3 Jaꞌ naj rey Sedequías tuꞌ, jix ẍejtoj Jucal scꞌaal Selemías yetoj naj yakꞌomal xaambꞌal chi yij Sofonías, scꞌaal Maaseías, yet chi too il-le Jeremías jun ẍejabꞌ Dios, catuꞌ chi yalon ebꞌ tet: Txalan tet Jehová cu Diosal ku jon, ẍi ebꞌ tet naj. 4 Jaꞌ yet tuꞌ cꞌamto chi ale oc naj Jeremías yul preso, yuxan chi skeꞌ cꞌal yecꞌabꞌ naj xol conobꞌ. 5 Jacꞌalaꞌ yet tuꞌ, jix tit ebꞌ soldado naj Faraón bꞌey conobꞌ Egipto. Jaꞌ yet jix yabꞌentej skꞌumal ebꞌ a Babilonia joyan ecꞌ yinlaj Jerusalén tuꞌ, jix el ebꞌ tituꞌ.

6 Jix kꞌanabꞌ Jehová tet naj Jeremías, jix yalon cꞌal tet ebꞌ chejbꞌiltoj tuꞌ jaxca tiꞌ: 7 Alwej tet naj sreyal Judá, jun jix jex chejontej jul je kꞌanle ey jin, tol jaꞌ ebꞌ soldado naj sreyal Egipto jix tit colwa je yetoj yaloni, tuxa jix meltzo ebꞌ bꞌey Egipto. 8 Yu jun tuꞌ, oj meltzo pax oc ebꞌ a Babilonia yin Jerusalén tiꞌ junelxa; oj eyqꞌuey jun conobꞌ tiꞌ yu ebꞌ, catuꞌ oj yaon oc skꞌakꞌal ebꞌ. 9 Jaxca tiꞌ yalon Jehová: Cꞌam ojabꞌ che yet kꞌanene je bꞌa, catuꞌ che yaloni tol jix el ebꞌ soldado a Babilonia cu xol, man ojabꞌ je chioj. Man jaxca oj tuꞌ oj yunne. 10 Caxcꞌal mi oj skeꞌ je yakꞌon eyqꞌuey ebꞌ soldado lalan yakꞌon jowal je yin tuꞌ, asanxane mi ebꞌ yasinajtoj oj cancan bꞌey bꞌulan ey ebꞌ tuꞌ, jaxa ebꞌ oj a waanoj, catuꞌ oj yakꞌon tzꞌaꞌ je conobꞌ ebꞌ tiꞌ, ẍi Jehová, jin chi tet ebꞌ jain Jeremías jin tiꞌ.

11 Jaꞌ yet jix el ebꞌ soldado Babilonia bꞌey Jerusalén tuꞌ, yutol jix yabꞌ ebꞌ tol lalan sjul ebꞌ soldado naj sreyal Egipto, 12 lalan yeltoj naj Jeremías bꞌey yul conobꞌ tuꞌ, yet chi too ẍaꞌ smajul txꞌotxꞌ yetoj ebꞌ yican bꞌey txꞌotxꞌ yul yet Benjamín yaloni. 13 Jaꞌ yet jix apni oc bꞌey spuertail yet txꞌotxꞌ Benjamín tuꞌ, ey jun winaj chi yij Irías scꞌaal Selemías, yitxiquin Hananías, tol yaawilal ebꞌ chi teynem puerta tuꞌ yeocoj. Jaꞌ jun tuꞌ jix mitxꞌon Jeremías, jix yalon jaxca tiꞌ:

—¡Oj jaach oc yetoj ebꞌ a Babilonia tuꞌ! ẍi naj.

14 Jix takꞌwi naj Jeremías jaxca tiꞌ:

—¡Cꞌamaj, man oj jin oc yetoj ebꞌ a Babilonia tuꞌ! ẍi naj.

Ma cꞌal ẍaꞌ yabꞌ naj Irías tuꞌ; jaꞌ tiꞌ yet, tol jix iꞌletoj naj Jeremías yu naj sattaj ebꞌ yaaw. 15 Jix tit sjowal ebꞌ tuꞌ yin naj Jeremías, jix yakꞌon jun chejbꞌanile ebꞌ tol chi makꞌlei, catuꞌ jix too yaon octoj ebꞌ yul preso bꞌey sna naj Jonatán, naj sat tzꞌibꞌlom. Jaꞌ jun na tuꞌ jix oc jaxca presoal yu ebꞌ. 16 Queytuꞌ jix yun stoo naj Jeremías yul preso, jix ale octoj naj yul jun jolan. Caw naatil jix maji oc naj tituꞌ.

17 Jaꞌ naj rey Sedequías jix akꞌon jun chejbꞌanile, tol chi iꞌletoj naj Jeremías bꞌey spalacio. Jaꞌ yet jix apni oc naj Jeremías sattaj naj rey tuꞌ, catuꞌ jix skꞌanlen el tet yin ewantajil jaxca tiꞌ:

—¿Ey mi junoj skꞌane Jehová? ẍi tet naj.

Jix takꞌwi naj Jeremías jaxca tiꞌ:

—Ey toni. Queywal tiꞌ yoc jaxca tiꞌ, jaach rey; oj jaach eyqꞌuey yul skꞌabꞌ naj sreyal Babilonia, ẍi Naj.

18 Jaꞌ yet jun txolan tuꞌ jix skꞌanle naj Jeremías tet naj rey Sedequías jaxca tiꞌ:

—¿Tzet wal yetal pena jix wun ja win, jaach rey, cꞌal yin ebꞌ ja wet yaawil, cꞌal yin ebꞌ conobꞌ, yuxan jix jin ja waoctoj yul preso? 19 ¿Tzet jix yun yeloc apnoj skꞌane wan ebꞌ chi yalon sbꞌa ẍejabꞌoj Dios, ebꞌ jix aloni tol man oj oc naj sreyal Babilonia yakꞌon jowal yin jun conobꞌ tiꞌ, cꞌal kin jaon tiꞌ? 20 Jaach rey, abꞌ wal tzet oj wal tinaniꞌ, ey jun tzetyetal oj jin kꞌan ey jaach: Tol cꞌam ojabꞌ chin ja chaꞌtoj junelxa bꞌey sna naj Jonatán, naj sat tzꞌibꞌlom, jaxa tala chi yunne, jaꞌ tituꞌ chin cami.

21 Yu jun tuꞌ xin, jix yal naj Sedequías tol jaꞌ tituꞌ chi can naj Jeremías bꞌey sattaj eltoj bꞌey eyecꞌ ebꞌ steynemal spalacio naj rey, catuꞌ junjun cꞌal cꞌu chi akꞌle junjunoj span naj chi manle tet ebꞌ waꞌnem pan. Quey cꞌal tuꞌ jix yunne, yajbꞌan eyto ixim pan bꞌey yul conobꞌ tuꞌ, yuxan jix cancan naj Jeremías bꞌey sattaj eltoj snail bꞌey ey ebꞌ chi teynen palacio tuꞌ.