Skꞌaneal Caabꞌ Xuc Teꞌ Sat Higo
24
Jaꞌ naj Jeconías sreyal Judá, scꞌaal Joaquim, jix iꞌletoj jaxca presowomal yu Nabucodonosor, naj sreyal Babilonia. Jix iꞌle cꞌal pax toj ebꞌ eyoc yin yaawil yetoj, ebꞌ waꞌnem na, cꞌal ebꞌ waꞌnem chꞌen. Jix lawi tuꞌ, jix xꞌoxon Jehová wil yin weyicheal caabꞌ xuc teꞌ sat higo, jatuꞌ eey sattaj stemplo Jehová. 2 Ey jun xuc bꞌey eeytoj sat teꞌ higo caw wal watxꞌ, tol kꞌanxa, jaꞌton teꞌ bꞌabꞌel sat; jal yul junxa teꞌ xuux tuꞌ xin, caw pena xacꞌal yili sat teꞌ higo eey yul, kꞌaꞌtaj xacꞌal el teꞌ masanil, cꞌamxa chi skeꞌ cu loꞌon teꞌ.3 Jix lawi tuꞌ, catuꞌ jix skꞌanlen Jehová ey jin: Jaach Jeremías, ¿tzetyetal wan cha wil tuꞌ? ẍi ey jin. Jix jin takꞌwi tet, jix walon jaxca tiꞌ: Ey caabꞌ xuc sat teꞌ higo chi wilaꞌ, ey sat teꞌ higo caw watxꞌ yili, ey pax sat teꞌ higo caw pena xa yili, cꞌamxa chi skeꞌ cu loꞌoni, jin chi.
4 Jix lawi tuꞌ xin, jix yalon Jehová ey jin jaxca tiꞌ: 5 Jain Jehová je Diosal jin chi walaꞌ: Jaxca wal sat teꞌ higo watxꞌ yili tuꞌ, Queyton tuꞌ yeoc conobꞌ Judá yul jin sat, jaꞌton ebꞌ jix wakꞌ iꞌletoj yin presowomal bꞌey snación ebꞌ Caldeo. Caw watxꞌ oj wute jin bꞌa tet ebꞌ. 6 Teynebꞌil cꞌal ebꞌ wu, catuꞌ oj wiꞌon meltzotej ebꞌ bꞌey jun conobꞌ tiꞌ. Jaꞌ titiꞌ oj wakꞌ chꞌibꞌ sbꞌisil ebꞌ, manxa oj wakꞌ lawoj ey ebꞌ. Jaxca wal tol oj waw eyoj, manxa oj jin qꞌueyel ebꞌ junelxa. 7 Oj wakꞌ snaꞌbꞌal ebꞌ yin jin yotajnen eloj, tol jain ton Jehová jin, jal ebꞌ xin, tol jin conobꞌ yeoc ebꞌ, jain xa sDiosal jin ebꞌ. Yutol oj meltzotej ebꞌ ey jin yetoj masanil scꞌul.
8 Jal pax naj Sedequías sreyal Judá yetoj cꞌal ebꞌ yaaw yeoc yetoj, cꞌal yetoj masanil ebꞌ caan bꞌey Jerusalén, jaꞌton ebꞌ jix can caey titiꞌ, yetoj cꞌal pax ebꞌ jix apni caey bꞌey Egipto, laan wal yili ebꞌ yul jin sat, jaxca wan sat higo caw kꞌaꞌtajxa, teꞌ cꞌamxa chi skeꞌ cu loꞌoni. 9 Oj watoj junoj miman syaꞌilal yibꞌan ebꞌ; caw wal oj xiwa wanxa mimej conobꞌ yilon ocoj. Oj iꞌle ey ebꞌ sicꞌlebꞌil. Jaꞌ ebꞌ ánima bꞌey wan mimej conobꞌ bꞌey oj jin sajlemne cantoj ebꞌ tuꞌ, tuxa cꞌal oj bꞌuchwa ebꞌ yin ebꞌ, cꞌal sbꞌawa ebꞌ yin ebꞌ, catuꞌ oj waontej syaꞌtajilal yibꞌan ebꞌ chi bꞌuchle tuꞌ. 10 Oj watoj jowal, wail, cꞌal syaꞌilal xol ebꞌ. Cꞌamxa junoj ebꞌ oj cancan bꞌey sat txꞌotxꞌ txꞌotxꞌ jix wakꞌ tet ebꞌ, cꞌal tet ebꞌ je mam icham, ẍi Dios.