2 —Jaꞌ Jehová Naj Yaaw yibꞌan masanil, cu Diosal jaon Israel jon tiꞌ, chi yal jaxca tiꞌ: Oj jin makꞌ kꞌatoj jun teꞌ teꞌ yet skꞌubꞌal txꞌotxꞌ noꞌ wacax yet naj sreyal Babilonia. 3 Jaꞌ yet caabꞌ abꞌil tinaniꞌ, catuꞌ oj wiꞌon meltzo masanil mitxꞌkꞌabꞌe yet templo iꞌbꞌiltoj yu naj rey Nabucodonosor bꞌey Babilonia. 4 Jain Jehová jin chi walaꞌ, tol oj wakꞌ meltzo naj Jeconías, scꞌaal Joaquim sreyal Judá, yetoj cꞌal masanil ebꞌ ánima jix too yin presowomal bꞌey Babilonia tuꞌ. Sowalil oj wiꞌ can el yopiso naj sreyal Babilonia je yibꞌan, ẍi Dios, ẍi naj Hananías.

5 Catuꞌ jix takꞌwi naj ẍejabꞌ Dios chi yij Jeremías tet naj Hananías sattaj ebꞌ yakꞌomal xaambꞌal cꞌal sattaj masanil ebꞌ conobꞌ eyecꞌ bꞌey templo tuꞌ. Jix yalon jaxca tiꞌ:

6 —¡Jaaꞌ yel toni! ¡Toloj wal chi yun Jehová jaxca tuꞌ! ¡Toloj wal chi yun jaxca wal wan kꞌane cha wal tuꞌ, tol chi meltzotej masanil wan mitxꞌkꞌabꞌe yet templo iꞌbꞌiltoj bꞌey Babilonia, yetoj cꞌal masanil ebꞌ ánima jix iꞌle cꞌal pax toj! 7 Asan xin, abꞌ wal tzet chi wal ey jaach, cꞌal tet ebꞌ conobꞌ tiꞌ. 8 Jaꞌ wan ẍejabꞌ Dios jix ecꞌ yet peyxa, yet cꞌamto chi cu ali ja wetoj, jix yalel ebꞌ tol oj jul jowal, syaꞌtajilal, cꞌal syaꞌilal yibꞌan wan conobꞌ tol miman yeloc apnoj. 9 Yuxan ta jaꞌ junoj ẍejabꞌ Dios chi alon pax eloj, tol oj a can swatxꞌilal bꞌey jun conobꞌ tiꞌ, masantaꞌcꞌal oj yunne, catuꞌ oj txeclo eloj tol jaꞌ Jehová jix chejon yalaꞌ, ẍi naj Jeremías.

10 Catuꞌ jix yiꞌon el naj Hananías jun teꞌ teꞌ eyoc yin snukꞌ naj Jeremías tuꞌ, jix smakꞌon kꞌatoj. 11 Sattaj wal ebꞌ conobꞌ jix yalon naj jaxca tiꞌ:

—Jaꞌ Jehová chi alon jaxca tiꞌ: Yet wal caabꞌ abꞌil tinaniꞌ, catuꞌ oj wiꞌon el jun teꞌ teꞌ yet smulnabꞌal noꞌ wacax eyoc yibꞌan conobꞌlaj, tol jaꞌton Nabucodonosor jix aon ocoj, jain oj jin makꞌ kꞌatoj, ẍi Dios, ẍi naj Hananías.

Catuꞌ jix too naj Jeremías tuꞌ. 12 Jaꞌ yet jix ecꞌ el jun tiempoal yet xax smakꞌ kꞌatoj jun teꞌ teꞌ naj Hananías jix yiꞌel yin snukꞌ Jeremías tuꞌ, jix kꞌanabꞌ Jehová tet Jeremías. Jix yalon jaxca tiꞌ: 13 Asiꞌ bꞌey naj Hananías, catuꞌ cha waloni tol jain Jehová jin chi walaꞌ: Jix skeꞌ ja makꞌon kꞌatoj teꞌ teꞌ tuꞌ; jaxa tinaniꞌ tol chꞌen hierro xacꞌal el junoj oj wakꞌ sqꞌuexeloj teꞌ teꞌ tuꞌ. 14 Jain caw Jehová jin, yaaw jin yibꞌan masanil, sDiosal jin cꞌal pax Israel, jain chi walaꞌ: Jix waoc jun yugo tol hierro yibꞌan wan conobꞌ tiꞌ yet chi oc ebꞌ yakꞌomaloj servil bꞌey Nabucodonosor sreyal Babilonia. Tol tax masanil noꞌ xol-laj teꞌal noꞌ jix wa can oc noꞌ yalan yopiso jun rey tuꞌ, ẍi Jehová.

15 Jix lawi tuꞌ xin, jix yalon Jeremías tet naj Hananías jaxca tiꞌ:

—Jaach Hananías, abꞌ tzet oj wal ey jaach: Jaach tiꞌ, manaj Jehová jix jaach chejontej. Caw wal man yeloj tzetyetal lalan ja waon oc yipoj scꞌul ebꞌ conobꞌ tiꞌ. 16 Yu jun tuꞌ, chi yal Jehová jaxca tiꞌ: Oj jaach wiꞌeloj yet chach qꞌueya bꞌey sat txꞌotxꞌ txꞌotxꞌ tiꞌ. Jaꞌ yet jun abꞌil tiꞌ oj jaach camoj. Yu ja kꞌane yuxan jix sjijetoj jun conobꞌ tiꞌ tzet jix ja walaꞌ, yuxan jix yiꞌel snaꞌbꞌal ebꞌ win an, ẍi Jehová, ẍi naj Jeremías.

17 Yuxan jaꞌ yet jujebꞌ xꞌaaw yet jun abꞌil tuꞌ jix cam naj Hananías.