Naj Jeremías Yetoj Ebꞌ Yicꞌaal Naj Recab
35
Jaꞌ yet eyoc naj Joaquim scꞌaal Josías reyal bꞌey Judá, jaꞌ yet tuꞌ jix kꞌanabꞌ Jehová ey jin, jix yalon jaxca tiꞌ: 2 Asiꞌ bꞌey eyecꞌ ebꞌ yicꞌaal naj Recab, catuꞌ chach kꞌanabꞌ yetoj ebꞌ. Iꞌtoj ebꞌ bꞌey yul junoj cuarto bꞌey jin templo, catuꞌ cha wakꞌon vino tet ebꞌ, ẍi Dios ey jin. 3 Yuxan jix too jin seyecꞌ naj Jaazanías (scꞌaal junxa chi yij Jeremías, yitxiquin Habasinías.) Jix wiꞌtoj yetoj ebꞌ yuẍtaj, cꞌal yetoj ebꞌ yuninal, yetoj cꞌal pax masanil ebꞌ yicꞌaal Recab caan tituꞌ. 4 Jix wiꞌtoj ebꞌ bꞌey templo, jaꞌton bꞌey jun scuarto ebꞌ scꞌaal Hanán, scꞌaal Igdalías, jaꞌton jun ey yeloc apnoj Dios yul sat. Jaꞌ jun cuarto tuꞌ, junne ey yetoj yet ebꞌ yaaw yeoc bꞌey templo tuꞌ, yibꞌan scuarto naj Maaseías scꞌaal Salum, jaꞌton jun tuꞌ syaawil ebꞌ steynemal templo. 5 Jix wakꞌ ẍalual cꞌal vasoal vino tet ebꞌ, jix waloni: Ucꞌwej niꞌoj vino tiꞌ, jin chi tet ebꞌ.6 Jix takꞌwi ebꞌ, jix yalon ebꞌ jaxca tiꞌ: Jaon tiꞌ, cꞌam chi kucꞌ vino, yutol jaꞌ naj Jonadab scꞌaal Recab, jaꞌton cu mam icham jon, jaꞌ jix akꞌon sowalil tol cꞌam chi kucꞌ vino, tam wal jaon yicꞌaal jon tiꞌ oj skeꞌ kuqꞌuen vino. 7 Jix yakꞌ cꞌal pax sowalil, tol cꞌam chi cu waꞌne cu na, tam wal kawon junoj tujan awo, tam wal kawon an uva. Jix yal ey jon tol asan cꞌal yul-laj kꞌap na chi cu caey ecꞌoj, quey cꞌal tuꞌ oj yun cu caey ecꞌ mimanoj tiempoal bꞌey jun txꞌotxꞌ bꞌey tucꞌal chi cu ecꞌabꞌtoj tiꞌ. 8 Jaon tiꞌ, lalan cu jijen tzetyetal jix yal can naj cu mam icham Jonadab tuꞌ jon, yuxan cꞌam cꞌal bꞌey chi kucꞌ vino jon, tam wal ebꞌ ix kistil jon, tam wal ebꞌ kuninal chi uqꞌueni. 9 Cꞌam cꞌal cu na chi cu waꞌne jon, cꞌam uva chi kawaꞌ, tam wal ey cu txꞌotxꞌ bꞌey chi skeꞌ kawon cu awo jon. 10 Asan cꞌal yul-laj kꞌap na chi cu caey ecꞌ jon, lalan wal cu jijen jaxca jix yun yalon can cu mam icham Jonadab tuꞌ jon. 11 Jaxa wal yet jix jul Nabucodonosor naj sreyal Babilonia yakꞌon jowal yin cu conobꞌ tiꞌ jon, jix cu ela jon, jix cu naꞌbꞌalnen el cu tit can bꞌey Jerusalén tiꞌ, yutol jix cu ela tet ebꞌ soldado a Caldeo cꞌal tet ebꞌ soldado a Siria. Yu jun tuꞌ, yuxan caan jon ecꞌ bꞌey Jerusalén tiꞌ, ẍi ebꞌ.
12 Jix lawi tuꞌ xin, jix kꞌanabꞌ pax Jehová tet naj Jeremías, jix yalon jaxca tiꞌ: 13 Jain Jehová, yaaw jin yin masanil, sDiosal jin Israel, jain chi walaꞌ tol chi too ja wal tet masanil ebꞌ ánima bꞌey Judá cꞌal bꞌey Jerusalén. Jain Jehová jin chi walaꞌ: ¿Tumi cꞌam chi skeꞌ scuyon wan cuybꞌanile ebꞌ cꞌal yoc ebꞌ yin jijemal tzet chi yal jin chejbꞌanil? 14 Ilaꞌ ebꞌ yicꞌaal naj Jonadab, scꞌaal Recab, chi sjije ebꞌ tzet jix yal smam icham, tol cꞌam chi yucꞌ vino ebꞌ. Masantaꞌcꞌal tinaniꞌ, cꞌam cꞌal chi yucꞌ ebꞌ, yutol caw wal chi sjije ebꞌ tzet jix yal smam icham ebꞌ tuꞌ. Jain tiꞌ, caw ecꞌal el jix wakꞌ jin chejbꞌanil ey jex, tutun wal ma je jije niꞌoj. 15 Caw ecꞌal ebꞌ jin chejabꞌ jix jin chejtoj je xol yet chi yalon ebꞌ ey jex tol che bꞌejcan je pena bꞌeybꞌal cꞌal je pena naꞌbꞌal. Cꞌam chex too yintaj wan comon dios, tam wal chex oc eyilal tet, yet watxꞌ chex caey cꞌal ecꞌ bꞌey txꞌotxꞌ txꞌotxꞌ jix wakꞌ ey jex, cꞌal tet ebꞌ je mam icham. Jaex tiꞌ, junelne wal ma je chaꞌ je yabꞌe, tam wal che jije. 16 Jaꞌ ebꞌ yicꞌaal Jonadab scꞌaal Recab tuꞌ, caw chi sjije ebꞌ tzet jix yal smam icham; jal jex xin, junelne cꞌam che jije tzet chi walaꞌ. 17 Yu jun tuꞌ, yuxan jain Jehová, je Diosal jin, chi walaꞌ: Oj wakꞌ jul wan syaꞌilal albꞌilxa can wu je yibꞌan, masanil jex caan bꞌey Judá cꞌal bꞌey Jerusalén. Yutol jix jex jin tenchane, ma pax je jije. Jix jin awi ey jex, ma jex takꞌwoj ey jin, ẍi Jehová tet naj Jeremías.
18 Jix too yalon naj Jeremías tet ebꞌ yicꞌaal Recab jaxca tiꞌ: Jaꞌ Jehová Naj ey yipalil, Naj cu Diosal, jaon Israel jon tiꞌ, jaꞌ chi aloni: Yutol che jije cꞌal tzet jix yal je mam icham tuꞌ, 19 jain Jehová, tol ey wipalil, sDiosal jin Israel, jain chi walaꞌ: Tol cꞌam bꞌakꞌin oj qꞌueyel ebꞌ yicꞌaal Jonadab yin jin yakꞌon servil, ẍi Jehová, ẍi naj Jeremías.