Wan Yechel Comon Dios Yetoj Eyilal Tet Dios Tol Iquis
10
Jix yalon naj Jeremías jaxca tiꞌ:Cꞌam ojabꞌ che bꞌeybꞌalne sbꞌeybꞌal wanojxa conobꞌlaj, cꞌam ojabꞌ chex xiw yu wanoj tzetyetal chi xꞌox sbꞌa bꞌey satcan, jaxca chi yun xiwa ebꞌ ánima yul wanojxa conobꞌ.
3 Yutol jaꞌ sbꞌeybꞌal wan conobꞌ tuꞌ, caw cꞌam niꞌoj yeloc apnoj. Chi too ebꞌ stzokꞌa junoj teꞌ skꞌoal teꞌ bꞌey xol-laj teꞌ, chi yiꞌontej ebꞌ, chi yakꞌon ebꞌ tet junoj naj josom teꞌ, jaxa jun josom teꞌ tuꞌ chi waꞌnen ey yetoj smitxꞌkꞌabꞌ.
4 Chi lawi tuꞌ, chi yaon oc plata cꞌal oro yin yelawiloj. Chi smakꞌon oc slawuẍal yetoj martillo, yet chi cawxi eyoj, yet watxꞌ cꞌam chi telcꞌotoj.
5 Jaꞌ wan echele tuꞌ, cꞌam chi skeꞌ sbꞌilwi laan jaxca junoj xibꞌtebꞌal tzꞌiquin chi waꞌnele a xol bꞌey awbꞌil ey junoj awo. Cꞌam chi skeꞌ skꞌanabꞌi, sowalil tol chi ijle ecꞌoj yutol cꞌam chi skeꞌ sbꞌeyi. Cꞌam ojabꞌ chex xiw jaex tiꞌ tet wan tuꞌ, tam wal chi skeꞌ je yoc yin eyilal tet, yutol cꞌam chi skeꞌ scolwai, cꞌam yipalil yaon oc syaꞌilal, tam wal chi skeꞌ yakꞌon swatxꞌilal, ẍi Dios.
6 Jaach Jehová jin Diosal, cꞌam junojxa laan ja wetoj, yutol yel xacꞌal miman ja weloc apnoj, yutol caw wal mimanbꞌil jaach, yutol masanil chi skeꞌ ja wu.
7 Sreyal jaach masanil conobꞌ, ¿man smoo oj ta ey junoj mactxequel man oj xiw ey jaach? Smoo tol miman ja weloc apnoj yul sat masanil ánima. Xol ebꞌ jelan, xol ebꞌ rey bꞌey yul yibꞌankꞌinal tiꞌ, yutol cꞌam junojxa mactxequel laan ja wetoj.
8 Masanil ebꞌ ánima tiꞌ cꞌam niꞌoj snaꞌbꞌal ebꞌ, cꞌam pax niꞌoj sjelanilal ebꞌ. ¡Tumi oj skeꞌ yakꞌon junoj cuybꞌanile teꞌ skꞌoal teꞌ tuꞌ yu cu scuyoni!
9 Jaꞌ wan echele tuꞌ naꞌbꞌa plata cꞌal eloj, tol jaꞌ bꞌey conobꞌ Tarsis iꞌbꞌiltej, cꞌal chꞌen oro iꞌbꞌiltej bꞌey conobꞌ Ufaz, tol waꞌnebꞌil yu ebꞌ chacꞌom chꞌen. Eyoc an kꞌejweinaj kꞌap yili, cꞌal an cajin kꞌap yin spichiloj. Masanil wan tuꞌ, waꞌnebꞌil yu ebꞌ ánima jelan yin swaꞌnen tzettaj yetal.
10 Jal pax Jehová xin, jaꞌcaw Dios iquis toni, yaaw Naj. Jaꞌ yet chi tit sjowal, chi bꞌilwi txꞌotxꞌ txꞌotxꞌ tiꞌ yu. Cꞌam chi skeꞌ stecꞌbꞌan sbꞌa masanil nacionlaj sattaj sjowal scꞌul Jehová.
11 (Jaꞌ jaex Israel jex tiꞌ, alwej tet ebꞌ txꞌoj conobꞌal jaxca tiꞌ: Jaꞌ wan comon dios tuꞌ, manaj ebꞌ jix waꞌnen satcan cꞌal sat txꞌotxꞌ tiꞌ, yuxan sowalil oj qꞌueyle el ebꞌ bꞌey yul yibꞌankꞌinal tiꞌ. Cꞌamxa junoj oj cancanoj, je chi tet ebꞌ.)a
Jun Bꞌit Yu Alo Watxꞌ Kꞌane Tet Dios
12 Jaꞌ Jehová jix waꞌnen txꞌotxꞌ txꞌotxꞌ tiꞌ yetoj yipalil; jix yaon can oc yul yibꞌankꞌinal tiꞌ yin xolilal, masanil tzet jix swaꞌne yetoj sjelanil. Jacꞌalaꞌ yetoj sjelanil tuꞌ jix swaꞌne cꞌal pax satcan.
13 Jaꞌ yet chi bꞌilwi yul snukꞌ, catuꞌ chi bꞌilwi a jaꞌ jaꞌ bꞌey satcan tuꞌ yu, chi a bꞌakꞌakꞌoj asun yu bꞌey slawubꞌal stiꞌlaj txꞌotxꞌ txꞌotxꞌ tiꞌ, chi a kopna raya xol mimej yaxnabꞌ yu Jehová, catuꞌ chi yiꞌon eltej kaꞌeꞌ bꞌey scꞌuanbꞌal.
14 Jaꞌ ebꞌ ánima chi yaoc wan echele tuꞌ yipoj scꞌul, cꞌam snaꞌbꞌal ebꞌ, yutol cꞌam niꞌoj tzet yotaj ebꞌ. Jaꞌ ebꞌ waꞌnem chꞌen, tuxa cꞌal chi qꞌuixwi can a ebꞌ yu wan echele chi swaꞌne a ebꞌ tuꞌ. Jaꞌ wan echele tuꞌ cꞌam yeloc apnoj niꞌoj ebꞌ, yutol cꞌam spixan ebꞌ.
15 Jaꞌ wan tuꞌ cꞌam tzet chi oqui, naꞌbꞌacꞌal smulnail ebꞌ. Jaꞌ yet oj jul sjowal scꞌul Jehová yibꞌan ebꞌ, oj qꞌueyle el ebꞌ.
16 Caw wal miman sqꞌuexanil cu Diosal jaon yicꞌaal jon Jacob tiꞌ; yutol jaꞌ cu Diosal jix waꞌnen masanil tzetyetal. Jaꞌ jix sicꞌon el cu conobꞌ Israel tiꞌ yu yoc can yetoj. Jaꞌ Jehová Naj Yaaw tol miman yeloc apnoj, jaxca ton tuꞌ yoc sbꞌi Naj cu Diosal.
Syaꞌilal Tꞌinan Sjuli
17 —Jex a Jerusalén joybꞌil jex xa aoj, yambꞌawej a masanil je tzetyetal.
18 Yutol chi yal Jehová jaxca tiꞌ: Jaꞌ yet junel tiꞌ, caw naat oj wujtetoj masanil ebꞌ caan bꞌey jun nación tiꞌ. Caw oj wakꞌ xacꞌal syambꞌa oc sbꞌa syaꞌilal yin ebꞌ, masantaꞌcꞌal oj michꞌcha ebꞌ yu, ẍi Dios.
19 ¡Jix walon jain Jeremías jin jaxca tiꞌ: Caw okꞌbꞌal jin cꞌul, lalan jin lawi eyoj! Cꞌamxa chi ancha jin yasil. Jix jin naꞌoni tol wet cꞌaltaꞌ yeoc jun syaꞌilal tiꞌ, yuxan oj wakꞌ techaoj.
20 Tuxa jix uchcha ey jin kꞌap na, tuxa jix nicꞌchatoj masanil xꞌanil. Tuxa jix jin bꞌejlecan yu ebꞌ wuninal, jix cam can masanil ebꞌ. Cꞌamxa junoj mactxequel chi waꞌnen a jin kꞌap na junelxa. Cꞌamxa mactxequel chi litxꞌbꞌantoj wenel wibꞌan.
21 Jaꞌ ebꞌ eyoc yilomal jun conobꞌ tiꞌ, caw cꞌam niꞌoj snaꞌbꞌal ebꞌ. Cꞌam chi skꞌan sjelanil ebꞌ tet Jehová. Yu jun tuꞌ, yuxan jix eyqꞌuey ebꞌ, jix sajlemtoj ebꞌ ánima masanil.
22 ¡Abꞌwej xin! Ti wal chi apni oc jun skꞌaneal tiꞌ. Jaꞌ jun conobꞌ ey bꞌey yetcꞌulal norte, nilili xacꞌal sbꞌilwi stita. Jaꞌ jun tuꞌ oj qꞌuexbꞌonen oc conobꞌlaj yul yet Judá yin tzꞌininial. Asanxane noꞌ ooj, oj eecꞌ tituꞌ.
23 Jaach Jehová jin Diosal, wotaj sicꞌlebꞌil tol jaon ánima tiꞌ jon, man yul oj cu kꞌabꞌ eyoc cu cawil jon. Cꞌam niꞌoj kopiso kotajnen eloj yin tzetyetal oj jul cu sattaj jon.
24 Akꞌ jon cuenta jaxca wal yeoc ja watxꞌilal, catuꞌ man ojabꞌ yetoj sjowal ja cꞌul, yet watxꞌ cꞌam chon ja wakꞌ lawoj eyoj.
25 Bꞌejeytej sjowal ja cꞌul yibꞌan wan txꞌoj conobꞌal, jaꞌton wan conobꞌ tol cꞌam chach yotajne eloj. Jaꞌton ebꞌ cꞌam chi yal sbꞌa ey jaach, yutol jix qꞌueyle el cu conobꞌ jaon yicꞌaal jon Jacob tiꞌ yu ebꞌ. Junelne jix cu qꞌueyle xacꞌal el yu ebꞌ; pilan jix uchchatoj cu nación tiꞌ yu ebꞌ jon.