—Ey wal jun tzetyetal oj cu kꞌan ey jaach tinaniꞌ, tol ojabꞌ cha chaꞌ ja wabꞌ ey jon: Txalan tet Jehová cu Diosal ku, jaywan jon jix cu cancan tiꞌ. Jaꞌ yet yalantoj, ecꞌal cu bꞌisil, jal tinaniꞌ xin caw jaywanxane cu bꞌisil jon. 3 Yuxan txalan tet Jehová cu Diosal ku jon, yet watxꞌ oj xꞌox ey jon tzet bꞌeal oj kiꞌ, cꞌal tzet watxꞌ oj kunne, ẍi ebꞌ.

4 Jix takꞌwi naj Jeremías tet ebꞌ, jix yaloni:

—Oj jin txaloj tet Jehová cu Diosal je yu, jaxca wal jix yun je yalon ey jin. Jaꞌ tzet oj yun stakꞌwoj Dios ey jin, queytuꞌ oj yun walon ey jex. Cꞌam bꞌey oj webꞌa el niꞌoj, ẍi naj.

5 Jix takꞌwi ebꞌ tet naj:

—Jaꞌ ojabꞌ Jehová tuꞌ, jaꞌ testigo chi yun can oc kin jon, ta tol man oj cu jije jaxca wal tzet oj yun yalon ey jaach tuꞌ. 6 Caxcꞌal oj ẍaꞌ cu cꞌul, ma man oj ẍaꞌ cu cꞌul tzet oj yun spajtzen ey jaach, oj cu jije tet Jehová cu Diosal, bꞌey jix cu kꞌan ey jaach tol oj ja kꞌan tet, yet watxꞌ oj cu eloc jon, ẍi ebꞌ.

7 Laonebꞌxa cꞌu tuꞌ, catuꞌ jix kꞌanabꞌ Jehová tet naj Jeremías, 8 yuxan jix awtele Johanán scꞌaal Caréah, yetoj ebꞌ yaawilal ebꞌ soldado cꞌal yetoj masanil ebꞌ ánima yu naj Jeremías tuꞌ. 9 Jix yalon jaxca tiꞌ: Jaꞌ Jehová cu Diosal jaon Israel jon tiꞌ, Naj bꞌey jix jin txali yu tzet jix je yal ey jin, chi yal jaxca tiꞌ: 10 Ta chi yoche je cꞌul chex caey ecꞌ bꞌey jun txꞌotxꞌ tiꞌ, caw oj jex wiꞌa can yu swatxꞌilal oj wakꞌ ey jex. Manxa oj jex wakꞌ lawoj, yutol yaꞌ chi wabꞌe yu jix watoj jun miman syaꞌilal tuꞌ je yibꞌan. 11 Jain Jehová jin chi walaꞌ: Manche xa jex xiw tet naj sreyal Babilonia, jun tol caw chex xiw tet. Jaꞌ tinaniꞌ cꞌam ojabꞌxa chex xiwi, yutol ey jin cꞌal ecꞌ je yetoj, oj jex jin colel yul skꞌabꞌ naj. 12 Yutol chi okꞌ jin cꞌul je yin. Oj wakꞌon yun jun rey tuꞌ, tol oj cusoc scꞌul je yin, catuꞌ oj jex chaꞌle meltzo bꞌey je conobꞌ tuꞌ, ẍi Jehová.

13 Ta jaex tiꞌ xin, cꞌam che yoche chex can bꞌey jun conobꞌ tiꞌ, ta oj je ten tzet chi yal Jehová cu Diosal; 14 ta oj je yal jaxca tiꞌ: Oj cu toj caey bꞌey Egipto, bꞌey manxa oj kil jowal, bꞌey manxa oj kabꞌ yokꞌ snukꞌ trompeta, tam wal oj cu cam yu wail, ta je chi, 15 ta jaxca tuꞌ che yute je bꞌa, chi cam je yabꞌen jaex lalan je cancan bꞌey Judá tiꞌ, tzet chi yal Jehová, Naj cu Diosal: Ta che yoche chex too caey bꞌey Egipto, 16 jaꞌ jowal, cꞌal wail bꞌey chex xiwi, jaꞌ oj apnoj cꞌal oc je yin tituꞌ. Oj jex cam cꞌaltaꞌa. 17 Jaꞌ masanil mactxequel chi too caey bꞌey txꞌotxꞌ Egipto, oj cam cꞌaltaꞌ ebꞌ yu jowal, yu wail, cꞌal yu yaꞌbꞌil. Cꞌam mactxequel oj cancan yin yiquisal, cꞌam mactxequel oj ela tet syaꞌilal oj watoj, ẍi Dios. 18 Jaꞌ Jehová, Naj cu Diosal, chi yal jaxca tiꞌ: Jaxca wal jix yun stit sjowal jin cꞌul yibꞌan ebꞌ caan bꞌey Jerusalén, queytuꞌ oj yun sjul cꞌal pax sjowal jin cꞌul je yibꞌan jaex tiꞌ, ta tol oj jex toj caey bꞌey Egipto. Oj jul syaꞌtajilal je yibꞌan. Jaꞌ yet oj jex yilon oc wanxa nación, oj xiwa ebꞌ, cꞌal je bꞌuchle yu ebꞌ. Cꞌamxa bꞌakꞌin oj je yil jun je txꞌotxꞌ tiꞌ junelojxa, ẍi Jehová. 19 Jal pax jaex chex cancan bꞌey Judá tiꞌ xin, jaꞌ Jehová lalan yalon ey jex tol cꞌam chex too bꞌey Egipto. Otajnewej eloj tol jain lalan walon ey jex, 20 tol miman cꞌal tzet che loctej je yibꞌan, yutol jix jin je chej jin kꞌanle tet Jehová cu Diosal, jix je yalon ey jin jaxca tiꞌ: Txalan tet Jehová cu Diosal ku, catuꞌ oj ja wakꞌon kotajne el masanil tzet oj yalaꞌ; oj cu jijeni, je chi. 21 Tuxa jix wakꞌ je yotajne el tzetyetal jix yal Jehová cu Diosal ey jex, cꞌam pax chi yal je cꞌul che jije. 22 Yu jun tuꞌ, otajnewej eloj tol oj jex cam yu jowal, yu wail, cꞌal yu yaꞌbꞌil bꞌey jun conobꞌ bꞌey che yoche chex too caey tuꞌ, ẍi naj Jeremías tet ebꞌ.