4 Jix awtele naj Baruc, scꞌaal Nerías yu naj Jeremías tuꞌ. Jix oc ian Jeremías yalon masanil tzetyetal jix yal Jehová, jaxa naj Baruc jix tzꞌibꞌen yin jun an juun. 5 Catuꞌ jix yalon jaxca tiꞌ: Il wal ocoj tzet weocoj; jaxca tol chin tenle oc tucan jin too bꞌey templo. 6 Yu tuꞌ xin, jaꞌ yet oj jul scꞌual yet chi kijlen nocha cu bꞌa junelxa bꞌey templo, jaꞌ yet tuꞌ oj ja wawte a an juun jix wakꞌ ja tzꞌibꞌe, yet watxꞌ jaꞌ masanil ebꞌ conobꞌ tiꞌ, yetoj cꞌal masanil ebꞌ ánima caan yul yet Judá chi jul titiꞌ, oj yabꞌoc ebꞌ tzet chi yal skꞌane Jehová, 7 tala cꞌuxan oj txaloj ebꞌ ánima tiꞌ tet Dios, catuꞌ chi sbꞌejoncan spena bꞌeybꞌal ebꞌ. Yutol caw yel xacꞌal ey smey sjowal scꞌul Jehová tol jix snaꞌ yaon oc yibꞌan jun conobꞌ tiꞌ, ẍi naj Jeremías. 8 Catuꞌ jix yunen naj Baruc masanil tzetyetal jix yal naj Jeremías tuꞌ. Jix too naj bꞌey templo, catuꞌ jix yawten a skꞌane Jehová tzꞌibꞌebꞌil oc yin an juun tuꞌ.

9 Jaꞌ yet bꞌalonebꞌ xꞌaaw, yet sjoꞌ abꞌil xa yoc naj Joaquim, scꞌaal Josías yin reyal bꞌey Judá, catuꞌ jix snaꞌoni tol jaꞌ ebꞌ ánima caan bꞌey Jerusalén, yetoj cꞌal ebꞌ jix tit bꞌey wanxa conobꞌlaj yul yet Judá, tol chi yijle nocha sbꞌa ebꞌ masanil sattaj Jehová. 10 Jix yawte an juun naj Baruc jantaj tzet tzꞌibꞌebꞌil ey yul an juun tuꞌ, yet watxꞌ chi yabꞌ masanil ebꞌ ánima. Jatuꞌ jix yawte a bꞌey sattaj eltoj stemplo Dios, bꞌey yin scꞌul jun acꞌ puerta bꞌey ey scuarto naj Gemarías, naj sat tzꞌibꞌlom.

11 Jaꞌ naj Micaías, scꞌaal Gemarías, yitxiquin Safán, jix yabꞌ masanil skꞌane Jehová jix yawte Baruc yul an juun tuꞌ. 12 Catuꞌ jix too bꞌey spalacio naj rey, bꞌey scuarto naj sat tzꞌibꞌlom, bꞌey yaman ecꞌ ebꞌ naj mimej yopiso: Jaꞌton Elisamá naj sat tzꞌibꞌlom, Delaías scꞌaal Semaías; Elnatán, scꞌaal Acbor; Gemarías scꞌaal Safán; Sedequías, scꞌaal Hananías, cꞌal yetoj wanxa ebꞌ eyoc yin yopiso. 13 Jix yalon naj Micaías masanil tzet jix yabꞌ yalon naj Baruc yet jix yawten a an juun sattaj ebꞌ conobꞌ tuꞌ. 14 Jaꞌ ebꞌ naj yaaw tuꞌ jix chejontoj naj Jehudí, jaꞌton scꞌaal Netanías, yitxiquin Selemías yicꞌaal Cus, yet chi yal tet naj Baruc tol chi iꞌletej an juun jix awtele a sattaj ebꞌ conobꞌ tuꞌ. Jix yiꞌontoj an juun tuꞌ naj Baruc sattaj ebꞌ. 15 Jix yalon ebꞌ jaxca tiꞌ:

—Eyan chotanoj, catuꞌ cha wawten an juun tuꞌ kabꞌe, ẍi ebꞌ tet naj.

Catuꞌ jix yawten a an juun naj Baruc tuꞌ. 16 Jaꞌ yet jix yabꞌen ebꞌ tuꞌ, jun wal txolan jix xiwa ebꞌ, jix meltzo oc tꞌanan ebꞌ yin junjun, catuꞌ jix yalon ebꞌ jaxca tiꞌ:

—Sowalil oj kal masanil wan tiꞌ tet naj rey, ẍi ebꞌ.

17 Jix yalon ebꞌ tet naj Baruc jaxca tiꞌ:

—Al ey jon, tzet jix ja wute ja tzꞌibꞌen masanil wan kꞌane tiꞌ. ¿Jam wal naj Jeremías jix alon ey jaach? ẍi ebꞌ.

18 Jix takꞌwi naj Baruc tet ebꞌ jaxca tiꞌ:

—Jaꞌton wal caw naj Jeremías jix alon ey jin, catuꞌ jix jin tzꞌibꞌen yetoj tinta yin an juun tiꞌ, ẍi naj tet ebꞌ.

19 Catuꞌ jix yalon ebꞌ tet naj jaxca tiꞌ:

—¡Chi too ja cꞌubꞌa el ja bꞌa yetoj naj Jeremías, cꞌam ojabꞌ mac chi otajnen el bꞌeytuꞌ chex apni ocoj! ẍi ebꞌ.

20 Jix yakꞌon can an juun ebꞌ naj ey yopiso tuꞌ bꞌey scuarto naj Elisamá, jaꞌton naj sat tzꞌibꞌlom, catuꞌ jix too ebꞌ yalon masanil wan tiꞌ tet naj rey bꞌey sattaj eltoj despacho. 21 Catuꞌ jix chejletoj naj Jehudí yu naj rey yet chi too yiꞌontej an juun ey can bꞌey scuarto naj Elisamá. Jaꞌ yet jix jul naj yetoj an juun tuꞌ, catuꞌ jix yawten a sattaj naj rey cꞌal sattaj masanil ebꞌ ey yopiso tuꞌ, joyan ecꞌ ebꞌ yabꞌeni. 22 Bꞌalonebꞌxa xꞌaaw yet tuꞌ, yuxan eyecꞌ naj rey bꞌey scuarto chi skꞌan yet stiempoal siic, chotan ey naj stiꞌ jun kꞌakꞌ eeytoj stzakꞌakꞌ yul sneetal yu naj. 23 Jaꞌ yet jix lawi yawten Jehudí oxebꞌoj ma canebꞌoj tujan yul an juun tuꞌ, catuꞌ jix skocꞌ kꞌupnentoj naj rey yetoj jun chꞌen nawax chi skꞌan ebꞌ sat tzꞌibꞌlom, catuꞌ jix yaon octoj naj xol kꞌakꞌ tuꞌ. Queytuꞌ jix yun yakꞌon tzꞌaꞌ masanil an juun tuꞌ naj. 24 Caxcꞌal jix yabꞌ naj rey, cꞌal ebꞌ eyecꞌ yetoj tuꞌ yu tzet jix yal an juun tuꞌ, ma xiwa niꞌoj ebꞌ tam wal jix xꞌoxel ebꞌ ta tol jow yalon an chi yabꞌ ebꞌ. 25 Jaꞌ naj Elnatán, Delaías cꞌal Gemarías jix oc tean ebꞌ yin naj rey yet cꞌam chi nusle tzꞌaꞌ an juun tuꞌ, ma xacꞌal ẍaꞌ yabꞌ tzet jix yal ebꞌ. 26 Jix yalon ebꞌ tet naj Jerahmeel yicꞌaal ebꞌ rey, cꞌal tet naj Seraías scꞌaal Azriel, cꞌal tet naj Selemías scꞌaal Abdeel, yet chi kꞌal-letej naj Jeremías yetoj naj sat tzꞌibꞌlom, jaꞌton naj Baruc. Jaꞌ Jehová jix cꞌubꞌan el ebꞌ.

27 Jaꞌ yet jix nusle tzꞌaꞌ an juun tuꞌ yu naj rey, jaꞌton an bꞌey tzꞌibꞌebꞌil ey wan kꞌane jix yal naj Jeremías tet Baruc, jix kꞌanabꞌ pax Jehová tet naj Jeremías, jix yalon jaxca tiꞌ: 28 Iꞌtej junojxa an juun catuꞌ cha tzꞌibꞌen wan kꞌane jix ja tzꞌibꞌe yul an juun yet sbꞌabꞌelal tuꞌ, an jix yakꞌ tzꞌaꞌ naj Joaquim sreyal Judá. 29 Al cꞌal pax wan kꞌane tiꞌ tet naj Joaquim: Jaꞌ Jehová chi alon jaxca tiꞌ: Jaach tiꞌ, tol jix ja wakꞌ tzꞌaꞌ an juun, catuꞌ jix ja tzuon naj Jeremías, yutol jix stzꞌibꞌe yul an juun tuꞌ, tol oj jul naj sreyal Babilonia jul yakꞌon lawoj jun nación tiꞌ, catuꞌ cꞌamxa junoj ánima oj canoj, tam wal junoj noꞌ noꞌ. 30 Yu jun tuꞌ xin, jain Jehová jin chi wal ey jaach, jaach Joaquim sreyal Judá, tol cꞌam cꞌal junoj ebꞌ ja wicꞌaal oj yakꞌ yaawil bꞌey sdespacho naj rey David. Jaꞌ ja mimanil oj elcantoj telan xol yajan cꞌu, cꞌal xol siic yet akꞌbꞌalil. 31 Jaach tiꞌ, yetoj cꞌal ebꞌ ja wicꞌaal cꞌal ebꞌ eyoc yopiso ja wetoj, oj waoc syaꞌilal je yibꞌan yu je penail. Oj eyqꞌuey yibꞌan Jerusalén, cꞌal yibꞌan Judá wan syaꞌilal jix wal can el tiꞌ, jaꞌton wan kꞌane ma je chaꞌ je yabꞌe, ẍi Jehová, ja chi.

32 Jix lawi tuꞌ xin, jix yiꞌon a naj Jeremías junxa an juun chulbꞌil eyoj, catuꞌ jix yakꞌon tet Baruc, naj sat tzꞌibꞌlom. Jaꞌ jix tzꞌibꞌen masanil tzet jix yal naj Jeremías tuꞌ, chi yal yeloc apnoj, jaꞌton wan kꞌane tzꞌibꞌebꞌil ey yul an juun jix yakꞌ tzꞌaꞌ naj rey Joaquim. Eyto cꞌal stzꞌajil tzet jix yal naj Jeremías jix tzꞌibꞌelecanoj.