Jaꞌ naj Pashur scꞌaal Imer, sat yakꞌomal xaambꞌal yeoc naj bꞌey stemplo Jehová. Jaꞌ yet jix yabꞌen naj tzet jix wal jain Jeremías jin tiꞌ, 2 jix yalon naj tol chin makꞌlei, catuꞌ chin ale octoj yul jun teꞌ cepo bꞌey spuertail templo eyoc yibꞌan bꞌey yetcꞌulal smajul ebꞌ yet Benjamín. 3 Jaꞌ yet junxa cꞌual jix jin jul iꞌle eltej yul jun teꞌ cepo tuꞌ. Yuxan jix wal tet naj Pashur jaxca tiꞌ: Jaꞌ Jehová jix qꞌuexon ja bꞌi yin Magor-misabib (chi yal yeloc apnoj ey xacꞌal ja xiwcꞌulal.) 4 Yutol chi yal Jehová jaxca tiꞌ: Oj waoc xiwcꞌulal ja wibꞌan yetoj masanil ebꞌ eyoc ja wetoj; ja sattaj wal oj eyqꞌuey ebꞌ eyoc ja wetoj tuꞌ yu yespada ebꞌ je cajat, oj waoc masanil ebꞌ a Judá yul skꞌabꞌ ebꞌ a Babilonia. Jaꞌ ebꞌ tuꞌ oj jex iꞌontoj bꞌey Babilonia tuꞌ, ma tol oj jex tejle cam yu ebꞌ. 5 Catuꞌ oj waon oc masanil sbꞌeomal jun conobꞌ tiꞌ yul skꞌabꞌ ebꞌ je cajat tuꞌ, cꞌal masanil tzettaj yetal tol ey stool ey, ey jex, yetoj masanil sbꞌeomal ebꞌ sreyal Judá oj yiꞌtoj ebꞌ bꞌey Babilonia. 6 Jaach Pashur, oj jaach iꞌletoj yin yakꞌomaloj servil bꞌey Babilonia, yetoj cꞌal masanil ebꞌ caan ja wetoj yul ja na. Jaꞌ tituꞌ oj jaach camoj. Junne oj jaach mujle yetoj ebꞌ ja watxꞌil ánima, jaꞌton ebꞌ jix yakꞌ lekꞌtiꞌal ja wetoj, ẍi Jehová, ẍi naj Jeremías.