Spitalil Ebꞌ Conobꞌ Israel Sattaj Jehová
2
Jix yalon pax Jehová ey jin jaxca tiꞌ:2 Asiꞌ, catuꞌ cha walon tet ebꞌ a Jerusalén, tol jain Jehová jin chi wal jaxca tiꞌ: Chin naꞌtej yet caw achꞌe jexto yet caw jijem jex yet jix jex wiꞌon oc jin conobꞌoj. Caw ey je camcꞌulal win, jaxca junoj ix kꞌopo tol to chi nupi, caw ey scamcꞌulal yin yichamil. Jix jex oc cꞌal tzajan wintaj bꞌey txꞌotxꞌ cusiltaj txꞌotxꞌ, bꞌey jun txꞌotxꞌ tol cꞌam junoj mac chi mulna sat.
3 Jaꞌ yet tuꞌ, wet cꞌal je yeoc jaex Israel jex tiꞌ, jaxca wal junoj bꞌabꞌel sat awo. Jain caw Jehová jin chi walaꞌ tol yal cꞌal mac oj jex etnen oj, jain oj waoc syaꞌilal yibꞌan ebꞌ, ẍi Jehová, ja chi tet ebꞌ, ẍi ey jin.
4 Je masanil jaex tiꞌ yicꞌaal jex Jacob, yicꞌaal jex pax Israel, abꞌwej wal tzet chi yal Jehová:
5 ¿Tzetyetal man watxꞌoj jix yil ebꞌ je mam icham tuꞌ win, yuxan tol jix jin yintajne can el ebꞌ? Jix too ebꞌ yintaj wan comon dios cꞌam yeloc apnoj, yu cꞌal jun tuꞌ, yuxan cꞌamxa cꞌal niꞌoj yeloc apnoj ebꞌ.
6 Cꞌamxa taꞌ chi snaꞌtej niꞌoj ebꞌ, ta jain jix wiꞌeltej ebꞌ bꞌey Egipto, catuꞌ jix wijbꞌan ebꞌ bꞌey txꞌotxꞌ cusiltaj txꞌotxꞌ, jaꞌton bꞌey cꞌam tzet chi skeꞌ yawle awo sat, tol jootxꞌlaj yeqꞌui, bꞌey cꞌam jaꞌ, eyxa smey yeqꞌui. Cꞌam mac chi ecꞌ tituꞌ, cꞌam mac caan sat.
7 Jain jix wiꞌtej ebꞌ bꞌey jun txꞌotxꞌ txꞌotxꞌ caw wal ey syaxil sat, yet watxꞌ chi sloꞌ sat yawo ebꞌ chi el sat txꞌotxꞌ. Jal pax jaex yicꞌaal jex ebꞌ tiꞌ, caan jex ecꞌ bꞌey sat jin txꞌotxꞌ tiꞌ, catuꞌ jix je yetne eloj. Je yu cꞌal toni, yuxan cꞌamxa chi ẍaꞌ jin cꞌul jun jin txꞌotxꞌ tiꞌ.
8 Jaꞌ ebꞌ yakꞌomal xaambꞌal, ma xacꞌal jul ebꞌ jin sattaj. Jaꞌ ebꞌ je cuyomal, ma jin yotajne el ebꞌ. Jaꞌ ebꞌ eyoc yin yaawil yul je conobꞌ, tol jix jowi oc ebꞌ win, jaꞌ ebꞌ jin chejabꞌ, jaxa yin sbꞌi jun comon dios chi yij Baal jix kꞌanabꞌ el ebꞌ. Jix oc tzajan ebꞌ yintaj comon dios tol cꞌam yopiso.
Jaꞌ Tzet Chi Yal Jehová Yin Conobꞌ Israel
9 Jain caw Jehová jin chi walaꞌ tol oj wakꞌ jowal je yetoj, cꞌal yetoj ebꞌ je yicꞌaal.
10 Asiꞌwej bꞌey conobꞌ Chipre, yetcꞌulal bꞌey chi too cꞌu, catuꞌ chi cam je yiloni. Awejtoj je chejabꞌ bꞌey Quedar, yetcꞌulal bꞌey chi aol cꞌu, catuꞌ chi yilon ebꞌ ta eyxa bꞌey jix yun juneloj jun tuꞌ.
11 ¿Tumi taꞌ ey junoj conobꞌ tol jix yiꞌel sbꞌa yintaj sdiosal, caxcꞌal mi jaꞌ wan sdiosal ebꞌ tuꞌ man caw dios oj ebꞌ? Jal jex jaex tiꞌ, jin conobꞌ jex, catuꞌ chin je bꞌejon can pax canoj, tol je mimanbꞌilal weocoj. Jaxa pax yintaj xa comon dios cꞌam yeloc apnoj chex oc tzajanoj.
12 Jain Jehová jin chi walaꞌ: Tol oj wakꞌ bꞌilwoj satcan yu xiwcꞌulal, tol oj qꞌueya je cꞌul je yilon oc tzet oj wun tuꞌ.
13 Jaꞌ ebꞌ jin conobꞌ tiꞌ, ey caabꞌ tujan spenail ebꞌ jix oqui: Jix jin sbꞌejcan ebꞌ jaxca snukꞌ jaꞌ tol chi aoloj, queytuꞌ weocoj. Jix swaꞌne sdiosal ebꞌ tol laan jaxca junoj kꞌobꞌ jaꞌ tol jatilxa yul, cꞌamxa chi can jaꞌ yul, queytuꞌ yeoc ebꞌ jin conobꞌ tiꞌ.
Jaꞌ Tzet Jix Yun Yeloc Ebꞌ Conobꞌ Israel Yu Spitalil
14 Jix yalon Jehová jaxca tiꞌ: Jaex conobꞌ Israel jex tiꞌ, man yakꞌomaloj servilal je yeecꞌoj, man yin oj chejabꞌwom oj jix yun je yali. ¿Tzet yu, yuxan chex oc yin yakꞌomaloj servilal?
15 ¿Tzet yu, yuxan chi jowi xacꞌal oc wanxa conobꞌ je yin? Chi el yaw ebꞌ je yin jaxca noꞌ bꞌalam. Caw jix etex el je conobꞌ je yu, jix nusle tzꞌaꞌoj. Cꞌamxa mac caan yul je conobꞌ.
16 Jaꞌ ebꞌ winaj a Menfis, yetoj ebꞌ a Tafnes, jix stzujel xil je jolom ebꞌ jaex Israel jex tiꞌ.
17 Jix jul wan tiꞌ je yibꞌan, yutol jix jin je bꞌejcan jain Jehová je Diosal jin tiꞌ, yet jix jex wijbꞌa yul-laj bꞌe.
18 Jaꞌ tinaniꞌ ¿tzetyetal oj je yiꞌ yu chex oc yin wa kꞌane yetoj conobꞌ Egipto? ¿Tzetyetal oj je yiꞌ yu chex oc yin wa kꞌane yetoj ebꞌ a Asiria?
19 Jain wal caw Jehová Yaaw jin yibꞌan masanil tzetyetal, jain chi walaꞌ; tol jaꞌ je penail tuꞌ oj aon oc syaꞌilal je yibꞌan. Jaꞌ je pitalil oj akꞌon low je yin. Naꞌcha ojabꞌ el je yu, tol caw man watxꞌoj yu jix jin je bꞌejcan jain Jehová je Diosal jin tiꞌ. Oj waoc syaꞌtajilal je yibꞌan yutol cꞌam weloc apnoj yul je sat.
Spitalil Ebꞌ Conobꞌ Israel
20 Yet tax cꞌal yalantoj jix cꞌoli cꞌal yoc je penail ey jin an. Ma yal je cꞌul jix je jije tzet chi walaꞌ. Jix je yalon jaxca tiꞌ: Cꞌam chi yal cu cꞌul chach kakꞌ servil, je chi. Asanxane yin amulal che yatoj je bꞌa bꞌey txꞌotxꞌ tzalquiltaj, cꞌal je yoc yin eyilal tet comon dios bꞌey yichlaj yenel teꞌ teꞌ.
21 Jaxca chi yun yawle an uva, queytuꞌ jix yun jex wawoni, jaxca an jinat uva tol watxꞌ. ¿Tzet yu, yuxan tol laan xacꞌal chi yun je yeloc jaxca junoj xol-laj teꞌal uva?
22 Jain caw Jehová jin chi walaꞌ: Caxcꞌal che txꞌael je bꞌa yetoj chꞌen yal taan, caxcꞌal che kꞌan mimanoj xawon, jaꞌ je penail tuꞌ, ey cꞌal ecꞌ jin sattaj; cꞌam bꞌakꞌin chi skeꞌ je sajbꞌi el niꞌoj yul je yet.
23 ¿Tzet wal oj yun je yalon jaxca tiꞌ: Cꞌam cꞌal chi ketnetoj cu bꞌa yin koc eyilal tet comon dios? Chi cam je naꞌontej, tzet jix je yute je bꞌeybꞌal bꞌey jun miman panan. Chi cam je naꞌontej tzet jix je yunne, tucꞌal chex ecꞌ joyon jaxca junoj noꞌ xutx camello chi seyon ecꞌ noꞌ icham camello.
24 Laan jex jaxca junoj noꞌ xol-laj teꞌal xutx bꞌuru tol qꞌueynaj yecꞌ bꞌey txꞌotxꞌ cusiltaj txꞌotxꞌ, tol chi ey sukꞌan sat txꞌotxꞌ catuꞌ chi a pacꞌan sat. Jaꞌ yet elnaj noꞌ sajchi, cꞌam mac chi skeꞌ stenon oc tucanoj. Tumi oj to cꞌuumbꞌoj a yecꞌ tzajan junoj noꞌ icham yintaj yet stiempoal sajchi noꞌ txutxe.
25 Jex a Israel, bꞌejwej je seyon ecꞌ wan comon dios tuꞌ. Naꞌbꞌacꞌal chi lawitoj je yajan, cꞌal staj je tiꞌ yin je seyon ecꞌoj. Che yalon jaxca tiꞌ: Cꞌamaj; eyoc cu naꞌbꞌal yin wan comon dios, yuxan oj cu toj cꞌaltaꞌ yintaj ebꞌ, je chi, che yaloni.
Smoo Wal Ẍaꞌon Syaꞌilal Ebꞌ Conobꞌ Israel
26 Jaxca wal chi yun sqꞌuixwi a junoj elkꞌom yet chi ilchatej, queytuꞌ oj yun sqꞌuixwi a conobꞌ Israel, jaꞌton masanil ebꞌ conobꞌ tuꞌ, yetoj ebꞌ rey, ebꞌ yaaw, ebꞌ yakꞌomal xaambꞌal, yetoj cꞌal ebꞌ jin chejabꞌ.
27 Tol cu mam jaach, ẍi wal ebꞌ tet junoj teꞌ teꞌ, catuꞌ chi yalon cꞌal pax ebꞌ tet junoj chꞌen chꞌen: Tol cu txutx jaach, ẍi ebꞌ tet. Jal pax ey jin an xin, ja yichin ebꞌ chi sjacbꞌacantej ey jin. Cꞌamxa chi tit tꞌanan niꞌoj ebꞌ win. Jaxa pax yet chi jul syaꞌilal yin ebꞌ, chi yalon ebꞌ jaxca tiꞌ: Titan, colwaan, ẍina pax ebꞌ ey jin.
28 Jex a Judá, ¿Bꞌeytuꞌ eyoc wan comon dios jix je waꞌne tuꞌ? Jaxca wal sbꞌisil je conobꞌ, queytuꞌ sbꞌisil wan je diosal tuꞌ. Jul ojabꞌ wan tuꞌ jex jul yiloni, ta chi skeꞌ jex scolon el ebꞌ yet chi jul junoj syaꞌilal je yibꞌan.
29 Jain jaꞌcaw Jehová jin, chi walaꞌ: ¿Tzet yu, yuxan che yal win tol cꞌam chex jin coloꞌ? Ilaꞌ tol pit che yute je bꞌa je masanil ey jin an.
30 Naꞌbꞌa xacꞌal chi waoc syaꞌilal je yibꞌan, cꞌam chi yal je cꞌul che jije cuybꞌanile chi wakꞌa. Laan jex jaxca noꞌ bꞌalam yel xacꞌal ey smey, jix je makꞌ cam ebꞌ jin chejabꞌ.
31 Jex Israel, majwej je yabꞌ jin kꞌane. ¿Tumi jaxca wal junoj cusiltaj txꞌotxꞌ weoc ey jex? ¿Ma jaxca junoj txꞌotxꞌ tol ey smey? Jex jin conobꞌ, ¿tzet wal yu, yuxan che yal jaxca tiꞌ: Ket cu bꞌa cu txꞌojli jon, cꞌamxa bꞌakꞌin oj cu meltzo ey jaach? je chi.
32 ¿Chim wal to qꞌueycꞌulal spichil cꞌal yom cꞌal chꞌen ue chi akꞌle tet junoj ix kꞌopo yet chi nupi? Jal jex jaex jin conobꞌ tiꞌ, junelne chin too xacꞌal qꞌueycꞌulal je yu.
33 Jaxca ebꞌ ix amul ix yotaj sbꞌeal yet chi too seyon ecꞌ winaj, quey jex tuꞌ. Cuywam jex yin spenail.
34 Tol chicꞌtaj xacꞌal yoc je pichil yu ẍiqꞌuil ebꞌ mebꞌa cꞌal ebꞌ cꞌam spenail. Manaj ebꞌ lalan yelkꞌanwi che makꞌ camoj.
35 Caxcꞌal mi jaxca tuꞌ, che yal cꞌal pax jaxca tiꞌ: Caw watxꞌ cu bꞌeybꞌal, cꞌam cu penail, cꞌamxa sjowal scꞌul Dios kin, je chi. Jain Jehová jin tiꞌ oj waoc syaꞌilal je yibꞌan, yutol cꞌam che yotajne el je bꞌa xol je penail.
36 ¿Tzet yu, yuxan chex oc xacꞌal il je qꞌuexon ebꞌ chi colwa je yetoj? Jaxca wal jix yun je qꞌuixwi can a yu ebꞌ a Asiria, yu ma jex scol ebꞌ, Queywal tuꞌ oj yun je qꞌuixwi pax can a yu ebꞌ a Egipto.
37 Caw qꞌuixwiltaj xacꞌal oj yun je meltzotej bꞌey Egipto, yutol jix wintajne el ebꞌ che yaoc yipoj je cꞌul. Tumi ey tzet oj je yiꞌ yu watxꞌ xacꞌal je yakꞌon yetoj ebꞌ, ẍi Dios.