Ebꞌ Pena Snaꞌbꞌal Chi Tit Yetcꞌulal Norte
25
Jaꞌ yet canebꞌ abꞌil xa yoc naj Joaquim yin reyal bꞌey Judá, jaꞌton naj scꞌaal Josías, jaꞌton yet bꞌabꞌel abꞌil yoc Nabucodonosor yin reyal bꞌey Babilonia, jix kꞌanabꞌ Jehová ey jin, jain Jeremías jin tiꞌ, yu tzet oj jul yibꞌan conobꞌ Judá. 2 Jix walon wan kꞌane tiꞌ tet masanil ebꞌ ánima bꞌey conobꞌ Judá, cꞌal tet masanil ebꞌ caan bꞌey Jerusalén. Jix walon tet ebꞌ jaxca tiꞌ: 3 Jaꞌ yet oxlajonebꞌ abꞌil xa yoc naj Josías scꞌaal Amón yin reyal bꞌey Judá tiꞌ, masantaꞌcꞌal tinaniꞌ, chi yal yeloc apnoj eyxa 23 abꞌil tinaniꞌ, jix kꞌanabꞌ Jehová ey jin, yuxan ecꞌal el jix wal ey jex, cꞌam cꞌal pax che chaꞌ je yabꞌ tzet chi walaꞌ. 4 Caxcꞌal mi ecꞌal el jix yatej ẍejabꞌ Jehová yu jul yalon ebꞌ ey jex, ma cꞌaltaꞌ je chaꞌ je yabꞌ tzet jix yal ebꞌ, tam wal jix je jije niꞌoj. 5 Jix yal ebꞌ ey jex tol che bꞌejcan je pena bꞌeybꞌal, yet watxꞌ oj jex caey ecꞌ bꞌey txꞌotxꞌ txꞌotxꞌ jix yakꞌ Jehová tet ebꞌ cu mam icham. 6 Cꞌam ojabꞌ chex oc tzajan yintaj comon dios, tam wal chi skeꞌ je yoc yin eyilal tet. Cꞌam ojabꞌ che txꞌemtej sjowal scꞌul Dios yu je yoc yin eyilal tet wan comon dios tol jaex che waꞌne, yet watxꞌ cꞌam chi jul junoj syaꞌilal je yibꞌan yu Dios, ẍi ebꞌ. 7 Jaꞌ tinaniꞌ, chi yal Jehová jaxca tiꞌ: Jaex tiꞌ cꞌam chi yoche je cꞌul che chaꞌ je yabꞌ tzet chi walaꞌ. Caw che txꞌemtej sjowal jin cꞌul yet chex oc yin eyilal tet wan je diosal che waꞌne a tuꞌ. Yu jun tuꞌ, jaex cꞌal oc che yiꞌtej syaꞌilal je yibꞌan, ẍi Dios.8 Yu jun tuꞌ, yuxan chi yal Jehová, Naj Yaaw yibꞌan masanil: Yutol jaꞌ ebꞌ ánima tiꞌ, cꞌam chi ẍaꞌ yabꞌ ebꞌ tzet chi walaꞌ, 9 yuxan oj wawtetej masanil ebꞌ conobꞌlaj ey bꞌey yetcꞌulal norte, yetoj cꞌal Nabucodonosor sreyal Babilonia, yet chi jul yakꞌon jowal yin je conobꞌ tiꞌ, cꞌal yin masanil wanxa conobꞌ ey scawilal, yetoj masanil ebꞌ ánima caan bꞌey. Oj wakꞌ qꞌueyle el masanil ebꞌ. Junelne oj wakꞌ lawoj ey ebꞌ. Jaꞌ mac oj ilonoj, xiwcꞌulaltaj xacꞌal oj yun can ebꞌ, cꞌal sbꞌuchwa ebꞌ yin ebꞌ. 10 Jaꞌ tzet oj wute can ebꞌ tuꞌ, tol cꞌamxa bꞌey oj abꞌle yoc bꞌit yet kꞌin yet tzalacꞌulal, tam wal bꞌit yet nupil, tam wal eyto bꞌey oj abꞌle sbꞌilwi chꞌen kaꞌ, tam wal eyto bꞌey oj il-le yin tzejtebꞌal. 11 Masanil jun nación tiꞌ, oj lawoj eyoj, uchquiltaj xacꞌal oj yun cantoj. Oj oc can jun miman conobꞌ tiꞌ yetoj wanxa conobꞌlaj ey scawilal tiꞌ yalan yopiso naj sreyal Babilonia yin 70 abꞌil. 12 Jain caw Jehová jin chi walaꞌ, tol jaꞌ yet oj lawoj 70 abꞌil tuꞌ, catuꞌ oj jin waꞌnen yeoc yetoj naj sreyal Babilonia tuꞌ, yetoj cꞌal wanxa conobꞌ ey yul snación tuꞌ, jaꞌton ebꞌ Caldeo. Jaꞌ ebꞌ tuꞌ oj wakꞌ lawoj ey yin junelne. 13 Masanil wan syaꞌilal jix walaꞌ, oj wakꞌ eyqꞌuey yibꞌan jun conobꞌ tiꞌ, cꞌam chi ecꞌtoj sjul yibꞌan ebꞌ, jaꞌton masanil tzet tzꞌibꞌebꞌilcan ey yul jun libro tiꞌ, masanil tzetyetal jix jin chej yal can el naj Jeremías yin wan conobꞌ tiꞌ. 14 Oj waoc ebꞌ yul skꞌabꞌ mimej conobꞌ, cꞌal yul skꞌabꞌ ebꞌ mimej yaaw. Queytuꞌ oj yun ẍaꞌon spaj ebꞌ, jaxca wal smooalil jantaj tzet jix yun ebꞌ, ẍi Jehová, ẍi naj Jeremías.
Jun Copa Chi Xꞌoxtej Yechel Jun Syaꞌilal Yibꞌan Conobꞌ
15 Jaꞌ Jehová Naj cu Diosal jaon Israel jon tiꞌ, jaꞌ jix alon ey jin jaxca tiꞌ: Ilaꞌ wal jun copa tiꞌ, nonaj yu vino, jaꞌton yechel sjowal jin cꞌul. Iꞌtoj, catuꞌ cha wakꞌon yucꞌ masanil nacionlaj bꞌey oj jaach jin chejtoj. 16 Jaꞌ yet oj yuqꞌuen ebꞌ, oj xabꞌ ebꞌ yu, catuꞌ oj tit joyna chi yil ebꞌ, yu cꞌal jun jowal oj watoj xol ebꞌ tuꞌ, ẍi Dios.
17 Jix jin chaꞌon ecꞌ jun copa tuꞌ yul skꞌabꞌ Jehová, jix wakꞌon yucꞌ masanil wan nacionlaj tuꞌ tzet eey yul, jaꞌton bꞌey jix jin chejle yu Jehová. 18 Jix wakꞌ yucꞌ ebꞌ a Jerusalén, cꞌal yetoj masanil ebꞌ caan bꞌey conobꞌlaj yul yet Judá; jix yucꞌ ebꞌ yetoj cꞌal sreyal ebꞌ, cꞌal jantaj ebꞌ yaaw, yet chi uchcha xacꞌaltoj ebꞌ, cꞌal slawi ey ebꞌ. Jaꞌ mac oj ilonoj, caw oj xiwa ebꞌ sicꞌlebꞌil. Oj bꞌuchwa ebꞌ yin ebꞌ, cꞌal yintajnele can el ebꞌ, jaxca lalan yunen tinaniꞌ. 19 Jix wakꞌon cꞌal pax yucꞌ naj sreyal Egipto, yetoj cꞌal ebꞌ yaaw cꞌal ebꞌ miman yeloc apnoj, yetoj masanil ebꞌ conobꞌ, 20 yetoj cꞌal masanil junjun tujan conobꞌlaj ánima eyecꞌ tituꞌ. Jix wakꞌ yucꞌ cꞌal pax masanil ebꞌ rey ey bꞌey conobꞌ Us, yetoj cꞌal masanil mac ey yul sconobꞌ ebꞌ Filisteo: Jaꞌton Ascalón, Gaza, Ecrón, cꞌal yetoj ebꞌ eyto can bꞌey Asdod. 21 Jix wakꞌ tet Edom, Moab cꞌal tet Amón; 22 yetoj cꞌal tet masanil ebꞌ rey bꞌey Tiro, cꞌal bꞌey Sidón; yetoj cꞌal masanil ebꞌ rey ey bꞌey wan conobꞌ ey bꞌey stiꞌlaj jaꞌ mar Mediterráneo. 23 Jix wakꞌ tet ebꞌ yicꞌaal Dedán, Temá cꞌal Buz, yetoj masanil ebꞌ conobꞌlaj tol chi stzujel xil bꞌey spacꞌul sjolom. 24 Yetoj cꞌal masanil ebꞌ rey bꞌey Arabia, cꞌal masanil ebꞌ ánima caan bꞌey txꞌotxꞌ cusiltaj txꞌotxꞌ. 25 Jix wakꞌ cꞌal pax tet masanil ebꞌ rey bꞌey Zimrí, Elam cꞌal tet ebꞌ a Media, 26 yetoj cꞌal tet masanil ebꞌ rey bꞌey norte, ebꞌ cawil ey, cꞌal yetoj ebꞌ naat ey, yin xolilal jix yun yuqꞌuen ebꞌ. Chi yal yeloc apnoj, masanil ebꞌ rey bꞌey yul yibꞌankꞌinal tiꞌ jix uqꞌueni. Yin xa slawubꞌal jix yuqꞌuen cꞌal pax naj sreyal Babilonia.
27 Jix lawi tuꞌ, jix yalon Jehová ey jin jaxca tiꞌ: Alaꞌ tol jain Jehová sDiosal jin ebꞌ Israel, jix walaꞌ tol sowalil chi yucꞌ ebꞌ, catuꞌ chi ucꞌwi xacꞌal an ebꞌ yu, masantaꞌcꞌal oj xabꞌ ebꞌ, oj telcꞌotoj ebꞌ sat txꞌotxꞌ. Manxa oj a waan ebꞌ, yu cꞌal jowal oj watoj xol ebꞌ. 28 Ta tol cꞌam chi yoche ebꞌ chi ẍaꞌ jun copa tuꞌ ey jaach, cꞌal yuqꞌuen ebꞌ tzet eey yul, al tet ebꞌ jaxca tiꞌ: Tol jaꞌ Jehová Naj tol miman yeloc apnoj, jaꞌ chi aloni: Tol sowalil oj je yucꞌ cꞌaltaꞌ eytoj. 29 Yutol tuxa wal oj jin chaꞌel yich waontoj syaꞌilal yibꞌan jun conobꞌ tol wet yeocoj. ¿Chim je naꞌ jaex tiꞌ, tol man oj oc syaꞌilal je yibꞌan? jain wal caw Jehová jin chi walaꞌ, tol jaꞌ jun tuꞌ man oj ecꞌtoj sjul je yibꞌan, yutol oj watoj jowal yibꞌan masanil ebꞌ caan bꞌey sat txꞌotxꞌ tiꞌ, ẍi Dios, ja chi tet ebꞌ.
30 Jaach Jeremías, al masanil wan kꞌane tiꞌ tet ebꞌ:
Jaꞌ Jehová oj el yaw yin ipal, jaxca chi yun sbꞌilwi cꞌu, queytuꞌ oj yun yel yaw yin ebꞌ ánima, jata cꞌal bꞌey scalubꞌal bꞌey satcan tol asan ey yet. Oj el yaw yin masanil ebꞌ caan bꞌey sat txꞌotxꞌ txꞌotxꞌ tiꞌ, jaxca yel yaw ebꞌ chi tecꞌwi uva.
31 Oj apnoj taꞌcꞌal oc sbꞌilwi bꞌey slawubꞌal txꞌotxꞌ txꞌotxꞌ tiꞌ. Ey tzet oj yal Jehová yin masanil nación. Jaꞌcaw chi aloni, tol oj snaꞌoc yin masanil ebꞌ ánima tiꞌ, catuꞌ oj yaon can oc camich yibꞌan masanil ebꞌ penawom, ja chi tet ebꞌ, ẍi Jehová.
32 Jaꞌ Jehová, Naj Yaaw yibꞌan masanil chi alon jaxca tiꞌ: Abꞌwej xin, tol txololi xacꞌal oj yun smichꞌcha ebꞌ mimej conobꞌlaj yu jun syaꞌilal oj juloj. Lalanxa syambꞌan sbꞌa jun miman syaꞌilal tuꞌ bꞌey slawubꞌal txꞌotxꞌ txꞌotxꞌ tiꞌ, ẍi Dios.
33 Jaꞌ ebꞌ oj cam yu Jehová yet jun cꞌual tuꞌ, tuxa cꞌal oj ey can bꞌulan ebꞌ bꞌey masanil sat txꞌotxꞌ txꞌotxꞌ tiꞌ. Cꞌamxa mactxequel oj okꞌ yu ebꞌ, cꞌam mactxequel oj yambꞌan a smimanil ebꞌ yu smujoni; tuxa cꞌal oj cancan nilan ebꞌ sat txꞌotxꞌ tiꞌ, jaxca stzꞌaꞌ noꞌ noꞌ.
34 Jex steynemal conobꞌ, el ojabꞌ je yaw yu syaꞌilal; bꞌalwej ecꞌ je bꞌa xol pojoj, yutol tuxa jix jul scꞌual yet chex makꞌle camoj. Oj jex jin sajlemne cantoj. Oj jex telcꞌotoj, jaxa je poꞌotoj jaxca junoj txꞌotxꞌ secꞌ caw watxꞌ yili.
35 Jaꞌ ebꞌ yilomal conobꞌ, man oj skeꞌ scolon sbꞌa ebꞌ. Jaꞌ ebꞌ eyoc steynemaloj conobꞌ man oj skeꞌ yela ebꞌ.
36 Oj abꞌle wal yel yaw ebꞌ steynemal conobꞌ, oj el yaw ebꞌ yu syaꞌil, yutol tuxa jix akꞌle lawoj ey sconobꞌ ebꞌ yu Jehová;
37 uchquiltaj xacꞌal oj yun cantoj yinlaj sconobꞌ ebꞌ yu sjowal scꞌul Jehová.
38 Jix eltej jucna Jehová bꞌey eyecꞌoj, jaxca wal chi yun yeltej jucna junoj noꞌ bꞌalam. Yetoj wal sjowal scꞌul jix yaontej jun jowal xol ebꞌ ánima tuꞌ, jix uchcha can ey sconobꞌ ebꞌ. Yetoj wal sjowal scꞌul Naj jix yaontej jun jowal tol eyxa smey xol ebꞌ.