8
Jix yalon pax Jehová jaxca tiꞌ: Jaꞌ yet jun tiempoal tuꞌ, oj iꞌle eltej sbꞌajil ebꞌ rey bꞌey mujan ebꞌ, cꞌal sbꞌajil ebꞌ syaawil ebꞌ a Judá, yetoj cꞌal yet ebꞌ yakꞌomal xaambꞌal, cꞌal yet ebꞌ jix yaloc sbꞌa jin chejabꞌoj, cꞌal yet ebꞌ jix caey ecꞌ bꞌey Jerusalén. 2 Oj cancan bꞌulan wan bꞌaj tuꞌ xol yajan cꞌu, cꞌal xol yajan xꞌaaw cꞌal xol yajan weycan. Yutol jaꞌ yet iquis ecꞌ ebꞌ, tol jix scamcꞌulne wan tzejtebꞌal ebꞌ tuꞌ. Jix yal sbꞌa ebꞌ tet cꞌal yoc ebꞌ yin eyilal tet. Yu jun tuꞌ, man oj yambꞌale a sbꞌajil ebꞌ ánima tuꞌ, tam wal oj mujle ebꞌ. Oj can bꞌulan tituꞌ jaxca chi yun yey bꞌulan stzꞌaꞌ noꞌ noꞌ. 3 Jain Jehová, yaaw jin yibꞌan masanil, jain chi walaꞌ, tol jaꞌ ebꞌ ánima chi to can yin yiquisal xol junojxa conobꞌ tuꞌ, oj yoche xacꞌal ebꞌ tol oj camoj, yintaj tol chi can ebꞌ yin yiquisal catuꞌ chi sajlem cantoj ebꞌ bꞌey junojxa conobꞌ.Syaꞌilal Yibꞌan Conobꞌ Israel
4 Jaach Jeremías, jain Jehová jin chi walaꞌ, al jin kꞌane tet jun conobꞌ tiꞌ:
Ta ey junoj mactxequel chi telcꞌotoj, chi a pax waan junelxa. Ta ey mac chi qꞌueytoj bꞌey yul junoj bꞌe, chi meltzo pax yintaj junelxa.
5 Jal jex jaex Israel jex tiꞌ, ¿Tzet yuxan junelne che poꞌoel je bꞌa ey jin? Jex a Jerusalén, ¿Tzet yuxan cꞌamxa chex meltzotej ey jin? ¿Tzet yuxan che yakꞌ etnele je bꞌa, cꞌamxa chi yal je cꞌul chex meltzotej ey jin?
6 Jix jin maj wabꞌ tzet che yalaꞌ, junelne cꞌam junoj mac chi kꞌanabꞌ yin sjichanil. Cꞌam junoj chi snaꞌ sbꞌa scꞌul yin spenail catuꞌ chi yaloni: ¿Tzet wal jix wunne? man ẍi oj. Masanil ebꞌ chi too yul sbꞌe, jaxca chi yun stoo lemna noꞌ che yin jowal.
7 Jaꞌ noꞌ cigüeña chi ecꞌ jenenoj satcan, yotaj noꞌ bꞌakꞌin oj meltzo noꞌ. Ilaꞌ noꞌ cuateꞌ, noꞌ tzꞌutic, cꞌal noꞌ grulla, yotaj noꞌ bꞌakꞌin oj toj noꞌ bꞌey junojxa lugar. Jal jex jaex jin conobꞌ jex tiꞌ, junelne man je yotaj oj niꞌoj jin chejbꞌanil.
8 ¿Tzet yuxan che yal jaxca tiꞌ: Tol caw jelan je naꞌbꞌal, tol je yotaj jin chejbꞌanil je yaloni? ¡Ilaꞌ ebꞌ chi tzꞌibꞌen ley, chi sqꞌuextoj ebꞌ tzet chi yal ley tuꞌ!
9 Jaꞌ wan jelan yalon tuꞌ qꞌuixwiltaj xacꞌal oj yun can ebꞌ, oj somcha a snaꞌbꞌal ebꞌ, oj tit yibꞌan ebꞌ. Ilaꞌ tol jix yintajne el jin kꞌane ebꞌ. ¿Tzet wal oj yun yiꞌon sjelanil ebꞌ?
10 Yu jun tuꞌ, yuxan oj wa cantoj yistil ebꞌ yul skꞌabꞌ wanxa winaj, yetoj cꞌal xꞌotxꞌ ebꞌ, txꞌojxa mactxequel oj iꞌon can ocoj. Ebꞌ miman yeloc apnoj cꞌal ebꞌ cꞌam yeloc apnoj, asanxane yiꞌon tzetyetal ebꞌ yin spenail chi snaꞌ. Tol tax ey ebꞌ jin chejabꞌ, cꞌal ebꞌ yakꞌomal xaambꞌal asanxane elkꞌan chi yun pax ebꞌ.
11 Chi yalon ebꞌ tol watxꞌ chi yun swaꞌne yeoc jantaj syaꞌilal ey xol ebꞌ jin conobꞌ, catuꞌ chi yalon ebꞌ tol watxꞌ cꞌal yeoc masanil, ti tol man pax watxꞌoj.
12 Cꞌam chi qꞌuixwi niꞌoj ebꞌ swaꞌnen wan tzetyetal cꞌam chi techa wilon oc yin ebꞌ tuꞌ. Cꞌam chi cajbꞌi el niꞌoj sat ebꞌ yu qꞌuixwilal. Yu jun tuꞌ, jain Jehová jin chi walaꞌ, tol oj eyqꞌuey ebꞌ xol ebꞌ eyqꞌueynajxa. Yet oj ale oc syaꞌilal yibꞌan ebꞌ, oj lawoj ey ebꞌ, ẍi Jehová.
13 Chi yalon pax Jehová jaxca tiꞌ: Oj wiꞌel ebꞌ jin conobꞌ tiꞌ jaxca chi yun skꞌuple a ixim tiriw, ma jaxca junoj yakꞌil uva, ma junoj steꞌal higo cꞌam junoj sat, queytuꞌ yeoc ebꞌ. Yu jun tuꞌ, yuxan jaꞌ tzet jix wakꞌ tet ebꞌ, oj wa cantoj yul skꞌabꞌ ebꞌ txꞌoj conobꞌal, ẍi Dios.
14 Jal ebꞌ a Judá oj yal ebꞌ jaxca tiꞌ: ¿Tzet to wal yu, yuxan chi cu cancan titiꞌ? Cu yambꞌawej oc cu bꞌa, catuꞌ chi cu toowej bꞌey junoj conobꞌ watxꞌ yeoc smuroal. Jaꞌ tituꞌ chi cu cami, yutol jaꞌ Jehová cu Diosal chi cu akꞌon camoj. Jaxca tol jix yaeytoj veneno xol jaꞌ chi kuqꞌueꞌ, yutol jix oc cu penail tet.
15 Jix cu naꞌ tol yin watxꞌcꞌulal chi cu bꞌeytoj, cꞌam pax cꞌal tzetyetal watxꞌ jix akꞌle ey jon. Jix cu naꞌ tol tzalacꞌulal oj yun cu bꞌeytoj, asan cꞌal pax tzet ey smey jix jul kibꞌan.
16 ¡Lalan sjul ebꞌ cu cajat kin! Chi abꞌle sbꞌilwi sjul ebꞌ, chi jorna xaam ẍe ebꞌ bꞌey Dan. Caw chi bꞌilwi txꞌotxꞌ txꞌotxꞌ yet chi okꞌ noꞌ ẍe ebꞌ tuꞌ. Chi jul ebꞌ yu yakꞌon lawoj ey jun cu nación tiꞌ yetoj cꞌal masanil tzetyetal ey yul cu conobꞌ tiꞌ, cꞌal cu masanil jantaj jon caan jon titiꞌ, ẍi ebꞌ a Judá.
17 Chi yalon pax Jehová jaxca tiꞌ: Oj watoj noꞌ labꞌa caw jow svenenoal je xol. Cꞌam yeloc apnoj ebꞌ chi skeꞌ sucbꞌanen noꞌ, ẍi Dios.
Scuscꞌulal Naj Jeremías Yu Sconobꞌ
18 Jaꞌ jin cuscꞌulal tiꞌ cꞌamxa yanil, caw wal chi lawi el jin pixan chi wabꞌe.
19 Caw chi abꞌle yel yaw ebꞌ wet conobꞌ bꞌey masanil wanxa conobꞌ. ¿Tumi cꞌamxa Jehová eyecꞌ bꞌey Sión? ¿Tumi cꞌamxa cu reyal eyecꞌ tituꞌ? ẍi ebꞌ. Jix takꞌwi Jehová: ¿Tzet yu, yuxan jix je txꞌemtej sjowal jin cꞌul yu je yoc eyilal tet echele, wan echele cꞌam yopiso, txꞌoj bꞌey jix tita? ẍi Dios.
20 Chi yalon ebꞌ ánima jaxca tiꞌ: Tuxa jix ecꞌ el stiempoal yet chi cu col-le eloj, jaxca chi yun yecꞌ el stiempoal skꞌuple a ixim tiriw, cꞌal yet chi lawi ecꞌ sat wanojxa awo, ẍi ebꞌ.
21 Caw chi wabꞌ syaꞌil yu syaꞌilal chi yabꞌ ebꞌ wet conobꞌ. Caw jix jowbꞌi jin cuscꞌulal cꞌal jin xiwcꞌulal.
22 ¿Cꞌamxa mi tzet chi yun swaꞌxi oc bꞌey Galaad? ¿Cꞌam mi mactxequel chi skeꞌ yanten tituꞌ? ¿Tzet yuxan cꞌam chi skeꞌ yancha ebꞌ wet conobꞌ tiꞌ?