4 Jaxca ton wal tiꞌ yalon Jehová, Naj Yaaw yibꞌan masanil, jaꞌton cu Diosal jaon Israel jon tiꞌ, chi yal tet masanil ebꞌ a Jerusalén jix yakꞌ iꞌletoj yin presowomal bꞌey Babilonia: 5 Waꞌnewej je na, bꞌey chex caey ecꞌoj, awwej teꞌ awbꞌeal teꞌ, yet che loꞌon sat teꞌ. 6 Iꞌwej je yetbꞌi, nupanwej, catuꞌ chi ali je yuninal; oc ojabꞌ pax yetbꞌi ebꞌ je yuninal tuꞌ, catuꞌ chi ali cꞌal yuninal ebꞌ, tol ojabꞌ chi chꞌibꞌ je bꞌisil, cꞌam ojabꞌ cꞌal chi eytej je bꞌisil. 7 Colwaanwej yu swatxꞌiloj jun conobꞌ bꞌey jix jex watoj tuꞌ. Kꞌanwej jin colwal yibꞌan conobꞌ, yutol ta caw watxꞌ yeoc jun conobꞌ tuꞌ, ta jaxca tuꞌ, caw watxꞌ cꞌal pax oj yun je kaey ecꞌ jaex tiꞌ. 8 Yutol jain Jehová, yaaw jin yibꞌan masanil, je Diosal jin, jain chi wal wan tiꞌ: Cꞌam ojabꞌ che yakꞌ je bꞌa etnele yu wan ebꞌ lekꞌtiꞌ chejabꞌwom, cꞌal ebꞌ naꞌom el kꞌane yaloni. Cꞌam ojabꞌ che chaꞌ je yabꞌ sweyich ebꞌ chi yalaꞌ. 9 Jaꞌ tzet chi yalel ebꞌ yin jin bꞌi, naꞌbꞌa lekꞌtiꞌal kꞌane chi yal ebꞌ. Jain caw Jehová jin chi walaꞌ, tol man jain oj jix jin chej yal ebꞌ.

10 Chi walon cꞌal pax oj: Jaꞌ yet oj tzꞌajna 70 abꞌil yakꞌon yaawil Babilonia tuꞌ, oj wakꞌ jin watxꞌcꞌulal ey jex, catuꞌ oj wakꞌon eloc bꞌey jix wakꞌcan jin tiꞌ yu jex wakꞌon meltzotej titiꞌ junelxa. 11 Jain Jehová jin chi walaꞌ, tol wotaj tzetyetal naꞌbꞌil wu je yin. Jaꞌ tzet chin naꞌ wunen je yin, man yu oj je yabꞌen syaꞌil; yuxan jaꞌ tzet oj wakꞌ ey jex yu yoc je watxꞌiloj, yet watxꞌ ey wal tzet eyoc yipoj je cꞌul yet bꞌakꞌin. 12 Oj lawoj tuꞌ xin, oj jex oc tean win an, oj jex txaloj ey jin, catuꞌ oj wabꞌen tzet oj je yal yin je txa tuꞌ. 13 Jain caw Jehová jin chi walaꞌ, tol oj jex jul jin cꞌatan an, oj jin txꞌox jin bꞌa ey jex, yutol oj je yaoc je bꞌa yul jin kꞌabꞌ yin masanil je cꞌul. 14 Oj jin txꞌox jin bꞌa ey jex; jain wal caw Jehová jin chi walaꞌ, tol oj jin qꞌuextoj tzetyetal tol tꞌinan chi jul je yibꞌan. Oj jex wiꞌtej bꞌey masanil yul-laj nación, cꞌal bꞌey masanil bꞌey jix jex jin sajlem cantoj. Oj jex jin yambꞌa ocoj, oj jex wiꞌon meltzo pax tej bꞌey caan jex ecꞌ yet jix jex iꞌletoj.

15 Jaex tiꞌ che yalaꞌ: Eyxa ebꞌ ẍejabꞌ Jehová eyecꞌ cu xol bꞌey Babilonia tiꞌ, je chi che yaloni. 16 Yuxan chi yal Jehová jaxca tiꞌ yin naj rey eyecꞌ bꞌey yul sdespacho naj rey David, cꞌal yin ebꞌ caan bꞌey jun conobꞌ tiꞌ, jaꞌton wan je yican to je bꞌa yetoj, ebꞌ tol ma iꞌletoj je yetoj yin presowomal: 17 Jain Jehová, yaaw jin yibꞌan masanil chi walaꞌ: Oj watoj jowal, wail, cꞌal syaꞌilal xol ebꞌ tuꞌ. Laan xacꞌal oj yun can ebꞌ wu jaxca wan higo tol kꞌaꞌtajxa, tol cꞌamxa swatxꞌil, cꞌamxa chi skeꞌ chi loꞌlei. 18 Oj wujte ecꞌ ebꞌ yetoj jowal, yetoj wail, cꞌal yetoj syaꞌilal. Catuꞌ oj wakꞌon wal yun masanil nacionlaj, tol man oj ochele yu ebꞌ. Oj intajnele xacꞌal el ebꞌ, oj xiwa ebꞌ ánima yu ebꞌ, yet oj yilon oc ebꞌ. Oj bꞌuchwa ebꞌ yin ebꞌ, cꞌal sbꞌaale el ebꞌ yu wan nacionlaj bꞌey oj jin sajlemne cantoj ebꞌ. 19 Jain Jehová jin chi walaꞌ, tol ma ẍaꞌ yabꞌ ebꞌ jantaj tzetyetal ecꞌal el jix jin chej yal ebꞌ jin chejabꞌ. Jain caw chi walaꞌ, tol ma cꞌal pax je chaꞌ je yabꞌ jaex tiꞌ. 20 Je masanil jex a Jerusalén, jix jex wakꞌ iꞌletoj yin presowomal bꞌey Babilonia, abꞌwej wal jin kꞌane chi walaꞌ.

21 Jain Jehová, yaaw jin yibꞌan masanil, je Diosal jin pax oj, chi wal yin Ahab scꞌaal Colaías, cꞌal yin Sedequías scꞌaal Maaseías, jaꞌton ebꞌ chi alon wan lekꞌtiꞌal kꞌane yin jin bꞌi: Oj wakꞌon eyqꞌuey ebꞌ yul skꞌabꞌ Nabucodonosor, sreyal Babilonia, jaꞌ jun tuꞌ oj makꞌon cam ebꞌ je sattaj jaex tiꞌ. 22 Yu jun tuꞌ xin, ta ey junoj jex a Judá jix jex iꞌletoj bꞌey Babilonia, che yoche che yintajne el junojxa mactxequel je yaloni: Yun ojabꞌ Jehová je yetoj, jaxca wal jix yun yetoj Sedequías cꞌal Ahab; jaꞌ ebꞌ tuꞌ jix yal naj rey Nabucodonosor tol jix nusle tzꞌaꞌoj. 23 Queyton tuꞌ oj yun sjul yibꞌan ebꞌ, yutol yel xacꞌal pena tzet jix yun ebꞌ bꞌey yul je conobꞌal tuꞌ. Jix yun mul ebꞌ yetoj yistil ebꞌ yet conobꞌ. Jix yalon lekꞌtiꞌal kꞌane ebꞌ yin jin bꞌi, tol man jain oj jix jin chej yal ebꞌ. Jain wal caw Jehová jin chi walaꞌ, tol wotaj wal tzet yeocoj, ẍi Jehová.

24-32 Ey jun winaj a Jerusalén eyecꞌ bꞌey Babilonia, jaꞌton jun chi yij Semaías a Nehelam. Jaꞌ jun tuꞌ, yul cꞌal yet jix yaontej jun carta bꞌey masanil ebꞌ ánima caan bꞌey Jerusalén, cꞌal tet naj yakꞌomal xaambꞌal chi yij Sofonías scꞌaal Maaseías, yetoj cꞌal tet wanxa ebꞌ yakꞌomal xaambꞌal. Jaꞌ bꞌey yul jun carta tuꞌ jix yaltej tet Sofonías jaxca tiꞌ: Jaꞌ Jehová jix jaach aon oc yin yakꞌomal xaambꞌal yin sqꞌuexeloj naj Joiadá, yet watxꞌ tol sat ijbꞌawom jaach bꞌey templo. Ta tol ey mac chi jul jaxca tol chaꞌbꞌil joybꞌinaj sat yu, catuꞌ chi cꞌoli skꞌanabꞌ eloj jaxca tol ẍejabꞌ Dios yaloni, jaach tiꞌ, sowalil cha waoctoj yul teꞌ teꞌ bꞌey chi jejle can octoj yajan ebꞌ presowom, catuꞌ cha kꞌalon can oc yetoj cadena. ¿Tzet yu, yuxan tol ma ja tenchane Jeremías a Anatot, tol jix stecꞌbꞌa sbꞌa skꞌanabꞌ ja sattaj jaxca wal tol ẍejabꞌ Dios chi yute sbꞌa? Tol tax jix yatej jun carta ey jon bꞌey Babilonia tiꞌ. Chi yalon yul an carta jaxca tiꞌ: Yutol naatil oj jex eecꞌ tituꞌ; waꞌnewej je na, waꞌnewej ey je bꞌa, awwej teꞌ awbꞌeal teꞌ catuꞌ che loꞌon sat teꞌ, ẍi tej naj Jeremías tuꞌ ey jon, ẍi an scarta Semaías tuꞌ.

Jaꞌ naj yakꞌomal xaambꞌal chi yij Sofonías jix awten a an carta tuꞌ tet naj Jeremías. Jix lawi tuꞌ xin, jix kꞌanabꞌ Jehová, Naj Yaaw yibꞌan masanil, Naj sDiosal Israel, tet naj Jeremías, jix yalon jaxca tiꞌ: Altoj tet naj Semaías a Nehelam cꞌal tet masanil ebꞌ eytoj jaxca yin presowomal, tol jain chi walaꞌ: Jaꞌ naj Semaías a Nehelam jix alon ey jex, tol jain jix jin chej yalaꞌ, man pax yeloj tol jain jix jin chej yalaꞌ, jix je yaon oc jun lekꞌtiꞌal kꞌane tuꞌ yipoj je cꞌul. Jain wal caw Jehová jin chi walaꞌ, tol oj waoc syaꞌilal naj Semaías tuꞌ, cꞌal yetoj ebꞌ yicꞌaal. Cꞌam junoj yicꞌaal tuꞌ oj caey ecꞌ xol jin conobꞌ. Jain Jehová jin chi walaꞌ, tol man oj yakꞌ tzalabꞌoj scꞌul yin jin watxꞌcꞌulal oj wakꞌ ey jex, yutol jaꞌ yu skꞌane tuꞌ, yuxan jaꞌ jix jex iptzen yin je pitnen je bꞌa ey jin, ẍi Jehová tet naj Jeremías.