Jaꞌ Tzet Jix Skꞌanle Naj Jeremías Tet Dios
12
Jaach jin Diosal, ta tol chin teele jin bꞌa ja wetoj,tucꞌaltaꞌ jichan yeoc tzet cha walaꞌ. Jain tiꞌ, tol chi woche chin kꞌanle wan tzetyetal ey jaach. ¿Tzet yuxan caw watxꞌ cꞌal chi yun sbꞌeytoj ebꞌ penawom? ¿Tzet yu, yuxan yin cꞌal tzalacꞌulal ey ebꞌ tol asan cꞌal spenail chi snaꞌ?
2 Jaach cha wakꞌ chꞌibꞌ ebꞌ, watxꞌ cꞌal chi yun yiꞌon yip ebꞌ. Chi chꞌibꞌa ebꞌ, catuꞌ chi chꞌibꞌ sbꞌisil ebꞌ. Chach yakꞌ cꞌal bꞌina ebꞌ, jal pax yin snaꞌbꞌal ebꞌ xin, caw wal naat yeel snaꞌbꞌal ebꞌ ja win.
3 Jaach Jehová jin Diosal, ja wotaj jin. Ja wotaj tzet utbꞌil yeoc jin naꞌbꞌal ja win. Iꞌtoj wan ánima tuꞌ, jaxca chi yun yiꞌletoj noꞌ meꞌ bꞌey chi makꞌle camoj. Cha poꞌocan el ebꞌ, yet watxꞌ oj cam ebꞌ yet jun cꞌual yet oj makꞌle cam ebꞌ ánima.
4 ¿Jantaj to wal tiempoal yet oj tajtoj sat txꞌotxꞌ txꞌotxꞌ tiꞌ, cꞌal slawi ey an cꞌultaj bꞌey chi low noꞌ noꞌ? Jaꞌ noꞌ noꞌ, cꞌal noꞌ tzꞌiquin lalan scam noꞌ yu cꞌal spenail ebꞌ ánima caan bꞌey jun conobꞌ tiꞌ. Chi snaꞌ ebꞌ tol man oj ja wil tzet chi yun ebꞌ, jin chi tet Dios.
Spajtzebꞌal Dios
5 Jix yalon Jehová ey jin jaxca tiꞌ: Ta tol cꞌam chach tzaji ja wakꞌon ani yetoj ebꞌ chi bꞌeyi, ¿tzet wal oj yun ja laanbꞌanen ja bꞌey yetoj ebꞌ eyoc yibꞌan che? Ta tol chach telcꞌotoj bꞌey sat acꞌal bꞌey watxꞌ yeqꞌui, ¿tzet to wal oj yun ja bꞌey xol-laj an pim cꞌultaj bꞌey stiꞌlaj jaꞌ miman Jordán?
6 Ilaꞌ tol jaꞌ ebꞌ naj ja wuẍtaj yetoj cꞌal ebꞌ ja wican tol chi jowi oc ebꞌ ja win, chi awitoj ebꞌ ja wintaj jaxca ebꞌ ujtem noꞌ. Caxcꞌal watxꞌ xacꞌal chi yute kꞌanabꞌ sbꞌa ebꞌ ey jaach, cꞌam ojabꞌ cha waoc ebꞌ yipoj ja cꞌul, ẍi Dios ey jin.
Scuscꞌulal Jehová Yu Syaꞌilal Ebꞌ Sconobꞌ
7 Jix yalon cꞌal pax Jehová jaxca tiꞌ: Tuxa jix jin bꞌejcan jun jin conobꞌ camcꞌulnebꞌil wu tiꞌ an, jaꞌ ebꞌ tol jin conobꞌ yeocoj, tuxa jix wintajne can el ebꞌ. Tuxa jix waoc jin conobꞌ tol camcꞌulnebꞌil wu, yul skꞌabꞌ ebꞌ chi jowi oc yin ebꞌ.
8 Jaꞌ ebꞌ conobꞌ tol wet taꞌ yeocoj, jaꞌ yul jin sat laan ebꞌ jaxca junoj noꞌ bꞌalam chi ecꞌ xol-laj teꞌ, caw chi el yaw ebꞌ win, yu jun tuꞌ, yuxan chi wintajne can el ebꞌ.
9 Jaꞌ ebꞌ jin conobꞌ tiꞌ, laan ebꞌ jaxca junoj noꞌ chii sakꞌal yili, tol chi makꞌle cam yu wanxa yet chiial. Tit ojabꞌ masanil noꞌ xol-laj teꞌal noꞌ jul ẍiꞌon niꞌoj yet.
10 Caw ecꞌal ebꞌ syaawil ebꞌ txꞌoj conobꞌ jix qꞌueyon el ebꞌ jin conobꞌ tiꞌ, jaxca tol jix yakꞌ lawoj an uva ebꞌ tol awbꞌil wu. Jix stecꞌtoj jin mulnail ebꞌ. Jaꞌ txꞌotxꞌ txꞌotxꞌ tol ochebꞌil wu, cusiltaj txꞌotxꞌ xacꞌal jix yun cantoj yu ebꞌ.
11 Tzꞌinini xacꞌal jix yun cantoj jin conobꞌ yu ebꞌ, caw chi cus ebꞌ jin conobꞌ sicꞌlebꞌil. Masanil jun nación tiꞌ, tzꞌinini xacꞌal jix yun cantoj. Cꞌamxa junoj mactxequel chi naꞌontej.
12 Masanil xacꞌal bꞌey tzalquiltaj cꞌal bꞌey txꞌotxꞌ cusiltaj txꞌotxꞌ, caw jix jul ebꞌ winaj yakꞌon qꞌueyle eloj, yutol jain Jehová jin tiꞌ, ey jun wespada. Jaꞌ chi akꞌon lawoj ey jun nación tiꞌ bꞌey jun pacꞌ, masantaꞌcꞌal bꞌey jun pacꞌxa. Cꞌamxa bꞌey ey watxꞌcꞌulal.
13 Jix yaw tiriw ebꞌ jin conobꞌ, jaxa cꞌal teꞌ qꞌuix jix aoloj. Naꞌbꞌa xacꞌal jix mulna ebꞌ. Jix lawi ey yawo ebꞌ, qꞌuixwiltaj xacꞌal yecꞌ ebꞌ syambꞌan niẍtej sat yawo, yu cꞌal sjowal jin cꞌul yin ebꞌ, ẍi Dios.
Jix Yakꞌ Can Stiꞌ Jehová Tet Wanxa Conobꞌlaj
14 Jaxca tiꞌ chi yun yalon Jehová yin wan nacionlaj caw pena sbꞌeybꞌal ey scawilal Israel, tol jix yiꞌecꞌ txꞌotxꞌ txꞌotxꞌ ebꞌ jix yakꞌ Dios tet ebꞌ conobꞌ Israel: Chi yalon jaxca tiꞌ: Jain oj wiꞌel ebꞌ bꞌey sat smajul txꞌotxꞌ; jaxa ebꞌ a Judá oj wiꞌ can el yul skꞌabꞌ ebꞌ. 15 Jaxa yet tuxa chi lawi jin qꞌueyon el ebꞌ tuꞌ xin, catuꞌ oj okꞌ jin cꞌul yin ebꞌ junelxa, catuꞌ oj wakꞌon meltzo pax ebꞌ bꞌey sat xꞌotxꞌ, cꞌal bꞌey sconobꞌ junelxa. 16 Yutol jaꞌ wan conobꞌ tuꞌ jix ijbꞌantoj ebꞌ jin conobꞌ yin yoc ebꞌ yin eyilal tet jun comon dios Baal. Jaxa yet oj bꞌey cꞌaltoj xin, oj skeꞌ yoc pax ebꞌ xol jin conobꞌ, ta tol yel oj sjije jin chejbꞌanil ebꞌ jin conobꞌ tiꞌ, catuꞌ oj slocbꞌan jin bꞌi ebꞌ yin tzet oj yal ebꞌ. 17 Jal pax junoj nación tol cꞌam chi sjije tzet chi walaꞌ, jain caw Jehová jin chi walaꞌ, tol oj jin jokꞌatej xeꞌ jaxca junoj teꞌ teꞌ chi jokꞌle atej, catuꞌ oj wakꞌon qꞌueyeloj, ẍi Dios.