Jix Yakꞌ Stiꞌ Jehová Tet Ebꞌ Conobꞌ Israel
30
Jaꞌton wan kꞌane tiꞌ jix yal Jehová tet naj Jeremías jaxca tiꞌ: 2 Jain Jehová je Diosal jin jaex Israel jex tiꞌ, chi wal jaxca tiꞌ: Tzꞌibꞌe yin junoj juun masanil tzet jix wal ey jaach, 3 yutol oj jul scꞌual, catuꞌ oj jin qꞌuexon tzetyetal eyoc yibꞌan jin conobꞌ Israel cꞌal yibꞌan Judá. Jain wal caw Jehová jin chi walaꞌ, tol oj wakꞌ meltzo ebꞌ bꞌey txꞌotxꞌ txꞌotxꞌ jix wakꞌ smajuloj ebꞌ je mam icham, ẍi Dios.4 Jaꞌton skꞌane Jehová jix yal yin conobꞌ Israel cꞌal yin Judá tiꞌ:
5 Caw wal chi abꞌle yel aw yu xiwcꞌulal, cꞌamxa tzalacꞌulal xol ebꞌ.
6 Kꞌanlewej ton abꞌi, ¿tumi taꞌ ey junoj winaj chi yakꞌ aloj el unin che naꞌ? ¿Tzet yuxan jaꞌ ebꞌ winaj caw ey yip tuxa cꞌal lakꞌan oc skꞌabꞌ ebꞌ xaamscꞌul chi wilaꞌ, jaxca xacꞌal tol unin oj aloj yin ebꞌ? ¿Tzet yu, yuxan tol saj xacꞌal yili sat masanil ebꞌ?
7 Ey jun cꞌual tol cꞌamxa chi alcha jantaj wan syaꞌtajilal oj juloj, cꞌamto juneloj chi yun jun syaꞌilal oj jul tuꞌ. Jaꞌton yet jun tiempoal tuꞌ oj jul syaꞌilal yibꞌan ebꞌ sconobꞌ Jacob, jain xa oj jin colel ebꞌ.
8 Jain wal Jehová, yaaw jin yibꞌan masanil chi walaꞌ: Oj jin colel ebꞌ jin conobꞌ bꞌey eyoc ebꞌ yin yakꞌomaloj servilal tuꞌ. Cꞌamxa bꞌakꞌin oj oc ebꞌ yin yakꞌomaloj servil xol ebꞌ txꞌoj conobꞌal junelxa.
9 Tol jain Jehová sDiosal jin ebꞌ jain xa oj jin yakꞌ servil, cꞌal yakꞌon servil jun yicꞌaal naj rey David ebꞌ, tol jain caw oj waoc yin reyal, ẍi Jehová.
Oj Scolel Ebꞌ Sconobꞌ Jehová
10 Jex Israel yicꞌaal Jacob, jin chejabꞌ je yeocoj, cꞌam ojabꞌ chex xiwi, yutol oj jex jin colel yetoj ebꞌ je yuninal bꞌey jun nación tol naat bꞌey jix jex iꞌletoj yin presowomal. Jain caw Jehová jin chi walaꞌ, tol oj jex caey ecꞌ junelxa yin tzalacꞌulal, yin tol cꞌamxa mactxequel oj jex xibꞌtenoj.
11 Ey jin cꞌal oc je yetoj, oj wakꞌ lawoj ey masanil wan conobꞌlaj bꞌey jix jex jin sajlemne cantoj. Jal jex jaex tiꞌ, man oj jex wakꞌ lawoj eyoj. Asan tol oj jex wakꞌ cuenta jaxca wal smooalil. Man oj jex can cꞌal pax yin tol man oj jex wakꞌ cuenta, ẍi Dios.
12 Chi yalon cꞌal pax Jehová tet ebꞌ sconobꞌ: Jaꞌ je yasil tuꞌ, cꞌam chi skeꞌ yanchai; jaꞌ je yaꞌilal tuꞌ cꞌamxa yanil.
13 Tumi eyto mactxequel chi oc il je yu; tumi eyto mactxequel chi anten je yasil tuꞌ. Yutol cꞌamxa yanil jun je yaꞌilal tuꞌ.
14 Masanil ebꞌ ey scamcꞌulal je yin, jix jex toocan qꞌueycꞌulal yu ebꞌ. Tumi eyto niꞌoj chi snaꞌ ebꞌ tzet watxꞌ che yunne. Jain jix jex wakꞌ yasoj jaxca wal tol chin jowi oc je yin. Caw miman syaꞌilal jix waoc je yibꞌan, yu cꞌal jantaj je penail tol cꞌamxa chi bꞌischai.
15 ¿Tzet yu, yuxan ecꞌal el chi el je yaw yu je yasil tuꞌ? Jaꞌ je yaꞌilal tuꞌ, cꞌamxa yanil, yutol caw miman je penail. Yutol cꞌamxa chi bꞌischa je penail, yuxan queytuꞌ chex wute.
16 Jal masanil ebꞌ jix yoche chex yakꞌ qꞌueyeloj, jaꞌ ebꞌ tuꞌ, oj qꞌueyle el ebꞌ. Masanil ebꞌ chi jowi oc je yin, oj tojcan ebꞌ yin presowomal. Caw wal oj uchle eltej ebꞌ jix jex uchon eltej, oj elkꞌaneletoj stzetyetal ebꞌ jix elkꞌanentoj je yet.
17 Caxcꞌal mi chi yal ebꞌ chi jowi oc je yin tuꞌ: Jaꞌ Sión tuxa jix bꞌejlecanoj; tumi eyto mactxequel chi oc il yu, ta ẍi ebꞌ; jain Jehová jin chi walaꞌ, tol oj wakꞌ je cawil junelxa, jain oj wante je yasil tuꞌ, ẍi Dios.
18 Chi yalon cꞌal pax Jehová jaxca tiꞌ: Caw wal oj jin qꞌuex tzetyetal eyoc je yibꞌan jex sconobꞌ Jacob. Oj eecꞌ jin camcꞌulal je yin. Oj waꞌxoj a je conobꞌ junelxa bꞌey jix uchcha ey yet sbꞌabꞌelal; yetoj cꞌal pax je palacio, oj waꞌxoj a junelxa bꞌey ey cꞌaltaꞌa.
19 Jaꞌ tituꞌ oj el je yaw je bꞌitni, oj jex tzee yu tzalacꞌulal. Manxa oj eytej je bꞌisil. Jain oj wakꞌ chꞌibꞌ je bꞌisil. Manxa oj jex wintajne eloj, tol jain oj jex wute tol miman je yeloc apnoj.
20 Jaex Israel jex tiꞌ, jaxca wal je yeoc yet peyxa, queytuꞌ oj je yun pax junelxa. Caw wal oj yiꞌ yip je conobꞌ tuꞌ junelxa jin sattaj. Oj waoc syaꞌilal yibꞌan ebꞌ jix jex etnen tuꞌ.
21 Jain caw Jehová jin chi walaꞌ, tol jaꞌ je xol tuꞌ oj eltej mac oj oc je yaawiloj. Oj wakꞌ yun jun yaaw tuꞌ, tol oj jul jin cawilal, yutol cꞌam cꞌaltaꞌ mac chi stecꞌbꞌa sbꞌa sjul jin cꞌatan.
22 Jin conobꞌ oj je yun ocoj, jain tiꞌ je Diosal jin, ẍi Jehová.
23 Jaꞌ sjowal scꞌul Jehová oj jul yibꞌan ebꞌ penawom, jaxca wal junoj miman kaꞌeꞌ yaxnabꞌ chi jul yin eymanil.
24 Man oj oc tucan sjowal scꞌul tuꞌ, masantaꞌcꞌal oj yun tzet naꞌbꞌil yu. Masanil wan tuꞌ, oj naꞌcha el je yu yet oj jul stiempoal.