Jaꞌ jun libro tiꞌ jix tzꞌibꞌelecan yet abꞌil 450-430 a.C.

Jaꞌ naj Esdras jix tzꞌibꞌencanoj, yet jix jajcha eltej ebꞌ Israel yin jaxca presowomal. Crónicas chi yal yeloc apnoj, skꞌaneal ebꞌ rey. Jaꞌ jun bꞌabꞌel libro Crónicas tiꞌ, chi yaltej tzet chi yal an scaabꞌ slibro naj Samuel yetoj cꞌal tzet jix yun stzꞌibꞌelecan skꞌaneal ebꞌ rey. Asan xin, man masaniloj tzet chi yal wan libro tuꞌ, yetoj tzet chi yal pax caabꞌ libro tiꞌ. Jaꞌ mac jix tzꞌibꞌencan tzet chi yal jun libro tiꞌ caw miman yeloc apnoj skꞌaneal chi yal can yin naj rey David, yin naj rey Salomón, skꞌaneal stemplo Jehová, skꞌaneal tzet jix yun yoc ebꞌ ánima yin eyilal, skꞌaneal yopiso ebꞌ yakꞌomal xaambꞌal tet Dios. Chi yalon pax canoj, tol jaꞌ naj rey David tuꞌ jix iꞌon el yich templo yetoj sleyalil, caxcꞌal mi tol jaꞌ naj rey Salomón jix waꞌnen aoj. Caw miman jix yun sbꞌina naj Josafat, naj Ezequías cꞌal naj Josías yin txꞌoxbꞌanileal, tol caw ey yeloc apnoj sDiosal Israel yul sat ebꞌ. Jix oc cꞌal ebꞌ yin eyilal tet Jehová. Jaꞌ ebꞌ oxwan tiꞌ caw bꞌinabꞌil ebꞌ, yutol jaꞌ ebꞌ jix iꞌon meltzo oc ebꞌ ánima yul skꞌabꞌ Jehová. Jal yet eyoc wanxa ebꞌ rey yin yopiso, jacꞌal tet comon dios chi oc ebꞌ ánima yin eyilal. Jaꞌ mac jix tzꞌibꞌencan jun libro tiꞌ, chi yaltej tol caw miman tzet jix ecꞌtoj yibꞌan conobꞌ Israel yetoj Judá, jaꞌ Dios naꞌan cꞌal swa kꞌane yakꞌnaj can yetoj ebꞌ sconobꞌ tuꞌ, jix eloc jantaj tzet naꞌbꞌil yu.

Jaꞌ bꞌey capítulo 1 masantaꞌcꞌal bꞌey capítulo 9, chi yaltej xolilal yichmam jun tujan ebꞌ ánima. Jal capítulo 10, chi yaltej yu scamichal naj Saúl. Jaꞌ bꞌey capítulo 11 masantaꞌcꞌal bꞌey capítulo 29, chi yaltej tzet jix yun yakꞌon reyal naj David, chi yaltej tzet jix jul yibꞌan cꞌal tzet jix yun yiꞌon yip yopiso naj. Jix yaoc yin scꞌul syambꞌan can jantaj tzet jix kꞌanle yet jix waꞌxi stemplo Jehová. Jix swaꞌne can slistail ebꞌ oj mulna oc yin templo tuꞌ. Jix yaon can oc masanil yul skꞌabꞌ naj Salomón. Jaꞌ wan tiꞌ chi yal bꞌey capítulo 22 masantaꞌcꞌal bꞌey capítulo 29.