2 Jix iꞌle eltej naj Jeremías xol ebꞌ presowom yu naj yaaw tuꞌ, jix yalon tet jaxca tiꞌ: Tol jaꞌcaw Jehová ja Diosal jix aloni, tol oj yatej jun miman syaꞌilal bꞌey jun conobꞌ tiꞌ, 3 yuxan lalan yunen tzet jix yal can tuꞌ tinaniꞌ. Jix yatej jun tiꞌ je yibꞌan, yutol ma je jije tzet jix yalaꞌ. 4 Jaꞌ tinaniꞌ, oj wiꞌel chꞌen cadena tiꞌ ja win. Ta chi yoche ja cꞌul chach too wetoj bꞌey Babilonia, chi skeꞌ; jain oj jaach jin teyne. Ta cꞌam chi yoche ja cꞌul chach too xin, canan can titiꞌ. Masanil txꞌotxꞌ txꞌotxꞌ tiꞌ, eyoc txꞌotxꞌ yul ja kꞌabꞌ, chi skeꞌ ja sicꞌlen bꞌey chi yoche ja cꞌul chach cani, ẍi naj. 5 Cꞌam tocꞌal chi spajtze naj Jeremías wan kꞌane tuꞌ, catuꞌ jix yalon pax naj scomandanteal ebꞌ soldado tuꞌ jaxca tiꞌ: Ta chi yoche ja cꞌul, chi skeꞌ chach meltzo bꞌey naj Guedalías scꞌaal Ahicam, yitxiquin Safán, jaꞌton jun tuꞌ jix yaoc naj rey yin gobernadoral bꞌey Judá, catuꞌ chach too caey yetoj xol ebꞌ ja wet conobꞌ. Chi skeꞌ bꞌey cꞌal chi ẍaꞌ ja cꞌul, ẍi tet. Jix lawi tuꞌ, jix yakꞌon jun saꞌbꞌeal naj yaaw tuꞌ tet naj Jeremías, jix akꞌle sloꞌbꞌe naj, jix lawi tuꞌ, jix yalon cantoj sbꞌa naj. 6 Queytuꞌ jix yun stoo naj Jeremías yetoj naj Guedalías bꞌey conobꞌ Mizpá. Jaꞌ tituꞌ jix caey ecꞌ yetoj ebꞌ ánima jix cancan yu Nabucodonosor.

7 Ey ebꞌ scomandanteal ebꞌ soldado a Judá jix yewbꞌa el sbꞌa xol-laj teꞌ tet ebꞌ soldado a Babilonia. Jix yabꞌen ebꞌ tuꞌ tol jaꞌ Guedalías scꞌaal Ahicam jix ale oc yin gobernadoral yu naj sreyal Babilonia. Jaꞌ jix oc yilomaloj ebꞌ winaj, ebꞌ ix ix, cꞌal ebꞌ unin tol caw mebꞌa tituꞌ, jaꞌton ebꞌ ma iꞌletoj bꞌey Babilonia. 8 Yu jun tuꞌ, jix too il-le naj Guedalías yu ebꞌ bꞌey Mizpá, jaꞌton ebꞌ tiꞌ: Ismael, scꞌaal Netanías; Johanán cꞌal Jonatán scꞌaal Caréah ebꞌ, yetoj Seraías, scꞌaal Tanhúmet, yetoj jaywan ebꞌ scꞌaal Efai, a Netofá, yetoj Jezanías, scꞌaal jun winaj a Maacát, yetoj cꞌal soldado ebꞌ. 9 Jaꞌ naj Guedalías tuꞌ, jix yakꞌon stiꞌ, jix yalon jaxca tiꞌ: Cꞌam ojabꞌ chex xiw je yaon oc je bꞌa yul skꞌabꞌ ebꞌ a Babilonia. Cananwej can titiꞌ, awej oc je bꞌa yul skꞌabꞌ naj sreyal Babilonia; yet watxꞌ, watxꞌ cꞌal oj jex elocoj. 10 Jain tiꞌ, oj jin cancan bꞌey Mizpá tiꞌ, yet watxꞌ jain oj jin oc sattaj ebꞌ a Babilonia je yu, yet oj jul ebꞌ titiꞌ. Jaex tiꞌ xin, ocanwej cꞌal yin je yambꞌa sat uva, cꞌal jantaj sat awo, cꞌal aceite olivo. Queyton tuꞌ, oj yun je can cꞌal bꞌey wan conobꞌ jix can yul je kꞌabꞌ tuꞌ, ẍi naj Guedalías tet ebꞌ. 11 Ey cꞌal pax ebꞌ Israel jix cancan bꞌey Moab, bꞌey Amón, bꞌey Edom, cꞌal bꞌey wanxa nación. Jix yabꞌen ebꞌ tol eyto cꞌal ebꞌ ánima jix can yu naj sreyal Babilonia bꞌey Judá. Jaꞌ naj Guedalías scꞌaal Ahicam, yitxiquin Safán jix ale can oc yin gobernadoral. 12 Queytuꞌ jix yun smeltzo ebꞌ bꞌey Judá; masanil ebꞌ tol sajleminaj jix yun cantoj bꞌey wanxa conobꞌ. Jix lawi tuꞌ, jix too ebꞌ xꞌoxon sbꞌa sattaj naj Guedalías bꞌey Mizpá. Jix lawi tuꞌ jix syambꞌan uva ebꞌ, yetoj cꞌal wanxa sat awo.

13 Jaꞌ naj Johanán, scꞌaal Caréah, yetoj cꞌal wanxa ebꞌ syaawil ebꞌ soldado jix cancan bꞌey xol-laj teꞌ, jix too ebꞌ bꞌey Mizpá, yet chi too il-le naj Guedalías yu ebꞌ, 14 jix yalon ebꞌ jaxca tiꞌ:

—¿Man mi ja wotaj oj tol jaꞌ Baalís, naj sreyal Amón jix chejontej Ismael scꞌaal Netanías yet chach makꞌle camoj? ẍi ebꞌ.

Jaꞌ naj Guedalías tuꞌ, ma yaoc yin scꞌul tzet jix yal ebꞌ. 15 Yu jun tuꞌ, jaꞌ naj Johanán jix yal yin ewantajil tet naj Guedalías jaxca tiꞌ:

—Chi wal ey jaach, tol chin ja chaꞌtoj, yet chi too jin makꞌ cam naj Ismael. Cꞌam cꞌal junoj mactxequel otajnen mactxequel oj makꞌon camoj. ¿Tzet yu, yuxan tol oj jaach cu chaꞌ makꞌle cam yu naj? Ta chi yun jaxca tuꞌ, oj sajlem cantoj masanil ebꞌ a Judá eyxa ecꞌ ja wetoj titiꞌ, oj mi sajlemtoj ebꞌ xax can bꞌey Judá tiꞌ junelxa, ẍi tet naj.

16 Jix takꞌwi naj Guedalías jaxca tiꞌ:

—¡Cꞌam ojabꞌ cha naꞌ jaxca tuꞌ! Jaꞌ tzet chi al-le yin naj Ismael tuꞌ, man yeloj, ẍi.