Jun Yugo Eyoc Yin Txꞌoxbꞌanileal
27
Jaꞌ yet tol to jix oc naj Sedequías scꞌaal Josías yin reyal bꞌey Judá, jix kꞌanabꞌ Jehová tet naj Jeremías. 2 Jix yalon jaxca tiꞌ: Waꞌne wanoj tzꞌuum yetoj junoj teꞌ mitxꞌkꞌabꞌe chi skꞌan noꞌ wacax yin kꞌuo txꞌotxꞌ, catuꞌ cha waon oc yin ja nukꞌ. 3 Chi lawi tuꞌ, cha waontoj junoj chejbꞌanile tet ebꞌ sreyal Edom, Moab, Amón, Tiro cꞌal Sidón. Jaꞌ tet ebꞌ chejabꞌwom chi tit bꞌey Jerusalén, ebꞌ chi jul ilon naj rey Sedequías, jatuꞌ cha watoj. 4 Al tet ebꞌ tol chi yal wan kꞌane tuꞌ tet ebꞌ yaaw yeoc xol ebꞌ, tol jain Jehová jin tol ey wipalil yibꞌan masanil, sDiosal jin Israel jain chi walaꞌ: 5 Yetoj wal wipalil tol miman yeocoj, jain jix jin waꞌne yul yibꞌankꞌinal tiꞌ yetoj masanil tzettaj yetal ey bꞌey. Jix jin waꞌne ebꞌ ánima, cꞌal noꞌ noꞌ; yuxan chi skeꞌ wakꞌon tet yal cꞌal mactxequel bꞌey chi yoche jin cꞌul. 6 Yu jun tuꞌ xin, jain chi wa can oc masanil conobꞌ tiꞌ yul skꞌabꞌ naj jin chejabꞌ Nabucodonosor, sreyal Babilonia. Yetoj noꞌ xol-laj teꞌal noꞌ, chi wa cꞌal pax oc noꞌ yalan yopiso naj. 7 Masanil nacionlaj oj can yul skꞌabꞌ Nabucodonosor, yul skꞌabꞌ ebꞌ scꞌaal, cꞌal yul skꞌabꞌ yitxiquin, masantaꞌcꞌal yet oj jul scꞌual yeyqꞌuey conobꞌ Babilonia. Jaꞌton yet tuꞌ oj can Babilonia tuꞌ yul skꞌabꞌ wanxa nación, cꞌal yul skꞌabꞌ wan rey caw mimej yeoc yopiso. 8 Jain wal caw Jehová jin chi walaꞌ, ta ey junoj nación cꞌam chi yaoc sbꞌa yalan yopiso Nabucodonosor, oj waoc syaꞌilal yibꞌan, jaꞌton jowal, wail, cꞌal syaꞌilal, masantaꞌcꞌal oj yakꞌ lawoj ey yu jun rey tuꞌ yetoj yopiso.9 Yu jun tuꞌ, cꞌam ojabꞌ che chaꞌ je yabꞌ tzetyetal chi yal ebꞌ chi akꞌon je cꞌul tol cꞌam che yaoc je bꞌa yalan yopiso Nabucodonosor, sreyal Babilonia, jaꞌton ebꞌ yakꞌomal servil tol chi skeꞌ snaꞌon el kꞌane, cꞌal ebꞌ chi skeꞌ yalon tzet chi yal weyiche, cꞌal ebꞌ jelan snaꞌon el junoj kꞌane tol chi yalel tzetyetal oj jul yet yatoj tuꞌ yaloni. 10 Jaꞌ masanil wan tzetyetal chi yal ebꞌ tuꞌ, lekꞌtiꞌal cꞌal, jaꞌ tzet oj je yiꞌ yin jaex tiꞌ, tol oj jex iꞌletoj bꞌey junojxa txꞌoj conobꞌal. Jain oj jex wujtetoj, jaꞌ tituꞌ oj jex camoj. 11 Jal pax wanojxa conobꞌ bꞌejan scꞌul yaon oc sbꞌa yul skꞌabꞌ naj sreyal Babilonia tuꞌ xin, jain Jehová jin chi walaꞌ tol oj wakꞌ cꞌal caey ecꞌ ebꞌ bꞌey sat xꞌotxꞌ, oj mulna ebꞌ tituꞌ, ẍi Jehová.
12 Yuxan jix cam walon wan tiꞌ tet naj Sedequías sreyal Judá, jix walon tet naj jaxca tiꞌ: Aoc ja bꞌa yalan yopiso naj sreyal Babilonia, yetoj cꞌal masanil ebꞌ ánima eyoc yalan ẍejbꞌanil naj, yet watxꞌ cꞌam chex cami. 13 ¿Tzet wal yu, yuxan tuxa cꞌal oj ja bꞌej cam ja bꞌa yetoj ja conobꞌ xol jowal, yu wail, cꞌal yu syaꞌilal? Yutol tuxa jix yal Jehová tol queytuꞌ oj yun masanil ebꞌ conobꞌlaj tol man oj yaoc sbꞌa yul skꞌabꞌ naj sreyal Babilonia. 14 Cꞌam ojabꞌ cha jijetoj tzetyetal chi yal wan chi yaloc sbꞌa ẍejabꞌoj Dios tuꞌ, ebꞌ chi aloni tol cꞌam cha waoc ja bꞌa yalan yopiso naj sreyal Babilonia tuꞌ, yutol jaꞌ tzetyetal chi yal ebꞌ tuꞌ, lekꞌtiꞌal kꞌane. 15 Jaꞌ Jehová jix aloni tol manaj jix chejon yalon wan tuꞌ ebꞌ, naꞌbꞌa lekꞌtiꞌal kꞌane chi yal ebꞌ. Ta cha jijetoj tzet chi yal ebꞌ xin, oj jaach ujtele el titiꞌ yetoj ebꞌ lekꞌtiꞌ chejabꞌwom chi alon ey jaach tuꞌ, catuꞌ oj jaach cam yetoj ebꞌ, jin chi tet naj rey Sedequías tuꞌ.
16 Jix lawi tuꞌ, jix walon cꞌal pax tet ebꞌ yakꞌomal xaambꞌal, cꞌal tet masanil ebꞌ conobꞌ jaxca tiꞌ: Jaꞌ Jehová chi alon jaxca tiꞌ: Cꞌam ojabꞌ che chaꞌ je yabꞌ tzetyetal chi yal wan chi yaloc sbꞌa ẍejabꞌoj Dios tuꞌ. Caxcꞌal chi yal ebꞌ ey jex, tol yin eymanil oj meltzo masanil mitxꞌkꞌabꞌe yet templo iꞌbꞌiltoj bꞌey Babilonia. Jaꞌ wan tuꞌ, lekꞌtiꞌal kꞌane chi yal ebꞌ ey jex. 17 Yuxan cꞌam ojabꞌ che chaꞌ je yabꞌe. Awej oc je bꞌa yul skꞌabꞌ naj sreyal Babilonia, yet watxꞌ oj jex caey cꞌal ecꞌ titiꞌ. ¿Tzet wal yu, yuxan tol jaꞌ jun conobꞌ tiꞌ, tuxa cꞌal oj uchle can eyoj? ẍi Jehová. 18 Ta tol yel jin chejabꞌ yeoc ebꞌ, ta jaꞌ jin kꞌane chi yalel ebꞌ, txaloj ojabꞌ ebꞌ ey jin, yutol jain ton Jehová jin tiꞌ chi skeꞌ masanil tzetyetal wu. Skꞌan ojabꞌ ebꞌ ey jin, yet watxꞌ cꞌamxa chi iꞌletoj wanxa mitxꞌkꞌabꞌe yet templo bꞌey Babilonia cꞌal yetoj tzetyetal eyto can bꞌey spalacio naj sreyal Judá, cꞌal bꞌey Jerusalén, jin chi tet ebꞌ.
19-20 (Jaꞌ yet jix iꞌletoj naj Jeconías, scꞌaal Joaquim reyal Judá yu Nabucodonosor sreyal Babilonia, jix iꞌle cꞌal pax toj ebꞌ eyoc yin yaawil bꞌey Judá cꞌal ebꞌ bꞌey Jerusalén. Jaꞌ yet tuꞌ, ma iꞌletoj wan mimej oy, jun miman pila tol chꞌen bronce cꞌal eloj, tam wal sbꞌatxlubꞌ yalan, tam wal wanxa mitxꞌkꞌabꞌe yet templo.) 21 Jix yalon Jehová jaxca tiꞌ: Abꞌwej tzet chi walaꞌ, jain Jehová tiꞌ, yaaw jin yibꞌan masanil, je Diosal jin jaex Israel jex tiꞌ, chi walon yu wanxa tzetyetal jix cancan bꞌey templo tuꞌ, cꞌal bꞌey spalacio ebꞌ sreyal Judá, yetoj cꞌal bꞌey Jerusalén. 22 Jain caw Jehová jin chi walaꞌ, tol oj iꞌletoj masanil wan tzetyetal tuꞌ bꞌey Babilonia, jaꞌ tituꞌ oj can cꞌal canoj, masantaꞌcꞌal jain oj jex wiꞌtej junelxa bꞌey je conobꞌ tiꞌ, ẍi Jehová.