9
¡Toloj wal laan xacꞌal jin sat tiꞌ jaxca junoj snukꞌ jaꞌ tol chi el sne,yet chin okꞌ yet cꞌualil cꞌal akꞌbꞌalil yu masanil jantaj ebꞌ wet conobꞌ jix cami!
2 ¡Toloj wal jaꞌ bꞌey txꞌotxꞌ cusiltaj txꞌotxꞌ chin caey ecꞌoj, yet watxꞌ naat chin el scꞌatan ebꞌ wet conobꞌ tiꞌ! Yutol amul xacꞌal el ebꞌ masanil, catuꞌ etnem ánima ebꞌ.
3 Caw jelan ebꞌ yin yalon lekꞌtiꞌal kꞌane. Asan yin lekꞌtiꞌal kꞌane eyoc snaꞌbꞌal ebꞌ. Cꞌamxa kꞌane yel chi al-lei. Yu jun tuꞌ, yuxan chi yal Jehová, tol asanxane spenail chi yun ebꞌ. Cꞌamxa chi yal scꞌul ebꞌ chi yaloc sDiosaloj.
4 Cꞌam ojabꞌ che yaoc ebꞌ je watxꞌil ánima tam wal ebꞌ je yuẍtaj yipoj je cꞌul, yutol jaꞌ ebꞌ yuẍtaj sbꞌa, chi yakꞌ lekꞌtiꞌal ebꞌ tet junjun. Jaꞌ ebꞌ yamigo sbꞌa, chi snaꞌle a kꞌane ebꞌ yin junjun.
5 Junjun xacꞌal chi yiꞌle eytej sat. Cꞌamxa mactxequel chi kꞌanabꞌ yin yel tet junjun. Tuxa oj qꞌueyel ebꞌ lekꞌtiꞌ. Cꞌamxa chi snaꞌ sbꞌa scꞌul ebꞌ.
6 Jix yal Jehová ey jin: Jaach Jeremías jaꞌ ja calubꞌal, jatuꞌ eyecꞌ xol ebꞌ chi yetne yet animail. Yu yetnen yet animail ebꞌ tuꞌ, yuxan cꞌamxa chi yal scꞌul ebꞌ chin yaloc sDiosaloj.
7 Yu jun tuꞌ, jain Jehová jin chi walaꞌ: ¿Tzet to wal yetal junojxa chi skeꞌ wunen yetoj jin conobꞌ tiꞌ? Asan tol chi waoc xol kꞌakꞌ, yet chi waꞌnele oc yin swatxꞌil jaxca chi yun chꞌen plata.
8 Jaꞌ stiꞌ ebꞌ, laan jaxca junoj julbꞌal tol palan cꞌal scam ánima yu. Asanxane lekꞌtiꞌal chi ecꞌ yalel ebꞌ. Chi yakꞌle scawil scꞌul ebꞌ yetoj yamigo yaloni, jal yin snaꞌbꞌal ebꞌ, lalan snaꞌon ebꞌ tzet chi yun stelkꞌotoj jun yamigo tuꞌ.
9 ¿Tumi man smoo oj waon oc syaꞌilal yibꞌan ebꞌ yu tzet chi yun ebꞌ tuꞌ? Jain Jehová jin chi walaꞌ: ¿Tumi man smoo oj jin spajtzen tet jun conobꞌ tiꞌ?
10 Chin okꞌi, chin el waw bꞌey txꞌotxꞌ tzalquiltaj, chi cꞌuyuyi wokꞌ bꞌey chi low noꞌ jobꞌbꞌeal noꞌ, yutol jix tzꞌaꞌtoj yu kꞌakꞌ. Cꞌamxa mac chi ecꞌ tituꞌ. Tumi eyto junoj wacax chi abꞌle yel yaw. Noꞌ xol-laj teꞌal noꞌ, cꞌal noꞌ tzꞌiquin pilan jix qꞌueya noꞌ.
11 Chi yalon Jehová: Jaꞌ yet oj lawoj wunen wan tuꞌ, jaꞌ conobꞌ Jerusalén yetoj Judá, junxane bꞌulan oj yun jin makꞌon ey bꞌulanoj. Jaxa cꞌal noꞌ ooj eyecꞌ tituꞌ, ẍi Dios.
12 ¿Mactxequel caw ey snaꞌbꞌal chi skeꞌ snaꞌcha el wan tiꞌ yu? ¿Mactxequel bꞌey jix yakꞌ Jehová otajnele el wan tzetyetal tiꞌ, jaxa oj alon el tet wanojxa? ¿Tzet yuxan jix uchchatoj jun nación tiꞌ, cusiltaj txꞌotxꞌ jix yun cantoj, yuxan cꞌamxa junoj mac chi eqꞌui?
13 Jix takꞌwi Jehová jaxca tiꞌ: Jaxca tuꞌ jix yunne yutol jix yintajne el cuybꞌanile ebꞌ jin conobꞌ tiꞌ jix wakꞌa. Ma sjije ebꞌ, tam wal chi sbꞌeybꞌalne ebꞌ. 14 Tol jix yakꞌ xacꞌal pitbꞌoj el snaꞌbꞌal ebꞌ, catuꞌ jix oc tzajan ebꞌ yintaj wan comon dios, jaxca jix yun scuyle can ebꞌ yu smam icham. 15 Yu jun tuꞌ, yuxan jain Jehová sDiosal jin Israel chi walaꞌ: Oj wakꞌ tzetyetal tol kꞌaꞌ sloꞌ ebꞌ, catuꞌ oj wakꞌon jaꞌ eeytoj veneno xol yucꞌ ebꞌ. 16 Catuꞌ oj jin sajlemnen cantoj ebꞌ bꞌey wanojxa conobꞌ tol man yotaj oj ebꞌ, tam wal smam icham ebꞌ jix otajnen eloj, catuꞌ oj wakꞌon ujtele ebꞌ yetoj espada, masantaꞌcꞌal oj qꞌueyle el ebꞌ masanil, ẍi Dios.
Cuscꞌulal Bꞌey Jerusalén
17 Jaꞌ Jehová Naj ey yipalil chi aloni: Abꞌwej xin; awtewej ebꞌ ix ix, ebꞌ ix tol ey cꞌaltaꞌ oc yopiso yin yokꞌi.
18 Yal ojabꞌ ebꞌ a Jerusalén: Tit ojabꞌ ebꞌ yin eymanil, catuꞌ chi okꞌ ebꞌ ix yin cuscꞌulal ku, catuꞌ no ojabꞌ el sbꞌakꞌ cu sat yu yal, jaxa yin xil cu sat chi eltej jiilabꞌoj yal cu sat, ẍi ojabꞌ ebꞌ.
19 Tol ojabꞌ chi abꞌle yoc okꞌil yu cuscꞌulal bꞌey Sión: ¡Caw okꞌbꞌal jon cꞌul, tuxa jix cu lawi eyoj, tuxa wal jix kabꞌ syaꞌil yu qꞌuixwilal! Jaꞌ tinaniꞌ, sowalil oj cu bꞌejcan cu conobꞌ tiꞌ, yutol jix uchcha ey cu na, ẍi ojabꞌ ebꞌ chi okꞌ tuꞌ, ẍi Jehová.
20 Jex ix, abꞌwej yalon Jehová, awej oc je txiquin yin cuybꞌanile chi yal Naj. Cuywej ebꞌ je yuneꞌ yokꞌ yu cuscꞌulal, yetoj cꞌal ebꞌ je watxꞌil ánima, el ojabꞌ yaw ebꞌ yin okꞌilal yu camich.
21 Jaꞌ camich tuxa jix octoj yul-laj cu na, tuxa jix apni oc yul-laj cu palacio. Chi cam ebꞌ unin bꞌey yul-laj calle, cꞌal ebꞌ achꞌe chi cam ebꞌ bꞌey txombꞌal.
22 Jix yal Jehová ey jin: Al tet ebꞌ; jaꞌ Jehová chi aloni: Tuxa cꞌal oj cancan bꞌulan smimanil ebꞌ ánima, jaxca xacꞌal chi yun yeycan bꞌulan stzꞌaꞌ noꞌ noꞌ bꞌey satlaj acꞌal, jaxca xacꞌal chi yun yeycan cꞌotlabꞌoj sjolom ixim tiriw yintaj ebꞌ kꞌupom tiriw, cꞌamxa mac chi sicꞌon aoj, ẍi Jehová, ja chi.
23 Jix yalon pax Jehová jaxca tiꞌ: Cꞌam ojabꞌ chi yakꞌ tzalabꞌoj scꞌul ebꞌ jelan yu sjelanil, tam wal ebꞌ ey yip yu yipalil, tam wal ebꞌ bꞌeom yu sbꞌeomal.
24 Jain Jehová jin chi walaꞌ, ta tol ey mac chi yoche chi yakꞌ tzalabꞌoj scꞌul, tzala ojabꞌ scꞌul yin jin yotajnen eloj, tol jain ton Jehová jin, tol watxꞌ chi wute jin bꞌa bꞌey sat txꞌotxꞌ txꞌotxꞌ tiꞌ yin camcꞌulal, cꞌal yin sjichanil. Jaꞌton wan tiꞌ chi ẍaꞌ jin cꞌul, ẍi Jehová.
25-26 Chi yalon Jehová jaxca tiꞌ: Lalan sjul stiempoal yet oj waon oc syaꞌilal yibꞌan ebꞌ ánima bꞌey Egipto, bꞌey Judá, bꞌey Edom, bꞌey Amón, bꞌey Moab cꞌal ebꞌ caan bꞌey txꞌotxꞌ cusiltaj txꞌotxꞌ, jaꞌton ebꞌ tzujbꞌil el xil sjolom bꞌey spacꞌul sat. Jaꞌ masanil wan ánima tiꞌ chi yaoc jun yechel chi yij circuncisión yin smimanil; cꞌam pax chi sjije swa kꞌane ebꞌ chi txꞌoxon jun yechel tuꞌ, tam wal ey junoj wan conobꞌ tiꞌ chi jijen jin wa kꞌane, tam wal ebꞌ Israel chi jijen cꞌal pax oj, ẍi Jehová.