Jix Qꞌueyle El Swa Kꞌane Dios
11
Jain Jeremías jin tiꞌ, jix kꞌanabꞌ Jehová ey jin, jix yalon jaxca tiꞌ: 2 Abꞌ wal tzet chi yal jin wa kꞌane, catuꞌ cha walon cꞌal pax tet masanil ebꞌ ánima a Judá yetoj cꞌal tet ebꞌ caan bꞌey Jerusalén. 3 Cha wal tet ebꞌ tol jain Jehová sDiosal jin ebꞌ, tol jain chi walaꞌ tol intajnebꞌilxa el mactxequel ebꞌ cꞌam chi jijen tzet chi yal jun wa kꞌane tiꞌ; 4 jaꞌton jun jin wa kꞌane jix jin waꞌne yetoj ebꞌ je mam icham, yet jix wiꞌon eltej ebꞌ bꞌey txꞌotxꞌ Egipto, jaꞌton jun nación tuꞌ tol laan yeoc yin ebꞌ jaxca junoj jorna bꞌey chi tzꞌaꞌ chꞌen hierro. Jix wal tet ebꞌ jaxca tiꞌ: Jijewej jin chejbꞌanil; waꞌnewej masanil tzetyetal chi walaꞌ. Ta queytuꞌ oj je yunne, jaex tiꞌ jin conobꞌ jex, jain xa je Diosal jin. 5 Ta oj je jije tzet chi walaꞌ, oj wakꞌ yun bꞌey jix wakꞌcan jin tiꞌ tet ebꞌ je mam icham, yin wakꞌon jun je txꞌotxꞌ, jaꞌton txꞌotxꞌ yaax sat bꞌey ey jex ecꞌ tinaniꞌ, ẍi Jehová.Yuxan jix jin takꞌwi tet Naj jaxca tiꞌ: Jaach jin Diosal, yun ojabꞌ tzet cha walaꞌ, jin chi.
6 Yu jun tuꞌ, yuxan jix yal Jehová ey jin jaxca tiꞌ: Al jun kꞌane tiꞌ tet junjun conobꞌlaj yul yet Judá, cꞌal bꞌey yul-laj scalleal conobꞌ Jerusalén. Al tet ebꞌ ánima jaxca tiꞌ: Abꞌwej tzet chi yal jun wa kꞌane tiꞌ, catuꞌ che jijeni, ja chi. 7 Jaꞌ yet jix wiꞌon eltej ebꞌ je mam icham bꞌey txꞌotxꞌ Egipto, jix cam walon tet ebꞌ tol chi ẍaꞌ yabꞌ ebꞌ tzet chi walaꞌ. Jatax cꞌal yet tuꞌ masantaꞌcꞌal tinaniꞌ lalan cꞌal walon tet ebꞌ. 8 Ma pax ẍaꞌ yabꞌ ebꞌ, tam wal jix sjije ebꞌ; tol jix yakꞌ cꞌal pitbꞌoj el snaꞌbꞌal ebꞌ. Jix bꞌejcha xacꞌal scꞌul ebꞌ stoo yin spenail. Ma xacꞌal yal scꞌul ebꞌ jix sjije tzet jix walaꞌ. Yu jun tuꞌ, yuxan jix watej syaꞌilal yibꞌan ebꞌ, jaxca yalon can yin jun wa kꞌane tuꞌ, ẍi Dios.
9 Jix yalon cꞌal Jehová ey jin jaxca tiꞌ: Jaꞌ ebꞌ a Judá, yetoj cꞌal ebꞌ caan bꞌey Jerusalén, chi slatiꞌne sbꞌa ebꞌ yiꞌon el sbꞌa yul jin kꞌabꞌ. 10 Lalan cꞌal stoo ebꞌ yin amulal jix sbꞌeybꞌalne ebꞌ je mam icham. Jaꞌton ebꞌ tuꞌ ma sjije tzet jix walaꞌ, tol jix ya cꞌal oc snaꞌbꞌal ebꞌ yin wan comon dios, jix oc ebꞌ yin eyilal tet. Ma sjije jin wa kꞌane ebꞌ Israel, yetoj cꞌal ebꞌ yet Judá jix jin waꞌne yetoj ebꞌ je mam icham tuꞌ. 11 Yu tuꞌ xin, jain caw Jehová jin chi walaꞌ tol oj watej syaꞌilal yibꞌan ebꞌ, tol manxa oj skeꞌ scolon sbꞌa ebꞌ tet jun syaꞌilal tuꞌ. Caxcꞌal oj el yaw ebꞌ, yu skꞌanon jin colwal ebꞌ yaloni, manxa cꞌal oj jin takꞌwoj tet ebꞌ an. 12 Jaxa ebꞌ a Judá, cꞌal ebꞌ caan bꞌey Jerusalén, oj toj ebꞌ skꞌan scolwal wan comon sdiosal bꞌey chi yakꞌ tzꞌaꞌ incienso ebꞌ tuꞌ; man pax oj skeꞌ yu wan comon dios tuꞌ yet chi col-le el ebꞌ tet jun syaꞌilal oj jul tuꞌ. 13 Yutol jaꞌ ebꞌ a Judá tuꞌ, caw ecꞌal sbꞌisil sdiosal ebꞌ. Laan xacꞌal sbꞌisil sdiosal ebꞌ jaxca sbꞌisil sconobꞌlaj ebꞌ. Jacꞌalaꞌ cꞌal pax ebꞌ a Jerusalén, manxa jantaj wan yet xaambꞌal jix swaꞌne a ebꞌ, jaxca xacꞌal sbꞌisil scalleal conobꞌ bꞌey chi yakꞌ tzꞌaꞌ incienso ebꞌ tet Baal, jaꞌton jun comon dios tol yaabꞌetaj yili yul jin sat. 14 Yu jun tuꞌ xin, jaach Jeremías, cꞌam ojabꞌ chach txali yu jun conobꞌ tiꞌ; tam wal ja woc tean ey jin yu ebꞌ, yutol jain tiꞌ, man oj jin takꞌwoj tet ebꞌ, caxcꞌal mi oj skꞌan jin colwal ebꞌ snan xol syaꞌilal tuꞌ.
15 ¿Tzet to wal chi jul yun wan jin conobꞌ tol camcꞌulnebꞌil wu tiꞌ bꞌey jin calubꞌal. Ilaꞌ tol asan cꞌal spenail chi yun ebꞌ? ¿Chim snaꞌ ebꞌ tol jaꞌ yu oj yakꞌ xaambꞌal ebꞌ ey jin, yuxan man oj jul syaꞌilal tuꞌ yibꞌan ebꞌ? Toloj wal jaxca tuꞌ chi yunne, tzalacꞌulal mi yet ebꞌ. 16 Yutol jaꞌ yet yalantoj, laan wan jin conobꞌ tiꞌ jaxca junoj teꞌ olivo manxa jantajoj swatxꞌil yili xaj. Caw nonaj el yu sat. Jal pax tinaniꞌ xin, oj wakꞌ lawoj ey ebꞌ jaxca chi yun slawi ey junoj teꞌ teꞌ chi el skꞌabꞌlaj yu sjowal kaꞌeꞌ nabꞌ, catuꞌ chi tzꞌaꞌtoj yu raya.
17 Jain Jehová jin tiꞌ, Yaaw jin Yibꞌan Masanil Tzetyetal, jain jix walaꞌ tol chi jobꞌcha conobꞌ Israel cꞌal conobꞌ Judá. Jal pax tinaniꞌ xin, tuxa jix walaꞌ tol oj jul syaꞌilal yibꞌan, yu cꞌal jantaj spenail chi yun ebꞌ. Jix xꞌemtej sjowal jin cꞌul ebꞌ, yutol jix yakꞌ tzꞌaꞌ incienso ebꞌ tet comon dios Baal, ẍi Jehová.
Jix Yoche Ebꞌ A Conobꞌ Anatot Tol Jix Makꞌle Cam Naj Jeremías Yu Ebꞌ
18 Jaꞌ Jehová jix akꞌon wotajne eloj tol ey ebꞌ chi jowi oc win, tol lalan snaꞌon ebꞌ tzet chi yun yaon oc junoj spenail ebꞌ win. Jaꞌ Jehová jix jajon jin naꞌbꞌal yet chi naꞌcha el wu. 19 Yin cꞌal tzalacꞌulal ey jin ecꞌoj, jaxca cꞌal junoj noꞌ meꞌ chi iꞌletoj bꞌey chi makꞌle camoj, caw man wotaj oj tzetyetal lalan snaꞌon ebꞌ win. Chi yal ebꞌ jaxca tiꞌ: Cu makꞌwej camoj, yet watxꞌ cꞌamxa mactxequel chi naꞌontej, jaxca wal chi yun stzokꞌle a junoj teꞌ teꞌ lalan yakꞌon sat, ẍi ebꞌ.
20 Yu jun tuꞌ, yuxan jix jin oc tean yin Jehová jix walon jaxca tiꞌ: Jaach Jehová jin Diosal, masanil cꞌal chi skeꞌ ja wu, Juez jaach yin sjichanil. Caw ja wotaj tzetyetal ey yin cu naꞌbꞌal. Akꞌ wilaꞌ tzet oj yun ja waon oc syaꞌilal yibꞌan wan ánima tiꞌ. Tuxa jix wakꞌ abꞌenal yul ja kꞌabꞌ yu tzet lalan snaꞌon ebꞌ win, jin chi yin jin txa.
21 Jaꞌ ebꞌ ánima bꞌey Anatot, jix snaꞌ ebꞌ tzet chi yun jin cami. Jix yalon ebꞌ tol chin smakꞌ cam ebꞌ, ta tol jacꞌalaꞌ walon el skꞌane Jehová. 22 Jaꞌ Jehová tol chi skeꞌ yu masanil, jix yal yin ebꞌ jaxca tiꞌ: Ey tzet oj jin waꞌne yeoc yetoj ebꞌ ánima tiꞌ. Jaꞌ ebꞌ achꞌe oj cam ebꞌ xol jowal, jaxa ebꞌ winaj unin yetoj cꞌal ebꞌ ix unin, oj cam ebꞌ yu wail. 23 Cꞌamxa junoj ebꞌ a Anatot tuꞌ oj cancanoj, yutol oj jul scꞌual yu jin naꞌon oc yin spenail chi sbꞌeybꞌalne ebꞌ, caw oj watej junoj syaꞌilal yibꞌan ebꞌ, ẍi Jehová.