Jix Makꞌle Cam Naj Guedalías
41
Jaꞌ yet sjuj xꞌaaw, jix too naj Ismael scꞌaal Netanías, yetoj laonwan ebꞌ soldado bꞌey Mizpá yet chi kꞌanabꞌ yetoj naj Guedalías; junne jix low ebꞌ yetoj. (Jaꞌ Ismael tuꞌ, yitxiquin cꞌal pax Elisamá, yicꞌaal ebꞌ rey, catuꞌ miman yeoc yopiso bꞌey sreyal Judá yet yalantoj.) 2 Yajbꞌan chi low ebꞌ, jix a waan naj Ismael yetoj ebꞌ laonwan jaꞌjun yetoj tuꞌ, yin smakꞌon cam Guedalías ebꞌ, naj jix ale oc yin gobernadoral bꞌey Judá yu naj sreyal Babilonia. 3 Jix makꞌle cꞌal pax cam masanil ebꞌ a Judá, yetoj cꞌal ebꞌ soldado a Babilonia eyecꞌ yetoj Guedalías bꞌey Mizpá tuꞌ.4 Jaꞌ yet junxa cꞌual xin, yet xax cam naj Guedalías tuꞌ, yet cꞌamto mactxequel chi otajnen el tzetyetal jix yun tuꞌ, 5 jix apni oc 80 ebꞌ winaj speto ebꞌ bꞌey Siquem, bꞌey Siló, cꞌal bꞌey Samaria. Josbꞌil el xil stiꞌ masanil ebꞌ, catuꞌ tzilquiltaj xacꞌal yoc spichil ebꞌ eyocoj, yasiltaj xacꞌal yoc smimanil ebꞌ; jacꞌal oc ebꞌ jix yute sbꞌa jaxca tuꞌ. Iꞌbꞌil cꞌal pax oc ixim tiriw yu ebꞌ, cꞌal incienso yet chi yakꞌon xaambꞌal ebꞌ tet Jehová bꞌey templo. 6 Jaꞌ yet tuꞌ, jix eltej naj Ismael bꞌey Mizpá jul ẍaꞌon apnoj ebꞌ, lalan yokꞌ naj; jaꞌ yet jix ẍaꞌle sbꞌa yetoj ebꞌ, jix yalon tet ebꞌ jaxca tiꞌ:
—Titanwej, jul ilwej naj Guedalías scꞌaal Ahicam, ẍi tet ebꞌ.
7 Cꞌuxan wal yapni oc wan winaj tuꞌ snan xol conobꞌ tuꞌ, jix makꞌle cam ebꞌ yu naj Ismael yetoj ebꞌ jaꞌjun yetoj. Jix kꞌojle eytoj ebꞌ bꞌey yul jun jolan yu. 8 Ey junoj ebꞌ laonwan lalan smakꞌle cam tuꞌ, jix alon tet Ismael jaxca tiꞌ:
—Cꞌam ojabꞌ chon ja makꞌ camoj; jaon tiꞌ ey cu tiriw, ey cu cebada, ey aceite, ey cꞌal pax noꞌ yal awcabꞌ; jaꞌ wan tuꞌ ewan el ku bꞌey stiꞌel conobꞌ tiꞌ, ẍi ebꞌ.
Yu jun tuꞌ xin, ma makꞌle cam ebꞌ yu naj Ismael yetoj cꞌal ebꞌ jaꞌjun yetoj tuꞌ. 9 Jaꞌ jun jolan bꞌey jix ale eytoj smimanil ebꞌ ánima jix smakꞌ cam naj Ismael tuꞌ, jaꞌton jun jolan bꞌey chi yambꞌale jaꞌ jaꞌ, jun jix yakꞌ jotle naj rey Asá, yet jix colon sbꞌa tet naj Baasá sreyal Israel. Jaꞌ jun jolan tuꞌ, caw miman yeocoj, caw jix noel yu smimanil ebꞌ ánima jix smakꞌ cam naj Ismael tuꞌ. 10 Jix iꞌletoj ebꞌ ix scutzꞌin naj rey yu naj Ismael, yetoj cꞌal ebꞌ ánima eyecꞌ bꞌey Mizpá tuꞌ, jaꞌton ebꞌ jix akꞌle steyne naj Guedalías yu naj syaawil ebꞌ soldado chi yij Nabuzaradán. Jix iꞌletoj ebꞌ yu naj Ismael, yet chi too can ebꞌ bꞌey yul yet Amón.
11 Jaꞌ yet jix yabꞌen oc naj Johanán scꞌaal Caréah, yetoj cꞌal ebꞌ syaawil soldado eyecꞌ yetoj, yu tzet jix yun naj Ismael tuꞌ, 12 jix syambꞌa oc masanil ebꞌ soldado, jix too yakꞌon jowal ebꞌ yetoj. Jaꞌ tituꞌ jix ilcha oc yu ebꞌ bꞌey jun miman paam jaꞌ ey bꞌey Gabaón. 13 Jaꞌ ebꞌ lalan yiꞌletoj jaxca presowomal yu naj Ismael tuꞌ, jaꞌ yet jix yil-len sbꞌa ebꞌ yetoj Johanán yetoj cꞌal ebꞌ syaawil ebꞌ soldado jaꞌjun yetoj, caw jix tzala a ebꞌ. 14 Jix meltzo ebꞌ bꞌey Johanán. 15 Jal pax naj Ismael, yetoj waxajwan ebꞌ jaꞌjun yetoj, jix el ebꞌ, jix toocan ebꞌ bꞌey conobꞌ Amón.
16 Jal naj Johanán yetoj cꞌal ebꞌ syaawil ebꞌ soldado jix ilon tzet jix yun can ebꞌ soldado, ebꞌ ix ix, ebꞌ unin yetoj cꞌal wan ebꞌ mimej yopiso lalan yiꞌletoj preso yu naj Ismael. Jaꞌ tituꞌ jix iꞌletoj ebꞌ bꞌey Mizpá yu, yet jix lawi smakꞌle cam Guedalías yu naj. Jaꞌ Johanán jix iꞌon meltzo ebꞌ bꞌey Gabaón. 17 Queytuꞌ jix yun stoo cꞌal ebꞌ xin, masantaꞌcꞌal jix apni oc ebꞌ bꞌey Gerut-quimam, cawil xol jun tuꞌ yetoj Belén. Jaꞌ tituꞌ jix oc tucan ebꞌ, jal pax snaꞌon cꞌaltaꞌ ebꞌ xin, tol tꞌinan chi apni oc ebꞌ bꞌey Egipto. 18 Queytuꞌ chi yun yel ebꞌ tet ebꞌ a Babilonia yaloni; chi xiw ebꞌ, yutol jaꞌ naj Ismael jix makꞌon cam Guedalías, naj abꞌil oc yin gobernadoral yu naj sreyal Babilonia.