Skꞌaneal Jun Lino Kꞌalile
13
Jix yalon Jehová ey jin jaxca tiꞌ: Asiꞌ, catuꞌ cha manon junoj ja kꞌalil tol lino cꞌal eloj, catuꞌ cha waon oc yet cꞌamto chi txꞌale eloj, ẍi Dios. 2 Jix jin man jun kꞌalile tuꞌ jaxca jix yun yalon Jehová ey jin, jix waon oc yin jin nan. 3 Jix lawi tuꞌ, jix yalon pax junelxa ey jin jaxca tiꞌ: 4 Iꞌtoj jun ja kꞌalil jix ja manaꞌ, jun eyoc ja wu tuꞌ, chach too bꞌey jaꞌ Éufrates. Jaꞌ tituꞌ cha webꞌa can el bꞌey yul sjatilal junoj chꞌen miman chꞌen, ẍi Dios. 5 Jix lawi tuꞌ, jix jin too bꞌey jaꞌ miman jaꞌ tuꞌ an, jix webꞌa can el jun kꞌalile tuꞌ, jaxca jix yun yalon Jehová ey jin.6 Mimanxa tiempoal jix ecꞌ eloj, jix yalon pax Jehová ey jin jaxca tiꞌ: Asiꞌ bꞌey jaꞌ Éufrates, chi too ja wiꞌontej jun kꞌalile jix wal ey jaach tol cha webꞌa can el tituꞌ, ẍi ey jin. 7 Jix jin too bꞌey jaꞌ jaꞌ tuꞌ, jix jin seyon ecꞌ bꞌey ey can jun kꞌalile tuꞌ wu an, jix wiꞌon eltej bꞌey cꞌuan can el tuꞌ, xax kꞌaꞌtoj, cꞌamxa tzet chi oqui.
8 Jix yalon pax Jehová ey jin junelxa. 9 Jix yaloni: Queywal tuꞌ oj yun jin qꞌueyon el smimanbꞌilal Judá cꞌal Jerusalén. 10 Jaꞌ jun conobꞌ yel xacꞌal pena tuꞌ, caw cꞌam chi yal scꞌul chi sjije jin chejbꞌanil; asan cꞌal tzet chi yoche scꞌul chi yunne. Jix oc tzajan ebꞌ yintaj wanxa comon dios yin yakꞌon servil, cꞌal yoc ebꞌ yin eyilal tet. Laan ebꞌ jaxca jun kꞌalile kꞌaꞌtajxa, cꞌamxa niꞌoj yopiso. 11 Jaxca wal junoj mac chi skꞌaloc junoj kꞌalile yin snan, queytuꞌ jix wun yetoj conobꞌ Israel, cꞌal yetoj conobꞌ Judá, caw wal junne yeoc ebꞌ wetoj, tol jin conobꞌ yeoc ebꞌ, yet chi xꞌoxon el ebꞌ tol miman weloc apnoj. Jaxa tinaniꞌ, caw wal ma sjije ebꞌ tzet chi walaꞌ, ẍi Dios.
Skꞌaneal Jun Sneetal Yal Uva
12 Al tet ebꞌ conobꞌ jaxca tiꞌ: Jaꞌ Jehová cu Diosal chi alon jaxca tiꞌ: Junjun sneetal yal uva smoo chi akꞌle no yu yal uva, ja chi. Jaꞌ ebꞌ ja wet Israelal oj alon ey jaach: Tumi man kotajoj tol junjun cꞌaltaꞌ neet smoo chi akꞌle no yu yal uva, ẍi ebꞌ, oj yalon ebꞌ. 13 Jaxa ja takꞌwi tet ebꞌ jaxca tiꞌ: Jaꞌ Jehová chi alon jaxca tiꞌ: Oj wakꞌ qꞌuey scꞌul masanil ebꞌ caan bꞌey jun nación tiꞌ yu sjowal jin cꞌul, jaxca wal chi yun sqꞌuey scꞌul mac miman vino chi yucꞌ eytoj ebꞌ rey yin yicꞌaal David, ebꞌ yakꞌomal xaambꞌal, ebꞌ chi yaloc sbꞌa jin chejabꞌoj, yetoj cꞌal masanil ebꞌ caan bꞌey Jerusalén. 14 Oj jin makꞌ poꞌo ebꞌ jaxca chi yun smakꞌlen poꞌo sbꞌa sneetal yal uva yet ey mac chi tenoni. Laan xacꞌal oj yute sbꞌa ebꞌ mame yetoj ebꞌ cꞌaale. Jain caw Jehová jin chi walaꞌ, tol oj wakꞌ lawoj ey ebꞌ yin junelne, man oj okꞌ jin cꞌul yin ebꞌ, tam wal oj jin cus yin ebꞌ, ẍi Jehová, ja chi tet ebꞌ.
Tenchebꞌal Tet Conobꞌ Israel
15 Jex wet Israelal, cꞌam ojabꞌ che meyne je bꞌa, yeynajil ojabꞌ che yute je bꞌa, majwej cꞌal je yabꞌ tzet chi yal Jehová.
16 Iꞌwej a can sbꞌi Jehová cu Diosal, yajbꞌan tol cꞌamto chex telcꞌo a yinlaj tzalan, cꞌal xol jun kꞌejkꞌinal oj jul je yibꞌan yu Dios. Che naꞌ tol oj jul sajkꞌinal, jaxa oj yunne tol oj jowbꞌoj kꞌejkꞌinal sicꞌlebꞌil.
17 Ta tol man oj je chaꞌ je yabꞌe, oj jin okꞌ yin ewantajil yu je meynebꞌail tuꞌ. Caw wal oj eltej yal jin sat, yutol oj jex iꞌletoj yin jaxca presowomal, ẍi naj Jeremías.
Skꞌane Dios Tet Naj Rey
18 Jix yalon Jehová tet Jeremías jaxca tiꞌ: Al tet naj rey, cꞌal tet ix xutx naj: Eyanwejtej bꞌey je despacho, catuꞌ chex ey chotan sat txꞌotxꞌ, yutol oj iꞌle el je corona tol txꞌojxa swatxꞌil eyoc yin je jolom tuꞌ.
19 Oj joyle ey wan conobꞌlaj yul yet Négueb; cꞌamxa mac oj skeꞌ sjajon octoj sbꞌa tituꞌ. Masanil ebꞌ a Judá oj iꞌletoj ebꞌ jaxca presowomal.
20 Asiꞌwej tꞌanan bꞌey yetcꞌulal norte, che yilon stit ebꞌ je cajat. ¿Bꞌeytuꞌ eyoc jun bꞌulan ebꞌ jin conobꞌ tol jain jix waoc yul ja kꞌabꞌ yu ja teyneni? Jaꞌton jun bꞌulan ebꞌ jin conobꞌ tuꞌ eyoc ja mimanbꞌilaloj, ẍi Jehová, ja chi tet ebꞌ.
Albꞌil Tet Ebꞌ Israel Tol Oj Iꞌletoj Ebꞌ Jaxca Presowomal
21 Jix yalon Jehová jaxca tiꞌ: ¿Tzet oj je yal tinaniꞌ jex a Jerusalén, yet oj yakꞌon yaawil wan ánima tuꞌ je yibꞌan, jaꞌton wan ebꞌ jix oc je watxꞌil animaoj? Oj jul wal syaꞌilal je yibꞌan jaxca wal chi yun sjul syaꞌilal yibꞌan junoj ix ix lalan swaꞌxi scꞌul yu unin.
22 Ta tol che kꞌanle tzet yu, yuxan chi jul jun tiꞌ je yibꞌan, sowalil tol che yotajne eloj jantaj wal yeoc je penail, yu jun tuꞌ, yuxan tuxa cꞌal oj jex tꞌirbꞌale eloj cꞌal je yetnelei.
23 ¿Tumi chi skeꞌ sqꞌuexon sbꞌa yili junoj ánima tol kꞌejin yili? Tumi chi skeꞌ sqꞌuexon sbꞌa yili junoj noꞌ tzꞌibꞌin bꞌalam. Queyton tuꞌ jex jaex tiꞌ, tol qꞌueynaj jex je yunen spenail, cꞌamxa chi skeꞌ je yunen swatxꞌilal.
24 Yu jun tuꞌ, yuxan jain caw Jehová jin chi walaꞌ tol oj jex jin sajlemne cantoj, jaxca chi yun yijletoj smatzꞌical ixim tiriw yu kaꞌeꞌ chi tit bꞌey cusiltaj txꞌotxꞌ.
25 Queywal tuꞌ yeoc je yibꞌan jaex Israel jex tiꞌ, jaꞌton jun tuꞌ smoo chi wakꞌ ey jex. Yutol jix jin too qꞌueycꞌulal je yu, jaxa cꞌal yin wan echele jix je yaoc yipoj je cꞌul.
26 Oj jex jin tꞌirbꞌa eloj, caw oj je yakꞌ je qꞌuixwil.
27 Yutol jix wil jantaj yeoc je penail, jaꞌton amulal tol qꞌuixwiltaj xacꞌal che yunne. Yaabꞌetaj xacꞌal tzet che yun bꞌey txꞌotxꞌ tzalquiltaj cꞌal bꞌey xol-laj teꞌ yet chex oc yin eyilal tet ebꞌ comon dios. Caw okꞌbꞌal jex cꞌul, jex a Jerusalén. ¿Jantaj to tiempoal oj je bꞌeybꞌalne amulal tuꞌ? ẍi Jehová.