Tenchebꞌal Yet Chi Snaꞌon Sbꞌa Cu Cꞌul
4
Jaꞌ Jehová chi alon jaxca tiꞌ:Ta chi yal je cꞌul che bꞌejcan spenail jaex Israel jex tiꞌ, meltzaanwejtej ey jin. Ta tol che yiꞌel masanil wan je diosal tol yaabꞌetaj tuꞌ jin sattaj, catuꞌ chex oc cꞌal tzajan wintaj an.
2 Catuꞌ che yakꞌon eloc tzet che yalaꞌ. Ta oj jin je yakꞌ bꞌina yin yel, ta jaxca tuꞌ, oj wakꞌ jin yaxilal yibꞌan masanil je conobꞌ, ẍi Dios.
3 Chi yalon pax Jehová jaxca tiꞌ: Jex a Judá cꞌal jex a Jerusalén:
Caw pit jix je yute je naꞌbꞌal jaxca junoj txꞌotxꞌ cꞌamto mac chi mulna sat, asan cꞌal teꞌ qꞌuix chi chꞌibꞌa sat. Toloj wal cꞌuun che yute niꞌoj je naꞌbꞌal tuꞌ, yet watxꞌ chi oc jin kꞌane yin je naꞌbꞌal tuꞌ.
4 Jex a Judá cꞌal jex a Jerusalén, jijewej jin wa kꞌane jix wal can je yetoj. Awej oc yin je cꞌul catuꞌ che txꞌoxon el yin je bꞌeybꞌal, yutol chaꞌbꞌil je yu. Otajnewej eloj tol jain Jehová Dios jin an. Ta cꞌamaj, jaꞌ yu je penail tuꞌ oj tit sjowal jin cꞌul je yibꞌan jaxca junoj kꞌakꞌ cꞌamxa mactxequel chi skeꞌ sbꞌuton tanoj.
Eyqꞌueynaj Conobꞌ Judá Yu Jowal
5 Alwej el wan tiꞌ tet ebꞌ a Judá, cꞌal tet ebꞌ a Jerusalén; xuꞌwej chꞌen trompeta yabꞌ masanil mimej conobꞌ. Yin ipeal chi yun yel je yaw, che yalon jaxca tiꞌ: Cu yambꞌawej oc cu bꞌa bꞌey wan mimej conobꞌ tol watxꞌ yeoc smuroal, je chi.
6 Iꞌwej a junoj txꞌoxbꞌanile jaxca junoj bandera yet chi too yewbꞌa el sbꞌa ebꞌ ánima bꞌey Sión. Seywej bꞌey che col je bꞌa. Cꞌam ojabꞌ chex oc tucanoj, yutol jaꞌ bꞌey norte oj yiꞌtej jun miman syaꞌilal Jehová, jaꞌ oj akꞌon lawoj el masanil cu tzetyetal.
7 Jaxca chi yun yeltej noꞌ bꞌalam yul sweyubꞌ, queytuꞌ chi yun stit jun mac oj akꞌon lawoj ey nacionlaj. Tuxa jix eltej yul sconobꞌ yet chi jul yakꞌon lawoj ey cu conobꞌ tiꞌ, yet chi uchle can eyoj, catuꞌ chi cancan yin tzꞌinanil.
8 Yu jun tuꞌ, yuxan kawej oc an eel pichile, okꞌojonwej, el ojabꞌ kaw yu syaꞌil, yutol jaꞌ sjowal scꞌul Jehová cꞌamto chi tan cu xol, je chi, ẍi Jehová.
9 Jaꞌcaw Jehová chi aloni: Jaꞌ yet oj jul jun scꞌual tuꞌ, jaꞌ ebꞌ rey yetoj ebꞌ yaaw tuxa cꞌal oj lujlon ebꞌ yu xiwcꞌulal. Jaꞌ ebꞌ yakꞌomal xaambꞌal tuxa cꞌal oj qꞌuey scꞌul ebꞌ yilon ocoj, cꞌal ebꞌ jin chejabꞌ, caw oj xiwa ebꞌ, ẍi Dios.
10 Jix walon tet jaxca tiꞌ: ¡Ay, Jaach jin Diosal! ¿Tzet yu, yuxan jix ja wal tet ebꞌ ánima a Jerusalén? catuꞌ jix ja wakꞌcan ja tiꞌ ja wakꞌon ja watxꞌcꞌulal tet ebꞌ, jaxa pax tinaniꞌ jaꞌ chꞌen espada jejan oc yin snukꞌ ebꞌ cꞌal yin spixan ebꞌ ja wu, jin chi.
11 Jaꞌ yet jun txolan tuꞌ, oj al-le tet ebꞌ ánima bꞌey Jerusalén yu Jehová: Ey jun kaꞌeꞌ tol kaj chi tit bꞌey sjolomlaj wonan bꞌey txꞌotxꞌ cusiltaj txꞌotxꞌ. Chi tit xuyuyoj yetcꞌulal jin conobꞌ, man jaxca oj comon kaꞌeꞌ chi oc yopiso yet chi xuꞌle el skꞌail ixim tiriw.
12 Jaꞌ jun kaꞌeꞌ oj wakꞌ tit tuꞌ, yel xacꞌal jow yintaj jun tuꞌ. Jaꞌ jun kaꞌeꞌ chi bꞌina titiꞌ, jaꞌton syaꞌilal oj watej yibꞌan jin conobꞌ tiꞌ, ẍi Jehová.
Jix Oc Joyan Scajat Ebꞌ Judá Yinlaj
13 Jix yalon Jehová: Ilwej ton abꞌ stit ebꞌ je cajat jaxca junoj asun. Jaꞌ scarruaje ebꞌ laan jaxca junoj cajxuchum kaꞌeꞌ. Caw jelan sbꞌey ẍe ebꞌ yintaj noꞌ chii. Okꞌbꞌal jon cꞌul jaon tiꞌ, caw oj cu qꞌueyle el yu ebꞌ, je chi.
14 Jex a Jerusalén, iꞌwej el masanil spenail eyoc yin je naꞌbꞌal. Queytuꞌ oj yun je colcha eloj. ¿Bꞌakꞌin oj je bꞌej je naꞌon spenail tuꞌ?
15 Chi apni tacꞌal oc skꞌaneal jowal bꞌey Dan cꞌal bꞌey txꞌotxꞌ tzalquiltaj yul yet Efraín.
16 Alwej tet masanil conobꞌ cꞌal tet Jerusalén, tol jaꞌ bꞌey jun nación caw naat ey, jatuꞌ chi tit ebꞌ je cajat. Caw chi el yaw ebꞌ stit yakꞌon jowal yin conobꞌ Judá.
17 Tuxa cꞌal joyan oc ebꞌ yin conobꞌ Judá, jaxca chi yun steynele junoj awo. Jain caw Jehová jin chi walaꞌ tol queyton tuꞌ oj yunne, yutol jix jin yintajne can el ebꞌ an.
18 Yu je bꞌeybꞌal cꞌal tzet che yunne, yuxan chi jul wan tiꞌ je yibꞌan. Jaꞌ yu je penail tuꞌ yuxan cuscꞌulal jix yun je yelocoj, caw che yabꞌ syaꞌil yu, ẍi Jehová.
Scuscꞌulal Naj Jeremías Yu Sconobꞌ
19 ¡Caw chin ecꞌ txꞌumumoj yu syaꞌil! Caw chi pucꞌxi a jin pixan yu tzet lalan yuneni. Cꞌamxa chi skeꞌ jin tzꞌini eyoj. Jix wabꞌ yoc yul snukꞌ chꞌen trompeta, chi el jun aw yet jowal.
20 Txololi xacꞌal sjul skꞌaneal syaꞌilal lalan yuneni. Tuxa jix etextoj masanil jun nación tiꞌ. Jun txolan jix uchcha ey jin kꞌap na, catuꞌ jix etextoj bꞌey caan jin.
21 ¿Jantaj to wal tiempoal oj wil cꞌal oc sbandera ebꞌ soldado cꞌal wabꞌen yoc snukꞌ chꞌen trompeta?
22 Chi yalon Jehová jaxca tiꞌ: Jaꞌ ebꞌ jin conobꞌ tiꞌ, caw cꞌam snaꞌbꞌal ebꞌ, cꞌam chin yotajne el ebꞌ. Laan ebꞌ jaxca junoj unin tol cꞌam niꞌoj snaꞌbꞌal, cꞌam chi naꞌcha el niꞌoj yu ebꞌ. Caw jelan ebꞌ yunen spenail, man yotaj oj ebꞌ chi yun pax swatxꞌil, ẍi Dios.
Tzet Oj Yun Slawoj Ey Conobꞌ
23 Jain Jeremías jin tiꞌ, txꞌoxbꞌil wilaꞌ tzet oj eloc yul yibꞌankꞌinal tiꞌ, caw cusiltaj xacꞌal oj yun cantoj. Jix wilon cꞌal pax atoj satcan, cꞌamxa sajkꞌinal tituꞌ.
24 Jix wilon wan wonanlaj, tuxa cꞌal chi tzꞌeyxi eyoj, cꞌal txꞌotxꞌ tzalquiltaj chi yucxi eyoj.
25 Jix wiloni tol cꞌamxa ánima chi ecꞌ sat txꞌotxꞌ tiꞌ, cꞌamxa cꞌal pax junoj noꞌ tzꞌiquin chi ecꞌ jenenoj satcan.
26 Jix wilon cꞌal pax teꞌ awbꞌeal teꞌ, cusiltaj xacꞌal yili teꞌ, yetoj cꞌal masanil conobꞌlaj pilan jix uchchatoj. Yu sjowal scꞌul Jehová, yuxan queytuꞌ jix yun cantoj masanil wan tuꞌ.
27 Jix yalon Jehová jaxca tiꞌ: Masanil txꞌotxꞌ txꞌotxꞌ oj uchchatoj, man pax oj wakꞌ lawoj ey yin junelne.
28 Caw cuscꞌulal xacꞌal oj yun cantoj txꞌotxꞌ txꞌotxꞌ tiꞌ; cusiltaj xacꞌal yili cꞌal pax bꞌey satcan. Queytuꞌ oj yunne yutol jain Jehová jix jin naꞌbꞌalne eloj. Man oj qꞌuexchatoj, sowalil oj eloc tzet chi walaꞌ, ẍi Dios.
29 Jaꞌ yet oj yabꞌen masanil ánima sbꞌilwi stit ebꞌ iꞌbꞌil oc sjulbꞌal yetoj cꞌal ebꞌ eyoc yibꞌan noꞌ che yet jowal, oj ela ebꞌ, catuꞌ oj toj yewbꞌa el sbꞌa ebꞌ xol-laj teꞌ cꞌal satlaj chꞌen. Yu jun tuꞌ, tzꞌinini xacꞌal oj yun cantoj yul-laj conobꞌ. Cꞌamxa junoj mac oj cancanoj.
30 Jaꞌ Jerusalén tuxa jix etextoj, laan chi yute sbꞌa jaxca junoj ix ix tol naꞌbꞌa xacꞌal chi spich sbꞌa yetoj an pichile kꞌejweinaj yili, catuꞌ eyoc chꞌen oro manxa jantajoj swatxꞌil yili yinlaj, naꞌbꞌa xacꞌal chi sbꞌon yinlaj sbꞌakꞌ sat. Cꞌamxa niꞌoj yeloc apnoj yu swaꞌnen el sbꞌa ix ix tuꞌ, yutol jaꞌ ebꞌ winaj chi ochen oc ix ix tuꞌ, cꞌamxa chi ochele ix yu ebꞌ naj. Tol chi snaꞌ ebꞌ naj tzet oj yun yakꞌon camoj. Queytuꞌ yeoc Jerusalén yetoj wanojxa conobꞌ.
31 Jaꞌ ebꞌ a Sión chi el yaw tuꞌ. Caw chi wabꞌ yel yaw ebꞌ jaxca yel yaw junoj ix ix yet chi ali junoj sbꞌabꞌel unin. Chi el yaw ebꞌ, chi sjenbꞌan el skꞌabꞌ ebꞌ, chi yalon ebꞌ: ¡Ay, caw okꞌbꞌal jon cꞌul! ¡Oj cu makꞌle cam yu ebꞌ makꞌom cam ánima! ẍi ebꞌ.