24
Jaꞌ yul stiempoal naj Joaquim tuꞌ, jix tit naj Nabucodonosor sreyal Babilonia yetoj ebꞌ soldado yakꞌon jowal yin naj. Queytuꞌ jix yun yoc naj rey Joaquim tuꞌ yalan ẍejbꞌanil naj rey Nabucodonosor, jix lawi tuꞌ, catuꞌ jix meltzo oc naj Joaquim yin naj sreyal Babilonia tuꞌ.2 Jaꞌ Jehová jix aontej ebꞌ soldado a Caldeo, cꞌal ebꞌ soldado a Sirio, cꞌal ebꞌ soldado Moabita, cꞌal ebꞌ soldado Amonita yin elkꞌan yin conobꞌ Judá, yet chi etneletoj jaxca jix yun yalon can ebꞌ ẍejabꞌ Jehová.
3 Queytuꞌ jix yun stit jun tiꞌ yibꞌan Judá, yutol jaꞌ Jehová jix aontej yibꞌan, yu cꞌal spenail naj Manasés jix yaocoj.
4 Yu cꞌal scamichal ebꞌ ánima cꞌam spenail jix smakꞌ cam naj Manasés bꞌey Jerusalén. Jaꞌ yu jun tuꞌ, yuxan cꞌamxa chi yakꞌ mimancꞌulal Jehová.
5 Masanil tzet jix yun naj rey Joaquim, jix tzꞌibꞌelecan yul slibroal skꞌaneal ebꞌ sreyal Judá. 6 Jaꞌ yet jix cam naj rey Joaquim, jatuꞌ jix mujle naj bꞌey mujan ebꞌ smam icham, jaxa jun scꞌaal chi yij Joaquín, jaꞌ jix oc can sqꞌuexeloj yin reyal.
7 Cꞌamxa chi el naj sreyal Egipto yetoj ebꞌ soldado yul sconobꞌ ebꞌ tuꞌ, yutol jaꞌ naj sreyal Babilonia tuꞌ jix iꞌon can ecꞌ masanil tzet majbꞌil can a yu naj, chi tit tacꞌal bꞌey jaꞌ jaꞌ bꞌey yet Egipto masantaꞌcꞌal bꞌey jaꞌ Éufrates.
Jix Iꞌletoj Naj Rey Joaquín Yin Presowomal Bꞌey Conobꞌ Babilonia
8 Eyxa 18 abꞌil skꞌinal naj Joaquín yet jix oc naj yin reyal, oxebꞌne xꞌaaw jix yakꞌ reyal bꞌey Jerusalén. Jaꞌ xutx chi yij Nehustá, scutzꞌin Elnatán a Jerusalén.
9 Caw pena sbꞌeybꞌal naj Joaquín tuꞌ sattaj Jehová, jaxca cꞌal sbꞌeybꞌal smam, queytuꞌ jix yunne.
10 Jaꞌ yet jun tiempoal tuꞌ, jix tit ebꞌ soldado naj Nabucodonosor sreyal Babilonia yakꞌon jowal yin conobꞌ Jerusalén, jix oc joyan ebꞌ yin conobꞌ tuꞌ.
11 Lalan yakꞌon jowal ebꞌ, catuꞌ jix apni oc naj rey Nabucodonosor.
12 Queytuꞌ jix yun yaon oc sbꞌa naj Joaquín sreyal Judá yetoj xutx, cꞌal ebꞌ yaaw, yetoj cꞌal ebꞌ yakꞌomal servil yul skꞌabꞌ naj rey Nabucodonosor tuꞌ. Jix iꞌletoj ebꞌ preso bꞌey Babilonia yet waxajebꞌxa abꞌil yoc naj Nabucodonosor yin reyal.
13 Jix lawi tuꞌ xin, catuꞌ jix yiꞌon iꞌletej masanil jantaj bꞌeomal cꞌuan a yul stemplo Jehová, cꞌal yul spalacio naj rey tuꞌ yu naj Nabucodonosor. Catuꞌ jix smakꞌon poꞌo masanil wan mitxꞌkꞌabꞌe oro cꞌal eloj bꞌey yul templo, wan waꞌnebꞌil can yu naj Salomón sreyal Israel, jaxca jix yun yalon can Jehová yet yalantoj.
14 Catuꞌ jix iꞌletoj masanil ebꞌ ánima yu naj, yetoj ebꞌ eyoc yin yopiso, cꞌal ebꞌ soldado caw jelan. Jix iꞌle cꞌal pax toj ebꞌ josom teꞌ cꞌal ebꞌ waꞌnem chꞌen. Ey 10,000 ebꞌ jix iꞌletoj preso tuꞌ bꞌey Babilonia. Asanxane ebꞌ mebꞌa jix cancanoj.
15 Jix iꞌle cꞌal pax toj naj rey Joaquín yetoj xutx cꞌal ebꞌ yistil, cꞌal ebꞌ chi teynen naj, cꞌal ebꞌ eyoc yin yopiso yetoj, yetoj cꞌal ebꞌ ánima miman yeloc apnoj bꞌey yul snación tuꞌ. Jix iꞌletoj ebꞌ yu naj rey Nabucodonosor bꞌey Babilonia tuꞌ.
16 Jaꞌ xol masanil ebꞌ ánima jix yiꞌtoj bꞌey Babilonia yin presowomal tuꞌ, ey 7,000 ebꞌ soldado jelan yin jowal, catuꞌ jun 1,000 josom teꞌ, yetoj cꞌal ebꞌ waꞌnem chꞌen. 17 Jaxa naj rey Nabucodonosor tuꞌ, jix aon oc naj Matanías yuẍtaj smam Joaquín tuꞌ, yin reyal sqꞌuexeloj. Jix qꞌuexle sbꞌi naj Matanías tuꞌ yu naj, Sedequías xa jix yij sbꞌi naj.
Jaꞌ Yet Eyoc Naj Sedequías Yin Reyal
18 Ey 21 abꞌil skꞌinal naj Sedequías yet jix oc naj yin reyal, jusluqꞌuebꞌ abꞌil jix yakꞌ reyal bꞌey Jerusalén. Jaꞌ xutx chi yij Hamutal, scutzꞌin Jeremías a conobꞌ Libná ix.
19 Caw pena cꞌal jix yute sbꞌeybꞌal naj Sedequías yul sat Jehová, jaxca wal jix yute sbꞌa naj Joaquim.
20 Yu jun tuꞌ, caw jix tit sjowal Jehová yin Jerusalén cꞌal yin Judá, yuxan jix yiꞌel wan conobꞌ tuꞌ sattaj.