Spenail Jerusalén
5
Jix yalon Jehová ey jin jaxca tiꞌ:Ecꞌ il masanil scalleal conobꞌ Jerusalén tiꞌ, chi cam ja wiloni. Cha seyon ja wil bꞌey txombꞌal tuꞌ ta ey junoj mactxequel chi bꞌeybꞌalne sjichanil, ta watxꞌ cꞌal chi yute sbꞌa. Ta ey mac chi ilcha ja wu, oj wakꞌ mimancꞌulal yibꞌan conobꞌ Jerusalén tiꞌ.
2 Ey mactxequel chin akꞌon bꞌinaoj, chin yakꞌ bꞌina ebꞌ yin slekꞌtiꞌal, ẍi Jehová.
3 Jix walon jaxca tiꞌ: Jaach jin Diosal, jaꞌ mactxequel cha seyaꞌ, jaꞌton ebꞌ ánima yel tzet chi yalaꞌ. Jix ja waoc syaꞌilal yibꞌan ebꞌ ja conobꞌ, cꞌam cꞌal ja weloc apnoj yul sat ebꞌ. Jix ja waoc syaꞌilal yibꞌan ebꞌ, ma cꞌaltaꞌ naꞌcha el yu ebꞌ. Caw pit snaꞌbꞌal ebꞌ, yel xacꞌal caw snaꞌbꞌal ebꞌ yintaj chꞌen chꞌen. Ma yoche ebꞌ chi sbꞌejcan spena bꞌeybꞌal.
4 Jain tiꞌ jix jin naꞌ jaxca tiꞌ: Tejan jaꞌ ebꞌ mebꞌa, ebꞌ cꞌam wal tzet yotaj, ebꞌ cꞌam snaꞌbꞌal, yutol man yotaj oj ebꞌ tzet chi yoche Jehová sDiosal ebꞌ, cꞌal tzet chi yalaꞌ.
5 Oj jin toj kꞌanabꞌ yetoj ebꞌ ánima tol miman yeloc apnoj. Jaꞌ ebꞌ tuꞌ, tejan yotaj ebꞌ tzetyetal chi yoche Jehová, cꞌal tzetyetal chi yal sDiosal waloni. Masanil ebꞌ tuꞌ, jix oc spitalil ebꞌ tet Dios. Cꞌamxa chi yal scꞌul ebꞌ chi sjije tzet chi yalaꞌ.
6 Yu jun tuꞌ, yuxan oj eltej noꞌ bꞌalam ey bꞌey xol-laj teꞌ yin ebꞌ, oj makꞌle cam ebꞌ yu noꞌ. Oj chiꞌle eytoj ebꞌ yu noꞌ ooj bꞌey txꞌotxꞌ cusiltaj txꞌotxꞌ. Oj oc noꞌ leopardo yin ebꞌ bꞌey yul sconobꞌ ebꞌ. Ta chi eltej ebꞌ, kocꞌ xacꞌal oj yun cantoj ebꞌ yu noꞌ, yutol caw miman spenail ebꞌ jix yaocoj, caw ecꞌal el chi yintajne el Dios ebꞌ.
7 Yu jun tuꞌ, yuxan chi yal Jehová: ¿Tzet to wal oj yun wakꞌon mimancꞌulal yin ebꞌ? Jaꞌ ebꞌ je yuninal jix jin bꞌejlecan yu ebꞌ, catuꞌ chi yakꞌon bꞌina sdiosal ebꞌ tol man dios oj. Caw miman jix yun wakꞌon sloꞌbꞌe ebꞌ, caw ma pax sjije ebꞌ tzet chi walaꞌ, asanne amulal jix yun ebꞌ, jix sjunbꞌane sbꞌa ebꞌ yetoj ebꞌ ix amul ix.
8 Laan xacꞌal ebꞌ jaxca noꞌ che caw bꞌakꞌech tol caw loꞌtzebꞌil, comon xacꞌal chi ecꞌ jininoj; yutol junjun xacꞌal chi too tzajan yintaj yistil yet winajil caan scawilal.
9 ¿Tumi man oj waoc syaꞌilal yibꞌan ebꞌ yu wan sbꞌeybꞌal tuꞌ? ¿Tumi man oj wakꞌ spajtzebꞌal jaxca smoo ẍaꞌon ebꞌ?
10 Jul ojabꞌ ebꞌ je cajat yin yakꞌon lawoj ey an je yuva, man masaniloj teꞌ oj lawoj ey yu ebꞌ. Nicꞌle ojabꞌ el yaqꞌuil an yu ebꞌ, yutol manxa wetoj yeoc an.
11 Jain wal caw Jehová jin chi walaꞌ, tol queytuꞌ oj yunne, yutol jix jin bꞌejlecan yu ebꞌ Israel yetoj ebꞌ a Judá, ẍi Jehová.
Wan Syaꞌilal Oj Juloj
12 Jaꞌ conobꞌ Israel cꞌal conobꞌ Judá, jix yal ebꞌ tol man yotaj oj Jehová ebꞌ. Chi yal ebꞌ jaxca tiꞌ: Jaꞌ Dios, tumi ey tzet chi snaꞌ yaontej kibꞌan. Cꞌam syaꞌilal oj jul kibꞌan, cꞌam jowal tam wal wail oj jul cu xol.
13-14 Jaꞌ ebꞌ ẍejabꞌ Dios tuꞌ, cꞌam yeloc apnoj skꞌane ebꞌ chi yalaꞌ, manaj skꞌane Dios chi yal ebꞌ, ẍi ebꞌ.
Jaꞌ Dios, yaaw yibꞌan masanil, jaꞌ chi alon wan tiꞌ ey jin: Yu cꞌal tol chi yal ebꞌ jaxca tuꞌ, yuxan oj jul syaꞌilal yibꞌan ebꞌ. Jaꞌ jin kꞌane chi walaꞌ, laan jaxca xaj kꞌakꞌ; jaꞌ ebꞌ conobꞌ tiꞌ, laan oj yun ebꞌ jaxca teꞌ siꞌ. Jaꞌ jun kꞌakꞌ tuꞌ oj akꞌon lawoj ey masanil ebꞌ, ẍi Jehová.
15 Jaꞌcaw Jehová chi alon jaxca tiꞌ: Jex yicꞌaal Israel, jaꞌ jun conobꞌ caw naat ey, jaꞌ oj wiꞌtej je yin, jun conobꞌ tol caw ey yip, ey cꞌaltaꞌ yet peyxa, jaꞌton jun conobꞌ tol man otajbꞌiloj stiꞌ je yu, tam wal oj naꞌcha el tzetyetal oj yal ebꞌ.
16 Masanil ebꞌ tuꞌ, caw wal jelan ebꞌ yin akꞌo jowal, iꞌbꞌil oc camich yu sjulbꞌal ebꞌ.
17 Oj sloꞌeytoj sat je yawo ebꞌ, cꞌal je loꞌbꞌe, oj makꞌle cam ebꞌ je cꞌaal cꞌal ebꞌ ix je cutzꞌin yu ebꞌ. Oj ẍiꞌon eytoj je meꞌ cꞌal noꞌ je wacax ebꞌ; oj sloꞌon cꞌal pax eytoj sat je uva cꞌal sat je higo ebꞌ. Jaꞌ yetoj sjulbꞌal ebꞌ tuꞌ oj yakꞌ lawoj ey je conobꞌ tol watxꞌ yeoc smuroal tol eyoc yipoj je cꞌul, ẍi Jehová.
18 Jaꞌcaw Jehová chi alon jaxca tiꞌ ey jin: Caxcꞌal mi tol miman syaꞌilal oj jul yet wan cꞌual tuꞌ, man oj wakꞌ lawoj ey jin conobꞌ tuꞌ yin junelne. 19 Ta ey mac oj kꞌanlen ey jaach: ¿Tzet yu, yuxan queytuꞌ chi cu yute Jehová cu Diosal jaxca tiꞌ? ta ẍi ebꞌ; chach takꞌwi tet ebꞌ jaxca tiꞌ: Queytuꞌ jix yute yutol jix je bꞌejcan Naj. Jix jex oc je yakꞌon servil wan comon dios yul je conobꞌ bꞌey caan jex. Yu jun tuꞌ, yuxan sowalil tol oj je yakꞌ servil ebꞌ txꞌoj conobꞌal bꞌey junojxa conobꞌ, ja chi, ẍi Dios.
Chi Tenchanele Ebꞌ Conobꞌ Israel
20 Jix yalon pax Jehová jaxca tiꞌ: Alwej tet ebꞌ yicꞌaal Jacob caan yul yet Judá:
21 Jantaj jex cꞌam je naꞌbꞌal, abꞌwej wan kꞌane tiꞌ: Caxcꞌal ey sbꞌakꞌ je sat, cꞌam chi skeꞌ je yiloni. Ey je txiquin, cꞌam pax che yabꞌe.
22 Jaex tiꞌ, cꞌam weloc apnoj yul je sat. Jain tiꞌ jix jin waꞌne ey chꞌen arena smajbꞌaniloj stiꞌlaj jaꞌ mar, jaꞌ jun majbꞌal tuꞌ, junelne tol cꞌam chi skeꞌ yecꞌtoj jaꞌ jaꞌ yibꞌan. Caxcꞌal chi a pomna sat jaꞌ, yet chi bꞌilwi a jaꞌ, cꞌam chi skeꞌ yecꞌtoj jaꞌ bꞌey ey can ey smoonal tuꞌ. Caxcꞌal queytuꞌ yeoc wipalil, caw cꞌam chex xiw niꞌoj ey jin.
23 Jaex tiꞌ caw pit je naꞌbꞌal, jix jin je bꞌejcanoj.
24 Cꞌam chi tit niꞌoj yin je naꞌbꞌal yet che yalon jaxca tiꞌ: Ey ojabꞌ yeloc apnoj cu Diosal yul cu sat, tol jaꞌ Naj chi akꞌon nabꞌ kibꞌan yin stiempoal nabꞌilkꞌinal, catuꞌ chi yakꞌon cꞌal pax sat kawo yin stiempoal, man je chioj niꞌoj.
25 Yu cꞌal je penail tuꞌ, jaꞌ chi tenon oc tucan wan tuꞌ, yuxan cꞌam chi skeꞌ je yakꞌon tzalabꞌoj je cꞌul yetoj jin yaxilal, ẍi Jehová.
26 Jaꞌ xol ebꞌ jin conobꞌ tiꞌ, ey wal ebꞌ ánima caw pena sbꞌeybꞌal; chi yakꞌ eyqꞌuey yet animail ebꞌ jaxca chi yun yeyqꞌuey noꞌ tzꞌiquin yu yaal.
27 Chi yakꞌ no yul sna ebꞌ yu masanil tzet chi yelkꞌane, jaxca chi yun sno yul steꞌ noꞌ tzꞌiquin bꞌey chi octoj junoj miman bꞌulan tzꞌiquin, yuxan caw chi yiꞌ yip ebꞌ yu tzet chi yelkꞌane tuꞌ.
28 Caw bꞌakꞌech ebꞌ, watxꞌ tzet chi sloꞌ ebꞌ. Cꞌamxa chi alcha jantaj spenail ebꞌ. Cꞌam chi swaꞌne yeoc skꞌane ebꞌ cꞌamxa smam, cꞌal ebꞌ cꞌamxa xutx; cꞌam chi waꞌxi yeoc skꞌane ebꞌ mebꞌa yin sjichanil yu ebꞌ ey yopiso.
29 ¿Tumi man oj waoc syaꞌilal yibꞌan ebꞌ yu wan tzetyetal tuꞌ? Jain caw Jehová jin chi walaꞌ, tol oj wakꞌ spaj tet ebꞌ ánima jaxca wal smoo ẍaꞌon spaj ebꞌ yu spenail ebꞌ tuꞌ, ẍi Dios.
30 Caw chi qꞌuey cu cꞌul yu spenail tzet chi yun ebꞌ ánima bꞌey jun conobꞌ tiꞌ.
31 Asan lekꞌtiꞌal chi yal ebꞌ chi yaloc sbꞌa jin chejabꞌoj. Jaꞌ ebꞌ yakꞌomal xaambꞌal chi yakꞌ yaawil ebꞌ jaxca chi yoche scꞌul. Jaꞌ jun jin conobꞌ tiꞌ, watxꞌ xacꞌal chi yabꞌ ebꞌ jaxca tuꞌ. Yu jun tuꞌ, ¿tzet wal oj yun ebꞌ yet oj jul slawubꞌal?