Skꞌane Naj Jeremías Jix Yal Bꞌey Templo
7
Jix kꞌanabꞌ Jehová tet naj Jeremías, jix yaloni: 2 Ocan tucan bꞌey stiꞌ spuertail templo, catuꞌ cha walon wan kꞌane tiꞌ tet ebꞌ ánima: Je masanil jex caan bꞌey Judá, mac jex chex octoj bꞌey spuertail conobꞌ tiꞌ yin je yoc yin eyilal tet Jehová, chi cam wal je yabꞌen jun kꞌane tiꞌ. 3 Jaꞌ Jehová Naj Yaaw yibꞌan masanil, jaꞌton cu Diosal jaon Israel jon tiꞌ, jaꞌ chi alon jaxca tiꞌ: Ta oj je waꞌne oc je bꞌeybꞌal cꞌal je naꞌbꞌal, oj jex wakꞌ cꞌal caey ecꞌ bꞌey sat jun txꞌotxꞌ tiꞌ. 4 Cꞌam ojabꞌ che yaoc je naꞌbꞌal yin wan ebꞌ chi alon lekꞌtiꞌ kꞌane tol chi yal ebꞌ jaxca tiꞌ: Kotaj jaon tiꞌ, tol cꞌam tzet oj jul kibꞌan, yutol jaꞌ titiꞌ eyecꞌ stemplo Jehová, jaꞌton stemplo Jehová tiꞌ, ẍi ebꞌ, chi yalon ebꞌ.5 Ta che waꞌne oc je bꞌeybꞌal cꞌal je naꞌbꞌal, catuꞌ watxꞌ cꞌal che yute je bꞌa ey jex junjun jex; 6 ta cꞌam che yetne ebꞌ txꞌoj conobꞌal, ebꞌ unin cꞌamxa smam cꞌal ebꞌ cꞌamxa xutx, cꞌal ebꞌ ix ix camnajxa yichamil caan je xol; cꞌam che makꞌ cam ebꞌ ánima tol cꞌam spenail; cꞌam chex oc yin eyilal tet wan comon dios tol chex etnen eloj. 7 Ta queytuꞌ che yunne, oj jex wakꞌ caey ecꞌ bꞌey jun txꞌotxꞌ tiꞌ, jaꞌton txꞌotxꞌ jix wakꞌ yin junelne tet ebꞌ je mam icham.
8 Jaex tiꞌ, che yaoc wan kꞌane tol cꞌam niꞌoj yeloc apnoj yipoj je cꞌul. 9 Chex elkꞌanwi, chex makꞌwi cam ánima, chex mulwi, che yakꞌ je tiꞌ yin lekꞌtiꞌal, che yakꞌon tzꞌaꞌ teꞌ incienso tet jun comon dios Baal, catuꞌ chex oc yin eyilal tet comon dios, tol cꞌam je yalon je yet yin. 10 Chi lawi tuꞌ, catuꞌ chex jul pax oc jin sattaj bꞌey jin templo tiꞌ, che yaloni: Cꞌam tzet oj cu ionoj, je chi, catuꞌ che bꞌeybꞌalnen cꞌal wan tzetyetal tol cꞌam chi woche. 11 ¿Chim je naꞌ tol jaꞌ jin templo tiꞌ, laan jaxca junoj nachꞌen bꞌey chi yewbꞌa el sbꞌa ebꞌ elkꞌom? Jain caw Jehová jin chi walaꞌ tol chi wil cꞌal masanil tzet che yunne. 12 Asiꞌwej bꞌey Siló bꞌey ecꞌlenaj jin calubꞌal, jaꞌton jun tuꞌ jix jin sicꞌ can el yin sbꞌabꞌelal bꞌey jix jin caey ecꞌoj, catuꞌ oj je yilon tzet jix wun yetoj spenail ebꞌ je mam icham tuꞌ. 13 Jix wal junel cael ey jex yu je bꞌeybꞌal, tumi jix je jije tzet chi walaꞌ, tam wal jix jex takꞌwi ey jin. 14 Yu jun tuꞌ, yuxan jain wal caw Jehová jin chi walaꞌ, tol jaxca jix wun yetoj bꞌey ecꞌlenaj jin calubꞌal bꞌey Siló tuꞌ, queytuꞌ oj wun yetoj jin templo tiꞌ, jaꞌton jun jix wakꞌ tet ebꞌ je mam icham cꞌal ey jex, jaꞌton jun che yaoc yipoj je cꞌul tinaniꞌ. 15 Oj jex wiꞌel jin sattaj, jaxca wal jix yun wiꞌon el ebꞌ je yican jin sattaj yet yalantoj, jaꞌton ebꞌ yicꞌaal Efraín, ẍi Jehová, ja chi tet ebꞌ.
Spenail Ebꞌ Israel
16 Jaach Jeremías, cꞌam ojabꞌ chach txali yu jun conobꞌ tiꞌ. Cꞌam ojabꞌ cha wal ey jin tam wal chach oc tean win yu ebꞌ. Cꞌam ojabꞌ chach oc tean win yu, yutol man oj wabꞌ tzet oj ja walaꞌ. 17 ¿Tumi cꞌam cha wil tzet chi yun ebꞌ conobꞌ yul yet Judá cꞌal bꞌey yul-laj scalleal conobꞌ Jerusalén tiꞌ? 18 Ilaꞌ tol jaꞌ ebꞌ uninale chi seyontej teꞌ siꞌ, jaxa ebꞌ mame chi nubꞌon oc kꞌakꞌ, jaꞌ ebꞌ ix txutxe chi waꞌnen ixim wocꞌox pan yet chi yakꞌon yofrenda ebꞌ tet sdiosal, jun chi yij syaawil satcan.a Caw wal chi xꞌemtej sjowal jin cꞌul ebꞌ, jaxca yet chi yakꞌon yal uva ebꞌ yin ofrendail tet comon dios. 19 Jain Jehová jin chi walaꞌ, tol man asanne oj jin chin yetne ebꞌ; jacꞌal oc ebꞌ chi yetne sbꞌa, chi yiꞌel sqꞌuixwil ebꞌ. 20 Yu jun tuꞌ xin, jain Jehová jin chi walaꞌ, tol oj watoj sjowal jin cꞌul yibꞌan ebꞌ ánima titiꞌ, cꞌal yibꞌan noꞌ noꞌ cꞌal yibꞌan teꞌ teꞌ, cꞌal yibꞌan masanil yawo ebꞌ. Laan oj yun jun tuꞌ jaxca wal junoj bꞌolobꞌ tol cꞌamxa chi tani, ẍi Dios.
21 Jaꞌ Jehová sDiosal Israel, Naj Yaaw yibꞌan masanil chi yal tet sconobꞌ jaxca tiꞌ: Akꞌwej je naꞌbꞌal je chiꞌon noꞌ xaambꞌal chi akꞌle tzꞌaꞌ yetoj cꞌal wanxa noꞌ xaambꞌal. 22 Jaꞌ yet jix wiꞌon eltej ebꞌ je mam icham bꞌey txꞌotxꞌ Egipto, jix wakꞌ jin chejbꞌanil tet ebꞌ, man asanne oj yu yakꞌon xaambꞌal cꞌal yofrenda ebꞌ. 23 Jaꞌ tzet jix wal tet ebꞌ yin sbꞌabꞌelal, tol jijem ebꞌ ey jin. Ta jaxca tuꞌ, jain ton sDiosal jin ebꞌ, jaxa ebꞌ oj oc can ebꞌ jin conobꞌoj. Catuꞌ jix waloni tol chi sjije ebꞌ jaxca tzet jix walaꞌ, yet watxꞌ cꞌal chi eloc ebꞌ. 24 Jaxa jix yunne, ma ẍaꞌ yabꞌ ebꞌ tam wal jix sjije ebꞌ. Jaꞌ tzet jix yun ebꞌ, tol jix yakꞌ pitbꞌoj el snaꞌbꞌal ebꞌ, catuꞌ jix sbꞌeybꞌalne spenail ebꞌ jaxca chi yoche scꞌul. Yel xacꞌal jix yetne el sbꞌa ebꞌ. Ma xacꞌal swaꞌne oc snaꞌbꞌal ebꞌ. 25 Yet tax jix eltej ebꞌ je yichmam bꞌey Egipto masantaꞌcꞌal tinaniꞌ, jix wal tet jin chejabꞌ. 26 Jal jex jaex tiꞌ, ma je jije tzet chi walaꞌ. Pit jix je yute je bꞌa. Yel xacꞌal pena jix je yute je bꞌa yintaj ebꞌ je mam icham.
27 Jaach Jeremías, al masanil wan tiꞌ tet ebꞌ, caxcꞌal man oj ẍaꞌ yabꞌ ebꞌ ey jaach. 28 Al tet ebꞌ jaxca tiꞌ: Jaex tiꞌ junelne tol pit che yute je bꞌa, cꞌam chi yal je cꞌul chex akꞌle cuenta yu cu Diosal. Cꞌamxa chi bꞌina niꞌoj jijemal je xol, ja chi tet ebꞌ.
29 ¡Jex a Jerusalén, tzujwej el xil je jolom yu cuscꞌulal, catuꞌ che kꞌojon eloj! Jaꞌ bꞌey txꞌotxꞌ tzalquiltaj bꞌey chi mayayi yili chi too je bꞌitne bꞌit yet cuscꞌulal, yutol tuxa jix jex jin bꞌejcan yu sjowal jin cꞌul, ẍi Jehová.
Txꞌotxꞌ Panan Yet Ebꞌ Makꞌbꞌil Camoj
30 Jix yalon Jehová jaxca tiꞌ: Jaꞌ ebꞌ ánima bꞌey Judá, caw pena tzet chi yun ebꞌ jin sattaj. Jix yaoctoj sdiosal ebꞌ tol yaabꞌetaj bꞌey yul jin templo, caw jix etex el snail jin kꞌane yu ebꞌ. 31 Jaꞌ bꞌey spananil sjobꞌeal Ben-hinom, jatuꞌ jix swaꞌne a jun yet xaambꞌal ebꞌ bꞌey Tófet, chi yakꞌon tzꞌaꞌ scꞌaal cꞌal scutzꞌin ebꞌ tituꞌ. Tumi jain jix wakꞌ yun ebꞌ. Tam wal ey bꞌey jix ecꞌ jun tuꞌ yin jin naꞌbꞌal. 32 Yu jun tuꞌ, jain Jehová jin chi walaꞌ, tol oj apnoj oc scꞌual tol jaꞌ jun panan tuꞌ manxa oj yij Tófet, tam wal spananil sjobꞌeal Ben-hinom, jaxa sbꞌi oj yij jaxca tiꞌ: Spananil Sjobꞌeal yet ebꞌ Makꞌbꞌil Camoj. Yutol oj mujle ánima bꞌey Tófet masantaꞌcꞌal oj noel sat jun txꞌotxꞌ tuꞌ. Cꞌamxa bꞌey oj skeꞌ smujle ebꞌ. 33 Yu jun tuꞌ, jaꞌ smimanil wan ánima tuꞌ oj oc ẍiꞌbꞌeoj noꞌ miij cꞌal noꞌ chiꞌwawom noꞌ ey xol-laj teꞌ. Cꞌamxa mac oj xibꞌten el noꞌ yin ebꞌ. 34 Oj wakꞌ qꞌueya ebꞌ ánima bꞌey conobꞌlaj yul yet Judá. Jaxa yul-laj scalleal conobꞌ yet Jerusalén, cꞌamxa bꞌit yet kꞌin, tam wal eyto tzalacꞌulal oj ocoj. Cꞌamxa sbꞌital yet nupil oj ocoj. Jaxca tol cusiltaj txꞌotxꞌ oj yun can jun conobꞌ tuꞌ, ẍi Dios.