Syaꞌilal Yibꞌan Judá Yu Spenail
17
Jix yalon Jehová jaxca tiꞌ: Jaꞌ je penail jex a Judá tiꞌ,caw cꞌam che bꞌejcan je yuneni, jaxca tol tzꞌibꞌebꞌil oc yin je pixan, ey cꞌal pax oc yin xiquin jun yet je xaambꞌal.
2 Ilaꞌ tol ey ebꞌ je yuninal chi naꞌontej wan yet xaambꞌal, yetoj wan teꞌ teꞌ tol yaꞌ yili, junne ey yetoj teꞌ teꞌ bꞌey txꞌotxꞌ tzalquiltaj tol naat eyaoj,
3 cꞌal bꞌey sjolomlaj wonan bꞌey stiꞌel conobꞌ. Yu je penail che yaoc bꞌey wan yet eyilal bꞌey yul masanil je conobꞌ tiꞌ, yuxan oj wakꞌ elkꞌaneletoj je bꞌeomal, cꞌal tzet cꞌuan ecꞌ je yu.
4 Sowalil tol oj je bꞌejcan txꞌotxꞌ txꞌotxꞌ tiꞌ, jaꞌton txꞌotxꞌ txꞌotxꞌ jix wakꞌcan je majuloj. Oj jex waoc yin yakꞌomaloj servil ebꞌ je cajat bꞌey jun txꞌotxꞌ tol man je yotaj oj, yutol tuxa jix tit sjowal jin cꞌul je yin. Laan wal jaxca junoj kꞌakꞌ cꞌam bꞌakꞌin chi tani, ẍi Dios.
Wanxa Kꞌane
5 Jix yalon Jehová jaxca tiꞌ: Okꞌbꞌal cꞌul mactxequel chi yiꞌel snaꞌbꞌal win an, catuꞌ jaxa yin yet animail chi yaoc yipoj scꞌul yet chi colwa yetoj snaꞌoni.
6 Laan ebꞌ jaxca teꞌ qꞌuix ey bꞌey txꞌotxꞌ cusiltaj txꞌotxꞌ. Cꞌam bꞌey chi yaꞌilnele teꞌ. Chi chꞌibꞌa teꞌ xol-laj chꞌen, ma bꞌey txꞌotxꞌ txꞌotxꞌ tol ey atzꞌam, bꞌey cꞌam ánima caan sat txꞌotxꞌ.
7 Jal pax ebꞌ ánima chin yaoc yipoj scꞌul, caw wal watxꞌ yet ebꞌ.
8 Laan ebꞌ jaxca teꞌ teꞌ awbꞌil bꞌey stiꞌlaj jaꞌ, tol yelcꞌulal chi too xeꞌ yul txꞌotxꞌ. Caxcꞌal mi ey kꞌakꞌ, cꞌam tzet chi snaꞌ teꞌ, caw yaax cꞌal xaj teꞌ. Jaꞌ yet cꞌam nabꞌ, cꞌam cꞌal chi tajtoj teꞌ, cꞌam cꞌal chi sbꞌej yakꞌon sat.
9 Tumi ey junoj tzetyetal yel xacꞌal ecꞌbꞌan yakꞌon lekꞌtiꞌal jaxca snaꞌbꞌal ebꞌ ánima, cꞌamxa chi skeꞌ swaꞌxi oc wan naꞌbꞌale tuꞌ. ¿Mac wal txequel chi skeꞌ yotajne el tzet ey yin snaꞌbꞌal junoj mactxequel?
10 Jain Jehová jin tiꞌ, asanne jin chi skeꞌ jin naꞌon oc yin junjun mactxequel. Wotaj masanil tzet chi ecꞌ yin naꞌbꞌale. Jain chin pajtze tet junjun jaxca wal smooalil, jatacꞌalaꞌ tzet chi el yunen junjun.
11 Jaꞌ ebꞌ chi oc bꞌeomal yu yetnen yet animail, laan ebꞌ jaxca junoj noꞌ tzꞌiquin chi smoeltej jos tol man yetoj. Jaxa oj yunne, caw eyoc ebꞌ yin qꞌueycꞌulal catuꞌ oj sbꞌejoncan sbꞌeomal ebꞌ tuꞌ, jaxa yin slawubꞌal oj txeclo eloj tol cꞌam snaꞌbꞌal ebꞌ.
12 Jaꞌ stemplo Dios waꞌnebꞌil yet tax peyxa, laan yili jaxca junoj palacio caw watxꞌ yili, naat yea bꞌey waꞌnebꞌil can aoj.
13 Jaach Jehová jin Diosal jaach, ey jaach oc yipoj cu cꞌul jaon Israel jon tiꞌ. Jaꞌ ebꞌ oj jaach bꞌejon canoj, tuxa cꞌal oj qꞌuixwoj can a ebꞌ, masanil mactxequel chi yiꞌel sbꞌa ja cꞌatan, tuxa cꞌal oj qꞌueycan a ebꞌ, jaxca chi yun sqꞌueya junoj bꞌie tzꞌibꞌebꞌil ey xol pojoj. Oj qꞌueycan el ebꞌ yutol chach sbꞌejcan ebꞌ, jaach tiꞌ laan jaach jaxca junoj jaꞌ snukꞌ jaꞌ tol chi yakꞌ cu kꞌinal.
Jix Txali Naj Jeremías Tet Jehová
14 Jaach Jehová jin Diosal, akꞌ waꞌxoj jin cꞌul, yet watxꞌ chin waꞌxi canoj. Col jin eloj, yet watxꞌ chin colcha eloj, yutol asan ey jaach chi wal jin watxꞌ kꞌane.
15 Chi yal ebꞌ ánima ey jin jaxca tiꞌ: ¿Tzet la yeoc skꞌane Jehová jix yal ey jon tuꞌ? ¡Yun ojabꞌ tzet yalnaj can tuꞌ tinaniꞌ xin! ẍi ebꞌ.
16 Cꞌam bꞌey jix jin kꞌantej junoj uchlebꞌail yibꞌan ebꞌ, tam wal chi woche chi jul junoj syaꞌilal yibꞌan ebꞌ. Jaach tiꞌ ja wotaj tzetyetal jix jin kꞌanaꞌ, yutol ja sattaj jix walaꞌ.
17 Cꞌam ojabꞌ chin ja waoc yin xiwcꞌulal yutol jaꞌ ja win chin col jin bꞌa yet ey jin oc yin syaꞌtajilal.
18 Qꞌuixwoj ojabꞌ can a ebꞌ chin ujten ecꞌoj, man ojabꞌ jain oj chin qꞌuixwi aoj. Jaꞌ ojabꞌ ebꞌ chi xiwaoj, catuꞌ man ojabꞌ jain oj chin xiwaoj. Tit ojabꞌ syaꞌilal yibꞌan ebꞌ, qꞌueycan el ebꞌ yin junelne.
Jaꞌ Tzet Jix Al-le Yu Scꞌual Xewilal
19 Jix yalon Jehová ey jin jaxca tiꞌ: Asiꞌ, ocan linan bꞌey spuertail conobꞌ bꞌey chi ecꞌ eltoj ebꞌ sreyal Judá. Jaꞌ tituꞌ cha walel jin kꞌane, quey cꞌal pax tuꞌ oj yun ja walon el jin kꞌane bꞌey wanxa spuertail conobꞌ Jerusalén. 20 Catuꞌ cha walon tet ebꞌ ánima jaxca tiꞌ: Jex rey, cꞌal je masanil jex a Judá, cꞌal jantaj jex caan jex bꞌey Jerusalén tiꞌ, mac jex chex oc bꞌey wan spuertail conobꞌ tiꞌ, abꞌwej tzet chi yal skꞌane Jehová. 21 Jaꞌ yet scꞌual xewilal, cꞌam ojabꞌ che yiꞌ je yijatz, tam wal je yiꞌon octej ijatz bꞌey spuertail Jerusalén tiꞌ, yet watxꞌ cꞌam chi jul syaꞌilal je yibꞌan. 22 Cꞌam cꞌal pax che yiꞌeltej junoj je yijatz bꞌey yul je na yet scꞌual xewilal, cꞌam cꞌal chex mulna yet jun cꞌual tuꞌ, yu je txꞌoxon eloj tol wet yeoc jun cꞌual tuꞌ, jaxca wal jix yun walon can tet ebꞌ je mam icham.
23 Yutol jaꞌ ebꞌ tuꞌ, ma ẍaꞌ yabꞌ ebꞌ tzet jix walaꞌ, tam wal jix sjije ebꞌ, yutol caw pit jix yute snaꞌbꞌal ebꞌ, caw ma sjije ebꞌ yet jix jin tenchane ebꞌ.
24 Jain caw Jehová jin chi walaꞌ: Jijewej tzet chi walaꞌ, cꞌam ojabꞌ che yiꞌtej je yijatz yet scꞌual xewilal bꞌey spuertail conobꞌ tiꞌ. Cꞌam junoj mulnail che yunne yu je txꞌoxon eloj tol wet yeoc jun cꞌual tuꞌ. 25 Ta tol oj je yun jaxca tuꞌ, ey cꞌaltaꞌ ebꞌ rey oj yakꞌ yaawil bꞌey sdespacho naj rey David. Oj octej ebꞌ bꞌey spuertail conobꞌ tiꞌ, yetoj scarruaje tokꞌbꞌil oc yu che, jaꞌjun ebꞌ yaaw, yetoj ebꞌ ánima a Judá, cꞌal yetoj ebꞌ a Jerusalén. Cꞌam bꞌakꞌin oj qꞌueya ebꞌ caan bꞌey jun conobꞌ tiꞌ. 26 Oj tit ebꞌ ánima bꞌey conobꞌlaj yul yet Judá, jaꞌton ebꞌ ey bꞌey yinlaj conobꞌ Jerusalén tiꞌ, yetoj cꞌal ebꞌ oj tit yul yet Benjamín, bꞌey acꞌal, cꞌal bꞌey txꞌotxꞌ wonanlaj, yetoj cꞌal bꞌey yul yet Négueb. Oj yiꞌtej noꞌ noꞌ ebꞌ, yet chi yakꞌon tzꞌaꞌ ebꞌ yin xaambꞌal bꞌey templo, yetoj cꞌal wanxa xaambꞌal, yetoj ofrenda yin ixim tiriw, cꞌal teꞌ incienso, cꞌal ofrenda yu yal-le yu diosalil ey jin an.
27 Ta tol man oj je jije jin chejbꞌanil tiꞌ, yu je txꞌoxon eloj tol wet yeoc scꞌual xewilal tuꞌ, ta tol oj je yiꞌoctej je yijatz bꞌey spuertail conobꞌ yet jun cꞌual tuꞌ, jain oj waoc kꞌakꞌ bꞌey spuertail conobꞌ tiꞌ, jun kꞌakꞌ tol oj akꞌon lawoj ey masanil spalacio bꞌey Jerusalén tiꞌ. Cꞌamxa mactxequel oj skeꞌ sbꞌuton tanoj, ẍi Jehová ey jin.