5 Jix yalon cꞌal pax Naj ey jin jaxca tiꞌ: Cꞌam ojabꞌ chach octoj bꞌey yul junoj na bꞌey eyoc ilo akꞌbꞌal yu ebꞌ ánima chi cami. Cꞌam ojabꞌ chach okꞌi, tam wal cha txꞌoxel ja cuscꞌulal yu ebꞌ, yutol jain caw Jehová jin chi walaꞌ, tol jix wiꞌel jin watxꞌcꞌulal cꞌal jin camcꞌulal, yutol cꞌamxa chi okꞌ jin cꞌul yin jun conobꞌ tiꞌ. 6 Oj cam ebꞌ icham ánima cꞌal ebꞌ unin bꞌey jun conobꞌ tiꞌ; cꞌam mactxequel oj mujon ebꞌ, cꞌam mactxequel oj okꞌ yu ebꞌ, tam wal ey mac oj xꞌoxel scuscꞌulal yin smakꞌon yasoj smimanil, cꞌal stzujon el xil sjolom. 7 Tol cꞌamxa mactxequel oj waꞌnen junoj loꞌbꞌe yu camich oj ocoj, yet chi mimancꞌulnele ebꞌ icane, caxcꞌal mi tol jaꞌ ebꞌ mame txutxe oj camoj.

8 Cꞌam chach octoj chotan yul junoj na, ja lowi cꞌal ja wuqꞌuen jaꞌ bꞌey ey junoj kꞌin. 9 Yutol jain Jehová jin, yaaw jin yibꞌan masanil, je Diosal jin, jain chi walaꞌ: Jain oj wakꞌ lawoj bꞌit chi oc yet ey junoj kꞌin, cꞌal bꞌit chi oc yet ey nupil bꞌey jun conobꞌ tiꞌ. Jaꞌ jun tiꞌ oj yun yul je tiempoal, oj je yil cꞌal pax jaex tiꞌ.

10 Jaꞌ yet oj ja walon jun kꞌane tiꞌ tet ebꞌ ja wet conobꞌ, oj skꞌanle ebꞌ ey jaach: ¿Tzet yu, yuxan oj yatej Jehová jun miman syaꞌilal tuꞌ kibꞌan? ¿Tzetyetal pena jix kunne? ¿Tzet cu penail jix kaoc tet Jehová cu Diosal? ẍi ebꞌ oj yalon ebꞌ. 11 Cha pajtze tet ebꞌ jaxca tiꞌ: Jaꞌcaw Jehová chi alon jaxca tiꞌ: Jaꞌ ebꞌ je mam icham jix jin bꞌejlecan yu ebꞌ, jix too tzajan ebꞌ yintaj comon dios, jix oc ebꞌ yin eyilal tet wan tuꞌ. Jix jin bꞌejlecan yu ebꞌ, ma sjije cuybꞌanile jix wakꞌ tet ebꞌ. 12 Jal jex pax jaex tiꞌ, yel xacꞌal pena jex yintaj ebꞌ je mam icham tuꞌ. Junjun jex xacꞌal che yun spenail chi tit yin je naꞌbꞌal, cꞌamxa che jije tzet chi walaꞌ. 13 Yu jun tuꞌ, yuxan oj jex wiꞌel bꞌey sat txꞌotxꞌ txꞌotxꞌ tiꞌ. Oj jex waontoj bꞌey junxa conobꞌ bꞌey tol man je yotaj oj, tam wal yotaj ebꞌ je mam icham. Jaꞌ tituꞌ oj je yakꞌ servil wan comon dios yet cꞌualil cꞌal yet akꞌbꞌalil. Cꞌamxa cꞌal niꞌoj oj cusoc jin cꞌul je yin, ja chi tet ebꞌ.

14 Jain caw Jehová jin chi wal canoj: Jaꞌ tinaniꞌ, jaꞌ yet chi slocon jin bꞌi ebꞌ ánima xol skꞌane, chi yal ebꞌ jaxca tiꞌ: Yin sbꞌi cu Diosal jix iꞌon eltej ebꞌ Israel bꞌey txꞌotxꞌ Egipto, ẍi ebꞌ. 15 Jaxa yet oj bꞌey cꞌaltoj tuꞌ, oj yal ebꞌ jaxca tiꞌ: Yotaj wal Jehová, Naj jix iꞌon eltej ebꞌ Israel bꞌey norte, yetoj cꞌal bꞌey wanxa conobꞌlaj bꞌey jix sajlem cantoj ebꞌ, ẍi ebꞌ. Yutol jain oj wiꞌ meltzo ebꞌ Israel bꞌey sconobꞌal, jaꞌton bꞌey txꞌotxꞌ txꞌotxꞌ jix wakꞌ tet ebꞌ je yichmam.

16 Jaꞌ yet cꞌamto chi yun jun tuꞌ, oj wiꞌtej ebꞌ scajat ebꞌ Israel yet chi jul mitxꞌle ebꞌ yu ebꞌ, jaxca chi yun smitxꞌle noꞌ pescado yul txim yu ebꞌ chi mulna oc yin jun mulnail tuꞌ, ma jaxca ebꞌ ujtem noꞌ chi too tzajan yintaj noꞌ noꞌ bꞌey txꞌotxꞌ tzalquiltaj, chi seyon cꞌal ecꞌ ebꞌ bꞌey yul-laj nachꞌen, cꞌal bꞌey yul-laj jolan bꞌey satlaj chꞌen. 17 Yutol chi wil masanil tzettaj chi el yunen ebꞌ. Cꞌam junoj mactxequel chi skeꞌ scꞌubꞌan el sbꞌa yul jin sat, tam wal chi skeꞌ scꞌubꞌan el spenail ebꞌ jin sattaj. 18 Oj wakꞌ spajtzebꞌal tet ebꞌ yu spenail ebꞌ, yutol jix yetnetoj jin txꞌotxꞌ ebꞌ yu sdiosal tol cꞌam spixan, tol caw yaabꞌetaj jaxca smimanil junoj camom. Jix yun tzetyetal ebꞌ tol cꞌam chi ẍaꞌ jin cꞌul, ẍi Jehová.