Cuybꞌanile Yin Jun Tzꞌajlom
18
Jix kꞌanabꞌ Jehová ey jin, jix yalon jaxca tiꞌ: 2 Eyantoj bꞌey sna jun naj tzꞌajom txꞌotxꞌ; jaꞌ tituꞌ oj wal jun kꞌane ey jaach an, ẍi Dios. 3 Catuꞌ jix jin eytoj tituꞌ, lalan wal stzꞌajli naj tzꞌajom txꞌotxꞌ tuꞌ yibꞌan jun chi ecꞌ xoyoyoj. 4 Jaꞌ yet lalan stzꞌajon a jun xi naj tzꞌajlom tuꞌ, pena jix yun yelocoj yu naj, yuxan jacꞌal oc yetoj txꞌotxꞌ txꞌotxꞌ tuꞌ jix swaꞌne pax a junojxa, jaxca wal chi yoche scꞌul.5 Jix yalon Jehová ey jin jaxca tiꞌ: 6 Jain wal caw Jehová jin chi wal ey jex jaex Israel jex tiꞌ: ¿Tumi cꞌam chi skeꞌ wu che naꞌ cꞌal jex wuten jaxca chi yute txꞌotxꞌ txꞌotxꞌ jun winaj tiꞌ? Jaex tiꞌ, laan je yeoc yul jin kꞌabꞌ jaxca txꞌotxꞌ tzꞌajbꞌeal txꞌotxꞌ eyoc yul skꞌabꞌ junoj tzꞌajlom. 7 Ta jain chin naꞌ, chi skeꞌ wuchontoj cꞌal wakꞌon lawoj ey junoj nación ma wiꞌon el junoj yaaw yin yopiso, 8 ta jaꞌ jun nación tuꞌ chi spoꞌoel sbꞌa xol spenail xin, cꞌamxa chi watej jun syaꞌilal naꞌbꞌil wu tuꞌ yibꞌan. 9 Ta chin naꞌ jin waꞌnen pax a junoj nación cꞌal wakꞌon chꞌibꞌoj, chi skeꞌ cꞌal wu cꞌal waon oc junoj yaaw yin yopiso, 10 ta asan cꞌal spenail chi yun pax jun miman conobꞌ tuꞌ xin, catuꞌ cꞌam chi sjije tzet chi walaꞌ, ma xa wakꞌ jin yaxilal naꞌbꞌil wu wakꞌon yibꞌan jun conobꞌ tuꞌ.
11 Al tet ebꞌ caan bꞌey Judá cꞌal tet ebꞌ a Jerusalén, tol jain chi wal wan kꞌane tiꞌ: Lalan jin naꞌon tzet oj yun waon oc syaꞌilal je yibꞌan jaex tiꞌ; yuxan chi wal ey jex bꞌejwej can je pena bꞌeybꞌal; waꞌnewej oc je bꞌeybꞌal, ẍi Jehová. 12 Jaꞌ ebꞌ tuꞌ oj alon ey jaach: Cꞌam ojabꞌ cha wetne el ja tiempo yin jon ja tenchaneni. Chi yoche cu cꞌul tol oj cu bꞌey cꞌaltoj jaxca tiꞌ, junjun jon cꞌal oj kun spenail bꞌey chi ẍaꞌ cu cꞌul, ẍi ebꞌ, oj yalon ebꞌ.
13 Yu jun tuꞌ, jix yalon Jehová jaxca tiꞌ: Kꞌanlewej ecꞌ bꞌey xol-laj nacionlaj, ta ey bꞌey xax abꞌle wan kꞌane jaxca wan tuꞌ. Jaꞌ ebꞌ ja wet conobꞌ Israel tiꞌ, ey wal tzetyetal yel xacꞌal pena jix yun ebꞌ.
14 ¿Ey mi bꞌey tucꞌal chi qꞌueya chꞌen sajbꞌacom bꞌey satlaj chꞌen mimej chꞌen bꞌey Líbano? ¿Chim skeꞌ stantoj jaꞌ jaꞌ caw wal siic chi tit bꞌey sjolomlaj wonan?
15 Jal jin jain tiꞌ, jix jin too xacꞌal can qꞌueycꞌulal yu ebꞌ jin conobꞌ tiꞌ; jaxa bꞌey tzetyetal tol man dios oj, jatuꞌ chi yakꞌ tzꞌaꞌ incienso ebꞌ. Jix qꞌueytoj ebꞌ yin jun bꞌe tol ey cꞌaltaꞌ yet peyxa. Jacꞌal yin pena bꞌeybꞌale jix too ebꞌ.
16 Yu jun tuꞌ, oj cancan jun miman conobꞌ tiꞌ yin tzꞌinanil. Oj bꞌuchle yu ebꞌ ánima. Masanil mactxequel oj ecꞌ tituꞌ, tuxa cꞌal oj syum sat ebꞌ yu qꞌueyubꞌtaj xacꞌal yili tzet oj wunne.
17 Jaxca wal chi yun sajlemtoj junoj tzetyetal yu kaꞌeꞌ chi tit yetcꞌulal bꞌey chi aol cꞌu, queytuꞌ oj yun wakꞌon yela ebꞌ Israel tiꞌ tet scajat. Jaꞌ wichin oj jin jacbꞌacantoj tet ebꞌ, yet oj apnoj jun scꞌual yet oj oc syaꞌilal ebꞌ. Manxa oj jin oc tꞌanan yin ebꞌ, ẍi Dios.
Jaꞌ Tzet Jix Naꞌle Oc Yin Naj Jeremías
18 Jix yalon ebꞌ conobꞌ jaxca tiꞌ: Cu naꞌwej tzet watxꞌ oj kun yetoj jun Jeremías tiꞌ. Ey cꞌaltaꞌ junoj yakꞌomal xaambꞌal oj cu cuyonoj, ey cꞌaltaꞌ ebꞌ ey snaꞌbꞌal oj akꞌon cu naꞌbꞌal, ey cꞌaltaꞌ ebꞌ ẍejabꞌ Dios oj alon skꞌane Dios ey jon. Yu jun tuꞌ, cu xijwej a kꞌane yibꞌan, catuꞌ chi makꞌle camoj. Cꞌam ojabꞌ chi cu jijewej tzetyetal chi yalaꞌ, ẍi ebꞌ.
Xa Naj Jeremías
19 Jaach Jehová jin Diosal, ocan wal tꞌananoj, abꞌ wal tzet chi yal ebꞌ chi jowi oc win.
20 ¿Tumi yin xa spenail chi yun spajtzele watxꞌcꞌulal? Jaꞌ ebꞌ tuꞌ, tuxa jix snaꞌ ebꞌ tzet oj yun jin yakꞌon camoj.
Naꞌtej tol jix jin txali ey jaach yu ebꞌ, yet watxꞌ cꞌam cha watej sjowal ja cꞌul yibꞌan ebꞌ.
21 Jaxa tinaniꞌ xin, cam ojabꞌ yuninal ebꞌ yu wail, ey ojabꞌ ebꞌ chi cam yu jowal. Can ojabꞌ can yistil ebꞌ yin cꞌamxa yichamil, cꞌal yin cꞌamxa yuneꞌ ebꞌ ix ix. Cam ojabꞌ yichamil ebꞌ ix ix yu syaꞌilal, cam ojabꞌ ebꞌ achꞌe xol jowal.
22 Cha waontej junoj bꞌulan soldado chi elkꞌanentoj stzetyetal xol ebꞌ, abꞌle ojabꞌ yoc aw yet syaꞌilal, yutol jix sjot jun jolan ebꞌ yet chi eyqꞌuey yu ebꞌ, jix yaon ey txꞌan yaal ebꞌ jin sattaj yet chin eyqꞌuey yu ebꞌ.
23 Jaach jin Diosal, ja wotaj masanil tzet chi snaꞌ ebꞌ win, cꞌal tzetyetal chi swaꞌne ebꞌ yet chin yakꞌon cam ebꞌ. Cꞌam ojabꞌ cha wakꞌ mimancꞌulal yin ebꞌ, tam wal stoo can qꞌueycꞌulal spenail ebꞌ ja wu. Qꞌuey ojabꞌ el ebꞌ ja sattaj, catuꞌ cha waon oc syaꞌilal yibꞌan ebꞌ yetoj sjowal ja cꞌul, ẍi naj Jeremías yin xa.