Albꞌilcan El Wan Syaꞌtajilal Oj Juloj
15
Jix takꞌwi Jehová ey jin jaxca tiꞌ: Caxcꞌal jaꞌ Moisés, cꞌal Samuel chi jul oc tean ebꞌ ey jin, tutun man oj jin colwa yin jun conobꞌ tiꞌ. Alwej tet ebꞌ tol chi el ebꞌ jin sattaj, yutol cꞌam chi yal jin cꞌul chi wiloc yin ebꞌ an. 2 Ta ey mac chi kꞌanlen ey jaach bꞌeytuꞌ chi kaꞌ stooc ebꞌ, al tet ebꞌ jaxca tiꞌ:Jaꞌ mactxequel tol eyoc yibꞌan tol oj cam yu junoj yaꞌ jolom, yaꞌ jolom oj iꞌon camoj. Jal pax mactxequel tol jaꞌ yin jowal oj camoj, jacꞌaltaꞌ xol jowal tuꞌ oj camoj. Jal pax mactxequel tol jaꞌ yu wail oj camoj, jaꞌton yu wail tuꞌ oj camoj. Jal pax mactxequel oj iꞌletoj jaxca presowomal xin, tol oj iꞌletoj bꞌey junojxa txꞌoj conobꞌal, ja chi.
3 Jain caw Jehová jin chi walaꞌ: Tol oj watej canebꞌoj tujan syaꞌilal yibꞌan ebꞌ ánima tiꞌ: Oj makꞌle cam ebꞌ xol jowal, oj jutxle bꞌey smimanil ebꞌ yu noꞌ txꞌiꞌ, oj chiꞌletoj ebꞌ yu noꞌ miij, jaxa noꞌ xol-laj teꞌal noꞌ oj akꞌon lawoj el smimanil ebꞌ.
4 Masanil conobꞌlaj oj xiwa yilon ocoj yu tzet oj wute ebꞌ jin conobꞌ tiꞌ, yu cꞌal spenail jix el yunen naj Manasés, scꞌaal Ezequías bꞌey Jerusalén, yet eyoc naj yin reyal bꞌey Judá.
5 ¿Mactxequel oj okꞌ scꞌul je yin jex a Jerusalén? ¿Mactxequel oj cusoc scꞌul je yin? ¿Mactxequel oj okꞌ je yu?
6 Jain caw Jehová jin chi walaꞌ, tol jaex tiꞌ jix jin je yintajne eloj, tol yel xacꞌal chex etex eloj. Tuxa jix jin cꞌuumbꞌi xacꞌal wakꞌon mimancꞌulal je yin, yuxan jix wiꞌa jin kꞌabꞌ yin jex wakꞌon cuenta yetoj syaꞌilal, cꞌal yin jex wakꞌon qꞌueyeloj.
7 Jix jex wiꞌeltoj yul je conobꞌ tiꞌ, jix jex too bꞌey wanxa conobꞌlaj, jix jex jin sajlemne cantoj jaxca chi yun xuꞌle sajlem smatzꞌical ixim tiriw yu kaꞌeꞌ. Jix wakꞌ qꞌueyel jin conobꞌ tiꞌ. Cꞌamxa junoj je yuninal jix wakꞌcanoj, yu cꞌal tol ma yal je cꞌul che bꞌejcan je pena bꞌeybꞌal.
8 Yu cꞌal jun tuꞌ, yuxan ecꞌal ebꞌ ix ix oj cꞌam yichamil, jaxca xacꞌal yarenail stiꞌ jaꞌ mar tol cꞌamxa chi bꞌischai. Yet chuman cꞌu oj jul jun syaꞌilal yibꞌan ebꞌ ix txutxe yetoj yuneꞌ; yin jun txolan oj wiꞌtej syaꞌtajilal cꞌal xiwcꞌulal yibꞌan ebꞌ.
9 Jaꞌ ebꞌ ix txutxe ey jujwan yuneꞌ achꞌe, qꞌuixwiltaj xacꞌal oj yun can ebꞌ ix. Oj pax yip ebꞌ, oj pax skaꞌeꞌ ebꞌ ix yu scamichal ebꞌ achꞌe tuꞌ. Ta tol eyto ebꞌ chi can yul sconobꞌ tuꞌ, jain caw Jehová jin chi walaꞌ, tol oj wakꞌ makꞌle xacꞌal cam ebꞌ yu scajat, ẍi Dios.
Scuscꞌulal Naj Jeremías
10 Jix yalon naj Jeremías jaxca tiꞌ: Jaach chicay, caw okꞌbꞌal jin cꞌul. ¿Tzet wal yu, yuxan jix jin ja wakꞌ aloj? Asanne wal yin jowal, cꞌal yin teelebꞌail ey jin ecꞌ yetoj ebꞌ ánima tiꞌ. Cꞌam bꞌey jix wakꞌ tumin yin maanil tet junojxa, tam wal ey bꞌey jix jin maane cꞌal pax tumin tet junojxa, masanil xacꞌal pax ebꞌ chin bꞌuchoni.
11 Jaach Jehová jin Diosal, yun ojabꞌ cꞌal jaxca chi yun sbꞌuchwa ebꞌ tuꞌ, ta ey bꞌey pena jix jaach wute wakꞌon servil, ta ma jin oc tean ey jaach yu ebꞌ chi jowi oc win, yet eyoc ebꞌ yin cuscꞌulal cꞌal yin syaꞌtajilal.
Albꞌil El Syaꞌilal Oj Jul Yibꞌan Conobꞌ Israel
12 Jix yalon Jehová jaxca tiꞌ: Jex a Judá, caw man oj techa je yakꞌon jowal yetoj ebꞌ je cajat, yutol laan ebꞌ jaxca chꞌen hierro ma junoj chꞌen bronce chi tit bꞌey norte, cꞌam mac chi skeꞌ smakꞌon kꞌatoj chꞌen, queytuꞌ ebꞌ.
13 Yu ton masanil je penail jex a Israel, yuxan oj wakꞌ masanil je bꞌeomal tet ebꞌ je cajat, cꞌal masanil tzetyetal ey bꞌey sat je txꞌotxꞌ tiꞌ, tuxa cꞌal oj yiꞌtoj ebꞌ yin naꞌbꞌacꞌal.
14 Oj jex waoc smosooj ebꞌ je cajat tuꞌ, bꞌey jun txꞌotxꞌ tol man je yotaj oj, yutol jaꞌ sjowal jin cꞌul laan jaxca kꞌakꞌ; oj jex lawoj ey yu, ẍi Dios.
Jix Txali Naj Jeremías Tet Jehová
15 Jaach Jehová jin Diosal, jaach tiꞌ ja wotaj masanil, naꞌ jintej, titan colwaan win. Pajtze tet ebꞌ jin cajat. Cꞌam ojabꞌ cha wakꞌ mimancꞌulal yin ebꞌ, ilaꞌ tol ian chin cami. Ilaꞌ tol ja wu, yuxan chin bꞌuchle yu ebꞌ.
16 Jaꞌ yet cha walon ja kꞌane ey jin, jix jin chaꞌ wabꞌe, caw chi wakꞌ tzalabꞌoj jin cꞌul yetoj ja kꞌane yutol ja wet jin, jaach Jehová jin Diosal jaach; Yaaw jaach yibꞌan masanil.
17 Man junne oj chin ecꞌ yetoj ebꞌ chi yakꞌ tzalabꞌoj scꞌul yunen spenail. Yu wopiso jix ja wakꞌ ey jin, yuxan jix jin ecꞌabꞌ jin txꞌojli, yutol chi wabꞌ syaꞌil yu sjowal ja cꞌul.
18 ¿Tzet yu, yuxan cꞌam chi oc tucan jin yaꞌilal jaxca junoj yasil cꞌamxa chi anchai? ¿Tumi oj jin ja wetne xacꞌal jaxca jaꞌ elom jaꞌ chi tantoj?
Spajtzebꞌal Yu Jehová
19 Yu jun tuꞌ, yuxan jix takꞌwi Jehová ey jin jaxca tiꞌ: Ta chach meltzotej ey jin, oj jaach jin chaꞌ junelxa, jaxca tuꞌ oj skeꞌ jin ja wakꞌon servil. Ta cha tenchane ja bꞌa yin comon kꞌane, asanne ojabꞌ kꞌane tol caw miman yeloc apnoj cha walaꞌ, jaach oj jaach kꞌanabꞌ el wu xol ánima. Jaꞌ ebꞌ ánima oj jul ja cꞌatan yu jul yabꞌen ja kꞌanabꞌ ebꞌ, manaj jaach oj ja wabꞌ skꞌanabꞌ ebꞌ.
20 Jaxca wal junoj smuroal conobꞌ tol chꞌen bronce eyoc yinlaj, queytuꞌ oj jaach wute can oc bꞌey jun conobꞌ tiꞌ, cꞌam junoj mactxequel chi skeꞌ yakꞌon eyqꞌueyoj. Oj yakꞌ jowal ebꞌ ja wetoj, jain caw Jehová jin chi walaꞌ tol man oj jaach eyqꞌuey yu ebꞌ, yutol ey jin oc ja wetoj, jain oj jaach jin coloꞌ.
21 Oj jaach jin colel yul skꞌabꞌ ebꞌ penawom, oj jaach jin colel yul skꞌabꞌ ebꞌ makꞌom cam ánima, ẍi Jehová.