Jun Miman Tiempoal Tol Manxa Oj Yakꞌ Nabꞌ
14
Yutol ey jun tiempoal tol naatil manxa oj yakꞌ nabꞌ, yuxan jix kꞌanabꞌ Jehová tet naj Jeremías, jix yalon jaxca tiꞌ:2 Jaꞌ ebꞌ a Judá caw chi okꞌ ebꞌ yu cuscꞌulal, yutol cꞌamxa yip sconobꞌ ebꞌ, tuxa cꞌal telan ey ebꞌ sat txꞌotxꞌ. Jaxa ebꞌ a Jerusalén, caw chi el yaw ebꞌ yu syaꞌilal.
3 Jaꞌ ebꞌ bꞌeom, chi ẍejtoj yakꞌomal servil ebꞌ iꞌo jaꞌ; chi too ebꞌ seyecꞌ jaꞌ bꞌey yul-laj jolan, cꞌamxa chi ilcha oc jaꞌ yu ebꞌ, yuxan chi meltzo ebꞌ yin tol cꞌam jaꞌ yul smooc. Tuxa cꞌal chi smajche el sat ebꞌ yu qꞌuixwilal.
4 Tuxa cꞌal chi jattoj txꞌotxꞌ txꞌotxꞌ yu stajinal. Caw wal chi tac scꞌul ebꞌ mulnawom, chi smajche el sat ebꞌ.
5 Jacꞌalaꞌ noꞌ scꞌultajil che bꞌey xol-laj teꞌ, chi sbꞌejcan yuneꞌ noꞌ tol to chi ali, yutol cꞌamxa an cꞌultaj chi sloꞌ noꞌ.
6 Cꞌal noꞌ xol-laj teꞌal bꞌuru, jata cꞌal bꞌey txꞌotxꞌ tzalquiltaj chi mayayi yili chi tit linan noꞌ. Jaxa cꞌal kaꞌeꞌ chi yucꞌtoj noꞌ jaxca noꞌ ooj. Tuxa cꞌal kꞌej jolinaj chi yil noꞌ, yutol cꞌamxa an cꞌultaj chi sloꞌ noꞌ, ẍi Jehová.
Jix Txali Naj Jeremías Tet Jehová Yu Ebꞌ Conobꞌ
7 ¡Jaach jin Diosal! caw yel miman yeoc cu penail ja sattaj, yu tuꞌ xin, colwaan kin jon yet watxꞌ cꞌam chach al-le penail. Caw wal pit jon ey jaach, caw chi oc cu penail ey jaach.
8 Asanne jaach ey jaach oc yipoj cu cꞌul, asanne jaach cu Colomal ja weoc yet ey jon oc yin syaꞌtajilal. ¿Tzet yu, yuxan jaxca xacꞌal txꞌoj conobꞌal cha wute ja bꞌa yul cu conobꞌ tiꞌ, jaxca xacꞌal junoj bꞌelwom ánima tol junne akꞌbꞌal chi ecꞌ weyoj?
9 ¿Tzet yu, yuxan tol laan jaach jaxca junoj soldado chi mitxꞌle yin tol man naꞌanoj yu, yuxan cꞌamxa chi skeꞌ scolwa niꞌoj? Jaach jin Diosal, tiꞌ wal ey jaach pax ecꞌ cu xol tiꞌ jon. Masanil ánima yotaj tol ja conobꞌ jon. Cꞌam ojabꞌ chon ja bꞌejcan cu txꞌojli.
10 Jaꞌton jun tiꞌ jix yal Jehová yin conobꞌ Israel: Jaꞌ jun conobꞌ tiꞌ, caw wal ey stzalacꞌulal yin yecꞌabꞌtoj. Chi too bꞌey jun, chi too bꞌey junxa. Yu jun tuꞌ, yuxan cꞌam niꞌoj chi tzala jin cꞌul yetoj. Jaꞌ tinaniꞌ oj jin naꞌtej spenail ebꞌ, catuꞌ oj jin naꞌon oc yin sbꞌeybꞌal ebꞌ, ẍi Dios.
11 Jix yalon Jehová ey jin jaxca tiꞌ: Cꞌam ojabꞌ chach txali ey jin yu swatxꞌiloj jun conobꞌ tiꞌ. 12 Caxcꞌal chi yijle nocha sbꞌa ebꞌ yet chin txali ebꞌ ey jin, man oj jin takꞌwoj tet ebꞌ. Caxcꞌal miman xaambꞌal chi yakꞌ tzꞌaꞌ ebꞌ, caxcꞌal miman sat yawo ebꞌ chi yiꞌtej yin ofrendail ey jin, manxa oj jin tzala oc yin ebꞌ. Oj wakꞌ qꞌueyel ebꞌ yu jowal, yu wail, cꞌal yu syaꞌilal, ẍi Dios.
13 Catuꞌ jix jin takꞌwi tet jaxca tiꞌ: Jaach jin Diosal, jaꞌ ebꞌ ja chejabꞌ, chi yal ebꞌ tet ebꞌ conobꞌ tol cꞌam jowal oj ocoj. Cꞌam wail oj juloj. Chi yalon ebꞌ tol oj ja wakꞌ cꞌal ja watxꞌcꞌulal bꞌey caan jon tiꞌ yalon ebꞌ, jin chi.
14 Catuꞌ jix takꞌwi Jehová ey jin jaxca tiꞌ: Ta jaxca tuꞌ chi yun yalon el ebꞌ jin chejabꞌ tuꞌ yin jin bꞌi, lalan yakꞌon lekꞌtiꞌal ebꞌ chi yal tuꞌ, yutol man jain oj jix wal tet ebꞌ. Cꞌam junoj chejbꞌanile jix wakꞌ tet ebꞌ, tam wal jix jin kꞌanabꞌ tet ebꞌ. Jaꞌ wan chi yal ebꞌ tuꞌ, lekꞌtiꞌal weyiche, man yeloj, yuxan cꞌam yeloc apnoj. Yul mi yet ebꞌ chi yalon a ebꞌ. 15 Jain Jehová jin chi wal yin wan chi alon tuꞌ, ebꞌ tol chi stecꞌbꞌa sbꞌa yalon el yin jin bꞌi tol cꞌam jowal, cꞌam wail oj ecꞌ bꞌey jun nación tiꞌ yalon ebꞌ, man jain oj jix jin chej yal ebꞌ: Jaꞌ ebꞌ chi alon jaxca tuꞌ oj cam ebꞌ yu jowal cꞌal yu wail. 16 Jacꞌalaꞌ queytuꞌ oj yun ebꞌ conobꞌ bꞌey chi yal ebꞌ tuꞌ, oj cam ebꞌ yu jowal cꞌal yu wail, yetoj cꞌal yistil ebꞌ cꞌal yetoj yuninal ebꞌ. Tuxa cꞌal oj ecꞌ can tel-labꞌoj smimanil ebꞌ yul-laj scalleal conobꞌ Jerusalén. Cꞌamxa mactxequel oj mujon ebꞌ. Queyton wal tuꞌ oj yun stoolanen el spenail ebꞌ jix yaocoj. 17 Yuxan al wan tiꞌ tet ebꞌ conobꞌ jaxca tiꞌ:
Cꞌam ojabꞌ chi lawi yel yal jin sat yet cꞌualil cꞌal yet akꞌbꞌalil, yu syaꞌilal eyxa smey jix jul yibꞌan ebꞌ jin conobꞌ, cꞌal yu syaꞌilal bꞌey chi yasitoj ebꞌ.
18 Jaꞌ yet chin eltoj bꞌey chi oc mulnail, chi wiloni tol ey mimanile ey can tituꞌ yu jowal. Chin oc pax tej yul conobꞌ, chi wiloni, tol lalan scam ánima yu wail. Jal ebꞌ chi yaloc sbꞌa ẍejabꞌoj Dios, cꞌal ebꞌ yakꞌomal xaambꞌal, tuxa jix iꞌletoj ebꞌ bꞌey jun conobꞌ man otajbꞌiloj yu ebꞌ, ja chi, ẍi Dios ey jin.
Jix Txali Naj Jeremías
19 Yu jun tuꞌ, jix walon jaxca tiꞌ: Jaach Jehová jin Diosal. ¿Tumi junelne wal jix ja wiꞌ can el ebꞌ ánima a Judá yin ja cꞌul? ¿Tumi jix ja wintajne el conobꞌ Sión? ¿Tzet yu, yuxan jix jon ja wakꞌ yasoj yin tol cꞌamxa chi cu anchai? Jaꞌ cu naꞌoni tol oj cu a can yin tzalacꞌulal kaloni, cꞌam pax niꞌoj tzetyetal watxꞌ jix cu chaꞌ jon. Jix cu naꞌoni tol watxꞌ oj yun cu bꞌeytoj, asan cꞌal pax tzetyetal ey smey jix jul kin.
20 Jaach jin Diosal, caw wal chi cu naꞌtej cu penail jon, yetoj cꞌal yecꞌnajilal ebꞌ kichmam jon. Caw wal jix oc cu penail ey jaach jon.
21 Yu wal yiꞌle a can ja bꞌi, cꞌam ojabꞌ chon ja wintajne can eloj. Cꞌam ojabꞌ cha wintajne can el jun conobꞌ tiꞌ bꞌey eyecꞌ ja despacho tol miman yeloc apnoj. Naꞌtej ja wa kꞌane jix ja wakꞌ ketoj jon. Tumi man oj yun tzet jix ja walaꞌ.
22 Tumi ey junoj comon dios, sdiosal ebꞌ txꞌoj conobꞌal oj skeꞌ yaon eytej nabꞌ. Tumi chi skeꞌ stit nabꞌ bꞌey satcan yul yet. Jaach jin Diosal, cu Diosal jaach, asanne jaach chi skeꞌ ja waon eytej nabꞌ. Yu jun tuꞌ, yuxan chach kaoc yipoj cu cꞌul, jin chi tet Jehová.