Jaꞌ Tzet Chi Kaoc Yipoj Cu Cꞌul Yet Bꞌakꞌin
23
Jaꞌcaw Jehová chi alon jaxca tiꞌ: ¡Okꞌbꞌal cꞌul ebꞌ eyoc yilomal jin conobꞌ tiꞌ, yutol chi sbꞌejcan ebꞌ yilon jaxca junoj ilom meꞌ, chi sajlem cantoj jin conobꞌ yu ebꞌ! ẍi Dios.2 Jaꞌ Jehová cu Diosal jaon Israel jon tiꞌ, jaꞌ chi alon tet ebꞌ yilomal conobꞌ, jaꞌton ebꞌ chi akꞌon yaawil xol ebꞌ sconobꞌ Dios, chi yalon jaxca tiꞌ: Jaex tiꞌ, jix je sajlemne cantoj ebꞌ jin conobꞌ tol jix je yujte eloj, catuꞌ ma je teyne ebꞌ. Yu jun tuꞌ, jain wal caw Jehová jin chi walaꞌ tol oj waoc syaꞌilal je yibꞌan yu tzet jix je yun tuꞌ. 3 Jal ebꞌ jin conobꞌ jix jin sajlemne cantoj bꞌey wanxa nacionlaj, jain wal caw Jehová jin chi walaꞌ, tol oj wiꞌ meltzo ebꞌ junelxa. Oj jin yambꞌa oc ebꞌ, catuꞌ oj wakꞌon caey ebꞌ junelxa bꞌey yul sconobꞌ yet watxꞌ oj chꞌibꞌ sbꞌisil ebꞌ. 4 Catuꞌ oj waon oc yilomal ebꞌ, yet watxꞌ cꞌamxa xiwcꞌulal ebꞌ, catuꞌ cꞌamxa cꞌal junoj ebꞌ oj qꞌueyaoj, ẍi Dios.
5 Jain Jehová jin chi wal jaxca tiꞌ: Oj apnoj jun scꞌual yet oj waon oc jun yicꞌaal naj rey David, jun tol caw watxꞌ snaꞌbꞌal, yet chi oc yin reyal bꞌey jin conobꞌ tiꞌ. Jaꞌ jun tuꞌ, caw jichan snaꞌbꞌal, oj swaꞌne yeoc junoj kꞌane xol ebꞌ jin conobꞌ yetoj sjichanil.
6 Jaꞌ yul stiempoal yet oj yakꞌon reyal tuꞌ, caw oj colcha can el ebꞌ a Judá yetoj cꞌal pax ebꞌ Israel, cꞌamxa cꞌal tzet oj snaꞌ ebꞌ. Jaꞌton jun bꞌie tiꞌ oj akꞌle yij sbꞌioj jaxca tiꞌ: Jaꞌ Jehová Naj chi waꞌnen yeoc junoj kꞌane yin sjichanil, queytuꞌ oj yij sbꞌi.
7 Chi yalon Jehová jaxca tiꞌ: Jain chi wakꞌ jin tiꞌ: Jaꞌ tinaniꞌ, jaꞌ yet chi sbꞌinane jin bꞌi ebꞌ ánima, chi yalon ebꞌ jaxca tiꞌ: Yotaj wal Jehová, Naj jix iꞌon eltej ebꞌ Israel bꞌey txꞌotxꞌ Egipto, ẍi ebꞌ. 8 Jaxa yet oj bꞌey cꞌaltoj tuꞌ, oj yalon ebꞌ jaxca tiꞌ: Caw yotaj Jehová, Naj jix iꞌon eltej ebꞌ Israel bꞌey norte, yetoj cꞌal bꞌey wanxa conobꞌlaj bꞌey jix sajlem cantoj ebꞌ, ẍi ebꞌ, oj yalon ebꞌ. Queyton tuꞌ oj yun yapni oc ebꞌ Israel bꞌey sconobꞌal junelxa, ẍi Dios.
Kꞌane Jix Al-le Yin Ebꞌ Chi Yaloc Sbꞌa Ẍejabꞌoj Dios
9 Jaꞌ tzet jix yal naj Jeremías yin ebꞌ chi yaloc sbꞌa ẍejabꞌoj Dios, chi yalon jaxca tiꞌ: Caw wal jix somchatoj jin naꞌbꞌal yu Jehová, caw yaꞌ chi yabꞌ jin pixan. Caw wal chi bꞌilwi jin mimanil, tuxa cꞌal chi qꞌueya jin cꞌul jaxca junoj uqꞌuem an chi telcꞌotoj, queytuꞌ weoc chi wabꞌe.
10 Jaꞌ ebꞌ ánima caan yul jun conobꞌ tiꞌ, asanne amulal chi sbꞌeybꞌalne ebꞌ, chi yakꞌ wal yip ebꞌ yunen spenail. Chi yakꞌ yip ebꞌ yin yetnen yet animail. Yu jun tuꞌ, yuxan jix intajnele can el jun txꞌotxꞌ tiꞌ yu Jehová. Yu jun tuꞌ, yuxan jix tajtoj txꞌotxꞌ, jix tajtoj an cꞌultaj bꞌey chi low noꞌ noꞌ.
11 Jaꞌ Jehová chi alon jaxca tiꞌ: Jaꞌ ebꞌ chi yaloc sbꞌa jin chejabꞌoj tiꞌ, cꞌal ebꞌ yakꞌomal xaambꞌal, caw cꞌam weloc apnoj yul sat ebꞌ; jix ilcha ebꞌ wu tol chi yun spenail ebꞌ yul jin templo.
12 Yu jun tuꞌ, jaꞌ sbꞌeybꞌal ebꞌ caw kꞌejkꞌinal cꞌal eloj, laan jaxca bꞌey caw ey sokꞌom tuxa cꞌal chi nululi yili bꞌey chi bꞌeytoj ebꞌ. Oj tenletoj ebꞌ, catuꞌ oj telcꞌotoj ebꞌ. Jaꞌ yet oj jin naꞌon oc yin ebꞌ, oj waontej mimej syaꞌilal yibꞌan ebꞌ, jain Jehová jin chi walaꞌ.
13 Jaꞌ ebꞌ chi yaloc sbꞌa jin chejabꞌoj bꞌey Samaria tuꞌ, caw pena tzetyetal jix yun ebꞌ. Jix kꞌanabꞌ el ebꞌ yin sbꞌi jun comon dios chi yij Baal, queytuꞌ jix yun yijbꞌale qꞌueytoj jin conobꞌ Israel tiꞌ yu ebꞌ.
14 Jix wil cꞌal pax ebꞌ chi yaloc sbꞌa jin chejabꞌoj bꞌey Jerusalén tiꞌ, caw pena xacꞌal tzetyetal chi yun ebꞌ. Chi yun amulal ebꞌ, chi yetne yet animail ebꞌ, catuꞌ chi yiptzelen sbꞌa ebꞌ yunen spenail. Junelne cꞌam junoj mac chi spoꞌoel sbꞌa yin spenail. Jaꞌ chi yun wiloni, tol jaꞌ wan ánima tiꞌ, yetoj cꞌal ebꞌ caan bꞌey Jerusalén, caw laan ebꞌ jaxca ebꞌ a Sodoma cꞌal ebꞌ a Gomorra.
15 Yu jun tuꞌ, jain Jehová Yaaw jin yibꞌan masanil, jain chi wal wan kꞌane tiꞌ yibꞌan ebꞌ chi yaloc sbꞌa jin chejabꞌoj tiꞌ: Oj wakꞌ tzetyetal kꞌaꞌ sloꞌ ebꞌ. Oj wakꞌon jaꞌ yucꞌ ebꞌ tol eytoj veneno xol, yutol jaꞌ yu ebꞌ chi yaloc sbꞌa ebꞌ jin chejabꞌoj bꞌey Jerusalén tiꞌ, yuxan jix jowbꞌi xacꞌal spenail bꞌey masanil yul nación tiꞌ, ẍi Dios.
16 Jain Jehová jin chi wal jaxca tiꞌ: Jex conobꞌ Israel, cꞌam ojabꞌ che yaoc yipoj je cꞌul tzet chi yal ebꞌ chi yaloc sbꞌa jin chejabꞌoj tuꞌ, yutol lekꞌtiꞌal cꞌal tzet chi yal ebꞌ. Jaꞌ tzet chi yal ebꞌ tuꞌ, yul cꞌal yet ebꞌ chi yalon ebꞌ. Man jain oj chin chej yal ebꞌ.
17 Jaꞌ tet ebꞌ cꞌam yeloc apnoj jin kꞌane yul sat, chi yal ebꞌ jaxca tiꞌ: Watxꞌ cꞌal oj yun je yelocoj, ẍi ebꞌ. Jaxa tet ebꞌ chi yakꞌ pitbꞌoj el snaꞌbꞌal yin yunen tzet chi ẍaꞌ scꞌul, chi yalon ebꞌ jaxca tiꞌ: Cꞌam cꞌal junoj syaꞌilal oj jul je yibꞌan, ẍi ebꞌ, chi yalon ebꞌ.
Jaꞌ Tzet Chi Yal Naj Jeremías Yin Jerusalén
18 Jain Jehová jin chi walaꞌ, tol jaꞌ ebꞌ chi yaloc sbꞌa jin chejabꞌoj, cꞌam juneloj jix bꞌetecꞌ ebꞌ yet jix jin yambꞌan jin bꞌa yetoj ebꞌ jin chejabꞌ. Cꞌam juneloj jix yabꞌ jin kꞌanabꞌ ebꞌ.
19 Jaꞌ sjowal jin cꞌul oj jul yibꞌan ebꞌ penawom, jaxca wal chi yun sjul junoj miman kaꞌeꞌ yaax nabꞌ chi jul yin eymanil.
20 Man oj oc tucan sjowal jin cꞌul, masantaꞌcꞌal oj yun tzet chi yoche jin cꞌul. Jaꞌ yet slawubꞌ cꞌual, oj naꞌcha el wan tzetyetal tiꞌ je yu.
Skꞌane Jehová Yin Ebꞌ Chi Yaloc Sbꞌa Ẍejabꞌoj Dios
21 Jix yalon Jehová jaxca tiꞌ: Man jain oj jix watoj wan chejabꞌwom tuꞌ, tam wal jain jix wal tet ebꞌ; caxcꞌal mi yin eymanil chi ecꞌ yalel jin kꞌane ebꞌ.
22 Toloj wal jix yotajne el ebꞌ tzetyetal naꞌbꞌil wu, jix mi yalel jin kꞌane ebꞌ tet ebꞌ jin conobꞌ. Ta jaxca tuꞌ, xax mi spoꞌoel sbꞌa ebꞌ jin conobꞌ yin pena bꞌeybꞌale, cꞌamxa mi spenail chi yun ebꞌ tinaniꞌ, ẍi Dios.
23 Jain Jehová jin chi wal jaxca tiꞌ: Jain tiꞌ, caxcꞌal naat ma cawil, Dios jin cꞌal eloj, ey jin cꞌal ecꞌ yetoj wipalil bꞌey masanil yul yibꞌankꞌinal tiꞌ.
24 Jain Jehová jin chi walaꞌ: ¿Tumi ey niꞌoj ewantaj bꞌey chi skeꞌ scꞌubꞌan el sbꞌa junoj mactxequel, yin tol cꞌam chi wilaꞌ? ¿Tumi man je yotaj oj tol ey jin ecꞌ bꞌey masanil satcan, cꞌal bꞌey masanil sat txꞌotxꞌ txꞌotxꞌ tiꞌ?
25 Jix wabꞌ wal tzet jix yal wan lekꞌtiꞌ chejabꞌ tuꞌ, chi stecꞌbꞌa wal sbꞌa ebꞌ yaloni tol jaꞌ jin kꞌane chi yalel ebꞌ, tol abꞌ jain chin kꞌanabꞌ tet ebꞌ yin weyicheal yaloni. 26 ¿Bꞌakꞌin oj sbꞌej wan chi yaloc sbꞌa jin chejabꞌoj tuꞌ yalon lekꞌtiꞌal kꞌane tuꞌ, wan kꞌane tucꞌal chi snaꞌa ebꞌ yul yet? 27 Jaꞌ ebꞌ tuꞌ, chi snaꞌ ebꞌ tzet chi yun jin too can qꞌueycꞌulal yu ebꞌ jin conobꞌ, yu sweyich ebꞌ chi yal-le tet junjun, jaxca ton jix yun ebꞌ je mam icham yet peyxa, jix jin too can qꞌueycꞌulal yu ebꞌ, jaxa cꞌal jun comon dios Baal jix yakꞌ servil ebꞌ. 28-29 Jain Jehová jin chi walaꞌ: Ta ey junoj ebꞌ jin chejabꞌ ey tzet chi yil yin weyicheal, yal ojabꞌi tol weyiche; ta jaꞌ jin kꞌane chi ẍaꞌ xin, yal ojabꞌ el yin sjichanil. ¿Tumi laan ixim sbꞌakꞌ tiriw yetoj ixim yajan tiriw che naꞌ. Queyton tuꞌ jin kꞌane, man smoo oj chi calchatoj yetoj weyiche. Jain Jehová jin chi walaꞌ, tol jaꞌ jin kꞌane laan jaxca xaj kꞌakꞌ, ma jaxca chꞌen makꞌbꞌal poꞌo chꞌen tol chi poꞌotoj mimej chꞌen yu.
30 Yu jun tuꞌ, yuxan jain Jehová jin chi walaꞌ, tol caw jow jin yin mactxequel tol tucꞌal chi yabꞌle ecꞌ jin kꞌane tet junjun, catuꞌ chi yalon eloj tol jin kꞌane chi yalel ebꞌ yaloni. 31 Jain Jehová jin chi walaꞌ, tol caw jow jin yin ebꞌ caw eyxa smey chi yute kꞌanabꞌ sbꞌa, chi yalon ebꞌ tol jin kꞌane chi yalel ebꞌ yaloni. 32 Jain Jehová jin chi walaꞌ, tol caw jow jin yin ebꞌ chi xij yal junoj weyiche. Jaꞌ yu wan mimej lekꞌtiꞌal chi yal ebꞌ tuꞌ, yuxan chi ijbꞌale qꞌueytoj ebꞌ jin conobꞌ yu ebꞌ. Man jain oj jix jin chejtoj ebꞌ, tam wal jain jix wakꞌ jin chejbꞌanil tet ebꞌ, yu jun tuꞌ, yuxan cꞌam tzet watxꞌ chi yiꞌ ebꞌ jin conobꞌ yin ebꞌ.
Tzet Chi Yun Yal-le El Skꞌane Jehová
33 Jix yalon Jehová ey jin jaxca tiꞌ: Jaach Jeremías, ta ey junoj ánima bꞌey yul conobꞌ tiꞌ, ma junoj chi yaloc sbꞌa jin chejabꞌoj, ma junoj yakꞌomal xaambꞌal chi skꞌanle el ey jaach: ¿Tzet chi yal ẍejbꞌanil Jehová? ta ẍi ebꞌ. Cha walon tet ebꞌ jaxca tiꞌ: Laan je yili jaxca junoj ijatz yul sat Jehová,a yuxan oj jex bꞌejlecan yu Naj, ja chi tet ebꞌ. 34 Ta ey junoj ebꞌ jin chejabꞌ, ma junoj ebꞌ yakꞌomal xaambꞌal, ma junojxa ánima tol a conobꞌ, ta jaꞌ junoj wan tuꞌ chi akꞌon bꞌina jaxca tiꞌ: Jaꞌton ẍejbꞌanil Jehová tiꞌ, ta ẍi ebꞌ, jain oj waoc syaꞌilal yibꞌan yetoj cꞌal ebꞌ caan yetoj bꞌey yul sna. 35 Ta ey junoj mactxequel chi skꞌanle tet junoj yamigo, ma tet junoj yican sbꞌa yetoj, chi skeꞌ yalon jaxca tiꞌ: ¿Tzet jix yun spajtzen Jehová? ma ¿Tzet jix yal Naj? ẍi ojabꞌi. 36 Ta cꞌam chi skeꞌ yalon junoj bꞌelan kꞌane yu tzet chi yal ẍejbꞌanil Jehová tuꞌ xin; yutol ta chi yal junoj bꞌelan kꞌane tuꞌ, jaꞌ skꞌane tuꞌ chi meltzo can oc yibꞌan jaxca junoj ijatz. Yutol jix yetnetoj ebꞌ ánima tzet chi walaꞌ, jain Jehová je Diosal tol iquis jin cꞌaltaꞌ ecꞌoj, yaaw jin yibꞌan masanil tzetyetal.
37 Jaxca tiꞌ chi yun je kꞌanlen tet ebꞌ jin chejabꞌ jaxca tiꞌ: ¿Tzet spajtzebꞌal jix yakꞌ Jehová? je chi ojabꞌi; ma ¿Tzet jix yal Naj? je chi ojabꞌi. 38 Ta chi yal ebꞌ jaxca tiꞌ: Jaꞌton ẍejbꞌanil Jehová tiꞌ, ta ẍi ebꞌ, chex takꞌwi tet ebꞌ jaxca tiꞌ: Jaꞌ Jehová chi alon jaxca tiꞌ: Yutol jaex tiꞌ jacꞌalaꞌ je yalon wan kꞌane tol jix jex jin tenchane tol cꞌamxa che yalaꞌ, 39 oj jex toj qꞌueycꞌulal wu jaex tiꞌ, yetoj cꞌal je conobꞌ jix wakꞌ ey jex yetoj cꞌal tet ebꞌ je mam icham, catuꞌ naat tacꞌal oj jex toj jin kꞌojcan eloj. 40 Masanil tiempo oj waoc qꞌuixwilal, cꞌal yeynajilal je yin, cꞌam bꞌakꞌin oj toj qꞌueycꞌulal je yu, yu tzet oj jex wute, ẍi Jehová.