6 Jix yalon Jeremías jaxca tiꞌ: Jaꞌ Jehová jix kꞌanabꞌ ey jin, jix yalon jaxca tiꞌ: 7 Ilaꞌ tol jaꞌ naj Hanamel, scꞌaal naj ja wican Salum, oj jul naj ja cꞌatan yu jul yalon jaxca tiꞌ: Jaꞌ jun jin txꞌotxꞌ ey bꞌey Anatot, smoo ton wal jaach cha manaꞌ, yutol kicanto cu bꞌa ja wetoj, ẍi naj Hanamel, ẍi Jehová ey jin. 8 Jaxca wal jix yun yalon Jehová tuꞌ ey jin, jaxca tuꞌ jix yunne. Jaꞌ naj wican jix jul jin cꞌatan yet ey jin ecꞌ bꞌey sattaj eltoj na, bꞌey eyecꞌ ebꞌ chi teynen spalacio naj rey. Jix jul naj yal ey jin tol chin man jun txꞌotxꞌ ey bꞌey Anatot, yul yet Benjamín. Jain ton ey walon wet jin manoni, yet chi can txꞌotxꞌ yul jin kꞌabꞌ, yutol wicanto jin bꞌa yetoj naj. Jaꞌ yet tuꞌ jix naꞌcha el wu tol yet Jehová jun kꞌane tuꞌ. 9 Jix jin man txꞌotxꞌ txꞌotxꞌ tuꞌ tet naj Hanamel tuꞌ; jix wakꞌon jun 17 chꞌen plata stooloj txꞌotxꞌ tet naj. 10 Jaꞌ jun wa kꞌane tuꞌ jix wakꞌ tzꞌibꞌelecan jun yuunal, jix jin majchen ey yetoj jin sello sattaj ebꞌ jix ilon jun tzet jix wun tuꞌ. 11 Jix lawi tuꞌ xin, jix wiꞌon a yuunal jun wa kꞌane tuꞌ yetoj scopiail, jaꞌton bꞌey chi yalaꞌ, tzet jix yun can jun laatiꞌ kꞌane tuꞌ, ey jun an eyoc sello yin smajil, jal junxa an xin, tucꞌal jajan can an. 12 Jix lawi tuꞌ, sattaj wal naj wican Hanamel tuꞌ, sattaj cꞌal pax ebꞌ testigo jix stzꞌibꞌen can ey sbꞌi ebꞌ yul an yuunal jun laatiꞌ kꞌane tuꞌ, cꞌal sattaj masanil ebꞌ wet conobꞌ chotan ey tituꞌ, jix waontoj an scaabꞌil tet naj Baruc, jaꞌton scꞌaal Nerías, yitxiquin naj Maaseías. 13 Sattaj wal ebꞌ tuꞌ jix walon tet naj Baruc jaxca tiꞌ: 14 Jaꞌ Jehová, Naj cu Diosal jaon Israel jon tiꞌ, jaꞌ jix aloni tol cha cꞌubꞌa can a caabꞌ an yuunal wa kꞌane tiꞌ, jaꞌton an tol eyoc selloal yin smajil cꞌal an jajan, cha cꞌubꞌa can an bꞌey yul junoj txꞌotxꞌ xi, yet watxꞌ ey cꞌal ecꞌ an ecꞌaloj abꞌil. 15 Jaꞌ Jehová, Naj Yaaw yibꞌan masanil, Naj cu Diosal, jaꞌ chi alon jaxca tiꞌ: Jaꞌ yet bꞌakꞌin, oj sman sna ebꞌ ánima, oj smanon pax xꞌotxꞌ ebꞌ, cꞌal uva awbꞌilxa bꞌey jun txꞌotxꞌ tiꞌ, ẍi Dios.

16 Jix lawi wakꞌon yuunal jun txꞌotxꞌ jix jin man tet naj Baruc tuꞌ, catuꞌ jix jin txali jaxca tiꞌ: 17 Jaach Jehová jin Diosal, yetoj wal ja wipal jix ja waꞌne satcan, cꞌal txꞌotxꞌ txꞌotxꞌ tiꞌ. Cꞌam tzetyetal tol yaꞌtaj jix yun yiꞌon sbꞌa ja wu. 18 Jaach tiꞌ, cha txꞌox ja camcꞌulal tet ecꞌaloj tujan icꞌaaleal ánima chi ecꞌ bꞌey yul yibꞌankꞌinal tiꞌ, catuꞌ cha waon cꞌal pax oc syaꞌilal yibꞌan ebꞌ ánima yu spenail smam ebꞌ. Jaach jin Diosal, caw wal miman ja weloc apnoj, caw wal chi skeꞌ ja wu. Jaꞌ ja bꞌi, Jehová Yaaw yibꞌan masanil. 19 Caw wal miman ja weloc apnoj yu tzet cha naꞌ, cꞌal yin tzet cha waꞌne. Jaach tiꞌ, cha wil masanil tzettaj chi el yunen ebꞌ ánima, catuꞌ cha pajtzen tet ebꞌ jaxca wal smooalil tzet chi yun ebꞌ. 20 Jaach jix ja wun wan mimej milagro cꞌal wan mimej txꞌoxbꞌanile bꞌey Egipto tol caw qꞌueyubꞌtaj yili; jacꞌalaꞌ eyto cꞌal tzet cha naꞌ ja txꞌoxon cu xol, jaon Israel jon tiꞌ, cꞌal bꞌey xol-laj masanil ánima; yu jun tuꞌ, yuxan caw wal miman ja weloc apnoj. 21 Yetoj jantaj ja wipalil tuꞌ, jix ja wiꞌon eltej conobꞌ Israel tiꞌ bꞌey txꞌotxꞌ Egipto, ja txꞌoxnaj wan ja mulnail tol caw qꞌueyubꞌtaj yili cꞌal wan txꞌoxbꞌanile tol miman yeloc apnoj jix ja txꞌoxoꞌ. Yu jun tuꞌ, yuxan caw jix xiw masanil ebꞌ ánima. 22 Jix lawi tuꞌ, jix ja wakꞌon jun txꞌotxꞌ caw wal yaax sat tiꞌ ey jon Israel tiꞌ, jatacꞌalaꞌ jix yun ja wakꞌon can ja tiꞌ tet ebꞌ cu mam icham jon. 23 Jaꞌ yet jix oc ebꞌ bꞌey jun conobꞌ tiꞌ yin yiꞌon ey sbꞌa ebꞌ ja sattaj, caw wal ma ẍaꞌ yabꞌ ebꞌ tzet jix ja walaꞌ, tam wal jix sjije ja chejbꞌanil ebꞌ, tam wal jix yun ebꞌ tzet jix ja woche jix yun ebꞌ; yu jun tuꞌ, yuxan jix ja waeytej masanil wan syaꞌilal tiꞌ kibꞌan jon.

24 Jaꞌ tinaniꞌ, tuxa wal jix swaꞌne oc swalubꞌ ebꞌ Caldeo yin yakꞌon jowal ebꞌ yin conobꞌ tiꞌ; ey pax wail, cꞌal syaꞌilal. Jaxa oj yunne, oj eyqꞌuey jun conobꞌ tiꞌ yul skꞌabꞌ ebꞌ chi akꞌon jowal tiꞌ. Jaach jin Diosal, ilaꞌ tol lalan yunen tzet jix ja walaꞌ. 25 Jaach Jehová jin Diosal, caxcꞌal mi oj eyqꞌuey jun conobꞌ tiꞌ yul skꞌabꞌ ebꞌ Caldeo tuꞌ, jaach jix ja walaꞌ, yuxan jix jin man jun txꞌotxꞌ tuꞌ; sattaj wal ebꞌ testigo jix jin toolane txꞌotxꞌ, jin chi yin jin txa.

26 Jix lawi tuꞌ xin, jix takꞌwi Jehová ey jin, jix yalon jaxca tiꞌ: 27 Jain Jehová jin, sDiosal jin masanil ánima. Cꞌam junoj tzetyetal tol yaꞌtaj yiꞌon sbꞌa wu. 28 Yu jun tuꞌ, yuxan chi wal ey jaach, jain oj wakꞌ eyqꞌuey jun conobꞌ tiꞌ yul skꞌabꞌ Nabucodonosor sreyal ebꞌ Caldeo bꞌey Babilonia. 29 Jaꞌ ebꞌ Caldeo tuꞌ lalan yakꞌon jowal ebꞌ yin jun conobꞌ tiꞌ, oj octej ebꞌ yul conobꞌ tiꞌ yin yaon oc skꞌakꞌal conobꞌ ebꞌ; oj tzꞌaꞌtoj masanil wan na bꞌey jix yaoc spenail ebꞌ ánima jin sattaj; jaꞌ yibꞌan spananil wan na tiꞌ, jix xꞌemtej sjowal jin cꞌul ebꞌ yet jix yakꞌon tzꞌaꞌ incienso ebꞌ tet Baal, cꞌal yakꞌon vino ebꞌ tet wanxa comon dios. 30 Jatax cꞌal yet yichbꞌanil jix sbꞌeybꞌalne ebꞌ ja wet Israelal, cꞌal ebꞌ a Judá tzetyetal tol cꞌam chi ẍaꞌ jin cꞌul. Jain ton Jehová jin chi walaꞌ, tol cꞌam cꞌal chi sbꞌej xꞌemontej sjowal jin cꞌul ebꞌ yu wan echele waꞌnebꞌil a yu ebꞌ tuꞌ. 31 Jaꞌ jun conobꞌ tiꞌ, jatax cꞌal yet jun cꞌual jix ẍaꞌel yich swaꞌnen a sna ebꞌ, masantaꞌcꞌal yet jun cꞌu tiꞌ, cꞌamxa tzet watxꞌ chi yunne, asan cꞌal xꞌemontej sjowal jin cꞌul ebꞌ. Yu jun tuꞌ, yuxan oj wakꞌ qꞌueyle el ebꞌ. 32 Jaꞌ ebꞌ ja wet Israelal cꞌal ebꞌ a Judá caw wal chi xꞌemtej sjowal jin cꞌul ebꞌ yu jantaj spenail chi el yunen ebꞌ, laan xacꞌal sbꞌeybꞌal ebꞌ yetoj ebꞌ eyoc yin reyal xol ebꞌ, ebꞌ yaaw, ebꞌ yakꞌomal xaambꞌal, cꞌal yetoj ebꞌ jin chejabꞌ, cꞌal masanil ebꞌ ánima caan bꞌey Jerusalén, cꞌal ebꞌ a Judá. 33 Ma oc tꞌanan niꞌoj ebꞌ win, asan cꞌal yichin ebꞌ jix sjacbꞌacantej ey jin. Caxcꞌal mi lalan jin cuyon ebꞌ, cꞌam cꞌal niꞌoj jix ẍaꞌ yabꞌ ebꞌ, tam wal ey yeloc apnoj jin tenchebꞌal yul sat ebꞌ. 34 Tol jix yetnetoj jin templo ebꞌ tol wet yeocoj, jix yaoctoj wan echele ebꞌ yul jin templo, caw yaabꞌetaj yul jin sat. 35 Yetoj cꞌal pax oj, jix swaꞌne jun yet xaambꞌal ebꞌ tet Baal bꞌey spananil sjobꞌeal yet Ben-hinom; jaꞌ tituꞌ chi yakꞌ tzꞌaꞌ scꞌaal cꞌal scutzꞌin ebꞌ yin xaambꞌalil tet Moloc; queyton tuꞌ jix yun yoc spenail ebꞌ a Judá cꞌal yunen tzetyetal tol man jain oj jix walaꞌ, tam wal tol jix ecꞌ yin jin naꞌbꞌal wan chi sbꞌeybꞌalne ebꞌ tuꞌ.

36 Jain Jehová jin chi walaꞌ, jaxca chi yun yalon ebꞌ ánima: Tol jaꞌ jun conobꞌ tiꞌ oj eyqꞌuey yul skꞌabꞌ naj sreyal Babilonia, yu jowal, yu wail, cꞌal yu syaꞌilal. Jain Jehová je Diosal jin chi walaꞌ: 37 Oj jin sajlemne cantoj ebꞌ ja wet conobꞌ bꞌey xol-laj masanil conobꞌ yu sjowal jin cꞌul, tol eyxa smey yeocoj. Oj lawoj tuꞌ, oj jin yambꞌan pax oc ebꞌ, catuꞌ oj wiꞌon meltzotej ebꞌ junelxa. Jaꞌ titiꞌ oj caey ecꞌ ebꞌ yin tol cꞌamxa tzet oj iꞌon ebꞌ. 38 Jin conobꞌ oj yun oc ebꞌ, jain xa oj jin oc sDiosaloj ebꞌ. 39 Junxane oj yun snaꞌbꞌal ebꞌ wu, laan xacꞌal oj yun jin yakꞌon servil ebꞌ, yet chi oc cꞌal swatxꞌiloj ebꞌ, cꞌal swatxꞌiloj yicꞌaal ebꞌ yet bꞌakꞌin. 40 Oj jin waꞌne junoj jin wa kꞌane yetoj ebꞌ yin junelne, tol man cꞌal oj jin bꞌej cꞌal wunen swatxꞌil tet ebꞌ, catuꞌ oj waon oc yin snaꞌbꞌal ebꞌ, tol ey weloc apnoj yul sat ebꞌ, yet watxꞌ cꞌamxa bꞌakꞌin oj spoꞌocan el sbꞌa ebꞌ wintaj. 41 Yetoj wal jin tzalacꞌulal oj wakꞌon swatxꞌilal tet ebꞌ; yetoj wal masanil jin cꞌul cꞌal masanil jin camcꞌulal yin ebꞌ, tol oj wakꞌ caey ebꞌ yin tzalacꞌulal bꞌey jun nación tiꞌ, ẍi Jehová.

42 Jix yalon cꞌal Jehová jaxca tiꞌ: Jaxca wal jix yun waontej jun miman syaꞌilal bꞌey yibꞌan jun conobꞌ tiꞌ, queytuꞌ oj yun waon cꞌal pax tej swatxꞌilal bꞌey jix wakꞌcan jin tiꞌ wakꞌoni. 43 Jain jix wal yin jun conobꞌ tiꞌ, tol oj can yin cusiltaj txꞌotxꞌ, cꞌamxa ánima tam wal noꞌ noꞌ oj cancan sat, tol lalan yeyqꞌuey yul skꞌabꞌ ebꞌ Caldeo, jaꞌ titiꞌ oj meltzo pax ebꞌ ánima smanon txꞌotxꞌ junelxa. 44 Oj sman xꞌotxꞌ ebꞌ, catuꞌ oj swaꞌnen yuunal ebꞌ, yetoj sello cꞌal yetoj sfirma ebꞌ testigo yin. Queyton tuꞌ oj yun bꞌey yul conobꞌ Benjamín, cꞌal bꞌey yul-laj yaldeail yinlaj Jerusalén, cꞌal yul-laj conobꞌ yul yet Judá, bꞌey wonanlaj, cꞌal bꞌey acꞌal-laj, yetoj cꞌal bꞌey yul yet Négueb. Jain Jehová jin chi walaꞌ, tol oj wakꞌ chꞌibꞌ sbꞌisil ebꞌ jin conobꞌ tiꞌ junelxa, ẍi Dios.