Joybꞌil Ey Ebꞌ Jerusalén Yu Ebꞌ Chi Jowi Oc Yin Ebꞌ
6
¡Jex yicꞌaal Benjamín, seywej bꞌey che col je bꞌa!¡Elanwej bꞌey Jerusalén! Xuꞌwej chꞌen trompeta bꞌey Tecoa, awej oc mucꞌ yin txꞌoxbꞌanil yil ebꞌ bꞌey Bet-haquérem yutol ey jun miman syaꞌilal chi tit bꞌey yetcꞌulal norte.
2 Tuxa wal oj jin qꞌueyel ebꞌ ánima ey bꞌey conobꞌ Sión, ebꞌ tol caw ochebꞌil taꞌle yili.
3 Jaꞌ ebꞌ rey yetoj soldado chi jul yin jun conobꞌ tiꞌ, chi swaꞌne ey bꞌulan sbꞌa ebꞌ bꞌey yinlaj tiꞌ. Junjun xacꞌal chi swaꞌne ey sbꞌa bꞌey chi cani.
4 Jaꞌ ebꞌ je cajat chi yal ebꞌ jaxca tiꞌ: Kakꞌwej lista cu bꞌa yet chi kakꞌon jowal yin. Yet mi wal chuman cꞌu catuꞌ chi cu oc kakꞌon jowal yin. Asan xin, tuxa jix ey cꞌu, lalanxa skꞌejbꞌi eyoj.
5 Jaꞌ tinaniꞌ xin, jaꞌ yet akꞌbꞌalil, catuꞌ oj kakꞌon jowal yin, oj cu makꞌey storreal sconobꞌ ebꞌ, ẍi ebꞌ je cajat tuꞌ.
6 Jaꞌ Jehová Naj Yaaw yibꞌan masanil, jaꞌ jix akꞌon jun chejbꞌanile tiꞌ:
Tzokꞌwej el teꞌ teꞌ, che waꞌnen a junoj waalubꞌe yet oj jex oc je yakꞌon jowal yin Jerusalén. Oj waoc syaꞌilal yibꞌan jun conobꞌ tiꞌ, yutol asanne yin etne ánima jix yun ebꞌ.
7 Jaꞌ bꞌey Jerusalén tuꞌ chi pitzcꞌu a spenail, jaxca wal chi yun yaol snukꞌ junoj jaꞌ jaꞌ. Asan makꞌwal cꞌal etne ánima chi bꞌina tituꞌ. Yu jun tuꞌ, yuxan oj waoc syaꞌilal yibꞌan ebꞌ.
8 Waꞌnewej oc je naꞌbꞌal jex a Jerusalén, yet watxꞌ cꞌam chi wiꞌel jin naꞌbꞌal je yin. Ta cꞌamaj, oj wakꞌcan je txꞌotxꞌ tiꞌ yin cusiltajil. Oj cancan yin tol cꞌamxa junoj mactxequel oj caey can ecꞌoj, ẍi Jehová.
Jix Al-le Yu Syaꞌilal
9 Jix yalon Jehová, Naj Yaaw yibꞌan masanil jaxca tiꞌ: Jaꞌ ebꞌ conobꞌ Israel chi cancanoj, pilan oj ecꞌ yambꞌale a ebꞌ, jaxca chi yun yecꞌ syambꞌale el sat an uva cꞌamxa junoj chi cancanoj. Yuxan jaꞌ yet cꞌamto chi yun jun tuꞌ, colcan el jantaj mac chi skeꞌ yelcanoj, yutol jaꞌ yet chi jul ebꞌ junelxa, laan jaxca chi yun yecꞌ skꞌabꞌ junoj mulnawom yin syambꞌan el sat uva yin skꞌabꞌlaj teꞌ, ẍi Dios ey jin.
10 Jix jin takꞌwi tet jaxca tiꞌ: ¿Mactxequel oj abꞌen pax ey jin, ta tol oj jin kꞌanabꞌ el yin walon jun skꞌaneal tiꞌ? Jaach jin Diosal, jaxca wal tol majan xiquin ebꞌ, cꞌam chi skeꞌ yabꞌen ebꞌ. Tucꞌal chi bꞌuchwa ebꞌ, cꞌam chi ẍaꞌ yabꞌ ja kꞌane ebꞌ.
11 Jun laan chi yun wabꞌen sjowal ja cꞌul yetoj jun conobꞌ tiꞌ jaach jin Diosal. Cꞌamxa chi skeꞌ jin mitxꞌon oc tucanoj, jin chi.
Jix yalon pax Jehová ey jin jaxca tiꞌ: Bꞌejey sjowal jin cꞌul tuꞌ yibꞌan ebꞌ chi ecꞌ yul-laj calle, cꞌal bꞌey yaman ecꞌ ebꞌ achꞌe. Oj mitxꞌle ebꞌ winaj, yetoj cꞌal yistil, yetoj cꞌal ebꞌ caw icham ánima xa.
12 Masanil sna ebꞌ, smulnail ebꞌ cꞌal yistil ebꞌ, txꞌojxa mac oj iꞌon cantoj. Yutol jaꞌcaw Jehová jin chi walaꞌ tol oj wiꞌa jin kꞌabꞌ yin waon oc syaꞌilal yibꞌan masanil mactxequel caan bꞌey jun nación tiꞌ.
13 Jaꞌ ebꞌ miman yeloc apnoj, cꞌal ebꞌ cꞌam yeloc apnoj, asanxane yiꞌon tzetyetal yin spenail chi snaꞌ ebꞌ. Laan xacꞌal chi yute sbꞌa ebꞌ jin chejabꞌ cꞌal ebꞌ yakꞌomal xaambꞌal yetoj ebꞌ, asanxane elkꞌan chi yun ebꞌ.
14 Quey cꞌal tuꞌ chi yoche ebꞌ chi swaꞌne, jantaj wan syaꞌilal eyoc yibꞌan ebꞌ jin conobꞌ, chi yalon ebꞌ tol watxꞌ cꞌal yeoc masanil, ti tol man pax watxꞌoj.
15 Cꞌam chi qꞌuixwi niꞌoj ebꞌ yu wan tzetyetal chi yun ebꞌ, caw cꞌam chi techa wu yu tzet chi yun ebꞌ tuꞌ. Cꞌam chi qꞌuixwi ebꞌ; tam wal chi cajbꞌi el sat ebꞌ yu qꞌuixwilal. Yu jun tuꞌ, jain caw Jehová jin chi walaꞌ, tol oj eyqꞌuey ebꞌ xol ebꞌ eyqꞌueynajxa. Yet oj waon oc syaꞌilal yibꞌan ebꞌ, oj lawoj ey ebꞌ, ẍi Dios.
Spitalil Ebꞌ Conobꞌ Israel
16 Jix yal Jehová tet ebꞌ sconobꞌ jaxca tiꞌ: Ocanwej tucan bꞌey chi ẍaꞌle sbꞌa wanoj bꞌe, catuꞌ che yiloni. Catuꞌ che kꞌanlen ecꞌoj bꞌeytuꞌ ey jun icham bꞌe tuꞌ, bꞌeytuꞌ eyoc junoj bꞌe watxꞌ. Jaꞌ yul junoj bꞌe watxꞌ, jatuꞌ chex toi, catuꞌ oj ilcha xewilal je yu, jin chi. Jix je yalon jaxca tiꞌ: Cꞌamaj, cꞌam chi koche chi cu too tituꞌ, je chi pax oj.
17 Jix waon oc wan je teynemal, jix walon jaxca tiꞌ: Majwej je yabꞌ yet oj xuꞌle chꞌen trompeta yu jun je teynemal tuꞌ, jin chi. Catuꞌ jix je yalon jaxca tiꞌ: Cꞌam chi yal cu cꞌul chi kabꞌe, je chi.
18 Yu jun tuꞌ, yuxan chi wal jaxca tiꞌ: Majwej je yabꞌ jex conobꞌ, otajnewej eloj tzet oj jul yin jin conobꞌ tiꞌ.
19 Abꞌwej je masanil bꞌey sat txꞌotxꞌ txꞌotxꞌ tiꞌ. Tol oj wiꞌtej junoj syaꞌilal caw pena xacꞌal yibꞌan jun conobꞌ tiꞌ, yu spenail chi yoche ebꞌ chi yunne; yutol ma ẍaꞌ yabꞌ jin kꞌane ebꞌ. Jaꞌ tzet jix yun ebꞌ, tol jix yintajne el cuybꞌanile jix walaꞌ.
20 Jex jin conobꞌ, ¿Tzet to wal chi oc che yiꞌtej incienso yet conobꞌ Sabá ey jin, cꞌal an cꞌultaj tol sukꞌukꞌi yoc sabꞌ chi tit bꞌey wanxa conobꞌ tol naat ey? Cꞌamxa chi ẍaꞌ jin cꞌul je xaambꞌal che yakꞌ tzꞌaꞌoj, tam wal wanojxa je saꞌbꞌeal, ẍi Jehová.
21 Yu jun tuꞌ, yuxan jix yal Jehová ey jin jaxca tiꞌ: Oj jex waoc jaxca bꞌey chi cu makꞌoc kajan sattaj jun conobꞌ tiꞌ, catuꞌ oj eyqꞌueyoj. Ebꞌ mame, ebꞌ cꞌaale, ebꞌ caan scawilal ebꞌ, cꞌal yetoj swatxꞌil ánima ebꞌ, laan cꞌal oj yun scam masanil ebꞌ, ẍi Dios.
Jun Jowal Chi Tit Bꞌey Yetcꞌulal Norte
22 Jix yalon Jehová jaxca tiꞌ: Jata cꞌal bꞌey yetcꞌulal norte naat ye cantoj, jatuꞌ lalan stit jun conobꞌ caw ey yipalil yakꞌon jowal.
23 Iꞌbꞌil oc julbꞌal cꞌal chꞌen lanza yu ebꞌ. Caw yel xacꞌal jow ebꞌ; cꞌamxa cꞌal chi okꞌ scꞌul ebꞌ yin yet animail. Jaxca wal sbꞌilwi sat jaꞌ mar, queytuꞌ kabꞌen sbꞌilwi stit ebꞌ yibꞌan che. Watxꞌ xa yeoc ebꞌ yet chi jul ebꞌ yakꞌon ebꞌ jowal je yin jaex caan jex bꞌey Jerusalén tiꞌ, ẍi Jehová.
24 Chi yal ebꞌ ánima bꞌey Jerusalén jaxca tiꞌ: Tuxa jix kabꞌ jun kꞌane tuꞌ, caw oj el kip yu xiwcꞌulal. Caw yaꞌ yoc chi kabꞌe, jaxca chi yun yabꞌen syaꞌilal junoj ix ix yet chi aapnoj scꞌual swaꞌxi scꞌul yu unin.
25 ¡Cꞌam ojabꞌxa chex eltoj mulnail, cꞌam ojabꞌxa chex eltoj ecꞌabꞌ yul-laj bꞌe! Ey xacꞌal ecꞌ ebꞌ je cajat yetoj smitxꞌkꞌabꞌ yet jowal. Ey xacꞌal xiwcꞌulal masanil bꞌey yinlaj conobꞌ yu jowal, ẍi ebꞌ ánima.
26 ¡Jex jin conobꞌ, awej oc an eel pichile yu je txꞌoxon el je cuscꞌulal! ¡Bꞌalwej ecꞌ je bꞌa xol stikꞌakꞌil taan! ¡Ocanwej yin cuscꞌulal cꞌal yin okꞌil sicꞌlebꞌil, jaxca wal yet chi cam junoj je yuninal tol jun chꞌan qꞌuetxan, yutol jaꞌ mactxequel oj jul cu yakꞌon lawoj, tuxa chi jul ebꞌ kin!
27 Jix yalon Jehová ey jin jaxca tiꞌ: Chach waoc sattaj yet cha wakꞌon porobꞌal ebꞌ jin conobꞌ tiꞌ. Chi cam ja wiloni, catuꞌ cha wilon tzet utbꞌil yili sbꞌeybꞌal ebꞌ.
28 Masanil ebꞌ caw pit snaꞌbꞌal ebꞌ, caw pena sbꞌeybꞌal ebꞌ. Ánima tol cꞌamxa snaꞌbꞌal, alom kꞌumale ebꞌ. Jix cawbꞌi el snaꞌbꞌal ebꞌ. Laan xacꞌal ebꞌ jaxca chꞌen bronce ma chꞌen hierro.
29 Jaꞌ yet chi xuꞌle a kꞌakꞌ yu junoj xubꞌal kꞌakꞌ, chi cajbꞌi kꞌakꞌ, catuꞌ chi uli el chꞌen plomo xol chꞌen plata. Jal pax ebꞌ jin conobꞌ tiꞌ xin, junelne cꞌam niꞌoj yeloc apnoj ta chi waꞌnele oc ebꞌ, yutol jaꞌ pena bꞌeybꞌale cꞌam chi qꞌueyel xol ebꞌ.
30 Oj mi al-le yin ebꞌ tol laan ebꞌ jaxca chꞌen plata tol kꞌojbꞌilxa eloj, yutol jain Jehová jin tiꞌ jix jin kꞌojel ebꞌ.