Jaꞌ an libro Jeremías tiꞌ, jix tzꞌibꞌelecan yet abꞌil 627-586 a.C.

Jaꞌ naj Jeremías jix tzꞌibꞌencan jun libro tiꞌ bꞌey conobꞌ Jerusalén. Jaꞌ naj Jeremías tiꞌ jaꞌton naj ẍejabꞌ Dios, jix caey ecꞌ naj yul yet Judá yet tuxa chi iꞌletoj ebꞌ a Judá jaxca yin presowomal bꞌey Babilonia. Jaꞌ jun tiꞌ yunnaj yet abꞌil 600 a.C. Caw ecꞌal el jix yal naj tet ebꞌ tol oj jul syaꞌilal yibꞌan jun nación tuꞌ, yu cꞌal spenail chi el yunen ebꞌ, yutol jix oc ebꞌ ánima yin eyilal tet comon dios. Iquisto ecꞌ naj Jeremías tuꞌ yet jix eyqꞌuey conobꞌ Jerusalén yu ebꞌ a Babilonia tuꞌ, jix yil naj yiꞌletoj naj rey yetoj ebꞌ ánima jaxca yin presowomal. Jix yalon pax can naj tol oj meltzo pax tej ebꞌ bꞌey xꞌotxꞌal tuꞌ junelxa, oj scaꞌ waꞌne pax a sconobꞌ ebꞌ tuꞌ junelxa.

Jaꞌ jun libro tiꞌ, ey canebꞌ tujan yeocoj. Jaꞌ jun bꞌabꞌel tujan, chi el yich bꞌey capítulo 1 masantaꞌcꞌal bꞌey capítulo 25. Jaꞌ tituꞌ chi yal wan kꞌane naj Jeremías tet ebꞌ ánima, yetoj cꞌal tet ebꞌ yaaw yeoc yul stiempoal canwan ebꞌ slawubꞌal rey.

Jaꞌ yet scaabꞌ tujan, chi el yich bꞌey capítulo 26 chi apni oc bꞌey capítulo 45. Jaꞌ tituꞌ chi yal jantaj tzet jix ecꞌ eltoj yibꞌan naj Jeremías. Chi yalon pax can yu wan kꞌane tol eyojto jix yalon can Dios tet naj, jaꞌton yu tzet oj yute Dios yakꞌon smimanil scꞌul ebꞌ ánima.

Jal yet yox tujan, chi el yich bꞌey capítulo 46 chi apni oc bꞌey capítulo 51. Jaꞌ tituꞌ chi yal can skꞌane Dios yibꞌan wan conobꞌ ey scawilal Israel.

Jal yet scan tujan jaꞌton capítulo 52, jaꞌ tituꞌ chi yal yu tzet jix yun yeyqꞌuey Jerusalén cꞌal tzet jix yun yiꞌletoj ebꞌ ánima jaxca yin presowomal bꞌey Babilonia. Jaꞌ naj Jeremías tiꞌ, caw ey scamcꞌulal naj yin ebꞌ yet conobꞌ, caw jix cus scꞌul naj yet jix yalon yu wan syaꞌilal oj jul yibꞌan ebꞌ, yutol oj qꞌueyle el sconobꞌ ebꞌ. Caw ecꞌal versículo bꞌey chi yaltej tol caw jix cus scꞌul naj yutol ẍejabꞌ Dios yeoc naj, yutol jaꞌ skꞌane Dios laan jaxca junoj kꞌakꞌ chi nilxi xaj, queytuꞌ yeoc yin naj chi yabꞌe, cꞌam junoj mac chi skeꞌ sbꞌuton tanoj.

Jal wanxa versículo manxa jantajoj swatxꞌil yalon yul jun libro tiꞌ, chi yaltej yu tzetyetal oj jul yet oj lawoj ecꞌtoj wan syaꞌilal tuꞌ, tol jaꞌ Dios oj swaꞌne junojxa yet scaabꞌ wa kꞌane yetoj ebꞌ sconobꞌ. Jaꞌ jun wa kꞌane tuꞌ, oj sjije ebꞌ, yutol jaꞌ yin spixan ebꞌ oj tzꞌibꞌelecan ocoj.