Jix Kꞌanabꞌ Can El Naj Micaías Yin Naj Ahab
18
Jaꞌ naj Josafat tuꞌ, caw jix a can sbꞌeomal, caw bꞌinabꞌil yin yopiso tuꞌ. Jaꞌ ix scutzꞌin Ahab, sreyal Israel jix oc yalibꞌoj naj.2 Jix ecꞌtoj jayebꞌoj abꞌil xin, catuꞌ jix too naj Josafat bꞌey Samaria, yu stoo yilon Ahab. Caw ecꞌal noꞌ meꞌ, cꞌal noꞌ wacax jix yal naj Ahab tol chi makꞌle camoj, yet chi oc junoj kꞌin, yutol jix apni oc naj Josafat yetoj cꞌal ebꞌ jaꞌjun yetoj. Jix yal tet naj tol chi yaoc sbꞌa yetoj, yin yakꞌon jowal ebꞌ yin conobꞌ Ramot yul yet Galaad. 3 Jaꞌ yet tuꞌ, jix skꞌanle naj Ahab sreyal Israel tet naj Josafat sreyal Judá jaxca tiꞌ:
—¿Chim yal ja cꞌul chach too wetoj yet chi too wakꞌon jowal yin conobꞌ Ramot yul yet Galaad? ẍi naj.
Jix takꞌwi naj Josafat tet jaxca tiꞌ:
—Chi skeꞌ jin too ja wetoj yetoj masanil ebꞌ jin soldado. 4 Asan xin, jaꞌ yet cꞌamto chi cu too ja wetoj, watxꞌ chi cu kꞌanle tzet wal ẍi snaꞌbꞌal Jehová yibꞌan jun tiꞌ.
5 Yuxan jix syambꞌa oc naj sreyal Israel masanil ebꞌ chi yaloc sbꞌa yakꞌomaloj servil Dios, ey 400 ebꞌ yin masanil. Jix skꞌanle naj tet ebꞌ jaxca tiꞌ:
—¿Chim skeꞌ kakꞌonwej jowal yin conobꞌ Ramot yul yet Galaad, ma cꞌamaj?
Jix takꞌwi ebꞌ tet jaxca tiꞌ:
—Chi skeꞌ, ocan ja wakꞌ jowal yin jun conobꞌ tuꞌ, yutol jaꞌ Dios oj aon oc yul ja kꞌabꞌ, ẍi ebꞌ tet naj.
6 Jaxa naj Josafat jix kꞌanlen jaxca tiꞌ:
—¿Tumi cꞌam junoj ẍejabꞌ Dios eyecꞌ titiꞌ yet chi cu kꞌanle tet xin?
7 Jaxa takꞌwi naj sreyal Israel tet Josafat jaxca tiꞌ:
—Ey jun naj chi skeꞌ skꞌanlen tet Jehová ku, jaꞌton naj Micaías scꞌaal Imlá. Asan caw chin caj jun winaj tuꞌ, yutol cꞌam juneloj chi yal tzetyetal watxꞌ ey jin an, yutol pena cꞌal chi yun yakꞌon spaj junoj kꞌane naj ey jin, ẍi tet naj Josafat.
Jaxa Josafat jix alon tet jaxca tiꞌ:
—Manche ja wal jaxca tuꞌ.
8 Jix lawi tuꞌ, jix yawtentej jun yakꞌomal servil naj sreyal Israel tuꞌ, jix yalon tet jaxca tiꞌ:
—Yin eymanil chi too ja wawte naj Micaías scꞌaal Imlá.
9 Jaꞌ ebꞌ rey tuꞌ scawanil, eyoc spichil ebꞌ chi skꞌan yin yopiso yin reyal, chotan ey junjun ebꞌ bꞌey spalacio bꞌey chi octoj yul conobꞌ Samaria. Eyecꞌ masanil ebꞌ chi yaloc sbꞌa yakꞌomaloj servil Dios tuꞌ sattaj ebꞌ. 10 Jaꞌ naj Sedequías, scꞌaal Quenaaná jix swaꞌne ey wan chꞌen chꞌen jaxca yili noꞌ yucꞌaꞌ meꞌ, chi el yaw chi yaloni: Jaꞌ Jehová chi alon jaxca tiꞌ: Jaꞌ yetoj wan cacho tiꞌ, oj skeꞌ ja wakꞌon jowal yetoj ebꞌ Sirio, masantaꞌcꞌal oj lawoj el ebꞌ ja wu, ẍi Jehová, ẍi naj Sedequías tuꞌ.
11 Masanil xacꞌal ebꞌ yakꞌomal servil tuꞌ, jun laan xacꞌal yalon ebꞌ: Asiꞌ akꞌ jowal yin conobꞌ Ramot yul yet Galaad tuꞌ yin eymanil, oj eyqꞌuey ja wu, yutol jaꞌ Jehová oj aon oc jun conobꞌ tuꞌ yul ja kꞌabꞌ, ẍi ebꞌ tet naj.
12 Jaꞌ jun yakꞌomal servil jix bꞌet awten Micaías tuꞌ, jix yal jaxca tiꞌ:
—Jaꞌ masanil ebꞌ ẍejabꞌ Dios, watxꞌ xacꞌal jix yute kꞌanabꞌ sbꞌa ebꞌ tet naj rey. Yu jun tuꞌ, yuxan chi wal ey jaach, quey ojabꞌ tuꞌ oj yun ja walon jaxca chi yun yalon ebꞌ tuꞌ, watxꞌ cꞌal oj yun ja waloni, ẍi naj.
13 Jix takꞌwi naj Micaías, jix yalon jaxca tiꞌ:
—Chi wakꞌ jin tiꞌ sattaj Jehová, tol asan tzetyetal oj yal jin Diosal ey jin, jaꞌ oj walaꞌ.
14 Jix lawi tuꞌ, jix apni oc sattaj naj rey, jix skꞌanlen naj tet jaxca tiꞌ:
—¿Watxꞌ mi chi kakꞌ jowal yin conobꞌ Ramot yul yet Galaad, ma cꞌamaj? Jix tzꞌaj yalon Micaías tuꞌ jaxca tiꞌ:
—Chi skeꞌ ja wakꞌon jowal yin, tucꞌaltaꞌ oj eyqꞌuey ja wu, yutol oj ale oc yul ja kꞌabꞌ, ẍi naj.
15 Catuꞌ jix takꞌwi naj rey jaxca tiꞌ:
—¿Jayel tocꞌal oj wal ey jaach tol cha wakꞌcan ja tiꞌ ja walon junoj kꞌane tol yel ey jin, yet cha walon chejbꞌanile chi yal Jehová ey jin? ẍi naj.
16 Jix lawi tuꞌ, jix yalon naj Micaías jaxca tiꞌ:
Jix wil masanil ebꞌ Israel, tuxa cꞌal jix sajlem cantoj ebꞌ bꞌey txꞌotxꞌ tzalquiltaj txꞌotxꞌ jaxca noꞌ meꞌ tol cꞌam yilomal, yuxan jix yal Jehová ey jin jaxca tiꞌ: Jaꞌ ebꞌ tiꞌ cꞌamxa mactxequel chi ijbꞌan ebꞌ; junjun xacꞌal ebꞌ jix meltzotoj bꞌey sna, ẍi Jehová, ẍi naj Micaías.
17 Yuxan jix yal pax naj sreyal Israel tet Josafat jaxca tiꞌ:
—Ilaꞌ wal jix wal ey jaach, tol jaꞌ jun winaj tiꞌ cꞌam cꞌal bꞌey chi yal junoj spajtzebꞌal watxꞌ kꞌane ey jin, asan cꞌaltaꞌ junoj kꞌane cꞌam yeloc apnoj chi yalaꞌ, ẍi tet naj.
18 Jix yalon wal naj Micaías tet jaxca tiꞌ. Abꞌwej wal yalon skꞌane Jehová xin. Jix wilaꞌ tol chotan ey Naj yul sdespacho; masanil ebꞌ ángel bꞌey satcan linan oc ebꞌ bꞌey swatxꞌ kꞌabꞌ cꞌal bꞌey skꞌexan kꞌabꞌ. 19 Jaxa Jehová jix yakꞌ skꞌanlebꞌal jaxca tiꞌ: ¿Mactxequel chi too iptzen naj Ahab, sreyal Israel, yet chi oc yakꞌon jowal yin conobꞌ Ramot, yet chi cam naj tituꞌ? ẍi Jehová. Txꞌoj tzet chi yal wan ebꞌ, txꞌoj pax tzet chi yal wanxa ebꞌ. 20 Jaxa jix yunne ey jun espíritu jix oc sattaj Jehová, jix yaloni tol jaꞌ chi too akꞌon yunne. Jix skꞌanlen Jehová tet yu tzet oj yute. 21 Jix yalon jun espíritu tuꞌ, tol masanil ebꞌ yakꞌomal servil tuꞌ, oj yakꞌ lekꞌtiꞌal ebꞌ tet naj rey. Jix yalon Jehová jaxca tiꞌ: Oj ton skeꞌ ja wu jaxca tuꞌ, asiꞌ, ẍi Jehová tet. 22 Jaꞌ tinaniꞌ xin, ja wotajxa tol jaꞌ Jehová jix chaꞌontej jun espíritu lekꞌtiꞌ yin ebꞌ naj ja wakꞌomal servil tuꞌ, queytuꞌ oj yun stit can ja wibꞌan, ẍi naj Micaías tet naj.
23 Jix sjitzontej sbꞌa naj Sedequías, scꞌaal Quenaaná scꞌatan naj Micaías, catuꞌ jix makꞌletoj sat yu naj, jix yalon jaxca tiꞌ:
—¿Tzet jix yun yel Yespíritu Jehová win yet chi to kꞌanabꞌ ey jaach? ẍi naj.
24 Jix takꞌwi naj Micaías tet jaxca tiꞌ:
—Oj ja naꞌtej jun tiꞌ yet jun cꞌual tuꞌ, yet tuxa cꞌal oj jaach ecꞌ ja sey bꞌey watxꞌ oj ja wewbꞌa el ja bꞌa xol jowal tuꞌ.
25 Jix yalon naj sreyal Israel jaxca tiꞌ:
—Mitxꞌwej ey naj Micaías tiꞌ, che yiꞌontoj tet Amón naj eyoc syaawiloj conobꞌ tuꞌ, cꞌal sattaj naj jin cꞌaal Joás. 26 Che yaloni tol jain chi walaꞌ tol chi oc naj preso; niẍtej chꞌan chi yun yakꞌle sloꞌbꞌe naj, cꞌal jaꞌ chi akꞌle tet naj, masantaꞌcꞌal chin meltzotej yin tzalacꞌulalil yin jun jowal bꞌey chin too tuꞌ an, ẍi naj.
27 Jix yalon jayebꞌ xa kꞌane naj Micaías jaxca tiꞌ:
Ta tol oj jaach meltzo yin tzalacꞌulal bꞌey chach too tuꞌ, tol manaj Jehová chi alon ey jin chi yal tuꞌ, ẍi tet naj. Jix yalon cꞌal pax naj tet masanil ebꞌ conobꞌ jaxca tiꞌ: Abꞌwej je masanil jex conobꞌ, naꞌan ojabꞌ je yu jun kꞌane chi wal can tiꞌ an.
28 Queytuꞌ jix yun stoo naj sreyal Israel, cꞌal naj Josafat sreyal Judá yin jowal yin conobꞌ Ramot yul yet Galaad. 29 Jix yalon naj sreyal Israel tet naj Josafat jaxca tiꞌ:
—Jaꞌ yet oj jin oc xol jowal tuꞌ, oj jin qꞌuexel jin pichil; jal jaach pax jaach tiꞌ xin, ey ojabꞌ cꞌal oc ja pichil yet ja reyal tuꞌ, ẍi tet jun yet reyal tuꞌ.
Yuxan jix sqꞌuexel spichil naj sreyal Israel tuꞌ, catuꞌ jix too ebꞌ scawanil yin jowal tuꞌ. 30 Jaxa naj sreyal Siria, tuxa jix yal naj tet ebꞌ capitán yeoc yin carruaje yet jowal, tol cꞌam chi yakꞌ jowal ebꞌ yin junojxa mactxequel, tol asanne yin naj sreyal Israel. 31 Jaꞌ yet jix yilon naj Josafat ebꞌ capitán tuꞌ, jix snaꞌ ebꞌ tol jaꞌ naj sreyal Israel tuꞌ, yuxan jix sjoyon oc sbꞌa ebꞌ yin, yet chi yakꞌon jowal ebꞌ yetoj chi yute yaloni. Jaxa ya yaw naj Josafat yu skꞌanon scolwal Jehová, catuꞌ jix col-le el naj yu Dios. Jix iꞌle el ebꞌ capitán tuꞌ yin naj. 32 Jaꞌ yet jix yilon ebꞌ tol manaj naj sreyal Israel tuꞌ, jix sbꞌejon ebꞌ yakꞌon jowal yin. 33 Jaxa jix yunne, ey jun soldado comon cꞌal jix julwa yetoj sjulbꞌal, palan cꞌal yasi naj sreyal Israel tuꞌ. Jaꞌ bꞌey chi snubꞌle sbꞌa chꞌen spichil naj rey tuꞌ, jatuꞌ jix low jun julbꞌal tuꞌ. Jaxa yalon naj tet mactxequel chi iꞌon bꞌey scarruaje tuꞌ jaxca tiꞌ:
—Iꞌ meltzo jin carruaje tiꞌ, chin ja wiꞌon el xol jowal tiꞌ, yutol caw miman jix yun jin yasitoj, ẍi tet naj.
34 Caw jow jix yun yoc jowal yet jun cꞌual tuꞌ, jix tocꞌal stecꞌbꞌa sbꞌa naj sreyal Israel yoc linan sattaj ebꞌ Sirio bꞌey yul scarruaje tuꞌ, masantaꞌcꞌal yet jix ey cꞌu. Jaxa yet jix too xacꞌal cꞌu xin, jix cam naj.