Cuybꞌanile Yin Txꞌotxꞌ Poꞌoil Mooc
19
Jix yalon Jehová ey jin jaxca tiꞌ: Chi too ja man junoj txꞌotxꞌ mooc, catuꞌ cha wawten cꞌal pax tej ebꞌ icham winaj yul conobꞌ ja wetoj, cꞌal yetoj ebꞌ yakꞌomal xaambꞌal tol icham winajxa. 2 Catuꞌ chach too bꞌey spananil sjobꞌeal yet Ben-hinom, bꞌey spuertail bꞌey chi ecꞌ el ebꞌ chi bꞌet akꞌo kꞌalem; jaꞌ tituꞌ oj ja wal masanil jin kꞌane chi wal ey jaach tiꞌ. 3 Al tet naj sreyal Judá, cꞌal tet ebꞌ caan bꞌey Jerusalén jaxca tiꞌ: Abꞌwej yalon Jehová cu Diosal, Naj ey yipalil: Abꞌwej, tol oj watej jun miman syaꞌilal yibꞌan jun je conobꞌ tiꞌ; jaꞌ masanil mac oj abꞌen ocoj, tuxa cꞌal oj qꞌueycan a scꞌul ebꞌ yabꞌeni. 4 Yutol jix jin je bꞌejcanoj, catuꞌ jix je yuten jun txꞌotxꞌ tiꞌ jaxca xacꞌal xꞌotxꞌal comon dios; catuꞌ jix je yakꞌon tzꞌaꞌ incienso tet wan comon dios tol man je yotaj oj, tam wal ebꞌ je mam icham jix otajnen eloj, tam wal ebꞌ je reyal. Cꞌamxa chi alcha jantaj ebꞌ ánima cꞌam spenail jix je makꞌ camoj. 5 Yetoj cꞌal pax oj, jix je waꞌne a jun yet xaambꞌal bꞌey che yakꞌ tzꞌaꞌ ebꞌ je yuninal yin xaambꞌalil tet jun comon dios Baal. Che yunen tzetyetal tol man jain oj jix wakꞌ je yunne, tam wal jix ecꞌ yin jin naꞌbꞌal jun tzet che yun tuꞌ. 6 Yu jun tuꞌ, jain caw Jehová jin chi walaꞌ tol oj apnoj wal jun scꞌual tol jaꞌ jun jobꞌe tiꞌ manxa oj yij Tófet, tam wal sjobꞌeal yet Ben-hinom, yutol sjobꞌeal scamichal ánima oj yij sbꞌi. 7 Jaꞌ bꞌey jun jobꞌe tiꞌ oj wakꞌ etex el tzet naꞌbꞌil je yu jex a Judá, cꞌal jex a Jerusalén. Oj jex wakꞌ eyqꞌuey sattaj ebꞌ je cajat chi yoche chex makꞌon camoj, jaxa je mimanil oj oc ẍiꞌbꞌeoj noꞌ miij cꞌal noꞌ xol-laj teꞌal chiꞌwawom noꞌ. 8 Cusiltaj txꞌotxꞌ xacꞌal oj yun can jun je conobꞌ tiꞌ, oj bꞌuchwa ebꞌ ánima yin. Jaꞌ mactxequel oj to ecꞌ titiꞌ, tuxa cꞌal oj qꞌueycan a scꞌul yiloni, cꞌal sbꞌuchwa can a yu tzet oj yun cantoj. 9 Jaꞌ junoj oj wakꞌ je yunne, tol oj je chiꞌle eytoj je bꞌa, cꞌal je chiꞌlen eytoj je yuninal yu wail yet oj oc joyan ebꞌ chi jowi oc yin je conobꞌ tiꞌ, ẍi Jehová, ja chi tet ebꞌ.10 Jaꞌ yet oj lawoj ja walon masanil wan tuꞌ, catuꞌ oj ja makꞌon poꞌo jun txꞌotxꞌ mooc tuꞌ sattaj ebꞌ ánima jaꞌjun ja wetoj tuꞌ, 11 catuꞌ cha walon tet ebꞌ jaxca tiꞌ: Jaꞌ Jehová, Naj miman yipalil chi alon jaxca tiꞌ: Oj wakꞌ lawoj ey jun conobꞌ tiꞌ jaxca wal chi yun smakꞌle poꞌo junoj txꞌotxꞌ mooc, tol cꞌamxa chi skeꞌ scaꞌ waꞌnele a junelxa. Jaꞌton bꞌey Tófet tiꞌ oj je mujeytoj jantaj ebꞌ oj camoj, yutol cꞌamxa bꞌey oj skeꞌ je mujon ebꞌ. 12 Jain caw Jehová jin chi walaꞌ, tol queytuꞌ oj wute jun conobꞌ tiꞌ, cꞌal yetoj jantaj jex caan jex bꞌey; tol laan oj je yun can jaxca conobꞌ Tófet. 13 Masanil na bꞌey Jerusalén tiꞌ, cꞌal spalacio ebꞌ sreyal Judá cꞌal spananil yibꞌanlaj na bꞌey chi akꞌle tzꞌaꞌ incienso bꞌey masanil tzejtebꞌal chi kilatoj bꞌey satcan cꞌal bꞌey che sec ey yal uva yin ofrendail tet comon dios, masanil wan tuꞌ, caw yaabꞌetaj xacꞌal oj yun canoj, queyton tuꞌ oj yun can conobꞌ Tófet, ẍi Jehová, ja chi tet ebꞌ.
14 Jix lawi yunen naj Jeremías wan tuꞌ xin, catuꞌ jix meltzotej naj bꞌey Tófet, bꞌey jix yal can el skꞌane Jehová. Jix octoj linan bꞌey yul templo, jix yalon tet masanil ebꞌ conobꞌ jaxca tiꞌ: 15 Jaꞌ Jehová cu Diosal, Naj Yaaw miman yipalil chi alon jaxca tiꞌ: Oj watoj syaꞌilal yibꞌan jun je conobꞌ tiꞌ, cꞌal yibꞌan wanxa conobꞌlaj ey je cawilal; oj jul masanil wan syaꞌilal tuxa oj jul je yibꞌan, yutol jix je pitne xacꞌal el je naꞌbꞌal, cꞌamxa che jije tzet chi walaꞌ, ẍi Jehová ẍi naj Jeremías.