Kꞌane Jix Al-le Yin Ebꞌ Sreyal Judá
22
Jix yalon Jehová ey jin jaxca tiꞌ: Asiꞌ bꞌey sdespacho naj sreyal Judá, catuꞌ cha walon wan kꞌane tiꞌ, 2 sattaj jun rey tuꞌ, jaꞌton jun eyoc reyal sqꞌuexeloj naj rey David. Cha walon cꞌal pax sattaj masanil ebꞌ mimej yaaw eyoc yin yopiso, cꞌal sattaj masanil ánima eyecꞌ tituꞌ tol chi yaoc xiquin ebꞌ yabꞌen jin kꞌane tiꞌ: 3 Jaꞌ sjichanil cꞌal swatxꞌilal che bꞌeybꞌalne. Cꞌam ojabꞌ cꞌal mactxequel chi yetne yet animail, cꞌam ojabꞌ chi etnele ebꞌ txꞌoj conobꞌal, ebꞌ unin cꞌamxa smam cꞌal ebꞌ cꞌamxa xutx, yetoj cꞌal ebꞌ ix ix camnajxa yichamil. Tam wal che makꞌ cam ebꞌ ánima tol cꞌam spenail bꞌey jun conobꞌ tiꞌ. 4 Ta tol yel oj je bꞌeybꞌalne wan chi wal tiꞌ, oj oc cꞌal ebꞌ yicꞌaal David yin reyal, eyoc ebꞌ yul carruaje cꞌal yibꞌan che yet oj octej ebꞌ bꞌey yul spuertail jun palacio tiꞌ, jaꞌjun masanil ebꞌ mimej yaaw eyoc yopiso cꞌal ebꞌ conobꞌ jaꞌjun yetoj ebꞌ. 5 Ta tol man oj je chaꞌ je yabꞌ wan chejbꞌanile jix wal tiꞌ, jain caw Jehová jin chi wakꞌ jin tiꞌ, tol jaꞌ jun palacio tiꞌ oj lawoj eyoj, ẍi Jehová.6 Jix yalon cꞌal pax Jehová jaxca tiꞌ:
Jaꞌ spalacio naj sreyal Judá, laan yeoc yul jin sat jaxca swatxꞌil yili txꞌotxꞌ Galaad, jaxca cꞌal pax yili txꞌotxꞌ wonan Líbano. Jain chi walaꞌ tol cusiltaj txꞌotxꞌ oj wute cantoj. Cꞌamxa junoj mactxequel oj caey bꞌey jun palacio tiꞌ.
7 Oj watoj ebꞌ ánima caw wal ey smitxꞌkꞌabꞌ yet jowal yin jun palacio tiꞌ, yu sqꞌueyle el ebꞌ. Oj skꞌajey teꞌ kꞌuteꞌ ebꞌ, teꞌ txꞌojxa swatxꞌil yoc yin patzabꞌil, oj yakꞌon tzꞌaꞌ ebꞌ.
8 Jaꞌ ebꞌ ánima oj tit bꞌey wanojxa nación, oj ecꞌabꞌ ebꞌ scawilal jun conobꞌ tiꞌ, tuxa cꞌal oj skꞌanle ebꞌ tet junjun jaxca tiꞌ: ¿Tzet la yu, yuxan queytuꞌ jix yute Jehová jun miman conobꞌ tiꞌ? ẍi xacꞌal ebꞌ, oj yalon ebꞌ. 9 Catuꞌ oj takꞌwoj wanojxa tet ebꞌ jaxca tiꞌ: Yutol jix sbꞌejcan jun swa kꞌane ebꞌ jix swaꞌne can yetoj Jehová sDiosal, jaxa tet wan comon dios jix oc ebꞌ yin eyilal, ẍi ebꞌ oj yalon ebꞌ, ẍi Jehová.
Kꞌane Jix Yal Naj Jeremías Yin Naj Salum
10-11 Cꞌam ojabꞌ chex okꞌ yu naj Josías, cꞌam ojabꞌ chex okꞌ yu scamichal naj. Okꞌanwej yu jun scꞌaal naj chi yij Salum, yutol chi el naj yul sconobꞌ yin junelne, cꞌamxa bꞌakꞌin oj meltzo naj; manxa oj yiloc yin sconobꞌ naj cꞌal xꞌotxꞌal naj bꞌey jix ali.
Jaꞌ Jehová chi alon yin scꞌaal Josías chi yij Salum, jun jix oc sreyaloj Judá yet xax cam smam tuꞌ: Jix el titiꞌ, man xacꞌaltaꞌ oj meltzo junelxa. 12 Jaꞌ bꞌey jun nación bꞌey jix iꞌletoj tuꞌ, jatuꞌ oj camoj. Manxa cꞌal oj jul yil jun sconobꞌ tiꞌ junelxa.
Kꞌane Jix al-le Yibꞌan Naj Joaquim
13 ¡Okꞌbꞌal jaach cꞌul, yutol jaꞌ yin spenail cha waꞌne ja palacio, cꞌal yetoj ja mimej na jix ja waꞌne. Jaꞌ ebꞌ ánima jix mulna ja wetoj, ma ja toolane scꞌu ebꞌ!
14 Cha walon jaxca tiꞌ: Oj jin waꞌne a junoj miman palacio, yetoj junojxa miman bꞌey yet scaabꞌ piso. Oj jajle swentanail, jaꞌ teꞌ kꞌuteꞌ oj waoctoj yichlaj na, catuꞌ oj bꞌonle yetoj cajin pintura, ja chi, cha waloni.
15 ¿Chim la ja naꞌ tol asan yu ja caey ecꞌ bꞌey yul-laj na tol kꞌuteꞌ xacꞌal eyoc yin, yuxan rey jaach tol miman ja weloc apnoj ja naꞌoni? Jaꞌ naj ja mam jix yakꞌ wal tzalabꞌoj scꞌul yutol caw wal watxꞌ sbꞌeybꞌal, watxꞌ cꞌal tzet jix yunne, yuxan watxꞌ cꞌal jix yun yelocoj.
16 Caw jix colwa yin ebꞌ mebꞌa, yetoj cꞌal ebꞌ okꞌbꞌal cꞌul yeocoj. Yu jun tuꞌ, yuxan watxꞌ cꞌal jix elocoj. Jain caw Jehová jin chi walaꞌ, tol jaꞌ yu watxꞌ bꞌeybꞌale tuꞌ, jaꞌ chi txꞌoxon eloj tol otajbꞌil jin yu.
17 Jal jaach, jaach tiꞌ xin, asan bꞌeomal cha woche cha wiꞌ yin spenail; cha makꞌon cam ebꞌ ánima cꞌam spenail, caw pena jix ja wute ja naꞌbꞌal yin ja wetnen ebꞌ conobꞌ, ẍi Jehová.
18 Chi yal Jehová yin naj Joaquim, scꞌaal Josías, sreyal Judá jaxca tiꞌ:
Cꞌam mactxequel oj okꞌ yu scamichal naj. Toj ey mactxequel oj okꞌoj, catuꞌ oj yalon jaxca tiꞌ: ¡Ay, jex wet animail, okꞌbꞌal jon cꞌul, tuxa jix cam naj cu reyal, tol jaxca wal cu mam yeocoj! man ẍi oj ebꞌ.
19 Oj utele jaxca cꞌal chi utele junoj noꞌ camnaj bꞌuru; oj jutxle can eltoj stiꞌel conobꞌ Jerusalén, ẍi Jehová.
Kꞌane Jix Al-le Yin Jerusalén
20 Jix yalon Jehová jaxca tiꞌ: ¡Jex a Judá, aanwejtoj bꞌey sjolom txꞌotxꞌ wonan Líbano, catuꞌ chex awi! ¡Caw wal ip chi yun je yawi bꞌey sjolomlaj txꞌotxꞌ wonan yul yet Basán, cꞌal bꞌey txꞌotxꞌ tzalquiltaj yul yet Abarim! Yutol masanil ebꞌ eyoc je yetoj tuxa jix lawi ey ebꞌ.
21 Jain tiꞌ, jix wal ey jex yet caw elnaj wal je yakꞌon tzalabꞌoj je cꞌul yu tzet ey, ey jex, ma je chaꞌ je yabꞌ tzet jix walaꞌ. Quey cꞌal tuꞌ jix je yute je bꞌa yet tax jix jex titoc yin achꞌeal, junelne ma je jije tzet chi walaꞌ.
22 Yu cꞌal jun tuꞌ, yuxan oj iꞌle bꞌey ebꞌ je yaawil, jaxca yet chi iꞌle bꞌey junoj tzetyetal yu junoj jow kaꞌeꞌ, yetoj cꞌal ebꞌ eyoc je yetoj oj iꞌletoj ebꞌ yin presowomal. Tuxa cꞌal oj jex qꞌuixwoj can aoj. Yeynajil xacꞌal oj je yun canoj, yu cꞌal masanil jantaj je penail.
23 Jaꞌ tinaniꞌ, caw wal tzalacꞌulal ey jex ecꞌ bꞌey je na, tol naꞌbꞌa kꞌuteꞌ eyoc yinlaj tol iꞌbꞌiltej bꞌey Líbano. Jaxa wal yet oj jul jun syaꞌilal tuꞌ je yibꞌan, caw wal oj el je yaw je yabꞌen syaꞌil, jaxca syaꞌil unin yin junoj ix ix chi ali yuneꞌ, ẍi Jehová.
Skꞌane Dios Tet Naj Rey Jeconías
24 Chi yalon Jehová tet naj Jeconías, scꞌaal Joaquim, naj sreyal Judá: Caxcꞌal caw ey tzet chach oc wu, jaxca wal junoj kolkꞌabꞌe eyoc yin jin watxꞌ kꞌabꞌ, jain caw Jehová jin chi wakꞌ jin tiꞌ, tutun oj jaach wiꞌel jin sattaj yin junelne. 25 Oj jaach waoc yul skꞌabꞌ ebꞌ ja cajat, jaꞌton tet ebꞌ caw wal chach xiw tet, jaꞌton ebꞌ chi yoche tol oj jaach smakꞌ camoj. Oj jaach waoc yul skꞌabꞌ Nabucodonosor, naj sreyal Babilonia, yetoj ebꞌ jaꞌjun yetoj. 26 Oj jaach wujtetoj yetoj ja txutx bꞌey jun txꞌotxꞌ tol manaj tuꞌ jix jaach ali, jaꞌ tituꞌ oj jex cam je cawanil. 27 Yu jun tuꞌ, yuxan manxa oj jex meltzotej titiꞌ, caxcꞌal mi caw oj to je yoche oj jex meltzotej, ẍi Jehová.
Skꞌanlebꞌal Naj Jeremías
28 Yu jun tuꞌ, jix walon sattaj Jeconías jaxca tiꞌ: ¿Tumi laan xacꞌal naj Jeconías tiꞌ jaxca junoj txꞌotxꞌ jatil ẍalu cꞌamxa yopiso, ma jaxca junoj mitxꞌkꞌabꞌe tol cꞌamxa mac chi ocheni? ¿Tzet yu, yuxan chi ujteletoj yetoj yuninal bꞌey jun txꞌotxꞌ tol man otajbꞌiloj yu?
29 ¡Jex ánima caan jex bꞌey jun conobꞌ tiꞌ, chi cam wal je yabꞌeni tzet chi yal Jehová!
30 Jaꞌ Jehová chi alon jaxca tiꞌ: Tzꞌibꞌewej can ey yul junoj an miman juun yet chi txeclo can yeocoj, tol laan oj yun can jun winaj tiꞌ jaxca junoj winaj tol cꞌam yuninal, jaxca junoj winaj tol man watxꞌoj jix elocoj; yutol cꞌamxa junoj yicꞌaal oj apnoj oc yakꞌon yaawilal bꞌey sdespacho naj rey David, yin yakꞌon yaawilal junelxa bꞌey Judá, ẍi Jehová.