4 Jaꞌ yet jix yilon naj rey Sedequías yetoj ebꞌ soldado tzetyetal lalan yunen tituꞌ, jix ela ebꞌ yet akꞌbꞌalil. Jatuꞌ jix ecꞌ eltoj ebꞌ bꞌey snan xol yawo ebꞌ rey, jix ecꞌ el apnoj ebꞌ bꞌey jun puerta ey snan xol caabꞌ muro. Queytuꞌ jix yun yoc ebꞌ yul jun bꞌe chi too bꞌey jun panan chi apni oc bꞌey jaꞌ Jordán. 5-6 Jix tzajlo ebꞌ soldado yet Babilonia yintaj ebꞌ, jix michꞌcha naj Sedequías yu ebꞌ bꞌey yacꞌalil Jericó. Jix yiꞌontoj ebꞌ bꞌey naj rey Nabucodonosor. Jaꞌ tituꞌ eyecꞌ bꞌey conobꞌ Riblá bꞌey yul yet Hamat. Jaꞌ tituꞌ jix yal Nabucodonosor tzet oj yunne. Sattaj wal Sedequías tuꞌ jix yalon naj rey tol chi makꞌle cam ebꞌ scꞌaal Sedequías tuꞌ, yetoj masanil ebꞌ miman yeloc apnoj bꞌey Judá. 7 Jix lawi tuꞌ xin, jix yalon naj Nabucodonosor tuꞌ tol chi iꞌle eltej sbꞌakꞌ sat naj Sedequías tuꞌ, jix kꞌal-le ey yetoj cadena, catuꞌ jix iꞌletoj naj bꞌey Babilonia.

8 Jaꞌ ebꞌ a Babilonia jix aon oc skꞌakꞌal despacho cꞌal yetoj masanil na ey bꞌey Jerusalén. Jix smakꞌon cꞌal pax ecꞌ bꞌulna smuroal jun conobꞌ tuꞌ. 9 Yin xa slawubꞌal xin, jaꞌ Nabuzaradán, syaawil yeoc yin ebꞌ steynemal naj sreyal Babilonia, jix iꞌletoj masanil ebꞌ ánima yin presowomal, jaꞌton ebꞌ jix to cancan yul conobꞌ yetoj ebꞌ jix yaoc sbꞌa yetoj ebꞌ a Babilonia. 10 Asanxane ebꞌ mebꞌa jix cancan bꞌey txꞌotxꞌ Judá, jaꞌton ebꞌ caw cꞌam niꞌoj tzetyetal ey tet. Jaꞌ yet tuꞌ jix akꞌle txꞌotxꞌ bꞌey awbꞌil uva tet ebꞌ cꞌal wanxa awo.

11 Jaꞌ naj rey Nabucodonosor sreyal Babilonia, jix yakꞌ jun chejbꞌanile tet Nabuzaradán, naj syaawil ebꞌ chi teynen naj rey tuꞌ, yu tzet chi utele Jeremías, jix yalon jaxca tiꞌ: 12 Iꞌtoj naj, catuꞌ cha teyneni; cꞌam ojabꞌ cha wetne naj, masanil cꞌal tzet chi skꞌanaꞌ, akꞌ tet naj, ẍi naj rey tuꞌ. 13 Jaꞌ naj Nabuzaradán, yetoj Nebusazbán cꞌal yetoj Nergal-sarézer, yetoj cꞌal wanxa ebꞌ ey yopiso bꞌey naj sreyal Babilonia, 14 jix iꞌle eltej naj Jeremías yu ebꞌ bꞌey sattaj eltoj bꞌey eyoc preso tuꞌ. Jix ale can oc naj yul skꞌabꞌ Guedalías scꞌaal Ahicam yu ebꞌ, naj yitxiquin Safán, yet chi yaꞌilnele naj yu ebꞌ. Jix yiꞌtoj bꞌey sna; queytuꞌ jix yun scancan naj Jeremías xol ebꞌ yet conobꞌ.

15 Jaꞌ yet eyto ecꞌ naj Jeremías bꞌey yamakꞌil bꞌey eyecꞌ ebꞌ steynemal palacio tuꞌ, jix kꞌanabꞌ Jehová tet naj, jix yalon jaxca tiꞌ: 16 Asiꞌ bꞌey naj Ébed-mélec a Etiopía, catuꞌ cha walon tet jaxca tiꞌ: Tol jain Jehová, sDiosal jin Israel chi walaꞌ: Oj wakꞌ yun tzetyetal jix wal yin jun conobꞌ tiꞌ, jaꞌton syaꞌilal, catuꞌ manaj swatxꞌilal. Jaꞌ yet oj wun wan tuꞌ, oj ja wil wan tuꞌ yetoj ja sat. 17 Jain Jehová jin chi walaꞌ, tol oj jaach jin teyne, yet watxꞌ man oj jaach eyqꞌuey yul skꞌabꞌ wan ánima bꞌey chach xiw tinaniꞌ. 18 Jain chi walaꞌ, tol oj jaach jin colel yul skꞌabꞌ ebꞌ, yuxan man oj jaach makꞌle camoj, yutol eyoc ja naꞌbꞌal win, ẍi Jehová.