Albꞌil El Syaꞌilal Yibꞌan Jerusalén
21
1-2 Ey jun cꞌual jix chejletoj naj Pashur scꞌaal Malquías yu naj rey Sedequías, yetoj naj yakꞌomal xaambꞌal jaꞌton naj Sofonías scꞌaal Maaseías, yet chi too il-le ecꞌ naj Jeremías yu ebꞌ, cꞌal yal-le tet jaxca tiꞌ: Caw chi cu oc tean ey jaach, tol cha kꞌan tet Jehová ku jaon tiꞌ, yutol jaꞌ naj Nabucodonosor sreyal Babilonia, lalan yakꞌon jowal naj kin jon. Jaxta wal chi el yin scꞌul Jehová xꞌoxon yipalil, jaxca jix yun yet yalantoj, yet watxꞌ chi sbꞌej yakꞌon jowal naj rey Nabucodonosor tuꞌ kin jon, ẍi ebꞌ.Jix lawi tuꞌ xin, jix kꞌanabꞌ Jehová tet Jeremías. 3 Jix takꞌwi Jeremías tet ebꞌ ẍejabꞌ naj rey Sedequías tuꞌ jaxca tiꞌ: Alwej tet naj Sedequías tuꞌ, 4 tol jaꞌ Jehová cu Diosal jaon Israel jon tiꞌ, chi yal jaxca tiꞌ: Oj wakꞌ meltzo ebꞌ ja soldado yintaj, jaꞌton ebꞌ chi akꞌon jowal yetoj ebꞌ soldado naj sreyal Babilonia. Jaxa ebꞌ soldado Caldeo tol eyecꞌ bꞌey yinlaj smuroal conobꞌ, tol joybꞌil jex a yu ebꞌ, jain oj jin yambꞌa octej ebꞌ yul jun conobꞌ tiꞌ. 5 Jain Jehová jin tiꞌ oj wakꞌ jowal je yin yetoj wipalil tol eyxa smey, yetoj wal sjowal jin cꞌul tol eyxa smey yeocoj. 6 Oj wakꞌ cam masanil ebꞌ ánima caan yul jun conobꞌ tiꞌ, masanil ebꞌ ánima yetoj cꞌal masanil noꞌ noꞌ oj cam yu jun miman yaꞌbꞌil oj juloj. 7 Oj lawoj tuꞌ xin, jaach Sedequías jaach tiꞌ, oj jaach wa can oc yul skꞌabꞌ naj rey Nabucodonosor, yetoj wanxa ebꞌ ja cajat. Oj jaach wa can oc yetoj ebꞌ chach akꞌon servil, ebꞌ soldado, yetoj cꞌal ebꞌ ánima oj cancan yin yiquisal bꞌey conobꞌ tiꞌ yet oj lawoj ecꞌ mimej yaꞌbꞌil, jowal cꞌal wail. Manxa oj wakꞌ mimancꞌulal je yin, tol jain caw Jehová jin chi walaꞌ, tol oj jex wakꞌ makꞌle cam yetoj chꞌen espada.
8 Alwej cꞌal pax el xol ebꞌ conobꞌ, tol jain Jehová jin chi walaꞌ: Chi wakꞌ je sicꞌle tzet bꞌeal che yiꞌ. Ey sbꞌeal kꞌinale, ey pax sbꞌeal camich. 9 Jaꞌ mactxequel chi cancan bꞌey jun conobꞌ tiꞌ, oj cam ebꞌ yu jowal, yu wail ma yu yaꞌbꞌil. Jal pax ebꞌ chi eltoj xin, catuꞌ chi yaon oc sbꞌa yul skꞌabꞌ ebꞌ Caldeo, jaꞌton ebꞌ lalan yakꞌon jowal yin conobꞌ tinaniꞌ, jaꞌ ebꞌ chi eltoj tuꞌ, man oj cam ebꞌ; oj colcha can ebꞌ. 10 Jain caw Jehová jin chi walaꞌ, tol tuxa jix jin naꞌ waon oc syaꞌtajilal yibꞌan jun conobꞌ tiꞌ, manaj swatxꞌilal oj wakꞌ yibꞌan. Tol oj waoc ebꞌ yul skꞌabꞌ naj sreyal Babilonia, jaxa naj oj nuson tzꞌaꞌoj.
Kꞌane Jix Al-le Can El Yibꞌan Sreyal Judá
11-12 Alwej cꞌal pax tet ebꞌ sreyal Judá, jaꞌton ebꞌ yicꞌaal David, tzetyetal chi walaꞌ:
Chi cam wal je yabꞌen tzet chi wal jain Jehová jin tiꞌ: Watxꞌ ojabꞌ che yun je waꞌnen yeoc jowal ey xol ebꞌ ánima yin junjun cꞌu. Che colel ebꞌ chi etex yu ebꞌ chi etnen yet animail. Ta tol pena che yute je waꞌnen yeoc junoj kꞌane xol ebꞌ, yu cꞌal jaxca tuꞌ, oj waeytej sjowal jin cꞌul je yibꞌan jaxca junoj kꞌakꞌ tol chi chaw xaj, cꞌamxa mac chi skeꞌ sbꞌuton tanoj.
Syaꞌilal Oj Jul Yibꞌan Jerusalén
13 Jex a Jerusalén, yel xacꞌal naat ey jex ecꞌ yibꞌan jun wonan tuꞌ, jaxca junoj miman chꞌen ey bꞌey sat acꞌal, jaex tiꞌ che yal jaxca tiꞌ: ¿Mac wal txequel oj skeꞌ yakꞌon jowal ketoj? ¿Mac wal junoj oj skeꞌ yapni oc bꞌey chi cu col cu bꞌa tiꞌ? je chi. Jain Jehová jin chi walaꞌ tol oj waeytej sjowal jin cꞌul je yibꞌan.
14 Jain caw Jehová jin chi walaꞌ, tol oj waoc syaꞌilal je yibꞌan, jaxca wal smooal je chaꞌon yu tzet che bꞌeybꞌalne. Oj waon oc skꞌakꞌal txꞌotxꞌ eltzabꞌ. Jantaj tzet ey stiꞌlaj je conobꞌ tiꞌ, pilan oj tzꞌaꞌtoj masanil, ẍi Jehová, ẍi naj Jeremías.