Jix Ale Oc Camich Yibꞌan Naj Jeremías
26
Jaꞌ yet jix oc Joaquim scꞌaal Josías, yin reyal bꞌey Judá, jaꞌ yet tuꞌ jix kꞌanabꞌ Jehová tet naj Jeremías. 2 Jix yalon jaxca tiꞌ: Jaꞌ bꞌey sattaj eltoj templo tuꞌ chach oc linanoj, catuꞌ cha walon masanil tzet jix wal ey jaach tet ebꞌ ánima speto bꞌey Judá, ebꞌ chi jul yiꞌey sbꞌa yin eyilal bꞌey templo tuꞌ. Cꞌam junoj kꞌane tol cꞌam cha waleloj, 3 tala cꞌuxan oj ẍaꞌ yabꞌ ebꞌ, catuꞌ oj sbꞌejoncan spena bꞌeybꞌal ebꞌ tuꞌ, catuꞌ cꞌamxa chi waoc syaꞌilal tol naꞌbꞌilxa wu waon oc yibꞌan ebꞌ yu spena bꞌeybꞌal tuꞌ. 4 Cha wal tet ebꞌ tol jain Jehová jin chi walaꞌ: Sowalil che chaꞌ je yabꞌe, che jijen masanil jin chejbꞌanil jix wal ey jex. 5 Sowalil che chaꞌ je yabꞌ tzet jix jin chej yal ebꞌ jin chejabꞌ ey jex, ma pax je jije niꞌoj tzet jix yal ebꞌ. 6 Yu cꞌal ma je jije, yuxan laan oj wute jun templo tiꞌ jaxca jix wute jin calubꞌal bꞌey Siló, queytuꞌ oj wute cantoj. Oj wintajne can el jun conobꞌ tiꞌ xol masanil nacionlaj ey bꞌey yul yibꞌankꞌinal, ẍi Jehová.7 Jaꞌ ebꞌ yakꞌomal xaambꞌal, ebꞌ chi yaloc sbꞌa ẍejabꞌoj Dios, cꞌal masanil ebꞌ conobꞌ, jix yabꞌ ebꞌ yalon el naj Jeremías wan kꞌane tuꞌ bꞌey templo tuꞌ. 8 Jaꞌ yet jix lawi yalon el masanil tzet jix chejle yal yu Jehová, catuꞌ jix mitxꞌle ey naj yu ebꞌ. Jix yalon ebꞌ tet naj jaxca tiꞌ: ¡Oj jaach camoj! 9 ¿Tzet wal yu, yuxan cha tecꞌbꞌa ja bꞌa ja walon yin sbꞌi Jehová tol jaꞌ jun templo tiꞌ laan oj yun cantoj jaxca jix yun scalubꞌal Naj bꞌey Siló? Catuꞌ cha waloni tol oj lawoj ey jun conobꞌ tiꞌ, catuꞌ cꞌamxa junoj ánima oj caey can ecꞌ bꞌey, ẍi ebꞌ. Masanil conobꞌ jix jul lemna bꞌey templo yin yakꞌon jowal yin naj Jeremías tuꞌ.
10 Jaꞌ yet jix yabꞌen ebꞌ yaaw yeoc bꞌey Judá tzet lalan yunen tituꞌ, jix tit ebꞌ bꞌey spalacio naj rey, jix too ebꞌ bꞌey templo; jaꞌ bꞌey ey jun acꞌ spuertail scalubꞌal Dios, jatuꞌ jix apni oc chotan ebꞌ. 11 Jix yalon ebꞌ yakꞌomal xaambꞌal cꞌal ebꞌ chi yaloc sbꞌa ẍejabꞌoj Dios tuꞌ tet ebꞌ yaaw cꞌal tet ebꞌ conobꞌ jaxca tiꞌ: Jaꞌ jun winaj tiꞌ smoo wal tol chi cami, yutol jix yalaꞌ tol pena tzet oj jul yibꞌan cu conobꞌ tiꞌ. Jaex tiꞌ jix cam wal je yabꞌen tzet jix yalaꞌ, ẍi ebꞌ.
12 Jix kꞌanabꞌ naj Jeremías tet ebꞌ yaaw cꞌal tet ebꞌ conobꞌ, jix yalon jaxca tiꞌ: Jaꞌ Jehová jix chejon wal tzet jix je yabꞌ walon yin jun conobꞌ tiꞌ, cꞌal yin jun templo tiꞌ, cꞌal je yin jaex tiꞌ. 13 Waꞌnewej je bꞌeybꞌal cꞌal tzet che yunne, jijem che yute je bꞌa tet Jehová cu Diosal, yet watxꞌ man oj yatej wan syaꞌilal tꞌinan yaletej je yibꞌan tuꞌ. 14 Jal jin jain tiꞌ, ey jin ecꞌ yul je kꞌabꞌ; chi skeꞌ che yun tzetyetal chi yoche je cꞌul win. 15 Asan xin, otajnewej el jun tiꞌ sicꞌlebꞌil: Ta chin je makꞌ camoj, oj oc je penail je masanil yu che makꞌ cam junoj mac tol cꞌam spenail, yutol jaꞌcaw Jehová cu Diosal, jaꞌ jix jin chejon walel wan kꞌane tiꞌ, ẍi naj Jeremías tet ebꞌ.
16 Jix lawi tuꞌ, jix yalon ebꞌ yaaw cꞌal ebꞌ conobꞌ tet ebꞌ yakꞌomal xaambꞌal cꞌal ebꞌ chi yaloc sbꞌa ẍejabꞌoj Dios jaxca tiꞌ: Man smoo oj chi cam jun winaj tiꞌ, yutol jaꞌ yin sbꞌi Jehová cu Diosal jix kꞌanabꞌ el ey jon, ẍi ebꞌ.
17 Ey wan ebꞌ icham winaj yeoc xol conobꞌ jix a waanoj, catuꞌ jix yalon ebꞌ tet ebꞌ conobꞌ yaman ecꞌ tituꞌ: 18 Jaꞌ yul stiempoal naj Ezequías sreyal Judá, jaꞌ naj Miqueas a Moreset jix kꞌanabꞌ el yin sbꞌi Jehová bꞌey masanil conobꞌ Judá. Jix yalon jaxca tiꞌ:
Jaꞌ Jehová, Naj cu Diosal chi alon jaxca tiꞌ: Jaꞌ wonan Sión tiꞌ oj cancan yin mulnabꞌal txꞌotxꞌ; jaxa Jerusalén uchquiltaj xacꞌal oj yun cantoj, jaxa jun tzalan bꞌey ey templo, eltzabꞌ xacꞌal oj yun cantoj, ẍi Dios, ẍi Miqueas.
19 Tumi taꞌ jix makꞌle cam naj Miqueas yu naj rey Ezequías, cꞌal yu ebꞌ conobꞌ. Jaꞌ tiꞌ yet ebꞌ, tol jix xiw ebꞌ, yuxan jix txali ebꞌ tet Jehová. Yu jun tuꞌ xin, ma xa aletej syaꞌilal yibꞌan ebꞌ yu Jehová. Ta jaon tiꞌ oj cu makꞌ cam Jeremías oj jul syaꞌilal kibꞌan, ẍi ebꞌ.
20 Yetoj cꞌal pax naj ẍejabꞌ Dios chi yij Urías, scꞌaal Semaías, a conobꞌ Quiriat-jearim, jaꞌ naj jix kꞌanabꞌ can el yin sbꞌi Jehová yin jun miman conobꞌ tiꞌ, cꞌal yin jun txꞌotxꞌ nación tiꞌ, jaxca cꞌal jix yun yalon can el naj Jeremías. 21 Jaꞌ naj rey Joaquim, yetoj cꞌal ebꞌ eyoc yin yaawilal yetoj, cꞌal ebꞌ miman yeloc apnoj yin yopiso, jix yabꞌ ebꞌ tzet jix yalaꞌ. Jix yoche xacꞌal scꞌul naj rey tuꞌ jix smakꞌ camoj. Jaꞌ yet jix yabꞌen naj Urías tzet yeoc xin, jix ela naj, jix toocan naj bꞌey Egipto. 22 Jix chejletoj naj Elnatán scꞌaal Acbor, yetoj wanxa winaj yu naj rey Joaquim bꞌey Egipto. 23 Jaꞌton ebꞌ jix bꞌet iꞌontej naj Urías, catuꞌ jix yaon oc ebꞌ yul skꞌabꞌ naj rey Joaquim tuꞌ; jix yal naj tol chi makꞌle camoj, catuꞌ chi kꞌojle eytoj smimanil naj bꞌey chi mujle ebꞌ comon ánima.
24 Jal pax naj Ahicam, scꞌaal Safán, jix yaoc sbꞌa yetoj naj Jeremías tuꞌ yuxan ma ale oc naj Jeremías tuꞌ yul skꞌabꞌ ebꞌ conobꞌ yet chi makꞌle camoj.