Oj Meltzo Ebꞌ Israel Bꞌey Sconobꞌ
31
Jaꞌ Jehová chi alon jaxca tiꞌ: Jaꞌ yet jun tiempoal oj juloj, tol jain ton oj jin oc sDiosal masanil junjun tujan ebꞌ Israel, catuꞌ jaꞌcaw jin conobꞌ oj yun can oc ebꞌ, ẍi Dios.2 Chi yalon Jehová jaxca tiꞌ: Jaꞌ ebꞌ ánima jix elcan yul skꞌabꞌ camich, jix ẍaꞌ jin watxꞌcꞌulal ebꞌ bꞌey txꞌotxꞌ cusiltaj txꞌotxꞌ, yet chi seyon ecꞌ ebꞌ bꞌey jix xewi, ẍi Dios.
3 Jaꞌ yet peyxa jix xꞌox sbꞌa Jehová ey jon, catuꞌ jix yaloni: Jex Israel, caw xaan jex wu yet tax cꞌal yichbꞌanil, yutol ey cꞌal jin camcꞌulal je yin.
4 Oj jex jin caꞌ waꞌne a junelxa. Oj je yiꞌ je pandereta, oj jex canalwoj yu tzalacꞌulal.
5 Catuꞌ oj je yawon je yuva junelxa bꞌey txꞌotxꞌ tzalquiltaj yul yet Samaria. Jaꞌ mac oj yaw uva oj yakꞌ tzalabꞌoj scꞌul yetoj sat yawo tuꞌ.
6 Yutol oj aapnoj jun scꞌual tol jaꞌ ebꞌ eyoc steynemaloj txꞌotxꞌ tzalquiltaj bꞌey yul yet Efraín, oj el yaw ebꞌ jaxca tiꞌ: Titanwej, toonwej bꞌey Sión, bꞌey Jehová cu Diosal, ẍi ebꞌ oj yalon ebꞌ, ẍi Jehová.
7 Chi yalon Jehová jaxca tiꞌ: Bꞌitnanwej yin tzalacꞌulal yu sconobꞌ Jacob, jaꞌton jun conobꞌ miman yeloc apnoj yintaj masanil nacionlaj. Abꞌle ojabꞌ yoc je bꞌit, catuꞌ che yalon jaxca tiꞌ: Jaach Jehová, colel ja conobꞌ, jaꞌton ebꞌ Israel jix to colcha can eloj, je chi.
8 Oj wiꞌ meltzotej ebꞌ bꞌey jun nación ey bꞌey norte; oj jin yambꞌatej ebꞌ bꞌey slawubꞌal yul yibꞌankꞌinal tiꞌ. Jaꞌ xol ebꞌ tuꞌ oj jul ebꞌ cꞌam chi skeꞌ yilwi, cꞌal ebꞌ chi eyqꞌuey sbꞌeyi, ebꞌ ix ix mimejalxa, cꞌal ebꞌ ix tol to chi waꞌxi scꞌul; jun wal miman bꞌulan oj yun smeltzotej ebꞌ titiꞌ.
9 Lalan xali ebꞌ, catuꞌ lalan yokꞌ ebꞌ yet oj jul ebꞌ. Catuꞌ oj wiꞌontej ebꞌ bꞌey jaꞌ jaꞌ chi el sne, yul jun bꞌe caw wal acꞌal, cꞌamxa bꞌey oj telcꞌotoj ebꞌ. Yutol mame weoc bꞌey conobꞌ Israel; jaxa conobꞌ Efraín xin, jin bꞌabꞌel cꞌaal yeocoj, ẍi Dios.
10 Jaꞌ Jehová chi alon jaxca tiꞌ: Jex conobꞌlaj, abꞌwej wal jin kꞌane; Alwej el bꞌey naat cꞌal bꞌey stiꞌlaj jaꞌ mar jaxca tiꞌ: Jaꞌ Jehová tol jix uchon sajlemtoj ebꞌ Israel, jacꞌal oc chi yambꞌan pax oc ebꞌ tinaniꞌ; catuꞌ chi steynen jaxca wal chi yun steynele noꞌ meꞌ yu yilomal, je chi.
11 Yutol oj jin colcan el ebꞌ yicꞌaal Jacob, oj jin colon eltej ebꞌ yul skꞌabꞌ wan conobꞌ caw ey yip.
12 Oj jul ebꞌ, catuꞌ oj bꞌitnoj ebꞌ yin tzalacꞌulal bꞌey tzalan Sión; oj yakꞌ tzalabꞌoj scꞌul ebꞌ yu jantaj jin yaxilal, jaꞌton ixim tiriw, yal uva, aceite olivo, noꞌ meꞌ, cꞌal noꞌ wacax oj wakꞌ tet ebꞌ. Laan xacꞌal oj yun ebꞌ jaxca wal junoj awo tol ey cꞌal oc yaal; manxa oj pax yip ebꞌ junelxa.
13 Oj canalwoj ebꞌ ix kꞌopo ix yu tzalacꞌulal; oj tzalabꞌoj cꞌal pax ebꞌ achꞌe, cꞌal ebꞌ icham winaj. Jain oj wakꞌ smimanil scꞌul ebꞌ. Jain Jehová jin chi walaꞌ, tol oj meltzo oc scuscꞌulal ebꞌ yin tzalacꞌulal; yel xacꞌal miman stzalacꞌulal ebꞌ oj wakꞌa, yintaj syaꞌilal jix yil ebꞌ.
14 Jaꞌ loꞌbꞌe tol watxꞌ oj wakꞌ sloꞌ ebꞌ yakꞌomal xaambꞌal, jal ebꞌ jin conobꞌ oj yakꞌ tzalabꞌoj scꞌul yetoj masanil tzet oj wakꞌ tet ebꞌ, ẍi Dios.
15 Chi yalon pax Jehová jaxca tiꞌ: Chi abꞌle yoc aw bꞌey conobꞌ Ramá, ey mac chi okꞌ yu mimej syaꞌilal. Jaꞌ ix Raquel chi okꞌ ix yu ebꞌ yuneꞌ. Cꞌamxa chi yoche chi mimancꞌulnelei, yutol cꞌamxa ebꞌ yuneꞌ ix eyecꞌoj.
16 Jaach Raquel, manche jaach okꞌ miman, cꞌam ojabꞌxa chi el yal ja sat, yutol jain caw Jehová jin chi walaꞌ, tol jaꞌ tzet jix ja wun tuꞌ yu yoc swatxꞌiloj ebꞌ ja wuneꞌ tuꞌ, oj ja chaꞌ spaj. Jaꞌ ebꞌ ja wuneꞌ oj el ebꞌ bꞌey sconobꞌ ebꞌ chi etnen ebꞌ, catuꞌ oj jul ebꞌ titiꞌ.
17 Jain caw Jehová jin chi walaꞌ, tol chi skeꞌ ja waon oc yipoj ja cꞌul yu tzet oj eloc wu yet bꞌakꞌin: Jaꞌ ebꞌ ja wuneꞌ, oj meltzo ebꞌ bꞌey sconobꞌ tiꞌ.
18 Jix wabꞌ yel yaw ebꞌ sconobꞌ Efraín yu cuscꞌulal, chi yalon ebꞌ jaxca tiꞌ: Jix jon ja cuyuꞌ jaxca chi yun scuyle junoj noꞌ wacax man yotaj oj chi mulna yin kꞌuo txꞌotxꞌ, yuxan tuxa jix jon cuycha tinaniꞌ. Iꞌon meltzo ja wetoj, bꞌejan cu cꞌul cu meltzotoj, yutol cu Diosal jaach.
19 Caxcꞌal mi jix kiꞌel cu bꞌa ja cꞌatan, jal tinaniꞌ xin jix snaꞌ sbꞌa cu cꞌul. Jaꞌ yet jix naꞌcha el cu penail ku, tuxa cꞌal jix cu ey noan yu qꞌuixwilal; yeynajil xacꞌal chi kute cu bꞌa, yu jantaj cu penail jix oc yet tax yichbꞌanil, ẍi conobꞌ Efraín ey jin.
20 Jain Jehová jin chi walaꞌ, tol jaꞌ conobꞌ Efraín tiꞌ, jaxca wal jin cꞌaal tol camcꞌulnebꞌil yeocoj; yel xacꞌal ochebꞌil ebꞌ wu. Caxcꞌal jix wakꞌ cuenta ebꞌ, cꞌam cꞌal chin bꞌej jin naꞌontej ebꞌ, naꞌan cꞌal ebꞌ wu; yaꞌ cꞌal chi yabꞌ jin pixan yu ebꞌ, yutol caw chi okꞌ jin cꞌul yin ebꞌ.
21 Jex a Israel, chi cam je yiloni tzet bꞌeal bꞌey chi kaꞌ je toi, jacꞌalaꞌ bꞌey yul jun bꞌe tuꞌ chex meltzotej junelxa yet chex jul pax junelxa bꞌey wan conobꞌ jix je bꞌejcan tiꞌ.
22 ¿Bꞌakꞌin oj je bꞌejcan je yecꞌabꞌtoj jaxca junoj ix ix tol pit chi yute sbꞌa? Jain Jehová jin oj wun junoj tzetyetal tol cꞌamto bꞌey chi yun juneloj bꞌey yul yibꞌankꞌinal tiꞌ; jaꞌ ix ix oj txꞌemtxꞌon oc yin naj winaj, ẍi Dios.
Watxꞌ Oj Yun Yeloc Conobꞌ Israel
23 Jaꞌ Jehová Naj Yaaw yibꞌan masanil, Naj cu Diosal jaon Israel jon tiꞌ, jaꞌ chi alon jaxca tiꞌ: Jaꞌ yet oj wiꞌon pax tej ebꞌ Israel tiꞌ bꞌey ey cꞌaltaꞌ ecꞌoj, oj yalon ebꞌ bꞌey conobꞌlaj yul yet Judá jaxca tiꞌ: ¡Yakꞌ ojabꞌ syaaxilal Jehová yibꞌan jun tzalan sicꞌbꞌil el yu bꞌey chi bꞌeybꞌalnele sjichanil! ẍi ebꞌ. 24 Junne xacꞌal oj caey ebꞌ ánima yul conobꞌlaj yul yet Judá; jaꞌ ebꞌ mulnawom yin awo, cꞌal ebꞌ ilom meꞌ oj caey ecꞌ tituꞌ. 25 Jain oj wakꞌ sicbꞌoj scꞌul ebꞌ chi cꞌuumbꞌi, oj wakꞌon low ebꞌ lalanxa spax yip yu wail, ẍi Jehová.
26 Jix lawi wilon wan tuꞌ, jix el jin weyan; jix jin ecꞌ tꞌananoj. Caw watxꞌ jix yun jin wey jix wabꞌe.
27 Jaꞌ Jehová chi alon jaxca tiꞌ: Oj aapnoj scꞌual, yet oj wakꞌon chꞌibꞌ sbꞌisil ebꞌ ánima cꞌal noꞌ noꞌ bꞌey yul yet Israel cꞌal bꞌey Judá. 28 Jain caw Jehová jin chi walaꞌ, tol jaxca jix yun wakꞌon wip jin tokꞌon atej xeꞌ, cꞌal wuchon eyoj, cꞌal wakꞌon lawoj, cꞌal jin qꞌueyon eloj, cꞌal wetnentoj, jacꞌalaꞌ queytuꞌ oj yun wakꞌon cꞌal pax wip wakꞌon chꞌibꞌ junelxa, cꞌal jin waꞌnen pax aoj.
29 Jaꞌ yet tuꞌ, man oj yal ebꞌ jaxca tiꞌ: Jaꞌ ebꞌ mame jix sloꞌ pa uva ebꞌ, jal pax ebꞌ uninale xin, jululi xacꞌal stoo spail yichlaj yee ebꞌ, man ẍi oj ebꞌ. 30 Yutol junjun cꞌal oj cam yu spenail. Jaꞌ mac oj loꞌon sat pa uva, jaꞌ oj abꞌen spail, ẍi Dios.
31 Chi yalon pax Jehová jaxca tiꞌ: Oj aapnoj scꞌual, catuꞌ oj jin waꞌne jun acꞌ wa kꞌane yetoj ebꞌ yicꞌaal Israel cꞌal yetoj ebꞌ yicꞌaal Judá. 32 Jaꞌ jun wa kꞌane tuꞌ, man laan oj yetoj jun jix jin waꞌne yetoj smam icham ebꞌ yet jix wiꞌon eltej ebꞌ bꞌey Egipto; jaxca tol ocnaj jin quetzan yin skꞌabꞌ ebꞌ yet jix wiꞌon eltej ebꞌ. Jain caw Jehová jin chi walaꞌ, tol jaꞌ ebꞌ tuꞌ ma sjije jin wa kꞌane jix jin waꞌne yetoj ebꞌ. Laan jix wute ebꞌ jaxca yakꞌon junoj winaj yetoj yistil. 33 Yuxan jaꞌ jun jin wa kꞌane oj jin waꞌne yetoj ebꞌ yicꞌaal Israel yet cu sattajto tuꞌ: Jain Jehová jin chi walaꞌ, tol oj waoc jin chejbꞌanil yin snaꞌbꞌal ebꞌ, jaxca tol oj jin tzꞌibꞌe can oc yin spixan ebꞌ, jain oj jin oc sDiosaloj ebꞌ, jaxa ebꞌ oj oc can ebꞌ jin conobꞌoj. 34 Cꞌamxa junoj oj yal tet yet conobꞌ jaxca tiꞌ: Otajnewej el Jehová, man ẍi oj ebꞌ; yutol jain Jehová jin chi walaꞌ, tol masanil ebꞌ oj jin otajnen eloj, caxcꞌal unin, caxcꞌal icham ánima. Oj wakꞌ lawoj spenail ebꞌ, catuꞌ cꞌamxa bꞌakꞌin oj jin naꞌtej spenail ebꞌ, ẍi Dios.
35 Jaꞌ Jehová, Naj jix waꞌnen can cꞌu yet chi stzejtane yet cꞌualil, cꞌal xꞌaaw cꞌal weycan, yet chi stzejtane yet akꞌbꞌalil, jaꞌton Naj chi akꞌon bꞌilwoj a sat jaꞌ mar, catuꞌ chi a pomna sat jaꞌ, jaꞌton Jehová, Naj Yaaw yibꞌan masanil chi alon jaxca tiꞌ:
36 Jain Jehová jin chi walaꞌ: Yajbꞌan cꞌamto chi qꞌueyel wan tzejtebꞌal tuꞌ, man oj qꞌueyel nación Israel jin sattaj.
37 Jain Jehová jin chi walaꞌ: Tumi ey bꞌakꞌin oj echele jantaj jun yeoc satcan, catuꞌ oj otajnele el tzet utbꞌil yeoc yich txꞌotxꞌ txꞌotxꞌ tiꞌ, tam wal ey bꞌakꞌin oj wintajne el ebꞌ yicꞌaal Israel yu tzet jix yun ebꞌ, ẍi Dios.
38 Jaꞌ Jehová chi alon jaxca tiꞌ: Oj apnoj oc jun scꞌual, tol oj waꞌxoj a jin conobꞌ tiꞌ junelxa, catuꞌ chi too tacꞌal bꞌey torre Hananel, catuꞌ oj apnoj bꞌey jun puerta ey bꞌey xiquin eltoj. 39 Tꞌinan cꞌal stoo smoonal masantaꞌcꞌal bꞌey txꞌotxꞌ tzalquiltaj yul yet Gareb, catuꞌ chi meltzo ecꞌtoj bꞌey yetcꞌulaltoj Goá. 40 Masanil bꞌey spananil stiꞌ sjobꞌeal bꞌey chi mujle ebꞌ camom, cꞌal bꞌey chi kꞌojle el chꞌen stikꞌakꞌil taan, cꞌal masanil yibꞌan jaꞌ jaꞌ chi yij Cedrón, masantaꞌcꞌal bꞌey junxa xiquin eltoj bꞌey ey spuerta yet noꞌ che, jal yetcꞌulal bꞌey chi aol cꞌu, wet oj yun can ocoj. Jaꞌ masanil wan tiꞌ, cꞌamxa bꞌakꞌin oj uchle eyoj, tam wal yakꞌle lawoj eyoj, ẍi Jehová.