Jix Ale Can Eytoj Naj Jeremías Yul Jun Jolan
38
Jaꞌ naj Sefatías scꞌaal Matán, yetoj Guedalías scꞌaal Pashur, cꞌal Jucal scꞌaal Selemías, cꞌal Pashur scꞌaal Malquías, jaꞌ ebꞌ tuꞌ jix abꞌen tzet jix yun skꞌanabꞌ naj Jeremías sattaj ebꞌ conobꞌ: 2 Bꞌey chi yal Jehová jaxca tiꞌ: Jaꞌ mac chi cancan yul conobꞌ tiꞌ, oj cam yu jowal, yu wail, ma yu yaꞌbꞌil. Jal mac chi el xin, catuꞌ chi yaon oc sbꞌa yul skꞌabꞌ ebꞌ a Babilonia, jaꞌ ebꞌ tuꞌ oj colcha el ebꞌ. 3 Oj waoc jun conobꞌ tiꞌ yul skꞌabꞌ ebꞌ soldado naj sreyal Babilonia. Jaꞌ ebꞌ tuꞌ oj akꞌon eyqꞌueyoj, ẍi Jehová, ẍi naj Jeremías.4 Yuxan jix yal ebꞌ yaaw tuꞌ tet naj rey jaxca tiꞌ:
—Makꞌ cam jun winaj tiꞌ, yutol chi yakꞌ caabꞌcꞌulal ebꞌ soldado eyto ecꞌ bꞌey yul conobꞌ tiꞌ yu wan kꞌane chi yal naj tuꞌ, catuꞌ chi yakꞌon somcha el scꞌul ebꞌ ánima. Jaꞌ jun winaj tiꞌ, cꞌam niꞌoj chi seyaꞌ yet chi oc swatxꞌiloj ebꞌ ket conobꞌ tiꞌ, tucꞌal chi etextoj snaꞌbꞌal ebꞌ yu naj, ẍi ebꞌ.
5 Catuꞌ jix takꞌwi naj rey Sedequías jaxca tiꞌ:
—Chi skeꞌ je yunen yetoj tzet chi yoche je cꞌul yin naj, cꞌam niꞌoj tzet chi skeꞌ walon je yetoj, ẍi naj.
6 Jix mitxꞌle naj Jeremías yu ebꞌ, catuꞌ jix yaon eytoj ebꞌ yetoj jun lasu yul jun jolan bꞌey chi yambꞌale jaꞌ jaꞌ. Jaꞌ jun jolan tuꞌ yet Malquías scꞌaal naj rey; jatuꞌ ey bꞌey sattaj eltoj bꞌey eyecꞌ ebꞌ steynemal despacho. Jaꞌ yul jun jolan tuꞌ cꞌamxa jaꞌ jaꞌ yul, asan xacꞌal stzokꞌom ey yul, yuxan jaꞌ yet jix ey apnoj, jix too naj xol stzokꞌom tuꞌ.
7 Jaꞌ yet chotan ey naj rey bꞌey puerta yet Benjamín, jix yabꞌen naj Ébed-mélec tol jix ale eytoj naj Jeremías yul jun jolan tuꞌ. Jaꞌ jun winaj tuꞌ a Etiopía, ey yopiso bꞌey spalacio naj rey. 8 Catuꞌ jix eltej naj Ébed-mélec bꞌey yul sdespacho naj rey tuꞌ, catuꞌ jix yalon tet naj jaxca tiꞌ:
9 —Jaach rey, caw wal pena tzet jix yun wan winaj tiꞌ yin Jeremías naj ẍejabꞌ Dios, tol jix yaeytoj ebꞌ yul jun jolan. Jaꞌ tituꞌ chi cam naj yu wail, yutol cꞌamxa loꞌbꞌe bꞌey yul conobꞌ tiꞌ, ẍi naj.
10 Catuꞌ jix chejle naj Ébed-mélec yu naj rey tuꞌ, jix yalon jaxca tiꞌ:
—Iꞌtoj junoj 30 winaj ja wetoj titiꞌ, catuꞌ chi too je yiꞌon atej naj Jeremías yul jolan tuꞌ, yajbꞌan cꞌamto chi cami, ẍi naj. 11 Catuꞌ jix too naj Ébed-mélec yetoj ebꞌ winaj tuꞌ bꞌey cꞌuanbꞌal yet despacho, jix bꞌet yiꞌontej wan icham kꞌap ebꞌ. Jix yaon eytoj an kꞌap tuꞌ yetoj txꞌan lasu tet naj Jeremías bꞌey yul jun jolan tuꞌ. 12 Jix yalon ebꞌ jaxca tiꞌ:
—Aoctoj wan kꞌap tuꞌ yalan ja kꞌabꞌ, yet watxꞌ cꞌam chach yasitoj yu txꞌan lasu tiꞌ, ẍi naj.
Yuxan queytuꞌ jix yute naj Jeremías. 13 Jix yaon eytoj txꞌan lasu tuꞌ ebꞌ, mitxꞌbꞌil can xaam txꞌan yu ebꞌ, catuꞌ jix iꞌle atej naj yu ebꞌ yetoj txꞌan lasu tuꞌ. Jix lawi tuꞌ xin, jix cancan naj Jeremías bꞌey sattaj eltoj na bꞌey eyecꞌ ebꞌ steynemal despacho tuꞌ.
Jix Awtele Naj Jeremías Yu Naj Sedequías
14 Jix yalon Sedequías tol chi iꞌletej naj Jeremías tuꞌ bꞌey sattaj masantaꞌcꞌal bꞌey yet yox puerta bꞌey yul templo. Jaꞌ tituꞌ jix yal naj rey tuꞌ jaxca tiꞌ:
—Ey junoj jin kꞌanlebꞌal oj wakꞌ ey jaach; chi woche tol tzꞌajan oj yun ja pajtzen ey jin, ẍi naj.
15 Jix yalon naj Jeremías jaxca tiꞌ:
—Jaach rey, ta chin pajtze ey jaach an, chim jin a wakꞌ makꞌle camoj; ta chi wakꞌ junoj naꞌbꞌale ey jaach, tumi oj ja chaꞌ ja wabꞌe, ẍi naj Jeremías tuꞌ.
16 Yin cꞌal ewantajil jix yakꞌon stiꞌ naj rey Sedequías tuꞌ, jix yalon tet naj Jeremías jaxca tiꞌ:
—Sattaj Jehová Naj chi akꞌon cu cawil, chi wakꞌon jin tiꞌ ey jaach, tol man oj jaach wakꞌ makꞌle camoj, tam wal oj jaach waoc yul skꞌabꞌ ebꞌ chi yoche chach makꞌon camoj, ẍi naj.
17 Catuꞌ jix yalon naj Jeremías tet naj Sedequías jaxca tiꞌ:
—Jaꞌ Jehová, Naj tol miman yeloc apnoj, jaꞌton Naj cu Diosal, jaꞌ chi alon jaxca tiꞌ: Ta tol cha waoc ja bꞌa yul skꞌabꞌ syaawil ebꞌ soldado naj sreyal Babilonia, oj jaach colcha el yetoj masanil ebꞌ caan ja wetoj yul ja na. Ta jaxca tuꞌ man oj akꞌle tzꞌaꞌ jun conobꞌ tiꞌ. 18 Ta man oj ja waoc ja bꞌa yul skꞌabꞌ ebꞌ xin, oj yakꞌ eyqꞌuey jun conobꞌ tiꞌ ebꞌ, oj yakꞌon tzꞌaꞌ ebꞌ, catuꞌ manxa oj skeꞌ ja colon ja bꞌa, ẍi Jehová, ẍi Jeremías.
19 Jix takꞌwi naj rey Sedequías jaxca tiꞌ:
—Chin xiw tet ebꞌ ket conobꞌ tiꞌ, tuxa jix yaoc sbꞌa ebꞌ yetoj ebꞌ a Babilonia; tala chin ale oc yul skꞌabꞌ ebꞌ, okꞌbꞌal cꞌul mi chin yute ebꞌ, ẍi naj.
20 Catuꞌ jix takꞌwi naj Jeremías jaxca tiꞌ:
—Cꞌamaj jaach rey, man oj jaach ale oc yul skꞌabꞌ ebꞌ. Jije wal tzet chi yal skꞌane Jehová jix wal ey jaach, queytuꞌ oj yun ja colcha eloj, catuꞌ watxꞌ oj jaach elocoj. 21 Yutol jaꞌ Jehová tuxa jix xꞌox tzetyetal ey jin, jantaj tzet oj juloj. Ta tol man oj ja waoc ja bꞌa yul skꞌabꞌ ebꞌ tuꞌ, 22 masanil ebꞌ ix ix chi cancan bꞌey ja palacio, sowalil oj iꞌle eltej ebꞌ, catuꞌ oj ale oc ebꞌ ix yul skꞌabꞌ ebꞌ syaawil ebꞌ soldado naj sreyal Babilonia, catuꞌ oj yalon ebꞌ ix ix tuꞌ jaxca tiꞌ:
Jaꞌ ebꞌ swatxꞌil ánima naj rey tuꞌ, pena tzet jix yal ebꞌ yin, yuxan jix eyqꞌueyi. Jix bꞌejlecan naj xol stzokꞌom yu ebꞌ, catuꞌ jix el ebꞌ scꞌatan naj, ẍi ebꞌ, yet oj yalon ebꞌ ix.
23 —Masanil ebꞌ je yistil, cꞌal ebꞌ je yuninal, oj ale oc ebꞌ yul skꞌabꞌ ebꞌ a Babilonia; jal jaach, jaach tiꞌ, manxa oj jaach colcha el yul skꞌabꞌ ebꞌ, tol oj jaach ale xacꞌal oc yul skꞌabꞌ naj sreyal Babilonia tuꞌ, catuꞌ oj akꞌle tzꞌaꞌ jun conobꞌ tiꞌ, ẍi Jeremías.
24 Catuꞌ jix takꞌwi Sedequías tet naj Jeremías jaxca tiꞌ:
—Ta cha woche cꞌam chach cami, cꞌam ojabꞌ cha wal jun tiꞌ tet junoj mactxequel. 25 Ta chi yotajne el wanxa ebꞌ yaaw tol jix jaach kꞌanabꞌ wetoj, oj mi jul ebꞌ, catuꞌ oj skꞌanlen el ebꞌ tzet jix ja wal ey jin, cꞌal tzet jix wal ey jaach. Oj yal ebꞌ ey jaach, tol man oj jaach smakꞌ cam ebꞌ, ta tol tzꞌajan oj yun ja walon el tet ebꞌ. 26 Asan tol oj ja wal tet ebꞌ, tol jaꞌ tzet cha kꞌan ey jin tol cꞌamxa chach watoj preso bꞌey sna naj Jonatán yet watxꞌ cꞌam chach cam tituꞌ, ja chi tet ebꞌ, ẍi naj Sedequías.
27 Jaxca ton tuꞌ jix yun xin. Masanil ebꞌ yaaw tuꞌ jix too ilon naj Jeremías, catuꞌ jix yakꞌon skꞌanlebꞌal ebꞌ tet naj. Jaxca wal jix yun yalon naj rey tet naj, jaxca tuꞌ jix yute takꞌwoj sbꞌa. Yu jun tuꞌ xin, jix sbꞌej skꞌanlen el ebꞌ tet naj, yutol cꞌam junoj jix abꞌen tzetyetal jix yal naj Jeremías yetoj naj rey. 28 Jaxca tuꞌ jix yun scan naj Jeremías sattaj eltoj bꞌey eyecꞌ ebꞌ steynemal despacho, masantaꞌcꞌal yet jix eyqꞌuey Jerusalén.