—Caw je yotaj jaex tiꞌ, tol jaꞌ conobꞌ Ramot yul yet Galaad ket cꞌaltaꞌ yeocoj. ¿Tzet yuxan tol cꞌam chi cu tokꞌwej ecꞌ tet naj sreyal Siria? ẍi naj tet ebꞌ.

4 Jix skꞌanlen naj tet naj Josafat jaxca tiꞌ:

—¿Chim yal ja cꞌul chach colwa wetoj yet chi cu chaꞌon el yich jowal yetoj conobꞌ Ramot yul yet Galaad? ẍi naj. Catuꞌ jix takꞌwi naj Josafat tet naj jaxca tiꞌ:

—Jain tiꞌ, yetoj ebꞌ jin soldado, cꞌal jantaj jin che yet jowal, chin colwa ja wetoj. 5 Asan xin, jaꞌ yet cꞌamto chi ẍaꞌel yich yoc jowal tuꞌ, tol ojabꞌ chi cu kꞌanle tet Jehová, ẍi naj Josafat tuꞌ.

6 Jix lawi tuꞌ, jix yambꞌale oc jun 400 ebꞌ chi yaloc sbꞌa ẍejabꞌoj Dios yu naj sreyal Israel tuꞌ, jix skꞌanlen naj tet ebꞌ jaxca tiꞌ:

—¿Chim skeꞌ jin chaꞌon oc jowal yetoj conobꞌ Ramot tuꞌ, ma cꞌamaj? ẍi naj tet ebꞌ.

Jix takꞌwi ebꞌ jaxca tiꞌ:

—Chi skeꞌ cha wakꞌ jowal tuꞌ. Jaꞌ Jehová cu Diosal, jaꞌ oj aon oc yul ja kꞌabꞌ, ẍi ebꞌ tet naj.

7 Jix skꞌanlen naj Josafat jaxca tiꞌ:

—¿Tumi wal cꞌamxa junoj ẍejabꞌ Jehová bꞌey chi skeꞌ cu kꞌanlen xin? ẍi naj.

8 Jix takꞌwi naj Ahab sreyal Israel jaxca tiꞌ:

—Eyto junxa naj bꞌey chi skeꞌ cu kꞌanleni tzet ẍi Jehová kibꞌan, jaꞌton naj Micaías, scꞌaal Imlá. Asan xin, caw chi chichon jin cꞌul yin naj tuꞌ an, yutol cꞌam juneloj chi yal watxꞌ kꞌane naj win, pena cꞌal tzet chi yal naj win, ẍi naj.

Jix yalon naj Josafat jaxca tiꞌ:

—Manche ja wal jaxca tuꞌ, ẍi naj.

9 Jix lawi tuꞌ, jix yawten junoj ebꞌ yakꞌomal servil naj rey Ahab, jix yalon tet jaxca tiꞌ:

—Asiꞌ, awte naj Micaías scꞌaal Imlá yin eymanil, ẍi naj.

10 Jaꞌ naj rey Ahab yetoj Josafat sreyal Judá, eyoc spichil ebꞌ yet sreyal. Jix ey chotan ebꞌ yul ẍila bꞌey spananil jun tecꞌbꞌal tiriw scawilal stiꞌ spuertail conobꞌ Samaria. Eyecꞌ masanil ebꞌ chi yaloc sbꞌa ẍejabꞌoj Jehová, chi yalon ebꞌ tzet oj jul sattaj ebꞌ rey tuꞌ. 11 Jaxa pax naj Sedequías scꞌaal Quenaaná, jix swaꞌne wan chꞌen chꞌen jaxca yucꞌaꞌ wacax, chi yalon jaxca tiꞌ: Jaꞌ Jehová jix alon jaxca tiꞌ: Jaꞌ yetoj wan jaxca yucꞌaꞌ wacax tiꞌ, catuꞌ oj ja tejon ebꞌ Siria masantaꞌcꞌal oj cam ebꞌ ja wu, ẍi Jehová, ẍi naj.

12 Jun laan xacꞌal chi yun yalon ebꞌ masanil, chi yalon ebꞌ tet naj rey jaxca tiꞌ: ¡Asiꞌ, akꞌ jowal yin conobꞌ Ramot tuꞌ, yutol jaꞌ Jehová oj aon oc jun conobꞌ tuꞌ yul ja kꞌabꞌ! ẍi ebꞌ masanil.

13 Yajbꞌan tuꞌ, ey pax jun yakꞌomal servil jix too iꞌon naj Micaías tuꞌ, jix yalon tet naj jaxca tiꞌ:

—Masanil ebꞌ ẍejabꞌ Dios jix aloni tol watxꞌ oj eloc naj rey, yuxan chi skeꞌ ja walon pax jaxca chi yun yalon ebꞌ tuꞌ, ẍi jun yakꞌomal servil tuꞌ tet.

14 Jix takꞌwi naj Micaías jaxca tiꞌ:

—Jix wakꞌ jin tiꞌ sattaj Jehová Naj iquis, tol asan tzet chi yalaꞌ, jaꞌ oj walaꞌ, ẍi naj tet.

15 Jix cꞌal apni oc sattaj naj rey tuꞌ, jix skꞌanlen naj rey tet jaxca tiꞌ:

—Jaꞌ tinaniꞌ jaach Micaías, ¿tumi chi too kakꞌ jowal yetoj conobꞌ Ramot yul yet Galaad tuꞌ, ma cꞌamaj? ẍi naj.

Jix takꞌwi naj Micaías jaxca tiꞌ:

—Ocan yin jowal tuꞌ, oj skeꞌ ja wu. Jaꞌ Jehová oj aon oc jun conobꞌ tuꞌ yul ja kꞌabꞌ, ẍi naj, asan tucꞌal jix yal naj jaxca tuꞌ.

16 Jix yalon naj rey tet naj jaxca tiꞌ:

—Caw ecꞌal el jix wal ey jaach an, tol jaꞌ tzetyetal yel, jaꞌ cha wal ey jin, yin sbꞌi Jehová, ẍi naj.

17 Jix yalon naj Micaías jaxca tiꞌ:

18 Jix yalon naj rey Ahab tet naj Josafat jaxca tiꞌ:

—Ilaꞌ wal xin, ¿tumi ma wal ey jaach tol jaꞌ jun winaj tiꞌ cꞌam niꞌoj swatxꞌil tzet chi yal naj win, asan cꞌal spenail chi yal naj? ẍi naj.

19 Jix yalon pax naj Micaías jaxca tiꞌ:

—Abꞌ tzet chi yal skꞌane Jehová. Jix wilaꞌ tol chotan ey Jehová yul sdespacho, yetoj masanil ebꞌ yángel eyecꞌ bꞌey satcan tuꞌ, linan oc ebꞌ bꞌey swatxꞌ kꞌabꞌ cꞌal bꞌey skꞌexan kꞌabꞌ. 20 Jix lawi tuꞌ jix yalon Jehová jaxca tiꞌ: ¿Mac oj akꞌon yun naj rey Ahab yet chi too yakꞌ yin jowal yin conobꞌ Ramot yul yet Galaad tuꞌ, yet watxꞌ jaꞌ tituꞌ chi cami? ẍi naj. Txꞌoj txꞌoj cꞌal jix yun yalon ebꞌ tet. 21 Jaxa jix yunne, ey jun espíritu jix apni oc sattaj Jehová, jix yaloni tol chi yakꞌ yunne. Jix skꞌanlen Jehová tet, yu tzet oj yute. 22 Jix yalon jun espíritu tuꞌ tol chi iptzele snaꞌbꞌal ebꞌ yakꞌomal servil naj rey Ahab yet chi yakꞌ xacꞌal lekꞌtiꞌal ebꞌ. Yuxan jix yal Jehová jaxca tiꞌ: Asiꞌ xin, wotaj tol oj skeꞌ ja wakꞌon eyqꞌueyoj, ẍi Jehová. 23 Yu tuꞌ xin, jix ẍaꞌtej Jehová jun espíritu yet lekꞌtiꞌal tuꞌ yin ebꞌ naj ja wakꞌomal servil tuꞌ yet chi yalon ebꞌ ey jaach, yet watxꞌ jaxca tuꞌ oj yun ja weyqꞌueyi, ẍi naj Micaías tuꞌ tet naj rey.

24 Yet cꞌal jun txolan tuꞌ, catuꞌ jix sjitzon oc sbꞌa naj Sedequías scꞌatan naj Micaías, jix smakꞌontoj sat naj, jix yalon jaxca tiꞌ:

—¿Tzet jix yun yel jun espíritu speto bꞌey Jehová tuꞌ win an, catuꞌ jaxa ey jaach chi kꞌanabꞌi? ẍi naj.

25 Jix takꞌwi naj Micaías tet naj jaxca tiꞌ:

—Oj xa ja wilaꞌ tzet oj jaach eloc yet jun cꞌu tuꞌ, yet oj ja wewbꞌa el ja bꞌa yul junoj na, ẍi naj.

26 Jix lawi tuꞌ, jix yalon naj rey Ahab jaxca tiꞌ:

—Mitxꞌwej ey naj Micaías tiꞌ, catuꞌ che yiꞌontoj naj preso bꞌey Amón, naj sgobernadoral conobꞌ tiꞌ, cꞌal tet naj jin cꞌaal chi yij Joás. 27 Alwej tet ebꞌ tol jain chi walaꞌ, tol chi ale octoj naj yul preso, niẍtej ojabꞌ chꞌan sloꞌbꞌe naj chi akꞌlei, catuꞌ niẍtej ojabꞌ chꞌan jaꞌ chi akꞌle yuqꞌueꞌ, masantaꞌcꞌal chin meltzo yin jowal, ta tol cꞌam tzet chin ion yin jowal tuꞌ, ẍi naj.

28 Jix yalon naj Micaías jayebꞌ xa bꞌelan kꞌane jaxca tiꞌ:

29 Jix lawi tuꞌ, catuꞌ jix too naj Ahab sreyal Israel tuꞌ yetoj naj Josafat sreyal Judá, yin yakꞌon jowal yin conobꞌ Ramot yul yet Galaad. 30 Jix yalon naj Ahab tet naj Josafat jaxca tiꞌ:

—Comon pichile yet ebꞌ soldado oj waocoj, catuꞌ oj jin oc xol jowal tuꞌ, jal pax jaach tiꞌ xin, ey ojabꞌ cꞌal oc ja pichil yet ja reyal ja wu, ẍi tet naj.

Jix sqꞌuexon el spichil catuꞌ jix too naj yin jowal tuꞌ. 31 Jal pax naj sreyal Siria xin, xax yal tet ebꞌ 32 scapitán jaxca tiꞌ: Cꞌam chex oc yin junojxa mactxequel, asanne yin naj sreyal Israel chex oqui, ẍi naj tet ebꞌ. 32 Jaxa yet jix iꞌle oc yin naj Josafat yu ebꞌ capitán tuꞌ, jix sjoyon oc sbꞌa ebꞌ yin. Jaꞌ yalon ebꞌ tol jaꞌ naj sreyal Israel tuꞌ, yuxan jix a yaw naj Josafat. 33 Queytuꞌ jix yun snaꞌcha el yu ebꞌ tol manaj naj sreyal Israel tuꞌ, catuꞌ jix sbꞌejon ebꞌ yujten ecꞌoj. 34 Ey pax jun soldado comon cꞌal jix julwai. Cꞌuxan cꞌal jix too xaam sjulbꞌal tuꞌ bꞌey chi snubꞌle sbꞌa chꞌen chꞌen pichile eyoc yu naj rey Ahab tuꞌ, yuxan jix yal tet naj inen oc carruaje bꞌey eyatoj tuꞌ jaxca tiꞌ:

—Iꞌ meltzo noꞌ che tiꞌ, catuꞌ chin ja wiꞌon el xol jowal tiꞌ, yutol caw wal miman jix yun jin lawi, ẍi naj.

35 Jaꞌ yet jun cꞌual tuꞌ, caw jow jix yun yoc jowal. Jix too slinbꞌa oc naj Ahab ebꞌ tuꞌ bꞌey yul carruaje yet chi too yakꞌon wal jowal yetoj ebꞌ Siria tuꞌ. Jaxa yet jix ey cꞌu xin, jix cami, txꞌojxa yel sequecoj ẍiqꞌuil yul carruaje tuꞌ. 36 Jaxa yet lalanxa stoo cꞌu, jix oc jun aw xol masanil ebꞌ soldado jaxca tiꞌ: 37 ¡Paxanwejtoj bꞌey je conobꞌ cꞌal bꞌey je na junjun jex! ẍi.

Jix cam naj rey Ahab tuꞌ, catuꞌ jix iꞌletoj smimanil naj bꞌey conobꞌ Samaria. Jaꞌ tituꞌ jix mujle canoj. 38 Jix txꞌale el scarruaje tuꞌ bꞌey jun jaꞌ naabꞌ jaꞌ waꞌnebꞌil bꞌey Samaria, bꞌey chi txꞌawi ebꞌ ix amul ix. Jaꞌ tituꞌ jix lecꞌle ẍiqꞌuil naj Ahab tuꞌ yu noꞌ txꞌiꞌ. Queytuꞌ jix yun yeloc jaxca jix yun yalon can Jehová.

39 Jaꞌ jantaj to skꞌaneal naj rey Ahab cꞌal tzet jix yunne, cꞌal skꞌaneal sna tol chꞌen marfil cꞌal eloj, cꞌal wan mimej conobꞌ jix swaꞌne, jatuꞌ tzꞌibꞌebꞌilcan ey skꞌaneal bꞌey yul libro yet skꞌaneal ebꞌ sreyal Israel. 40 Jaꞌ yet jix camtoj naj Ahab tuꞌ, jaxa jun scꞌaal chi yij Ocozías jix oc can sqꞌuexeloj yin reyal.

41 Jaꞌ yet canebꞌxa abꞌil yoc naj Ahab yin reyal bꞌey conobꞌ Israel, jix ẍaꞌon el yich naj Josafat scꞌaal Asá yoc reyal bꞌey Judá. 42 Eyxa 35 abꞌil skꞌinal yet tuꞌ, 25 abꞌil jix yakꞌ reyal bꞌey Jerusalén. Jaꞌ xutx chi yij Azubá, scutzꞌin naj Silhí.

43 Jaꞌ naj Josafat tuꞌ watxꞌ cꞌal tzet jix yun jaxca jix yun smam, caw watxꞌ cꞌal tzet jix el yunen sattaj Jehová. Asan tol ma ẍaꞌ iꞌle el masanil wan snail txabꞌal waꞌnebꞌil a bꞌey tzalquiltaj txꞌotxꞌ bꞌey chi yakꞌ xaambꞌal ebꞌ ánima cꞌal bꞌey chi yakꞌ tzꞌaꞌ incienso ebꞌ.

44 Jaꞌ naj Josafat tuꞌ, jix swaꞌne jun swa kꞌane yet watxꞌcꞌulal yetoj naj sreyal Israel. 45 Jaꞌ jantaj to skꞌaneal yetoj cꞌal tzet jix yunne, cꞌal jowal jix yakꞌa, jatuꞌ tzꞌibꞌebꞌilcan yul an juun bꞌey ey can ey skꞌaneal ebꞌ sreyal Judá. 46 Jaꞌ naj Josafat tuꞌ, jix yiꞌel masanil wan winaj chi mulwi yetoj yet winajil sattaj bꞌey chi oc ebꞌ yin eyilal tet sdiosal, jaꞌton ebꞌ jix cancan yul stiempoal Asá, jaꞌton smam. 47 (Jaꞌ yet jun tiempoal tuꞌ cꞌam junoj rey eyoc bꞌey conobꞌ Edom tuꞌ, asanne naj gobernador eyoc yu naj Josafat.)

48 Jaꞌ naj Josafat tuꞌ jix swaꞌne wan barco jaxca yet ebꞌ a Tarsis, yet chi too iꞌontej oro bꞌey Ofir, asan xin ma skeꞌ stoi, yutol jix poꞌotoj wan barco tuꞌ bꞌey Esión-guéber. 49 Jix lawi tuꞌ xin, jaꞌ naj Ocozías scꞌaal Ahab, jix alon tet naj Josafat tol chi too ebꞌ smulnawom naj yin wan barco yetoj ebꞌ smulnawom naj Josafat tuꞌ, ma yal scꞌul jaxca tuꞌ.

50 Jix cam naj Josafat xin, jatuꞌ jix mujle naj bꞌey sconobꞌ David, jaꞌton yichmam. Jix lawi tuꞌ, jaxa naj Joram jix oc can sqꞌuexeloj yin reyal.

51 Jaꞌ yet 17 abꞌil xa yoc naj Josafat yin reyal bꞌey Judá, jaꞌ yet tuꞌ jix ẍaꞌel yich naj Ocozías scꞌaal Ahab yakꞌon reyal xol Israel bꞌey conobꞌ Samaria, caabꞌ abꞌil jix yakꞌ reyal. 52 Caw pena jix yute sbꞌeybꞌal sattaj Jehová, jix sbꞌeybꞌalne spena sbꞌeybꞌal smam cꞌal xutx, cꞌal sbꞌeybꞌal naj Jeroboam scꞌaal Nabat, naj jix ijbꞌantoj ebꞌ Israel yin spenail. 53 Tol jix oc eyilal tet jun comon dios chi yij Baal, jaxca cꞌal jix yun smam yet yalantoj. Queytuꞌ jix yun xꞌemontej sjowal scꞌul Jehová, Diosal Israel yibꞌan.