Jaꞌ jun libro tiꞌ jix tzꞌibꞌelecan yet abꞌil 561-538 a.C. Man kotajoj mac jix tzꞌibꞌeni. Jaꞌton skꞌaneal ebꞌ Israel yetoj ebꞌ Judá, masantaꞌcꞌal jix eyqꞌuey ebꞌ Israel yu ebꞌ Asiria, catuꞌ jix eyqꞌuey ebꞌ Judá yu ebꞌ a Babilonia.

Jaꞌ jun libro tiꞌ, jaꞌton stzꞌajil an bꞌabꞌel libro bꞌey ey can ey skꞌaneal ebꞌ rey. Jaꞌ an bꞌabꞌel libro, jatuꞌ ey can skꞌaneal naj Josafat sreyal Judá yetoj naj Ocozías sreyal Israel. Jaꞌ jun tuꞌ, jix yun yet 850 a.C.

Jal pax jun scaabꞌ libro tiꞌ xin, chi ẍaꞌel yich yalon yu slawubꞌal yopiso naj Elías, jaꞌton naj ẍejabꞌ Dios, yetoj pax tzet jix yun ẍaꞌon el yich yopiso naj Eliseo, jaꞌton ocnaj can sqꞌuexeloj naj Elías tuꞌ. Jaꞌ jun bꞌabꞌel tujan chi yal yul jun libro tiꞌ, jaꞌton yet abꞌil 721 a.C. Jaꞌton chi yal capítulo 1 masantaꞌcꞌal chi apni oc bꞌey capítulo 17.

Jaxa yet scaabꞌ tujan chi yaltej yu skꞌaneal Judá, masantaꞌcꞌal yet jix eyqꞌuey Jerusalén yet abꞌil 586 a.C. Jaꞌton yet jix iꞌletoj ebꞌ bꞌey Babilonia. Jix sbꞌejoncan sconobꞌ ebꞌ, ey wanxa ebꞌ, jaꞌ bꞌey Egipto jix iꞌletoj junoj tiempoal yin presowomal. Jaꞌ jun libro tiꞌ chi lawi yalon can yu skꞌaneal naj Guedalías, naj eyoc yin Gobernadoral bꞌey Judá, yet eyoc ebꞌ yalan ẍejbꞌanil conobꞌ Babilonia, jaꞌton chi yal capítulo 18 masantaꞌcꞌal chi apni oc bꞌey capítulo 25.