Man Jijemoj Jix Yute Sbꞌa Conobꞌ Israel tet Dios
3
Chi yalon pax Jehová jaxca tiꞌ:Ta ey junoj winaj chi spoꞌole sbꞌa yetoj yistil, catuꞌ chi yiꞌon junojxa winaj ix ix tuꞌ, ta tol chi spoꞌole pax sbꞌa ix yetoj junxa naj tuꞌ, jaꞌ naj jix yiꞌle ix yet sbꞌabꞌelal tuꞌ cꞌamxa chi skeꞌ yiꞌle sbꞌa naj yetoj ix junelxa. Ta chi yiꞌle sbꞌa ebꞌ junelxa, yu cꞌal jun tuꞌ caw chi etextoj txꞌotxꞌ txꞌotxꞌ tiꞌ yul jin sat. Jain Jehová jin chi walaꞌ tol queytuꞌ jix yute sbꞌa ebꞌ conobꞌ Israel tiꞌ, jix jin sbꞌejcan ebꞌ, jaxa wan comon dios chi scamcꞌulne ebꞌ; jaxa tinaniꞌ, chi yoche scꞌul ebꞌ chi meltzo pax tej ey jin junelxa.
2 Aanwejtoj tꞌanan bꞌey txꞌotxꞌ tzalquiltaj, catuꞌ che yilon atoj. ¿Tumi eyto junojxa tzalan bꞌey ma jex oc yin eyilal tet wan comon dios tuꞌ? Chex ey chotan bꞌey stiꞌlaj bꞌe je majon sjul ebꞌ chi mulwi je yetoj, jaxca chi yun smajon ebꞌ bꞌelwom ánima bꞌey txꞌotxꞌ cusiltaj txꞌotxꞌ. Jix je yetnetoj jun txꞌotxꞌ txꞌotxꞌ tiꞌ yu je yamulal tuꞌ.
3 Yu jun tuꞌ, yuxan cꞌamxa nabꞌ chi yakꞌ yet stiempoal nabꞌilkꞌinal. Jaxca wal amul ix yili je sat. ¡Smoo wal tol chi qꞌuixwi a je sat!
4 Che yalon ey jin jaxca tiꞌ: Jaach tiꞌ, caw cu Diosal jaach, tol watxꞌ cꞌal kakꞌon ja wetoj yet tax cꞌal jix cu titoc yin achꞌeal.
5 ¿Tumi ey cꞌaltej sjowal ja cꞌul kin? je chi, che yaloni. Yajbꞌan lalan je yalon jaxca tuꞌ, lalan cꞌal je bꞌeybꞌalne amulal tol chi yoche je cꞌul che yunne, ẍi Jehová tet conobꞌ Israel.
Tenchebꞌal Chi Yakꞌ Jehová Tet Conobꞌ Israel Cꞌal Tet Conobꞌ Judá
6 Jaꞌ yul stiempoal naj rey Josías jix yalon Jehová ey jin jaxca tiꞌ: ¿Jix mi ja wil tzet jix yun ebꞌ ja wet conobꞌ Israel, tol laan jix yute sbꞌa ebꞌ jaxca junoj ix amul ix, jix too ebꞌ yin amulal bꞌey txꞌotxꞌ tzalquiltaj, cꞌal bꞌey yichlaj teꞌ teꞌ? 7 Jaꞌ jin naꞌoni, tol jaꞌ yet oj lawoj yunen spenail ebꞌ tuꞌ catuꞌ oj meltzo pax tej ebꞌ ey jin, jaxa jix yunne ma cꞌaltaꞌ meltzotej ebꞌ ey jin. Quey pax tuꞌ ebꞌ conobꞌ Judá, caw pit jix yute sbꞌa ebꞌ, jix yil ebꞌ tzet chi yun conobꞌ Israel tol eyto yu sbꞌa yetoj, laan jix yute sbꞌeybꞌal ebꞌ. 8 Jix yilon conobꞌ Judá tol jix wujte el conobꞌ Israel tuꞌ, jix jin bꞌejcan ebꞌ, yu ton wal yamulal ebꞌ tuꞌ. Jaꞌ conobꞌ Judá caw cꞌam niꞌoj xiwcꞌulal ey jin, tol jix too ebꞌ yin amulal. 9 Ma cꞌal xiw ebꞌ conobꞌ Israel tuꞌ stoo yin amulal, jix etextoj txꞌotxꞌ txꞌotxꞌ tiꞌ yu spenail ebꞌ, cꞌal yoc ebꞌ yin eyilal tet chꞌen chꞌen cꞌal tet teꞌ teꞌ. 10 Caxcꞌal jix yil Judá wan tuꞌ, ma cꞌaltaꞌ meltzotej ebꞌ ey jin yin masanil scꞌul, tucꞌal wal jix slan meltzotej sbꞌa ebꞌ ey jin, ẍi Jehová.
11 Jix yalon pax Jehová jaxca tiꞌ: Jaꞌ ebꞌ conobꞌ Israel tol pit jix yute sbꞌa, txenne wal spenail ebꞌ yintaj ebꞌ conobꞌ Judá, yutol caw jix yetne yet animail ebꞌ tuꞌ. 12 Jaach Jeremías, asiꞌ al can el jun kꞌane tiꞌ tet ebꞌ ja wet Israelal tuꞌ. Jatuꞌ chach too tꞌanan yetcꞌulal norte, catuꞌ cha walon tet ebꞌ jaxca tiꞌ:
Jaꞌcaw Jehová chi alon jaxca tiꞌ: Jex Israel tol caw pit je naꞌbꞌal, meltzaanwejtej ey jin. Man yin oj jowal oj yun jex jin chaꞌoni, man eyoj cꞌaltej sjowal jin cꞌul je yin, yutol caw ey jin camcꞌulal je yin.
13 Naꞌwej yin je bꞌeybꞌal, tol jix oc je penail, yel xacꞌal pit jix je yute je bꞌa jin sattaj jain Jehová je Diosal jin tiꞌ. Jain wal caw Jehová jin chi walaꞌ, tol tuxa cꞌal jix jex too lemna je seyon ecꞌ wan comon dios bꞌey yichlaj teꞌ teꞌ yaax xaj. Caw ma je jije jin chejbꞌanil, ẍi Jehová, ja chi tet ebꞌ, ẍi ey jin.
14 Jix yalon pax Jehová jaxca tiꞌ: Jex ánima pit che yute je naꞌbꞌal, meltzaanwejtej ey jin, yutol je Yaawil jin. Junjun jex oj jex wiꞌtej bꞌey junjun conobꞌ. Catajwan oj yun jex wiꞌontej yin junjun tujan icꞌaaleal. Queytuꞌ oj yun jex wakꞌon meltzo bꞌey Sión. 15 Oj waoc je yilomal jaxca chi yoche jin cꞌul; jaꞌ ebꞌ oj yakꞌ yaawil je yibꞌan yetoj sjelanilal cꞌal yin sjichanil. 16 Jain caw Jehová jin chi walaꞌ, tol oj chꞌibꞌ je bꞌisil yul je conobꞌ tiꞌ, manxa oj je naꞌtej teꞌ Scaẍail Jin Wa Kꞌane. Manxa oj je naꞌtej tam wal oj tit yul je cꞌul. Cꞌamxa tzet oj je naꞌ yin teꞌ, tam wal oj je waꞌne junojxa acꞌ Scaẍail Jin Wa Kꞌane. 17 Jaꞌ yet jun tiempoal tuꞌ, oj bꞌina sbꞌi jin despacho jain Jehová jin tiꞌ yin Jerusalén. Masanil conobꞌlaj oj syambꞌa oc sbꞌa tituꞌ yin yoc ebꞌ yin eyilal ey jin. Manxa oj yakꞌ sbꞌa ebꞌ yu yijbꞌaletoj yin pena bꞌeybꞌale.
18 Jaꞌ yet oj apnoj jun scꞌual tuꞌ, junxane oj yute sbꞌa conobꞌ Judá yetoj conobꞌ Israel. Junxane oj yun je meltzotej bꞌey jun conobꞌ ey bꞌey yetcꞌulal norte, jaxa je jul caey bꞌey txꞌotxꞌ txꞌotxꞌ jix wakꞌcan tet ebꞌ je mam icham.
Wan Comon Sdiosal Ebꞌ Israel
19 Jex conobꞌ Israel, jix jin naꞌbꞌalne el jex jin chaꞌon jaxca wal wuninal, catuꞌ chi wakꞌon can jun txꞌotxꞌ caw wal ochbꞌetaj yili tiꞌ ey jex. Asanxane jun txꞌotxꞌ tuꞌ caw wal watxꞌ yili bꞌey yul yibꞌankꞌinal tiꞌ. Jix jin naꞌ tol oj jin je yaloc je Mamoj yin junelne, yutol manxa oj jin je yintajne can eloj.
20 Jain wal caw Jehová jin chi walaꞌ, tol laan jix je yute je bꞌa jaxca junoj ix ix yel xacꞌal pena chi yute sbꞌa yul skꞌabꞌ yichamil, queytuꞌ jix je yute je bꞌa ey jin.
21 Chi abꞌle yel aw bꞌey txꞌotxꞌ tzalquiltaj tol cusiltaj yili: Jaꞌton ebꞌ Israel chi el yaw yul snukꞌ yokꞌ yu skꞌanon jin colwal ebꞌ. Jix elcan ebꞌ bꞌey yul sbꞌeal sjichanil. Jix jin too qꞌueycꞌulal yu ebꞌ, jain Jehová, sDiosal jin ebꞌ tiꞌ.
22 Meltzaanwejtej jin cꞌatan an xin, jantaj jex ánima tol pit je naꞌbꞌal, oj wiꞌel jun pit naꞌbꞌale eyoc je yin tuꞌ, ẍi Dios.
Jix Takꞌwi Ebꞌ Israel Tet Jehová Jaxca Tiꞌ
Tiꞌ ey jon xin. Tiꞌ chi kaoc cu bꞌa yul ja kꞌabꞌ, yutol cu Diosal jaach.
23 Caw yel, naꞌbꞌacꞌal chi cu too bꞌey txꞌotxꞌ tzalquiltaj yin kaon oc kꞌin tet wan comon dios. Asan wal ja win jaach cu Diosal, chi ilcha cu colbꞌanil jon.
24 Yet tax cꞌal unin ánima jon to, jaꞌ yu eyilal tet wan echele akꞌom qꞌuixwil tuꞌ jix akꞌon lawoj ey tzet jix yiꞌ ebꞌ cu mam icham tuꞌ jon, jaꞌton noꞌ meꞌ cꞌal noꞌ wacax, ebꞌ cꞌaale cꞌal ebꞌ ix cutzꞌine.
25 Yin yeynajilal oj yun kiꞌon ey cu bꞌa ey jaach, jaon tiꞌ yetoj ebꞌ cu mam icham jon, yel xacꞌal penawom jix kute cu bꞌa ja sattaj jaach cu Diosal. Yin tax cꞌal unin ánima jon caw ma cu jije tzet jix ja wal can ey jon, ẍi ebꞌ.