Albꞌilcan Tzet Oj Yun Yeloc Jerusalén Junelxa
33
Jaꞌ yet ey jin tocꞌal oc preso jain Jeremías jin tiꞌ bꞌey sattaj eltoj snail bꞌey eyecꞌ ebꞌ steynemal palacio, jix kꞌanabꞌ Jehová ey jin junelxa, jix yalon jaxca tiꞌ: 2 Jain Jehová jin tiꞌ, jain jix jin waꞌne ey yich txꞌotxꞌ txꞌotxꞌ tiꞌ, watxꞌ jix yun cancan txꞌotxꞌ wu. Jain chi wal ey jaach: 3 Awte jin, oj jin takꞌwoj ey jaach, catuꞌ oj jin txꞌoxon jantaj tzetyetal tol eyxa smey yeocoj, tol qꞌueyubꞌtaj xacꞌal yili, tol man ja wotaj oj. 4 Jain Jehová je Diosal jin, ey wal jun tzet chin naꞌ yin sna ebꞌ a Jerusalén, yetoj cꞌal yin spalacio ebꞌ sreyal Judá, tol lalan yuchle eyoj, ey chꞌen chꞌen chi kꞌanle yin smuroal conobꞌ, yet watxꞌ cꞌam chi octej ebꞌ Caldeo yakꞌon jowal je yetoj. 5 Jaꞌ wan na tuꞌ, tol oj noel yu smimanil ebꞌ ánima oj jin makꞌ cam yu sjowal jin cꞌul tol eyxa smey yeocoj; yutol tuxa jix wiꞌel jin sat yin jun conobꞌ tiꞌ, yu cꞌal wal tol mimanxa spenail ebꞌ jix yaocoj. 6 Ey pax jun cꞌual oj wante ebꞌ, oj wakꞌon scawil ebꞌ junelxa, catuꞌ oj wakꞌon caey ecꞌ ebꞌ yin tzalacꞌulal, tol cꞌamxa tzet oj iꞌon ebꞌ. 7 Oj wiꞌon meltzotej ebꞌ a Judá, cꞌal ebꞌ a Israel junelxa bꞌey eyoc ebꞌ yin presowomal, catuꞌ oj jin caꞌ waꞌnen a sconobꞌ ebꞌ junelxa, jaxca taꞌ yeoc yet yalantoj. 8 Oj wiꞌel spenail ebꞌ. Oj wakꞌ lawoj spenail ebꞌ tuꞌ, yetoj cꞌal jantaj bꞌey pit jix yute sbꞌa ebꞌ ey jin. 9 Oj lawoj tuꞌ xin, caw oj tzalabꞌoj jin cꞌul yu Jerusalén tiꞌ. Jaꞌ yet oj yabꞌen masanil ebꞌ nacionlaj yu mimej tzetyetal oj wun yin jin conobꞌ tiꞌ, oj yal watxꞌ kꞌane ebꞌ ey jin cꞌal yakꞌon bꞌina jin bꞌi ebꞌ. Tuxa cꞌal oj qꞌueya scꞌul ebꞌ cꞌal sbꞌilwi ebꞌ yu xiwcꞌulal yet oj yilon ebꞌ tol eyxa smey oj yun wiꞌon a can sbꞌisil ebꞌ Israel tiꞌ, cꞌal jantaj jin watxꞌcꞌulal oj wakꞌ tet jin conobꞌ tiꞌ.10 Jix yalon pax Jehová jaxca tiꞌ: Jaex tiꞌ che yalaꞌ, tol jaꞌ jun tujan txꞌotxꞌ tiꞌ, tol cusiltaj txꞌotxꞌ xacꞌal yili, cꞌamxa ánima tam wal noꞌ noꞌ chi ecꞌ sat. Caxcꞌal mi queytuꞌ yeocoj, tol jaꞌ bꞌey scalleal Jerusalén cꞌal bꞌey conobꞌlaj yul yet Judá. 11 Jaxa oj yunne, tol oj abꞌle yoc bꞌit yet kꞌin, cꞌal bꞌit yet tzalacꞌulal junelxa, cꞌal bꞌit yet ebꞌ achꞌe cꞌal ebꞌ kꞌopo ix yet lalan snupi ebꞌ. Oj iꞌletej ofrenda yet alo yu diosalil bꞌey jin templo, catuꞌ oj abꞌle cꞌal pax yalon ebꞌ jaxca tiꞌ: Kalwej yu diosal tet Jehová Naj Yaaw yibꞌan masanil, yutol yel xacꞌal watxꞌ Naj, yutol jaꞌ scamcꞌulal ey cꞌal ecꞌ yin tobꞌalkꞌinal, ẍi ebꞌ, oj yalon ebꞌ. Jain Jehová jin chi walaꞌ, tol oj wakꞌ chꞌibꞌ sbꞌisil jun conobꞌ tiꞌ, yet watxꞌ oj yun pax junelxa jaxca yeoc ebꞌ yet yalantoj.
12 Jaꞌ Jehová chi alon jaxca tiꞌ: Jaꞌ bꞌey jun txꞌotxꞌ tol cusiltaj txꞌotxꞌ ye canoj, cꞌamxa ánima, cꞌamxa noꞌ noꞌ ey bꞌey; jaxa oj yunne, jaꞌ yinlaj wan conobꞌ tuꞌ, tol oj teynele low noꞌ meꞌ yu ebꞌ ilom meꞌ junelxa. 13 Jain Jehová jin chi walaꞌ, tol jaꞌ bꞌey conobꞌlaj cꞌal bꞌey txꞌotxꞌ wonanlaj cꞌal bꞌey acꞌal-laj, yetoj cꞌal bꞌey Négueb, cꞌal bꞌey txꞌotxꞌ yet Benjamín, yetoj cꞌal bꞌey aldealaj yinlaj Jerusalén, cꞌal yetoj bꞌey wanxa conobꞌlaj bꞌey yul yet Judá, oj il-le yin ebꞌ ilom meꞌ junelxa, catuꞌ oj abꞌle sbꞌison smeꞌ ebꞌ.
14 Jaꞌ Jehová chi alon jaxca tiꞌ: Oj apnoj scꞌual catuꞌ oj yunen jaxca bꞌey jix wakꞌcan jin tiꞌ wakꞌon jin yaxilal bꞌey conobꞌ Israel cꞌal bꞌey Judá. 15 Jaꞌ yet oj apnoj oc jun tiempoal tuꞌ, oj waoc junoj yicꞌaal David yin reyal; jaꞌ oj iꞌon a can sjichanil cꞌal swatxꞌilal bꞌey jun conobꞌ tiꞌ. 16 Jaꞌ yet tuꞌ, jaꞌ ebꞌ a Judá oj colchaoj; jaxa ebꞌ a Jerusalén, cꞌamxa cꞌal tzet oj iꞌon ebꞌ; queytuꞌ oj yun yakꞌle yij jun conobꞌ tiꞌ jaxca tiꞌ: Jaꞌ Jehová chi waꞌnen yeoc cu kꞌane yin sjichanil, ẍi ebꞌ, oj yalon ebꞌ. 17 Jain Jehová jin chi walaꞌ: Cꞌam bꞌakꞌin oj qꞌueyel ebꞌ yicꞌaal naj rey David, yutol oj oc cꞌal ebꞌ yin reyal bꞌey Israel. 18 Man oj qꞌuey cꞌal pax el ebꞌ yakꞌomal xaambꞌal yetoj cꞌal wanxa ebꞌ yicꞌaal Leví; jaꞌ ebꞌ tuꞌ oj akꞌon tzꞌaꞌ xaambꞌal ey jin. Yin junjun cꞌu oj yakꞌ tzꞌaꞌ ixim tiriw ebꞌ yin xaambꞌal cꞌal yakꞌon wanojxa xaambꞌal ebꞌ ey jin, ẍi Jehová.
19 Jix kꞌanabꞌ Jehová tet naj Jeremías, jix yalon jaxca tiꞌ: 20 Jain Jehová jin chi walaꞌ: Tol ey jun jin wa kꞌane jaxca yeoc stiempoal cꞌualil cꞌal akꞌbꞌalil. Cꞌam chi skeꞌ qꞌuexchatoj jun wa kꞌane tuꞌ. 21 Queyton tuꞌ yeoc jun jin wa kꞌane tuꞌ, cꞌam chi skeꞌ tol chi qꞌueyel jin wa kꞌane jix wakꞌcan yetoj naj jin chejabꞌ David, tol ey cꞌal ebꞌ yicꞌaal oj yakꞌ yaawil bꞌey spalacio. Tam wal chi skeꞌ sqꞌueyel jin wa kꞌane yetoj ebꞌ yicꞌaal Leví yin jin yakꞌon servil ebꞌ yin yakꞌomal xaambꞌal. 22 Jaꞌ ebꞌ yicꞌaal naj jin chejabꞌ David, cꞌal yicꞌaal ebꞌ wakꞌomal servil xol ebꞌ yicꞌaal Leví, jaꞌ ebꞌ tuꞌ oj wakꞌ chꞌibꞌ sbꞌisil ebꞌ jaxca sbꞌisil weycan, ma jaxca yarenail stiꞌ jaꞌ mar, tol cꞌam mactxequel chi skeꞌ bꞌisoni, ẍi Jehová.
23 Jix kꞌanabꞌ Jehová tet naj Jeremías; jix yalon jaxca tiꞌ: 24 ¿Tumi cꞌam chi naꞌcha el ja wu tzet chi yal ebꞌ ánima tiꞌ, tol jix wintajne can el caabꞌ tujan ebꞌ sicꞌbꞌil el wu, jaꞌton Israel yetoj Judá? Yu jun tuꞌ, yuxan cꞌamxa yeloc apnoj ebꞌ jin conobꞌ tuꞌ tet ebꞌ, toj wal nación to yeoc yul sat ebꞌ. 25 Jain Jehová jin tiꞌ, jix jin waꞌne jun jin wa kꞌane jaxca yeoc cꞌualil yetoj akꞌbꞌalil, chi wiloni tzet chi yun bꞌey satcan, cꞌal sat yul yibꞌankꞌinal tiꞌ, catuꞌ cꞌam chi qꞌuexchatoj jun jin wa kꞌane tuꞌ. 26 Tam wal ey bꞌakꞌin oj qꞌuexchatoj jin wa kꞌane yetoj ebꞌ yicꞌaal Jacob, cꞌal yetoj ebꞌ yicꞌaal naj jin chejabꞌ David. Sowalil tol oj jin sicꞌ eltej junoj yicꞌaal naj David tuꞌ, tol oj yakꞌ yaawil yibꞌan ebꞌ yicꞌaal Abraham, Isaac cꞌal Jacob. Yutol caw wal chi okꞌ jin cꞌul yin ebꞌ, yuxan oj wiꞌa can ebꞌ junelxa, ẍi Jehová.