Jaꞌ Skꞌane Dios Jix Stzꞌibꞌe
JEREMÍAS
Yawtebꞌal Naj Jeremías Yu Jehová
1
Jaꞌ yul jun libro tiꞌ tzꞌibꞌebꞌilcan tzet jix yal naj Jeremías, scꞌaal Hilquías, yicꞌaal ebꞌ yakꞌomal xaambꞌal caan bꞌey conobꞌ Anatot, bꞌey yul yet txꞌotxꞌ yet Benjamín. 2 Jaꞌ yet 13 abꞌil xa yoc naj Josías scꞌaal Amón yin reyal bꞌey Judá, jaꞌ yet tuꞌ jix ẍaꞌon el yich skꞌanabꞌ Jehová tet naj Jeremías. 3 Jix kꞌanabꞌ yetoj, yet eyoc naj Joaquim scꞌaal Josías yin reyal, masantaꞌcꞌal yet 11 abꞌil xa yoc naj Sedequías yin reyal, scꞌaal Josías cꞌal pax oj. Jaꞌton yet joebꞌxa xꞌaaw yoc jun abꞌil tuꞌ, jal masanil ebꞌ caan bꞌey Jerusalén jix iꞌletoj ebꞌ jaxca yin presowomal bꞌey Babilonia.Yawtebꞌal Naj Jeremías Yu Dios
4 Jix kꞌanabꞌ Jehová ey jin Jeremías jin tiꞌ, jix yalon jaxca tiꞌ:
5 Jaach tiꞌ, sicꞌbꞌil jaachxa el wu yet cꞌamto chach wakꞌ pitzcꞌu oc yin ja txutx; poꞌobꞌil jaachxa el wu yet cꞌamto chach ali, tol sicꞌbꞌil jaach xacꞌaltaꞌ el wu yin ja woc jin chejabꞌoj xol-laj mimej conobꞌ, ẍi Jehová.
6 Catuꞌ jix jin takꞌwi tet jaxca tiꞌ: Jaach jin Diosal, Waawil jaach, ilaꞌ tol caw achꞌe jin to. Cꞌamto chi naꞌcha tzet chi wute kꞌanabꞌ jin bꞌa, jin chi tet.
7 Jix yalon Jehová ey jin: Cꞌam ojabꞌ cha walaꞌ tol caw achꞌe jaachto. Asan tol oj jaach toj bꞌey oj jaach jin chejtoj, catuꞌ oj ja walon el jantaj tzetyetal oj jin chej ja walaꞌ.
8 Cꞌam ojabꞌ chach xiw tet ebꞌ ja wet animail. Yutol jain Jehová jin chi walaꞌ tol ey jin cꞌal ecꞌ ja wetoj, catuꞌ oj jaach jin col cꞌal eloj, ẍi Dios ey jin.
9 Jix lawi tuꞌ, jix yaon oc skꞌabꞌ Jehová yin jin tiꞌ, jix yalon ey jin jaxca tiꞌ:
10 Jaꞌ tinaniꞌ chi waoc jin kꞌane yin ja tiꞌ. Chi wakꞌ ja wopiso yet chach jin chejontoj yu ja walon yabꞌ masanil conobꞌ, cꞌal tet ebꞌ mimej yaaw yeoc yul-laj mimej conobꞌlaj, tol oj jul syaꞌilal yibꞌan ebꞌ, oj qꞌueyle el ebꞌ, oj lawoj ey ebꞌ. Ey conobꞌ tol oj uchle eyoj, ey pax ebꞌ tol oj waꞌnele pax aoj, ẍi Dios ey jin.
Ey Caabꞌ Tzetyetal Jix Txꞌoxle Yil Naj Jeremías
11 Jix kꞌanabꞌ Jehová ey jin, jix yaloni:
¿Jaach Jeremías, tzetyetal jun cha wil tuꞌ? ẍi ey jin.
Ey jun skꞌabꞌ teꞌ almendro, jin chi.
12 Yel ton cha walaꞌ. Oj jin maj wilaꞌ,a yutol yin eymanil oj yun tzet chi walaꞌ, ẍi Naj ey jin.
13 Jix yalon pax Jehová yet scaelal ey jin:
¿Tzetyetal cha wil tuꞌ? ẍi ey jin.
Ey jun xi chi juji chi wilaꞌ, tol chi maltoj bꞌey yetcꞌulal norte, jin chi tet.
14 Jix yalon pax Jehová ey jin: Jaꞌ bꞌey norte tuꞌ oj tit syaꞌtajilal yibꞌan masanil ebꞌ caan yul jun conobꞌ tiꞌ.
15 Jain wal caw Jehová jin chi wal ey jaach, tol oj wawtetej wan mimej conobꞌlaj bꞌey norte, oj jul sreyalil ebꞌ yetoj, catuꞌ oj swaꞌnen ey sdespacho ebꞌ bꞌey spuertail Jerusalén tiꞌ. Oj oc joyan ebꞌ yinlaj conobꞌ Jerusalén tiꞌ cꞌal yinlaj masanil conobꞌlaj bꞌey yul yet Judá.
16 Jaꞌton jun syaꞌilal tiꞌ oj waoc yibꞌan jin conobꞌ yu cꞌal tol jix jin sbꞌejcan ebꞌ, jix oc ebꞌ yin eyilal cꞌal yakꞌon tzꞌaꞌ incienso ebꞌ tet wan comon dios tol jaꞌcaw ebꞌ jix waꞌnen a yetoj skꞌabꞌ.
17 Jaꞌ tinaniꞌ akꞌ ja wip, al tet masanil ánima jantaj tzet chin chej ja walaꞌ. Cꞌam ojabꞌ chach xiw tet ebꞌ ja wet animail. Ta tol oj jaach xiwoj, jain xa oj jaach wakꞌ xiwa sattaj ebꞌ.
18 Jaꞌ tinaniꞌ, chach wa can oc jaxca junoj conobꞌ caw ey yip, jaxca wal junoj oy tol hierro chꞌen eyoc yin, ma jaxca junoj smuroal conobꞌ tol bronce chꞌen eyoc yin, yet watxꞌ oj ja tecꞌbꞌa ja bꞌa sattaj conobꞌ Judá, cꞌal sattaj ebꞌ rey, ebꞌ yaaw, ebꞌ yakꞌomal xaambꞌal, cꞌal sattaj masanil conobꞌ.
19 Oj yakꞌ jowal ebꞌ ja wetoj, jain wal caw Jehová jin chi walaꞌ tol man oj jaach eyqꞌuey yu ebꞌ, yutol ey jin cꞌal oc ja wetoj yin jaach jin colon eloj, ẍi Dios.