ wacax yotaj yaaw noꞌ; cꞌal noꞌ bꞌuru, yotaj noꞌ bꞌey chi akꞌle low yu yilomal. Jal pax ebꞌ jin conobꞌ Israel tiꞌ xin, junelne cꞌam chi naꞌcha el niꞌoj yu ebꞌ ta jin conobꞌ yeocoj, jaxca tol cꞌam snaꞌbꞌal ebꞌ, ẍi Dios.

4 Jex wet conobꞌ, caw wal pena je bꞌeybꞌal. Qꞌueynaj jex je yunen spenail jaxca ebꞌ kichmam. Jix je bꞌejcan Jehová, jix je bꞌejcan Naj Tol Jaxa cꞌal Ocoj, Naj cu Diosal jaon Israel jon tiꞌ. Jix je txꞌemtej sjowal scꞌul. Jix jex meltzo je yintaj junelxa.

5 ¿Tzet yu, yuxan che pitne je bꞌa? ¿Tumi che yoche cꞌal chi tit syaꞌilal je yibꞌan? Jaxca tol yasinajtoj masanil je jolom, catuꞌ cꞌamxa yip je mimanil yu syaꞌilal.

6 Chi ẍaꞌtej yin je yajan, masantaꞌcꞌal bꞌey ẍumuc je jolom, junelne cꞌam swatxꞌil yili, yasinajtoj, eyoc sat, sululi xacꞌal smali, ey lalan skꞌaꞌtoj. Cꞌam ambꞌal eyoc yin. Cꞌam mac chi aon oc spichil je yasil tuꞌ. Cꞌam aceite olivo eyoc yin yet watxꞌ chi sicbꞌi eyoj.

7 Cusiltaj xacꞌal jix yun cantoj je txꞌotxꞌ. Jix nusle cantoj je conobꞌ, je sattaj, catuꞌ chi sloꞌon can eytoj sat je yawo ebꞌ txꞌoj conobꞌal, pilan chi lawi can ey yu ebꞌ.

8 Jix bꞌejlecan conobꞌ Sión, jaxca chi yun sbꞌejlecan junoj yaliẍ pat yu ebꞌ ilom uva, ma ebꞌ chi ilon awo yet tuxa chi yambꞌale aoj, ma jaxca junoj conobꞌ joybꞌilxa ey yu ebꞌ pena snaꞌbꞌal yet chi yakꞌon lawoj eyoj.

9 Ta ma yal scꞌul Jehová, Naj Yaaw yin Masanil, yet jix cu yakꞌon can jun bꞌulan jon tiꞌ, jaxca mi wal jix yun sqꞌueyle el conobꞌ Sodoma, cꞌal Gomorra jix kun cantoj.

11 Chi yal Jehová jaxca tiꞌ: Jaꞌ jantaj je xaambꞌal che yakꞌ ey jin tuꞌ. ¿Ey mi tzet chi oc wu che naꞌ? Caw chi tibꞌi el wu. Jix tibꞌi el noꞌ meꞌ wu, cꞌal ẍepuꞌal noꞌ bꞌakꞌech noꞌ. Cꞌamxa chi woche ẍiqꞌuil noꞌ wacax, tam wal ẍiqꞌuil noꞌ meꞌ, tam wal yet noꞌ icham chiw.

12 ¿Mactxequel chi alon ey jex, yuxan chex jul jin sattaj? ¿Mactxequel jix alon ey jex, yuxan comon xacꞌal chex jul tekꞌecꞌoj bꞌey yamakꞌil jin templo?

13 Cꞌam ojabꞌxa che yiꞌtej je yofrenda tuꞌ, yutol cꞌamxa tzet chi oc wu. Jaꞌ teꞌ incienso che yakꞌa, cꞌamxa chi ẍaꞌ jin cꞌul. Jaꞌ yet che yaon oc je kꞌin yet chi ali xꞌaaw, cꞌal yet scꞌual xewilal yet che yambꞌan je bꞌa yet jun kꞌin tuꞌ, caw cꞌamxa chi techa jex wilon ocoj. Yutol asanne cꞌal spenail chi el je yuneni.

14 Jaꞌ wan je kꞌin che yaoc yet chi ali xꞌaaw, cꞌal je kꞌin tol miman yeloc apnoj yul je sat, tuxa jix tibꞌi el wilon ocoj. Cꞌamxa chi techa wu, cꞌamxa chi ijcha wu. Caw chin cꞌuumbꞌi el wilon ocoj.

15 Jaꞌ yet che yambꞌan je bꞌa jin sattaj yet chex txali, caxcꞌal mi che yiꞌa je kꞌabꞌ, tol chi webꞌa el jin sat ey jex. Caxcꞌal miman tzet che yal yin je txa tuꞌ, man oj wabꞌ tzet che kꞌan yin je txa tuꞌ, yutol bꞌonchanajtoj je kꞌabꞌ yu ẍiqꞌuil ánima cꞌam spenail che makꞌ camoj.

16 Jaꞌ tinaniꞌ xin, Iꞌwej el spenail yin je naꞌbꞌal, catuꞌ che waꞌnen je bꞌeybꞌal. Bꞌejwej je yunen spenail, catuꞌ che yiꞌon el je bꞌa xol.

17 Cuywej je bꞌa je yunen swatxꞌilal. Jaꞌ ojabꞌ swatxꞌil bꞌey che yaoc je naꞌbꞌal, watxꞌ ojabꞌ chi yun je colwa yin ebꞌ chi etnelei, watxꞌ ojabꞌ chi yun je colwa yin ebꞌ unin cꞌamxa smam xutx. Colwaanwej yin ebꞌ ix ix camnajxa yichamil, ẍi Dios.

18 Chi yalon pax Jehová jaxca tiꞌ: Titanwej yin eymanil, catuꞌ chi cu waꞌnewej yeoc jun tiꞌ. Caxcꞌal caw wal pena je yili yu je penail, jain oj jex wakꞌ sajbꞌoj can el jaxca sajbꞌacom. Caxcꞌal txequel yeoc je penail tuꞌ je yin jaxca chi yun sbꞌoncha junoj an kꞌap yetoj junoj cajin ambꞌal, jain oj jex jin sajbꞌane eloj, jaxca wal saj lana oj je yun can el wu.

19 Ta chi yoche je cꞌul che jije, oj je loꞌ masanil tzetyetal watxꞌ chi yakꞌ sat txꞌotxꞌ txꞌotxꞌ tiꞌ.

20 Ta cꞌam chi yoche je cꞌul xin, catuꞌ pit cꞌal oj je yute je bꞌa, oj jex wakꞌ tan el xol jowal. Tol jain Jehová jin chi walaꞌ, ẍi Dios.

22 Jex a Jerusalén, jaꞌ yet yalantoj laan jex jaxca chꞌen plata, jaxa tinaniꞌ jaxca tol kꞌalem jex. Jaꞌ yet yalantoj jaxca yal uva caw watxꞌ quey jex tuꞌ, jal tinaniꞌ jaxca tol calbꞌil jex xa yetoj jaꞌ.

23 Jix pitbꞌi el ebꞌ je yaawil, yetbꞌixa sbꞌa ebꞌ yetoj ebꞌ elkꞌom. Chi yoche chi ẍaꞌ tumin ebꞌ yin ewantajil. Cꞌam chi yoche ebꞌ chi swaꞌne yeoc ebꞌ unin camnajxa smam xutx, cꞌal ebꞌ ix ix camnajxa yichamil.

24 Yu jun tuꞌ xin, jain Jehová jin chi skeꞌ wu masanil, Syaawil jin conobꞌ Israel, jain chi walaꞌ: Kꞌojbꞌilxa tiꞌ; jaex tol chex jowi oc win, oj waecꞌ spaj tet ebꞌ cꞌam chin ocheni.

25 Oj jex wakꞌ cuenta yetoj syaꞌilal, catuꞌ oj jin nuson tzꞌaꞌ masanil je penail, jaxca chi yun snusle tzꞌaꞌ kꞌalem, catuꞌ oj wiꞌon el masanil je penail eyoc je yibꞌan.

26 Oj waon oc ebꞌ yaaw jichan snaꞌbꞌal je xol junelxa, yetoj ebꞌ aom oc naꞌbꞌale jaxca taꞌ yet peyxa. Queyton tuꞌ oj yun yal-le yin jun conobꞌ tiꞌ junelxa, caw jichan sbꞌeybꞌal, caw jijem jun conobꞌ tiꞌ.

27 Yu swatxꞌil jin cꞌul cꞌal jin camcꞌulal je yin, yuxan oj jin colcan el ebꞌ caan bꞌey Sión, jaꞌton ebꞌ tol chi snaꞌ sbꞌa scꞌul.

28 Jal pax ebꞌ pit chi yute sbꞌa xin, cꞌal ebꞌ penawom, yetoj cꞌal ebꞌ chin bꞌejon canoj, oj qꞌueyle can el ebꞌ yin junelne.

29 Queyton tuꞌ oj yun je qꞌuixwoj aoj, yutol jix jex oc yin eyilal tet wan comon dios, cꞌal je yakꞌon je xaambꞌal xol teꞌ mimej jii.

30 Yutol jaxca wal chi yun spujel xaj teꞌ jii, queytuꞌ oj je yun cantoj, ma jaxca chi yun stajel junoj awo tol cꞌamxa chi ey nabꞌ yibꞌan.

31 Jaꞌ junoj ánima tol caw ey yip chi yute snaꞌoni, oj el yip, jaxca wal an chꞌim oj yun cantoj. Jaꞌ spena bꞌeybꞌal ebꞌ tuꞌ, laan cꞌal oj yun yoc skꞌakꞌal yetoj ebꞌ ánima tol ey yip snaꞌoni. Cꞌam mactxequel oj skeꞌ smakꞌon tanoj, ẍi Jehová.