Jaꞌ Tzet Jix Al-le Tet Naj Rey Sedequías
34
Jaꞌ naj Nabucodonosor sreyal Babilonia, jix tit yetoj masanil ebꞌ soldado cꞌal masanil wanxa conobꞌ eyoc yalan ẍejbꞌanil. Jix yakꞌ jowal ebꞌ yin Jerusalén, cꞌal yin wanxa conobꞌlaj ey bꞌey scawilal tuꞌ. Jaꞌ yet tuꞌ jix kꞌanabꞌ Jehová tet naj Jeremías, jix yalon jaxca tiꞌ: 2 Jain Jehová je Diosal jin, chi wal ey jaach, asiꞌ al tet naj Sedequías sreyal Judá: Jaxca wal tiꞌ yalon Jehová: Tol oj waoc jun conobꞌ tiꞌ yul skꞌabꞌ naj sreyal Babilonia, oj yaon oc skꞌakꞌal jun conobꞌ tiꞌ. 3 Jaach tiꞌ, manxa oj skeꞌ ja colon ja bꞌa, oj jaach mitxꞌle yu ebꞌ, oj jaach yaon oc ebꞌ yul skꞌabꞌ naj rey Nabucodonosor; jaꞌ yet oj ja wilon oc yin naj, oj kꞌanabꞌ naj ey jaach, catuꞌ oj jaach iꞌletoj bꞌey Babilonia. 4 Jaxa jaach Sedequías, abꞌ tzet oj wal jain Jehová jin tiꞌ: Man oj jaach makꞌle cam yu chꞌen espada, 5 tol tzalacꞌulal cꞌal oj yun ja cami. Jain Jehová jin chi wakꞌcan jin tiꞌ, tol jaxca jix yun yakꞌon tzꞌaꞌ incienso ebꞌ ánima yet jix mujle ebꞌ ja mam icham, jaꞌton ebꞌ ocnaj yin reyal yet cꞌamto chach oc yin ja wopiso tiꞌ, queytuꞌ oj yun yakꞌon tzꞌaꞌ incienso ebꞌ yet oj jaach mujleoj. Oj okꞌ ebꞌ ja wu, oj yalon ebꞌ jaxca tiꞌ: ¡Ay, caw jix cam naj cu reyal! ẍi xacꞌal ebꞌ, ẍi Jehová.6 Jain Jeremías jin, ẍejabꞌ jin Dios, jix wal masanil wan tiꞌ tet naj rey Sedequías bꞌey Jerusalén. 7 Yajbꞌan tuꞌ, ja ebꞌ soldado yet Babilonia eyxa oc ebꞌ yakꞌon jowal yin Jerusalén, yin Laquis cꞌal yin Azecá. Jaꞌ oxebꞌ conobꞌ tiꞌ watxꞌ yeoc smuroal yul yet Judá, asanxane wan conobꞌ tiꞌ cꞌamto chi eyqꞌueyi.
Jun Wa Kꞌane Yu Sjajcha El Ebꞌ Yet Conobꞌ Eyoc Yin Yakꞌomaloj Servilal
8 Jix lawi tuꞌ xin, jix kꞌanabꞌ pax Jehová tet naj Jeremías, yet jix lawi yakꞌon jun swa kꞌane naj Sedequías yetoj ebꞌ caan bꞌey Jerusalén, yet chi jajcha el ebꞌ eyoc yin yakꞌomaloj servil. 9 Jaꞌ yu jun wa kꞌane tiꞌ, tol jaꞌ masanil ebꞌ yet conobꞌ eyoc yakꞌomaloj servilal, jaꞌ ebꞌ chi jajcha eloj, caxcꞌal winaj, caxcꞌal ix, yet watxꞌ cꞌamxa junoj ebꞌ yet conobꞌ ebꞌ, chi oc can yin yakꞌomaloj servilal. 10 Masanil ebꞌ yaaw, cꞌal yetoj masanil ebꞌ conobꞌ, jix ẍaꞌ scꞌul jun wa kꞌane tuꞌ ebꞌ; queytuꞌ jix yun sjajon el ebꞌ eyoc yakꞌomaloj servil ebꞌ. Ma xa akꞌle pural ebꞌ tuꞌ yin yakꞌle servil ebꞌ yu ebꞌ. 11 Jix lawi tuꞌ, jix snaꞌon pax sbꞌa scꞌul ebꞌ yu jix jajcha el ebꞌ yakꞌomal servil ebꞌ tuꞌ, yuxan jix akꞌle pax pural ebꞌ yakꞌomal servil tuꞌ yin yoc pax ebꞌ akꞌo servilal tet ebꞌ junelxa.
12 Yu jun tuꞌ, jix yalon pax Jehová tet Jeremías, jaxca tiꞌ: 13 Jain Jehová je Diosal jin, jix wakꞌ jun jin wa kꞌane yetoj ebꞌ je mam icham, yet jix wiꞌon eltej ebꞌ bꞌey txꞌotxꞌ Egipto, bꞌey eyoc ebꞌ yin yakꞌomaloj servilal. Jaꞌ yet tuꞌ jix walaꞌ, 14 tol yin jujebꞌ abꞌil catuꞌ chi jajcha el ebꞌ eyoc yin yakꞌomaloj servil, jaꞌton ebꞌ yet Israelal, ebꞌ jix xon sbꞌa tet ebꞌ, tuxa jix akꞌle servil ebꞌ yu ebꞌ yin wajebꞌoj abꞌil. Jaxa pax ebꞌ je mam icham tuꞌ, ma ẍaꞌ yabꞌ ebꞌ tzet jix walaꞌ, tam wal jix sjije ebꞌ. 15 Jaxca tuꞌ jix je yute pax je bꞌa jaex tiꞌ, asan xin, jix je qꞌuex je bꞌeybꞌal, yutol lalanxa je yunen tzetyetal chi ẍaꞌ jin cꞌul, jaꞌton yin je jajon el ebꞌ je yet conobꞌ eyoc je yakꞌomaloj servil. Jix je yakꞌon je tiꞌ yin jun wa kꞌane jix je waꞌne jin sattaj, jaꞌton bꞌey yul templo tol wet yeocoj. 16 Jix lawi tuꞌ, jix je qꞌuexon pax je bꞌeybꞌal junelxa, jix jin je yintajne pax eloj. Jix je yakꞌon pax pural ebꞌ je yakꞌomal servil tuꞌ yin je yakꞌle servil yu ebꞌ junelxa, caxcꞌal jix jajchataꞌle el ebꞌ je yu. 17 Yu tuꞌ xin, jain Jehová jin chi walaꞌ: Jaex tiꞌ, ma je jije tzet chi walaꞌ; ilaꞌ tol ma je jajel ebꞌ je yet conobꞌ. Yu jun tuꞌ, jain Jehová jin chi walaꞌ tol oj watej jowal, wail, cꞌal syaꞌilal je yibꞌan; masanil nacionlaj caw oj xiwa ebꞌ yet oj yabꞌen ebꞌ tzet oj jex wute. 18-19 Jaꞌ ebꞌ yaaw yeoc bꞌey Judá, cꞌal bꞌey Jerusalén, yetoj cꞌal ebꞌ yakꞌomal servil yeoc bꞌey palacio, yetoj ebꞌ yakꞌomal xaambꞌal, cꞌal yetoj masanil ánima a conobꞌ yeoc tituꞌ, jix yakꞌ can stiꞌ ebꞌ yin jun wa kꞌane jin sattaj. Caabꞌ tujan jix yute spoꞌon ey jun noꞌ wacax ebꞌ, jix ecꞌtoj ebꞌ snan xol caabꞌ tujan noꞌ chiꞌbꞌe tuꞌ. Yin eymanil jix yintajne el jun jin wa kꞌane ebꞌ bꞌey jix yakꞌ can stiꞌ ebꞌ tuꞌ. Yuxan queytuꞌ oj wute ebꞌ, jaxca jix yute noꞌ wacax ebꞌ tuꞌ. 20 Jain oj wakꞌ eyqꞌuey ebꞌ yul skꞌabꞌ scajat ebꞌ tuꞌ, tol oj makꞌle cam ebꞌ yu ebꞌ, jaxa noꞌ miij, cꞌal noꞌ chiꞌwawom noꞌ oj chiꞌontoj smimanil ebꞌ. 21 Jain oj wakꞌ cꞌal yunne, yuxan jaꞌ naj Sedequías sreyal Judá cꞌal yetoj ebꞌ eyoc yin yaawilal yetoj, oj eyqꞌuey ebꞌ yul skꞌabꞌ ebꞌ scajat ebꞌ tuꞌ, ebꞌ chi yoche chi akꞌon cam ebꞌ. Oj eyqꞌuey ebꞌ yul skꞌabꞌ ebꞌ soldado yet Babilonia, caxcꞌal mi tol jajbꞌil el ebꞌ jayebꞌoj cꞌual yu ebꞌ. 22 Jain Jehová jin chi walaꞌ, tol oj wakꞌ jul pax ebꞌ yin jun conobꞌ tiꞌ junelxa, catuꞌ oj yakꞌon jowal ebꞌ yin. Oj eyqꞌuey yu ebꞌ, oj snuson can tzꞌaꞌ ebꞌ. Catuꞌ oj wakꞌon yunne, tol jaꞌ wanxa conobꞌlaj bꞌey yul yet Judá, oj cancan yin cusiltaj txꞌotxꞌ, cꞌamxa junoj ánima oj caey bꞌey, ẍi Jehová.